মনিপুর য়ুনিভর্সিতীনা য়ুম্বু ওইদুনা ৱাই.২০ ইন্দিয়া সম্মিতকী থীম মঙাগী মনুংদা অমা ওইরিবা, “শিয়র্দ ফ্যুচর: য়ুথ ইন দেমোক্রেসী এন্দ গোবর্নেন্স”কী মতাংদা ২০২৩গী মে ৪দা ৱাই.২০ সেমিনার শিল্লগনি।

সেমিনার অসিনা রেঙ্ক খুদিংমক্কী মরক্তা খেৎনবা অমত্তা থমদনা জি.২০. সম্মিত অসিবু ময়াম্না শরুক য়াবা অমা ওইহন্নবা নহাশিংদা অহেনবা মিৎয়েং থম্লগনি। ভারত সরকারনা মসিগী সেমিনার অসিগী খুত্থাংদা মনিপুরগী জিলা ১৬তা য়ৌহন্নবগী পান্দম থম্লি। য়ুনিভর্সিতী অসিনা চাউরাক্না পার্তিসিপেন্ত ৫৫০ রোম – মপান লমগী পেনেলিস্ত অমসুং দেলিগেত ২৬, মনিপুরগী মপানদগী দেলিগেত অমসুং পেনেলিস্ত ৩৮ অমসুং মনিপুর মনুংদগী ৬৯না শরুক য়াগদোরিবা থৌরম অসিগী য়ুম্বু ওইরগনি। মনিপুর য়ুনিভর্সিতীগা এফিলিয়েত তৌবা কোলেজশিংদগী চাউরাক্না মহৈরোই ৭০রোম্না সেমিনার অসিদা শরুক য়ারগনি।

মনিপুর য়ুনিভর্সিতীগী ভাইস-চান্সেলর, প্রোফেসর এন. লোকেন্দ্র সিংহনা হায়খি মদুদি মনিপুর অসি অপিকপা রাজ্য ওইজরবসু, রাজ্য অসিনা স্পোর্তস অমসুং কলচরদা য়াম্না চাউবা থৌদাং লৌদুনা শরুক য়াখি। নহাশিংনা মখোয়গী থবক-থৌরমশিংগী হিরম খুদিংমক্তা শিংথানিংঙাই ওইবা মওংদা নিংথিনা পাংথোক্লি। “ঐখোয়গী মহৈরোইশিং অসিগী অসিগুম্বা ইকাইখুম্ননিংঙাই ওইবা মওংদা মাইপাকপা পুরকপা অসিনা মরম ওইরগা ভারত সরকারনা মসিগী এসাইনমেন্ত অসি পাংথোক্নবগী থৌজাল অসি পীনবীরে”, হায়না ভি.-সি.না হায়খি।

মহাক্না মখা তারকখি মদুদি হৌখিবা দেকেদ অমা অনি অসিদা ভারতকী নহাশিং অমসুং মহৈরোইশিংগী মীশিং অসি পাক-শন্না য়াম্না চাউনা মশিং য়াম্না অমসুং মতিক-মগুন লৈনা শন্দোরক্লি। ভারত অসি য়াম্না নৌরিবা মতিক য়াম্না লৈবা, নহাশিংগী শক্তিনা থল্লবা লৈবাক্নি অমসুং নহাশিংগী ওইবা পোলিসীশিং কয়া অমা পাইখত্তুনা লাক্লি।

ৱাই.২০ সম্মিতকী চিয়রমেন, প্রোফেসর আর.কে. হেমাকুমার সিংহনা হায়খি মদুদি রাজ্য অসিগী নহাশিং অসি স্পোর্তস অমসুং কলচরদা য়াম্না হৈথোই-শিংথোই, মরম অদুনা মখোবশিং অসি দেমোক্রেসী অমসুং গোবর্নেন্সতসু হৈথোই-শিংথোইবা ওইগদবনি। চিয়রমেন অসিনা মখা তারদুনা থৌরম অসি রাজ্য অসিগী অথাপ্পা মফমশিংদা লৈরিবা মহৈরোইশিংদা য়ৌহন্নবা সোসিয়েল মীদিয়া প্লেতফোর্মশিংদা লাইব ওইনা থাদোক্লগনি।

সম্মিত অসিগী কনভেনর, প্রোফেসর দবল্যু. চান্দবাবু সিংহনা হায়খি ভারতনা জি.২০গী ১৮শুবা প্রেসিদেন্সীগী ফম পাইরি, অমসুং জি.২০ লৈবাকশিংনা গ্লোবল ত্রেদগী ৮৫% কন্ত্রোল তৌবা মরম্না জি.২০ লৈবাকশিংনা লৌবা ফিরেপ অদু অয়াম্বদা মালেম পুম্বনা য়াবা ওই।

মহাক্না মখা তারকখি মদুদি ৱাই.২০ য়াওনা ভারতকী প্রেসিদেন্সী অসিগী মনুংদা এনগেজমেন্ত গ্রুপ ১১ লৈ। অমসুং ৱাই.২০গী মনুংদা সব-থীম মঙা লৈ, মসিগী মনুংদা “শিয়র্দ ফ্যুচর: বুথ ইন দেমোক্রেসী এন্দ গোবর্নেন্স” অসিবু মখোয়শিং অদুগী মনুংদা অমনি।

“ভারতনা  ৱান অর্থ, ৱান ফেমিলী অমসুং ৱান ফ্যুচরগী মতাংদা ঙাংলি, অমসুং লৈবাক অসিবু শেমগৎপগী মতাংদা কনামত্তা নাথৈদুনা থম্লোইদবনি। মরম অদুনা নহাশিংনা মসিদা শরুক য়াবা হায়বসি য়াম্না মরু ওই,” হায়না কনভেনরনা হায়খি।

২০২৩গী সেপ্তেম্বরদা পাংথোক্কদবা অরোইবা জি.২০ সম্মিত অদুনা ইনফোর্মেশন পীনবা অমসুং দোমেস্তিক অমসুং গ্লোবল প্লেতফোর্মশিংদা ভারতকী নহাশিংগী খোঞ্জেলশিং অমসুং মখোয়গী অৱাবশিং অদুবু তাহন্নবা সেমিনার অসিগী রিকমেন্দেশনশিং অদুগী মতাংদা নিংথিনা খন্না-নৈনরগনি।

চিয়রমেন, শ্রী হেমাকুমারনা রাজ্য অসিগী ওর্গনাইজেশনশিং অমসুং প্রজা মীয়ামদা রাজ্য অসিগী নহাশিংগী তুংগী য়াইফনবগী মতাংদা খল্লগা ইরাং শাগৎপা নত্রগা বন্দশিংগী মওংদা সেমিনারদা অধিংবা অপনবশিং অমত্তা থোকহন্দনবা হায়রি।

****