‘ভিক্সিৎ ভারত@ 2047: তিম ইন্দিয়াগী থৌদাং’ হায়বা থিমদা মে ২৭,২০২৩দা নিউ দিল্লিগী প্রগাতি মৈদান্দা লৈবা নিউ কনভেন্সন সেন্তরদা নিতি অয়োগনা শীন্দুনা ৮শুবা গভর্নর কাউন্সিল মীফম পাংথোক্লগনি।

নোংম চুপ্না পাংথোক্কদৌরিবা মীফম অদুদা থিম ৮দা খন্ন-নৈনগনি, থিমশিং অদুদি (১) ভিক্সিৎ ভারত@ 2047, (২) এম.এস.এম.ই চাউখৎহনবা, (৩) ইনফ্রস্ত্রকচর অমসুং ইনভেস্তমেন্ত, (৪) চৎন-কাংলোনশিং মশিং হন্থহনবা, (৫) নুপীশিংদা শক্তি পীবা. (৬) হকশেল অমসুং মচি ওইবা চীঞ্জাক, (৭) স্কিল দিবলপমেন্ত, (৮) চাউখৎ-থৌরাং অমসুং সোসিএল ইনফ্রাস্ত্রকচরগী গাতি শক্তিনি।

মীফম অদুদা রাজ্যশিংগী চীফ মিনিস্তরশিং, য়ু.তিশিংগী লেপ্তনেন্ত গভর্নরশিং, এক্স-ওফিসিও মেম্বরশিং ওইবা য়ুনিয়ন মিনিস্তরশিং, নিতি অয়োগকী ভাইস চিয়ারমেন অমসুং মেম্বরশিং শরুক য়াগনি। নিতি অয়োগকী চিয়ারমেন ওইনা, প্রধান মন্ত্রীনা মীফম অদুগী মপু ওইগনি।

৮শুবা গভর্নর কাউন্সিল মীফমগী শেম-শাবা ওইনা, জনুৱারি ২০২৩দা ২শুবা চীফ সেক্রেতরিশিংগী মীফম পাংথোক্তুনা থিমশিং খন্ন-নৈনখ্রে। মীফম অদুদা হিরম কয়াগী অখঙ-অহৈশিং শরুক য়াগনি। প্রধান মন্ত্রী শরুক য়াখিবা ২শুবা চীফ সেক্রেতেরিশিংগী মীফমদা ভারত সরকারগী খনগৎলবা সেক্রেতেরিশিং অমসুং রাজ্যশিং/য়ু.তিশিংগী চীফ সেক্রেতেরিশিং শরুক য়াখি অমসুং থিমশিংগী খ্বাইদগী ফবা থবকশিং অমসুং থৌশিলশিং খন্নখি।

মালেমদা খ্বাইদগী চাউবা মঙাশুবা ইকোনোমি ওইনা অমসুং মীশিং খ্বাইদগী য়াম্বা লৈবাক ওইনা, ভারত শেন-থুম চাউখৎপগী লম্বীদা চৎলি অমসুং মসিনা মথং চহি ২৫দা লৈবাক অসিগী পান্দম ফংনবা হোৎনগনি। হিরম অসিগী মতাংদা, ২০৪৭ ফাওবগী মনুংদা চাউখৎলবা ভারত অমা ওইনবা লম্বী শেম্নবা তিম ইন্দিয়া ওইনা কেন্দ্র অমসুং রাজ্য পুন্না থবক তৌমিন্ননবা লম্বী অমা শেম্নবা ৮শুবা গভর্নর কাউন্সিল মীফম্না খুদোংচাবা অমা পীরগনি। মীফম অসিনা মালেমগী থাক্তা অমসুং ভারতকী খুন্নাই অমসুং শেন্মিৎলোন চাউখৎপদা অমসুং অওনবা পুরকপদা মরুওইবা থৌদাং অমা লৌগনি।

ভারতনা জি-২০গী প্রসিদেন্ত ওইরিবা অসিগী শরুক অমা ওইনা ৮শুবা গভর্নর কাউন্সিল মীফমশু পাংথোক্লি। ভারতকী জি-২০গী পান্দম ‘মালেম অমা, ইমুং অমা, তুংলমচৎ অমা’ না লৈবাক অসিগী সভেত্যগী গুনশিং ফোঙদোকলি। চাউখৎপগী পান্দম অসি ফংনবা হোৎনবদা সেন্তর অমসুং রাজ্যশিংনা শিঙথানিঙাই ওইবা থৌদাং অমা লৌরি।

ভারত চাউখৎপা হায়বসি রাজ্যশিং চাউখৎপগা অচেৎপা মরী লৈনৈ। ৭৬শুবা নিংতম্বা নুমিৎতা প্রধান মন্ত্রীনা পীখিবা মহাক্কী ৱারোলদা হায়খি, “ঐখোয়গী রাজ্যশিং চাউখৎপা মতমদা, ভারত চাউখৎলি”। মসি মথং ক্বাতর সেঞ্চুরিদা ভারতকী অপুনবা চাউখৎপা অমসুং তুংগী পান্দমগী লমজিং মৈরা ওইগনি। মসিগী পান্দম অসি ফংনবা সেন্তর অমসুং রাজ্যশিং মতেং পাংনবা হেনগৎহন্দুনা ‘ভিক্সিৎ ভারত@ 2047 গী পান্দম ফংনবা হোৎনবদা ৮শুবা গভর্নর কাউন্সিল মীফম্না মফম অমা পীরগনি।

**********