শক্নাইরবশিং,

অহানবদা, জি-২০ মীফম মাইপাক্না শীনবগীদমক ঐনা ইকায়খুম্নরবা জপানগী প্রধান মন্ত্রী কিসিদা থাগৎচরি। মালেমগী ওইনা চীঞ্জাক ৱাৎতনবা হিরমদা মীফম অসিদা ঐগী পাউতাক খর মফম অসিদা থমজরি:

অপুনবা ওইনা পায়খৎলিবা চীঞ্জাকশিং ফংহন্নবা থবকশিংনা মালেমদা খ্বাইদগী তোল্লবা মীওইশিং মরুওইনা লায়রবা লৌমীশিংদা মীৎয়েং চঙগদবনি। মালেমগী হার ফংহন্নবা লৈরিবা থৌরাংশিং মপাঙ্গল কনখৎহনগদবনি। হায়রিবা থবকশিং অসিদা পীরিবা রাজনিতিগী খুরৌশিং থাংবশিং লৌথোক্কদবনি। হারশিং পোৎথোকশিং পাইশিন্নবা হোৎনরিবা ৱাখল্লোনশিং য়েংশিনগদবনি। মসি ঐখোয় মশেল মতেং পাংনবগী পান্দম ওইগদবনি।

হারশিংগী মহুৎশীন্নবা ঐখোয়না মালেম শীনবা থুংনা মহৌশাগী লৌউ-পথাপকী অনৌবা নমুনা অমা শেম্লে। মালেমদা লৈরিবা লৌমী খুদিংমক দিজিতেল তেক্নোলোজিগী কান্নবশিং ফংহনগনি হায়না ঐনা থাজবা থম্লি। ওর্গনিক চীঞ্জাকশিং ফেসন অমসুং ললোন-ইতিক্তগী তোখাইনা থম্নবা অমসুং মসি হকচাং ফবা অমসুং মচি ওইবা চীঞ্জাক্কা মরী লৈনহন্নবা ঐখোয়না থবক পায়খৎলি।

২০২৩ অসি মালেমগী মিল্লেতশিংগী চহি ওইনা য়ু.এন্না লাউথোক্লে। মিল্লেতশিংনা মচি ওইবা চীঞ্জাক ফংদবগী অৱাবা, অইং-অশাগী ফিবম হোংলকপা, ঈশিং লীক্না শীজিন্নবা অমসুং চীঞ্জাক ৱাৎতনবগী মতাংদা মায়োক্নরিবা খুদোংচাদবশিং কোকহল্লে। মসিগী হিরম অসিদা মীয়াম ৱাখল তাহনগদবনি। চীঞ্জাক মাঙহনবা থিংবা অসি ঐখোয়গী অপুনবা থৌদাং ওইগদবনি। মসি মালেমগী ওইনা চীঞ্জাক ৱাৎহন্দনবা তঙাইফদবনি।

শক্নাইরবশিং,

মীওইবনা মতেং পাংনবদা কোবিদনা অচৌবা শিংবা অমা ওইহল্লে। তিকাশিং অমসুং হিদাক-লাংথকশিং ফংহনবা অসি মীওইবগী য়াইফনবা তৌবদগী রাজনিতিনা হেন্না লুম্না লৌরে। হকশেলগী খুদোংচাবশিং ফংহনবা হায়বসি তুংগী তঙাইফদবা অমনি। হিরম অসিগী মতাংদা ঐগী পাউতাক খর থমজরি:

খুদোংচাদবা খুদিংমক থেংনবা ঙম্বা অনা-লায়য়েংগী থবকশিং শেমগৎপা হায়বসি ঐখোয়না মরুওইনা লৌরি। অফবা অনা-লায়য়েংগী থবক অসি ঐখোয়গী পান্দম্নি। মমাঙঙৈগী হিদাক-লাংথক্কী লমদা অপুনবা ওইনা থিজিনবা অসি ঐখোয়গী পান্দম্নি।

মালেম অমা-হকশেল অমা হায়বসি ঐখোয়গী পান্দম্নি অমসুং মীওই খুদিংমক দিজিতেল হেল্থ, য়ুনিভর্সেল হেল্থনা কোনশিনবা হায়বসি ঐখোয়গী পান্দমনি।

মীওইবগী সেবা তৌনবা দোক্তরশিং অমসুং নর্সশিং মরাং কাইহনবা হায়বসি ঐখোয়না মরুওইনা লৌরি।

শক্নাইরবশিং,

চাউখৎপগী লম্বী শেম্নবা চাউখৎপগী নমুনা শেমগদবনি অমসুং চাউখৎলক্লিবা লৈবাকশিংগী চাউখৎপদা অপনবা পীরোইদবনি হায়বা ঐনা থাজৈ। কঞ্জুমরিজমদা য়ুম্ফম ওইবা চাউখৎপগী নমুনা হোংদোক্কদবনি। মহৌশাগী লনশিং নিংথিনা শীজিন্নবদা মীৎয়েং চঙগদবনি। মীওই খুদিংমক তেক্নোলোজিগী কান্নবা ফংহনবা অসি মরুওই। তেক্নোলোজিনা চাউখৎপা অমসুং গনতন্ত্রগী মরক্তা থোং ওইগদবনি।

শক্নাইরবশিং,

ঙসিদি নুপী চাউখৎহনবা হায়বসি ভারত্তা খন্ননবা হিরম অমা ওইদ্রে, মরমদি ঙসি ঐখোয় নুপীনা লমজিংবা চাউখৎপগী লুচিংবা ওইরে। ভারতকী রাস্ত্রপতি অসি ত্রাইবেলগী মফমদগী লাকপা নুপীনি। লোকেল বোদিশিংদা নুপীশিংগী সিত চাদা ৩৩ খাক্তুনা থম্লে। ত্রান্সজেন্দর মীওইশিগী হকশিং ফংনবা ঐখোয়না আইনশিং শেম্লে। ভারত্তা ত্রান্সজেন্দর মীওইশিংনা মপুংফানা থবক তৌবা রেলৱে স্তেসন অমা লৈরে হায়বা খঙবদা অদোম হরাওগনি।

শক্নাইরবশিং,

ঙসি ঐখোয়না খন্নরিবশিং অসিনা জি-২০ অমসুং জি-৭গী এজেন্দাশিংগী মরক্তা মরুওইবা লিঙ্ক অমা শেম্বদা অমসুং গ্লোবেল সাউথকী অনিংবশিং অমসুং থাজবশিং ফংহনবদা কান্নগনি হায়না ঐনা থাজৈ।

অদোম থাগৎচরি।

***