এক্সেলেন্সিজ, ইকায়খুম্নরবা মীথুংশিং অমদি দেলিগেৎশিং, খুরুমজরি!

জিনেভাদা পাঙথোক্লিবা ৱর্ল্দ হেল্থ এসেমব্লীগী ৭৬শুবা সেসন অসিদা মীপুম খুদিংমকপু তরাম্না ওকচরি‍। ঐনা দব্লিউ.ঐচ.ও.গী মফমদা মালেমগী থৌগল তৌরকপা চহি ৭৫ মপুং ফারকপগী পুৱারী ওইবা পন্দোল ফংলকপদা নুংঙাইবা ফোঙদোকচরি‍। দব্লিউ.ঐচ.ও.না মাগী থৌগলগী চহি ১০০ মপুং ফারকপা মতমদা লৈগদবা ফীভমদুগীদমক লাক্কদৌরিবা চহি ২৫সিগী পান্দমশিং শেমদুনা থম্লম্লগনি হায়না ঐনা থাজৈ‍।

মরূপশিং,

কোবিদ-১৯ লাইচৎনা ঐখোয়দা হকশেলগী লমদা হেন্না পাক চাউনা খুৎশম্ননা চৎমিন্নবগী মথৌ তাবা উহনখ্রে‍। লাইচৎ অসিনা মালেমগী হকশেলগী আর্কিতেকচরদা লৈরিবা অহোবশিং পুথোরকখি‍। খাঙবা কনবা মালেমগী সিস্তেম অমা শেমগৎপদা পুন্না হোৎনমিন্নবা চঙই‍।

মরূপশিং,

লাইচৎ অসিনা মালেমগী হেল্থ ইকুইতীী ফীভম ফগৎহনবগী মথৌ তাবসু পুথোরকখি‍। লাংফমগী মতমদা ভারতনা মালেমগী ওইনা তেংবাংনবদা লৈরিবা মাগী খোঙফম উৎখি‍। ঐখোয়না লৈবাক ১০০ হেনবদা দোজ মিলিয়ন ৩০০ লোম থাখি‍। হায়রিবা লৈবাকশিংসিগী মনুংদা কয়া অমদি গ্লোবেল সাউথতগীনি‍। লাক্কদৌরিবা চহিশিংদা রিসোর্সশিংদা মান্নবা এক্সেস ফংহনবগী লমদা ঙাক্লৌ পীবনা দব্লিউ.ঐচ.ও.গী খ্বায়দগী মরুওইবা প্রাইওরিতী ওইগনি হায়না ঐনা থাজৈ‍।

মরূপশিং,

ভারতকী চৎনরকপা ৱাখল লৌশিংনা হায়রি মদুদি লায়না লৈতবা হায়বসিগা মশা মউ ফবগা মান্নদে‍। ঐখোয় লায়না লৈহন্দনবখক হোৎনবগী মহুত্তা মশা মউ ফনা লৈনবগী মায়কৈদসু খোঙথাঙ অমা থাংজিনগদবনি‍। য়োগ, অয়ুর্বেদ অমদি হীরী কোনবনচিংবা হান্নদগী চৎনরকপা থৌওংশিংনা হকশেলগী লমদা হকচাঙগী, পুক্নিংগী অমদি খুন্নাইগী ওইবা ৱাফমশিংগী ৱাখৈ পুরকই‍। দব্লিউ.ঐচ.ও.গী অহানবা গ্লোবেল সেন্তর ফোর ত্রেদিস্নেল মেদিসিন ভারত্তা লিংখৎলিবসিদা ঐ নুংঙাইবা ফাওই‍। চনানগী মরুওইবশিং মীয়ামদা পাক শন্না খঙহনবদসু ইন্তরনেস্নেল ইয়র ওফ মিল্লেতনা মরুওইবা শক্লোন অমা লৌরিবসিদু ঐহাক্না নুংঙাইবা পোকই‍।

মরূপশিং,

ভারকী অরিবা খুৎইশিংনা মালেম অসিবু ইমুং অমগুম উননবা ঐখোয়দা তম্বিরি - বসুদৈব কুতুম্বকম‍। চহি অসিগী ঐখোয়গী জি২০ প্রেসিদেন্সী মনুংসিদা ঐখোয়না “মালেম অমা, ইমুং অমা, তুংলমচৎ অমা” হায়রিবা থীম অসিগা লোয়ননা থবক পায়খৎলি‍। ঐখোয়না হকচাঙ ফবগী লমদা মঙলিবা মঙলান্দি ‘মালেম অমা হকশেল অমা’ হায়বসিনি‍। ঐখোয়গী ইকোসিস্তেম পুম্বা মশা মউ ফরবা মতমদা ঐখোয়না মশা মউ ফনা লৈবা ঙমগদৌরিবনি‍। ঐখোয়গী মঙলান অসি মীওইবখক্তদা লোইদে‍। মসিনা শা-উচেক, উপাল ৱাপাল অমদি অকোয়বগী ফীভম য়াওনা ইকোসিস্তেম পুম্ববু কোনশিল্লি‍।

মরূপশিং,

হৌখিবা চহি খরসিদা ভারতনা হেল্থকেয়রগী এভাইলেবিলিতী, এক্সেসিবিলিতী অমদি এফোর্দেবিলিতীগী মতাঙদা থবক পায়খত্তুনা লাক্লি‍। মালেমগী খ্বায়দগী চাউবা হেল্থ ইন্স্যুরেন্স স্কীম – অয়ুস্মান ভারতপু ওইরবসু, নৎত্রগা হকশেলগী ইনফ্রাস্ত্রকচর পাক চাউনা শেমগৎলক্লিবসিবু ওইরবসু, নৎত্রগা লৈবাকসিগী ইমুং মিলিয়ন কয়াদা সেনিতেসন অমদি থক্নবা ঈশিং ফংহন্নবগী থৌরাংনচিংববু ওইরবসু; ঐখোয়না হোৎনরিবা কয়াসিগী মরক্তগী ময়াম অমদি লাস্ত মাইল ফাওবদা হকশেলগী ফীভম ফগৎহন্নবগী পান্দম থম্লি‍। ভারতকী খেন্নবা ফীভমশিং কোনশিন্দুনা চৎলিবা পরম অসিনা অতোপ্পশিংগী চৎন-কাঙলোন অমসু ওইরকপা য়াগনি‍। অসিগুম্বা থৌরাংশিং শেন্থোক য়ামজদবা লৈবাকশিংদা পায়খৎপদা ঐখোয়না দব্লিউ.ঐচ.ও.দা ঙাক্লৌ পীনিংই‍।

মরূপশিং,

পুম্নমক্কী মফমদা হকশেলগী খুদোংচাবা ফংহন্নবগীদমক চহি ৭৫ চুপ্না থবক তৌরকপগীদমক দব্লিউ.ঐচ.ও.বু ঐনা থাগৎচনিংই‍। মাঙলমচত্তা য়াম্না মরুওইবা থৌদাং লৌদুনা লাক্লিবা দব্লিউ.ঐচ.ও.গুম্বা মালেমগী ইনস্তিত্যুসনশিংগী থৌদাং তুংদা লাক্কদৌরিবা শিংনবশিং থেংনবদা হেন্না মরু ওইরক্কনি‍। হেন্না মশা মউ ফবা মালেম অমা শেমগৎনবগী থৌরাং খুদিংমক্তা মতেং পাংননবা ভারতনা খোঙফম চেৎনা লেপ্লি‍। ময়ামবু থাগৎচরি‍‍। ময়ামবু হন্না হন্না থাগৎচরি‍!

*****