প্রধানমন্ত্রীগী লোইশঙ
তোঙান তোঙানবা লৈঙাক্কী দিপার্তমেন্তশিং অমদি ওর্গনাইজেসনশিংদা নৌনা থবক হাপ্লবা মীওইশিংদা ভিদিও কন্ফরেন্সিংগী খুত্থাঙদা রোজগার মেলাগী মখাদা এপোইন্ত মেন্ত লেত্তর ৭১,০০০ য়েন্থোকপগী থৌরমদা প্রধান মন্ত্রীনা পীখিবা ৱারোল
Posted On:
16 MAY 2023 1:25PM by PIB Imphal
খুরুমজরি মরূপশিং,
ঙসি নহা লিশিং ৭০ হেনবনা ভারত লৈঙাক্কী তোঙান তোঙানবা দিপার্তমেনতশিংদা লৈঙাক্কী থবক ফংবগী এপোইন্তমেন্ত লেত্তর ফংলি। অদোম পুম্নমক্না মায় পাকপা অসি কন্না হোৎনদুনা ফংলক্লিবনি। ঐনা অদোম অমদি অদোমগী ইমুং মনুংশিংগী মফমদা নুংঙাইবা ফোঙদোকচরি অমদি য়াইফ-পাউজেল পীজরি। নুমিৎ খরনিগী মমাঙদা গুজরাত্তাসু মতৌ অসুম্না নহা লিশিং কয়াদা থবক পীনবগী রোজগার মেলা পাঙথোকখি। থা অসিদা অসামদসু রোজগার মেলা পাঙথোকখি। ভারত লৈঙাক্না অমদি বি.জে.পি.না লৈঙাকপা স্তেতকী লৈঙাকশংনা মতৌ অসুম্না রোজগার মেলা পাঙথোক্তুনা নহাশিংগীদমক ঐখোয়না লেপ্লিবা খোঙফম অসিবু উৎলি।
মরূপশিং,
হৌখিবা চহি ৯ অসিদা ভারত লৈঙাক্না লৈঙাক্কী থবক লৌবগী খোঙজেল য়াঙশিলহন্নবা, অরোন অথুপ লৈহন্দনবা অমদি মীচঙ মীখায় নাইবগী ফীভম লৈহন্দনবা মায়কৈদা মরুওইবা মীৎয়েঙ চঙদুনা লাক্লি। অহানবদা, স্তাফ সেলেক্সন বোর্দকী খুত্থাঙদা থবক লৌবগী থৌওং চাউরাক্না থা ১৫ দগী ১৮ লোম হায়বদি চহি অমা মখায়রোম চঙলম্মী। ঙসিদি হায়রিবা থৌওং অসি থা তরুক্তগী নিপান ফাওবগী মনুংদা লোইশিল্লে। মমাঙদদি লৈঙাক্কী থবক্কী চে থাবদা ফাওবা য়াম্না ৱারম্মী, এপ্লিকেসন ফোর্ম অমা লৌনবা হোৎনবদা পুং কয়া লাইন্দা লেপ্নরম্মী, চে-চাংশিং এতেস্ত তৌনবগীদমক গেজেতেদ ওফিসরশিং থিবা তারম্মি, অদুগা এপ্লিকেসন অদু পোস্তকী খুত্থাঙদা থারম্মি। অদুগা হায়রিবা এপ্লিকেসন অদু মতম চানা য়ৌরিবরা নৎত্রগা য়ৌদ্রিবরা, য়ৌফম থোকপা মফমদুদা য়ৌরিবরা হায়বসু খঙলমদে। ঙসিদি চে থাজিনবদগী মহৈ লাকপা ফাওবগী থৌওং পুম্বা ওন্লাইন্দা ওইরে। ঙসিদি দোকুমেন্তশিং সেল্ফ এতেস্ত তৌবসু য়ারে। গ্রুপ-সি অমদি গ্রুপ-দি গী ফমশিংগী থবক লৌবদা ইন্তরভিউ লৈহন্দ্রে। হায়রিবা থৌরাং কয়া অসিগী খ্বায়দগী চাউনা কান্নবদি শেঞ্জা থুমজা অমদি খঙন-চান্নবা ইমুং মনুংগী য়েংলগা থবক হাপ্পগী থৌওং মাঙখ্রে।
মরূপশিং,
ঙসিগী নুমিৎ অসি অতোপ্পা মরম অমগীদমক্তসু য়াম্না মরু ওইবা নুমিৎ অমনি। চহি ৯গী মমাঙদা ঙসিগী নুমিৎ অসিমক্তদা মো ১৬তা লোক সভাগী মীখলগী মহৈ লাউথোকখি। মতমদুদা লৈবাক পুম্বা থৌনা, মঙলান অমদি থাজবা অমগা লোয়ননা হরাও মথোয় কানখি। পুম্নমক্কা লোয়ননা পুম্নমক চাওখৎমিন্নবগী লাইৱা তুংইন্না খোঙ থাংজিনবা ভারতনা ঙসিদি চাওখৎপা ভারত ওইহন্নবগীদমক হোৎনরি। চহি ৯গী মমাঙদা মে ১৬তা লোক সভাগী মীখলগী মহৈ লাউথোকখিবগুম,, ঙসিসু অদুগুম্লবা মরুওইবা নুমিৎ অমা ওইরি। ঙসি অসি ঐখোয়গী মরুওইবা য়ুনিৎ অমা ওইরিবা হিমালয়গী মতম্বাক্তা লৈরিবা সিক্কিমগী য়ুনিৎ হৌদোকখিবা নুমিৎসু তারি।
মরূপশিং,
হৌখিবা চহি ৯ অসিদা, থবক পীননবগী অনৌবা খুদোংচাবশিং মাঙদা থমদুনা লৈঙাক্না অনৌবা থৌরাং থৌশিল কয়া পায়খৎখি। মতমগা চুনবা ইনফ্রাস্ত্রকচর শেমগৎপবু ওইরমসু, খুঙ্গং চাওখৎহনববু ওইরবসু, নৎত্রগা পুন্সিগা মরী লৈনবা খুদোংচাবশিং ফংহনববু ওইরবসু, ভারত লৈঙাক্না স্কীম খুদিং, থৌশিল খুদিংদা নহাশিংদা থবক পীননবগী অনৌবা খুদোংচাবশিং শেম্লি।
মরূপশিং,
হৌখিবা চহি ৯ অসিদা তঙায় ফদবকা খুদোংচাবশিং ফংহন্নবগীদমক ভারত লৈঙাক্না কেপিতেল এক্সপেন্দিচরদা চাউরাক্না লুপা করোর লাখ ৩৪রোম চাদিং তৌখি। চহিসিগী বজেত্তসু কেপিতেল এক্সপেন্দিচরগীদমক লুপা করোর লাখ ১০ থাক্তুনা থম্লি। শেনফম অসিনা লৈবাকসিদা অনৌবা হায়ৱে, অনৌবা এয়রপোর্ত, অনৌবা রেল লম্বী, অনৌবা থোংনচিংবা মশিং থিঙমদ্রবা মতমগা চুনবা ইনফ্রাস্ত্রকচরশিং শেমগৎপনা লৈবাকসিদা থবক লাখ কয়া পীগনি। ঙসি ভারতনা থবক তৌরিবা খোঙজেল অমদি পাক চাউবা অসিসু নীংতম্বগী চহি ৭৫ শুরকপগী পুৱারীদা অঙকপা মওংদা পায়খৎলিবনি। চহি ৭০দা ভারতনা রেল লাইন শুপ্নগী কিলোমিতর লিশিং ২০ ইলেক্ত্রিফিকেসন তৌই। অদুগা ঐখোয়গী লৈঙাক্না হৌখিবা চহি ৯ অসিদা চাউরাক্না কিলোমিতর লিশিং ৪০ রোম ইলেক্ত্রিফিকেসন তৌখ্রে, হায়বদি শরুক অনিরোম তৌখ্রে। ২০১৪গী মমাঙদা ঐখোয়গী লৈবাকসিদা থাদা অনৌবা মেত্রো লাইইন শুপ্নতগী মিতর ৬০০ লোমখক্তমক থারম্মি। ঙসিদি থাদা কিলোমিতর লিশিং ৬কী চাংদা থারি, মতমদুদা মিতরগী হিসাবতনি অদুগা হৌজিক্না কিলোমিতরগী হিসাবতনি।২০১৪গী মমাঙদা লৈবাকসিদা কিলোমিতর লাখ ৪ য়ৌদনা খুঙ্গংগী লম্বী শেমলম্মি। ঙসিনা লৈবাকসিদা খুঙ্গংগী লম্বী কিলোমিতর লাখ তরেৎলোমগী চাংদা লম্বী শেম্লি। মসিসু চাউরাক্না শরুক অনিগুম্বনি। ২০১৪গী মমাঙদা শুপ্নতগী এয়রপোর্ত ৭৪ খক লৈরম্মি। ঙসিদি লৈবাকসিদা এয়রপোর্ত মশিং ১৫০গী ময়াদা য়ৌরে। মসিসু শরুক অনিনি। হৌখিবা চহি ৯ অসিদা লৈবাকসিগী লায়রবশিংগী পক্কাগী য়ুম করোর ৪ শাখ্রে, মদুনসু থবক কয়া অমা পীরি। খুঙ্গং-খুঙ্গংশিংদা হাংদোক্লিবা কম্মন সর্ভিস সেন্তর লাখ ৫ অসিনা ঙসিদি থবক পীনবগী অচৌবা পাম্বৈ অমা ওইরি, নহাশিংবু খুঙ্গংগী থাক্তা ওন্ত্রপ্রিন্যুরশিং ওইহল্লি। খুঙ্গংশিংদা পঞ্চায়ত ভবন লিশিং ৩০ হেন্না শারিবা, য়ুম করোর ৯ লোমদা ঈশিংগী কন্নেক্সন পীরিবা পুম্নমক অসিনা মশিং য়াম্লবা থবক পীরিবনি। লৈবাকসিদা মপান লৈবাক্তগী থাদরক্লিবা শেলবু ওইরবসু নৎত্রগা ভারত্তগী রেকোর্দ ওইনা মপান্দা পোৎ থাদোক্লিবা, পুম্নমক অসিনসু লৈবাকসিগী কাচিন কোয়া থুংনা থবক্কী খুদোংচাবশিং শেম্লি।
মরূপশিং,
হৌখিবা চহি ৯ অসিদা থবক্কী মওংদসু খোঙজেল য়াঙনা হোংলক্লি। হোংলক্লিবা ফীভমশিং অসিদা নহাশিংগী অনৌবা সেক্তরশিং থোরক্লি। কেন্দ্র লৈঙাক্না হায়রিবা অনৌবা সেক্তরশিং অসিদসু লেপ্পা লৈতনা ঙাক্লৌ পীদুনা লাক্লি। হৌখিবা চহি ৯ অসিদা লৈবাকসিদা স্তার্ত অপকী অনৌবা য়াওল অমা উবা ফংলি। ২০১৪দা লৈবাকসিদা স্তার্ত অপ লৈরম্মি, অদুগা হায়রিবা মশিং অসি ঙসিদি স্তার্ত অপ লাখ অমা য়ৌরে। হায়রিবা স্তার্ত অপশিং অসিনা য়ামদ্রবদা লাখ ১০দা থবক পীরি হায়না পানরি।
মরূপশিং,
হৌখিবা চহি ৯ অসিদা লৈবাকসিদা কেব এগ্রিগেতর হায়বদি এপকী খুত্থাঙদা তেক্সী ৱায়বনা ভারতকী ময়োল্লমশিংদা অনৌবা পুন্সিগী লম্বী অমা ওইরক্লি। হৌখিবা চহি ৯ অসিদা ওনলাইন দেলিভরীগী অনৌবা সিস্তেম অমা শেমগত্তুনা নহা লাখ কয়াদা থবক পীরি। হায়রিবা চহি ৯ অসিদা দ্রোন সেক্তরদসু অনৌবা পন্দোল লোম্লি। হার চাইবদগী হৌরগা হিদাক লাংথক সপ্লাই তৌবা ফাওবদা দ্রোন শীজিন্নরি। হৌখিবা চহি ৯ অসিদা সিতী গ্যাস দিস্ত্রিব্যুসন সিস্তেম ময়োল্লম ৬০দা লৈরম্বদগী ময়োল্লম ৬০০ হেনবদা য়ৌখ্রে।
মরূপশিং,
হৌখিবা চহি ৯ অসিদা ভারত লৈঙাক্না মুদ্রা য়োজনাগী মখাদা লুপা করোর লাখ ২৩ লৈবাকসিগী নহাশিংদা ফংহল্লি। শেনফম অসিনা কনাগুম্বা অমনা অনৌবা করবার হৌদোক্নরি, কনাগুম্বনা তেক্সী লৈরি, কনাগুম্বনা দুকান হাংদোক্লি। হায়রিবা মশিং অসি লাখকী ৱা নত্তে, ঐ চাউথোক্না হায়বা ঙমগনি মদুগী মখোয়গী মশিং অসি করোরগী খুজিংদনি। চাউরাক্না মীওই করোর ৮ দগী ৯ ফাওবনা মুদ্রা য়োজনাগী মতেঙগা লোয়ননা অহানবা ওইনা মখোয়গী মনিং তম্বা থবক পায়খৎনরি। ঙসি পায়খৎলিবা আত্মনিরভর ভারত অসিগী মখাদা লৈবাকসিগী মেনুফেকচরিংগী খুত্থাঙদা থবক কয়া অমা পীরি। পি.এল.আই. স্কীমগী মখাদা কেন্দ্র লৈঙাক্না মেনুফেকচরিংগী লমদা চাউরাক্না লুপা করোর লাখ ২গী মতেঙ পীরি। হায়রিবা শেনফম অসিনা ভারতপু মালেমগী মেনুফেকচরিং হব ওইহনবগা লোয়ননা নহা লাখ কয়াদা থবক পীনবগী মতেঙ ওইনরি।
মরূপশিং,
ভারতকী নহাশিংগী মফমদা তোঙান তোঙানবা সেক্তরশিংদা থবক তৌননবগী স্কিল লৈহনবা য়াম্না মরু ওই। মসিগীদমক লৈবাকসিদা অৱাংবা থাক্কী মফমশিংদা কৌসল বিকাস মফমশিংসু ৱার ফুতিংদা শেমগৎলি। ইং ২০১৪ দগী ২০২২ ফাওবগী মরক্তা চহি খুদিংগী অনৌবা আই.আই.তি. অমা অমদি অনৌবা আই.আই.এম. অমমমগী চাংদা শেমগৎলি। হৌখিবা চহি ৯ অসিদা চয়োলদা য়ুনিভর্সিতী অমমম অমদি নুমিৎ খুদিংগী কলেজ অনি অনিগী চাংদা লিংখৎলি। ঐখোয়গী লৈঙাক লাকত্রিঙৈগী মমাঙদা লৈবাকসিদা য়ুনিভর্সিতী ৭২০ লোম লৈরম্মী, হৌজিক্তি মসিগী মশিং ১১০০ হেন্না লৈরে। দেকেদ তরেৎ অসিদা লৈবাকসিদা এইম্স ৭ খক্তমক লিংখৎলম্মি। হৌখিবা চহি ৯ অসিদা ঐখোয়না অনৌবা এইম্স ১৫ লিংখৎনবগী লমদা খোঙ থাংজিল্লি। মসিদা লায়েংশঙ কয়াদা মখোয়গী সর্ভিস পীবা হৌখ্রে। ২০১৪ ফাওবদা লৈবাক পুম্বদা মেদিকেল কলেজ ৪০০ য়ৌদনা লৈরম্মি। ঙসিদি মশিং ৭০০ লোম শুরে। কলেজ মশিং হেনগৎলকপগা লোয়ননা সীত মশিংসু হেনগৎলক্লিবনি, নহাশিংদা অৱাংবা থাক্কী মহৈ তম্নবগী খুদোংচাবসু হেনগৎলিবনি। ইং ২০১৪গী মমাঙদা লৈবাকসিদা এম.বি.বি.এস. অমদি এম.দি.গী সীত মশিং শুপ্নতগী লিশিং ৮০ রোমখক্তমক লৈরম্মি। হৌজিক্তি এম.বি.বি.এস. অমদি এব.দি. মশিং লাখ ১ লিশিং ৭০ হেন্না লৈরে।
মরূপশিং,
থবক অমা হেক্তগী ইন্দস্ত্রী চাওখৎহনবদা ঐখোয়গী আই.তি.আই.শিংনা মরুওইবা থৌদাং য়ারি। হৌখিবা চহি ৯ অসিদা লৈবাকসিদা চাউরাক্না নুমিৎ খুদিংগী অনৌবা আই.তি.আই. অমমম লিংখৎলি। ঙসিদি লৈবাকসিগী আই.তি.আই. লিশিং ১৫রোম অসিদা লৈবাকসিগী মথৌ তাবগী মতুং ইন্না অনৌবা কোর্সশিং হাপচিল্লি। পি.এম. কৌসল বিকাস য়োজনাগী মখাতা হৌজিক ফাওবদা নহা করোর অমা খরা হেনবদা স্কিল ত্রেনিং পীখ্রে।
মরূপশিং,
লৈঙাক্না হোৎনরিবশিং অসিনা অনৌবা সেক্তর কয়াদা থবক পীবগী অনৌবা খুদোংচাবশিং শেমগৎলি। ঐনা ময়ামগী মফমদা ই.পি.এফ.ও. খুদম অমখক পীজগে। করিগুম্বা ঐখোয়না ইং ২০১৮-১৯ মতুংগী ই.পি.এফ.ও.গী নেত পেরোল য়েংবা মতমদা মীওই করোর মরি মখায়দা ফোর্মেল থবক পীবা ঐখোয়না উবা ফংগনি। ইমপ্লোয়ী প্রোভিদেন্ত ফন্দ ওর্গনাইজেসনগী পেরোল দেতা অসিদগী ভারত্তা ফোর্মেল জোবকী মশিং লেপ্পা লৈতনা হেনগৎলক্লি হায়বা খঙবা ঙম্মি। ফোর্মেল জোব হেনগৎলক্লিবসিগা লোয়ননা লৈবাকসিদা মশানা মশাবু থবক পীজবগী খুদোংচাবসু লেপ্পা লৈতনা হেনগৎলক্লি।
মরূপশিং,
হৌখিবা চয়োল খরসিদা লাক্লিবা পাউশিং অসিনা ভারত্তা ইন্দস্ত্রী অমদি ইনভেস্তমেন্তকী অঙকপা ফংলবা পোজিতিবিতী উৎলি। নুমিৎ খরনিগী মমাঙদা ঐ ৱালমার্তকী সি.ই.ও.গা উনখি। মহাক্না মহাক্কী কম্পেনীনা মথংগী চহি ৩-৪ অসিদা ভারত্তগী লুপা করোর লিশিং ৮০গী পোত্থোক এক্সপোর্ত তৌবা ঙমগনি হায়না থাজবা ফোঙদোক্লম্মি। লোজিস্তিক্স অমদি সপ্লাই চেন সেক্তরদা থবক তৌবা পাম্বা ঐখোয়গী নহাশিংগীদমক্তদি মসি অচৌবা তাঞ্জা অমনি। সিস্কোগী সি.ই.ও.নসু মহাক্না ভারত্তা লাক্লম্বা মতমদা লুপা কর,র লিশিং ৮গী ভারত্তা পুথোকপা পোত্থোকশিং মপান্দা থাদোক্নবগী পান্দমদা থবক পায়খৎলি হায়না ঐঙোন্দা হায়রম্মি। নুমিৎ খরনিগী মমাঙদা এপ্পলগী সি.ই.ও.সু ভারত্তা লাকখি। ভারতকী তরং তরংবা তুংলমচৎ অমদি মরুওইনা মোবাইল মেনুফেকচরিংগী লমদা থাজবা কয়া ফোঙদোক্লম্মি। মালেমগী মমিং লৈরবা সেমিকন্দক্তর কম্পেনী এন.এক্স.পি.গী মকোক থোংবা একজেক্যুতিবশিংগসু ঐগা হন্দক্তা উনখি। মখোয়না ভারতকী সেমিকন্দক্তর ইকোসিস্তেমগী চাওখৎলক্লিবা অমদি মাগী মতিংগী মতাঙদা পোজিতিব ওইবা মতৌ উৎলম্মি। ফোক্সকোন্নসু ভারত্তা পায়খৎপা য়াম্লবা প্রোজেক্তশিংদা লুপা করোর লিশিং কয়া থাদবা হৌখ্রে। লাক্কদৌরিবা চয়োল অমদা মালেমগী অচৌবা কম্পেনীশিংগী সি.ই.ও.শিংগা ঐগা অমুক্কা হন্না উনগদৌরি। মখোয় পুম্নমক ভারত্তা শেল থাদনবগী ইহুল চাউনা লৈরি। ৱাফম পুম্নমক অসি, হোৎনরিবা পুম্নমক অসিনা ভারত্তা তোঙান তোঙানবা সেক্তরদা থবক পীনবগী অনৌবা খুদোংচাবশিং খোঙজেল য়াঙনা থোরক্লি হায়বা উৎলি।
মরূপশিং,
ঐখোয়গী লৈবাকসিদা পায়খৎলিবা চাওখৎপগী অচৌবা থৌরাং অসিদা, য়ামখ্রবা অওনবা পুরক্লিবা অসিদা হৌজিক্তি অদোম্না হকথেংননা থৌদাং লৌগদৌরিবনি। লাক্কদৌরিবা চহি ২৫ অসিদা অদোম্না অদোমগী থৌদাং লৌবগা লোয়ন লোয়ননা চাওখৎপা ভারতকী পান্দমশিংসু ফংহনগদৌরিবনি। হায়রিবা তাঞ্জা অসিগী কান্নবা মপুং ফানা লৌবিয়ু হায়না ঐনা ময়ামগী মফমদা হায়জরি। ঙসিদগী অদোমগী পুন্সিদা অনৌবা কয়া তমশিন্নবগগী অনৌবা খোঙচৎ অমসু হৌরবনি। লৈঙাক্না মাগী থৌমীশিংগী স্কিল দিভেলপমেন্তকী লমদসু মীৎয়েঙ চঙলি। মসিদা মীৎয়েঙ থম্লগা ওনলাইন লর্নিং প্লেৎফোর্ম, আই.গোৎ কর্ময়োগী হৌদোকখি। প্লেৎফোর্ম অসিদা মখল কয়াগী কোর্সশিং ফংলি। অদোম্না মখোয়গী কান্নবা মপুং ফানা লৌবিয়ু। অদোমগী মতিং হেনগৎলিবমখৈ অদোমগী থবক্তা হেন্না মহৈ য়ানগদৌরিবনি। অসুম্না মতিং লৈবা মীওইশিংনা থবক তৌরকপদা পীগদৌরিবা ইথিল অদুনা লৈবাক্কী মীওই কাঙলুপ খুদিংদা ইনোৎ হাপকদৌরিবনি। ঙসিগী মরুওইরবা তাঞ্জা অসিদা, অদোমগী পুন্সিগী মরুওইবা তাঙ্কক অসিদা ঐনা অমুক্কা হন্না অদোমগী মফমদা নুংঙাইবসু ফোঙদোকচরি, অদুগা অদোমগী অনৌবা খোঙচৎকীদমক্তা য়াইফ-পাউজেলসু পীজরি। লোয়ন-লোয়ননা অদোমগী ইমুং মনুং, মরী মতাশিংগী মফমদসু নুংঙাইবা ফোঙদোকচরি মরমদি মখোয়নসু অদোমবু নীংজবা, থাজবা অমদি মঙলান কয়াগা লোয়ননা পুন্সিদা মাঙদা চঙশিন্নবগীদমক কন্না হোৎনবিরকখিবনি। ঙসি মখোয়গী মফমদসু ঐনা য়াইফ-পাউজেল পীজরি। অদোমগী তরং তরংবা তুংলমচৎ অমগীদমক থৌনিজবগা লোয়ননা অমুক্কা হন্না হন্না হন্না থাগৎচরি।
*****
(Release ID: 1925737)
Visitor Counter : 85
Read this release in:
Kannada
,
English
,
Urdu
,
Hindi_MP
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Malayalam