కాన్ఫెడరేషన్ ఆఫ్ ఆల్ ఇండియా ట్రేడర్స్ (CAIT) మరియు ట్రిప్టా టెక్నాలజీస్‌తో ఈరోజు కమ్యూనికేషన్స్ శాఖ సహాయ మంత్రి శ్రీ దేవుసిన్హ చౌహాన్ సమక్షంలో ఇండియా పోస్ట్ ఒక అవగాహన ఒప్పందంపై సంతకం చేసింది. ఈ అవగాహన ఒప్పందం 'భారత్ ఈమార్ట్' అనే పోర్టల్ యొక్క కార్యాచరణను సులభతరం చేస్తుంది, ఇది వ్యాపారుల ప్రాంగణాల నుండి సరుకులను పికప్ చేసుకునే సౌకర్యాన్ని అందిస్తుంది అలాగే దేశవ్యాప్తంగా ఉన్న కొనుగోలు దారు ఇంటి వద్దకే డెలివరీ చేస్తుంది. ఇది సీ ఏ ఐ టీ తో అనుబంధించబడిన ఎనిమిది కోట్ల మంది వ్యాపారులకు ప్రయోజనం చేకూరుస్తుంది.

ఇండియా పోస్ట్ ఇటీవలి కాలంలో ప్రభుత్వ ఇ-మార్కెట్‌ప్లేస్ (GeM), ట్రైబల్ కోఆపరేటివ్ మార్కెటింగ్ డెవలప్‌మెంట్ ఫెడరేషన్ ఆఫ్ ఇండియా లిమిటెడ్ (TRIFED) యొక్క ప్రాంతీయ కేంద్రాలతో ఇలాంటి ఒప్పందాలను కుదుర్చుకుంది, ఇది సరుకుదారుల ఇంటి వద్దకే పార్సెల్‌లను పికప్ మరియు డెలివరీని అందిస్తుంది. త్వరలో, రవాణా సేవ సంస్థ గా వాణిజ్య మంత్రిత్వ శాఖ అభివృద్ధి చేస్తున్న ఓపెన్ నెట్‌వర్క్ ఫర్ డిజిటల్ కామర్స్ (ONDC) ప్లాట్‌ఫారమ్‌లో ఇండియా పోస్ట్ స్వయంగా ఆన్‌బోర్డ్ అవుతుంది.

ఈ సందర్భంగా రాష్ట్ర సమాచార ప్రసార శాఖ మంత్రి మాట్లాడుతూ కాలక్రమేణా, ప్రజల డిమాండ్లతో తపాలా శాఖ రూపాంతరం చెందిందని పేర్కొన్నారు. టెక్నాలజీ  మరియు కొత్త సేవల జోడింపు ఇండియా పోస్ట్‌ను ఆధునిక మరియు బహుళ సేవలందించే సంస్థ గా మార్చింది. నేడు, ఇది 1.59 లక్షల పోస్టాఫీసుల నెట్‌వర్క్ ద్వారా ప్రతి గ్రామానికి బ్యాంకింగ్, బీమా మరియు ప్రభుత్వం అమలు చేస్తున్న అనేక సంక్షేమ పథకాల ప్రయోజనాలను చివరి మైలు డెలివరీ ని అందిస్తుంది.

శ్రీ దేవుసింగ్ చౌహాన్ మాట్లాడుతూ, “ప్రధాన మంత్రి శ్రీ నరేంద్ర మోదీ మహిళా సాధికారత కోసం అవిశ్రాంతంగా కృషి చేస్తున్నారు. ఈ కలను సాకారం చేయడంలో తపాలా శాఖ కీలక పాత్ర పోషిస్తోంది. సుకన్య సమృద్ధి పథకం ఆడపిల్లలకు ఆర్థిక భద్రతను అందించే ప్రభుత్వ కార్యక్రమాలలో అత్యుత్తమ పనితీరును కనపరిచింది. మహిళల డిపాజిట్లపై 7.5 శాతం అత్యధిక వడ్డీ రేటును అందించే మహిళా సమ్మాన్ బచత్ పాత్ర చాలా ప్రజాదరణ పొందిన పథకంగా నిరూపించబడింది.

కోవిడ్-19 మహమ్మారి సమయంలో తపాలా శాఖ అందించిన గొప్ప సేవలను సమాచార ప్రసారాల శాఖ సహాయ మంత్రి గుర్తు చేసుకున్నారు. టెక్నాలజీ  ద్వారా డిజిటల్ చెల్లింపులు మరియు ఆన్‌లైన్ సేవలను ప్రవేశపెట్టడం ద్వారా డిపార్ట్‌మెంట్ విపత్తును అవకాశంగా మార్చిందని ఆయన అన్నారు. వారు, నిజమైన స్ఫూర్తితో, ప్రధాన మంత్రి శ్రీ నరేంద్ర మోదీ నుండి ప్రేరణ పొందిన “ఆప్దా సే అవసార్” నినాద స్ఫూర్తి తో పనిచేశారు.

“ప్రతి గ్రామంలోని ప్రతి పౌరుడి జీవితాన్ని మార్చివేసే సమ్మిళిత మరియు పౌర కేంద్రీకృత విధానాలను రూపొందించడానికి ప్రధాన మంత్రి శ్రీ నరేంద్ర మోదీ తపాలా శాఖకు స్పష్టమైన ఆదేశాన్ని ఇచ్చారు.  నేటి ఈవెంట్‌తో సహా డిపార్ట్‌మెంట్ ప్రతి సేవ, విధానం మరియు చర్య పైసూత్రం స్ఫూర్తితో మార్గనిర్దేశం చేయబడుతుంది అని శ్రీ దేవుసిన్ చౌహాన్ చెప్పారు.

సీ ఏ ఐ టీ  మరియు భారత్ ఇ-మార్ట్‌తో అవగాహన ఒప్పందం దేశంలోని చిన్న వ్యాపారులకు అవసరమైన రవాణా మద్దతును అందజేస్తుందని, ఇది వారి వ్యాపారాలను మరియు ఉపాధి అవకాశాలను కూడా పెంచుతుందని మంత్రి ఆశాభావం వ్యక్తం చేశారు.

ఈ కార్యక్రమంలో శ్రీ వినీత్ పాండే, సెక్రటరీ (పోస్టల్); శ్రీ అలోక్ శర్మ, డీ జీ పోస్టల్ సర్వీసెస్;  సీ ఏ ఐ టీ సెక్రటరీ జనరల్ శ్రీ ప్రవీణ్ ఖండేల్వాల్ మరియు ట్రిప్టా టెక్నాలజీస్ ఎం డీ శ్రీ బీ సీ భారతియా మరియు ఇతర సీనియర్ అధికారులు కూడా పాల్గొన్నారు. 

***