প্রধান মন্ত্রী, শ্রী নরেন্দ্র মোদীনা ঙসি ভিদিও মেসেসকী থোংদা ঙসি মনিপুরগী ইম্ফালদা পাঙথোকপা রাজ্য/য়ু.তি.শিংগী য়ুথ এফিয়র্স অমসুং স্পোর্তসকী মন্ত্রীশিংগী নুমিৎ-২গী ‘চিন্তন শিবির’দা ৱা ঙাংখ্রে।

থৌরম অদুদা ৱা ঙাংলদুনা প্রধান মন্ত্রীনা চহি অসিদা মনিপুরদা ‘চিন্তন শিবির’ পাঙথোকপদা নুংঙাইবা ফোঙদোকখি অমসুং লৈবাক্কীদমক অৱাং নোংপোক্তগী শান্নরোয় কয়ানা মেদলশিং লৌদুনা মচু অহুমগী ফিরালগী মীংচৎ পুরকখি হায়না ফোঙদোকখি। প্রধান মন্ত্রীনা লমদম সগোল কাংজৈ, থাং-তা, য়ুবি লাকপী, মুক্না অমসুং হিয়াং তান্নবা অসিগুম্বা লমদম অসিগী নাৎকী ওইবা মশানাশিংগী মতাংদা পল্লদুনা মখোয় অসি মখোয় মশাগী ওইবা মওং অমদা য়াম্না নীংথিজৈ হায়না ফোঙদোকখি। শ্রী মোদীনা মখা তারদুনা হায়খি, “অৱাং নোংপোক অমসুং মনিপুরনা লৈবাক্কী স্পোর্তসকী ত্রেদিসনবু মাংদা পুখৎপদা চাউনা শরুক তমখি”। লমদম অসিগী ওইবা মশান্নশিংগী মতাংদা মখা তানা ফোঙদোক্লদুনা প্রধান মন্ত্রীনা মনিপুরগী উ-লাওবী অসি কবদ্দীগা মান্নৈ, হিয়াং তান্নবা অসি কেরালাগী হীগী লমজেলগা মান্নৈ হায়খি। মহাক্না মনিপুরগা পোলোগা লৈনরিবা পুৱারী ওইরা মরীগী মতাংদা ফোঙদোকখি অমসুং হায়খি অৱাং নোংপোক্না লৈবাক্কী কলচরেল দাইভর্সিতীদা অনৌবা মচুশিং শংলি লোয়ননা লৈবাক্কী স্পোর্তস মলতিপ্লিসিতীদা অনৌবা মাইয়োলশিং পীরি। প্রধান মন্ত্রীনা লৈবাক শিনবা থুংবদগী স্পোর্তস মন্ত্রীনা ‘চিন্তন শিবির’  অসি লোইরকপদা লৌশিং কয়া ফংলগনি হায়না থাজবা ফোঙদোকখি।

“চিন্তন শিবির অসি কুপ্না তান্নরগা হৌই, ৱাখল মুন্না খল্লগা মখা চত্থৈ অমসুং অরোইবদা ইমপ্লিমেন্ত তৌই” হায়না চিন্তন শিবিরগী মতাংদা প্রধান মন্ত্রীনা ফোঙদোকখি অমসুং তুংগী পান্দমশিং খন্নবা অমসুং মমাংগী কনফরেন্সশিং হন্না য়েংশিনবগী মথৌ তাই হায়নসু ফোঙদোকখি। ২০২২দা কেবারিদা পাঙথোকখিবা মমাংগী মীফম অদু নীংশিংলদুনা প্রধান মন্ত্রীনা মরু ওইবা হীরম কয়া খন্নখি অমসুং স্পোর্তসকী য়াইফনবা ইকোসিস্তেম অমা শেম্নবা রোদ মেপ অমা শেম্নবা য়ান্ন-ৱারোল পীনখি হায়না ফোঙদোকখি। প্রধান মন্ত্রীনা স্পোর্তস সেক্তরদা কেন্দ্র অমসুং রাজ্যশিংগী মরক্তা শরুক য়াবা হেনগৎহন্নবগী মতাংদা ফোঙদোকখি অমসুং ওইথোক্নবা পাইখৎখিবা খোঙথাংশিংগী মতাংদা ফোঙদোকখি। মহাক্না মখা তারদুনা হাখি মসিগী হন্না য়েংশিনবগী থৌওং অসি পোলিসীশিং অমসুং প্রোগ্রামশিংগী থাক্তা খক্তা পাঙথোক্লোইদবনি মসি মমাং চহিগী ইনফ্রাস্তর্কচর দিবেলপমেন্ত অমসুং স্পোর্তসকী মাইপাকপশিংগী মতাংদসু য়াওগদবনি।

পি.এম.না ৱা ঙাংখিবগী মপুং ফাবা ৱারোলগীদমক মসিদা নম্বীয়ু

চিন্তন শিবিরগী হৌদোকপগী সেসন্দা য়ুথ এফিয়র্স অমসুং স্পোর্তস (য়াস) অমসুং ইনফোর্মেসন অমসুং ব্রোদকাইস্তিংগী কেন্দ্র মন্ত্রী, শ্রী অনুরাগ থাকুর, পঞ্জাবকী রাজ্যপাল অমসুং চান্দিগরগী এদমিনিস্ত্রেতর, শ্রী বনৱারী লাল পুরোহিৎ, মনিপুরগী মুখ্য মন্ত্রী শ্রী এন. বিরেন সিংহ, য়াস অমসুং হোমগী কেন্দ্রগী রাজ্য মন্ত্রী, শ্রী নিশথ প্রামানিক, য়ুথ এফিয়র্সকী সেক্রেতী, মীতা আর লোচান অমসুং য়াস মন্ত্রালয়গী স্পোর্তসকী সেক্রেতরী সুজাতা চতুর্বেদি অমসুং মনিপুরগী চীফ সেক্রেতরী, দা. রাজেশ কুমারনা শরুক য়াখি।

শ্রী অনুরাগ সিংহ থাকুরনা মহাক্কী মরু ওইবা ৱারোল পীবদা হায়খি মনিপুরদা শুপ্নগী মীশিং লাখ ৩৬ খক্তা লৈজরবসু অতোপ্পা অচৌবা রাজ্যশিংগা চাংদম্নবদা স্পোর্তসকী লমদা মনিপুরনা চাউনা শরুক তমখি। শরুক তম্লিবা অসিবু শকখঙলদুনা প্রধান মন্ত্রী শ্রী নরেন্দ্র মোদীনা রাজ্য অসিদা অহানবা নেস্নেল স্পোর্তস য়ুনিভর্সিতী শান্নবগীদমক সেঙ্কসন তৌখি অমসুং য়ুনিভর্সিতী অসি শেমগৎনবগীদমক লুপা করোর ৯০০রোমগী শেনফম চাদিং তৌগনি। মহাক্না মনিপুরগী লমদম অসিগী ওইবা মশান্নশিং মমিং চৎলিবা অসিগী মতাংদসু ফোঙদোকখি অমসুং কেন্দ্র সরকারনা খেলো ইন্দিয়াদা ইন্দিজিনস গেম কয়ামরুম হাপচিনখি। মহাক্না মখা তারদুনা হায়খি কেন্দ্র অমসুং রাজ্য সরকারনা অমত্তা ওইনা পুনশিন্দুনা মখোয় মশা-মশাগী রাজ্যশিংদা স্পোর্তস করম্না প্রমোৎ তৌগদগে হায়বগী ওপন দিস্কসন পাঙথোক্নবা হায়খি।

লৈবাক্কীদমক মীংচৎ পুরকখিবা মনিপুরগী শান্নরোয়শিংগী স্পোর্তসমেনশিপকী মতাংদা পল্লদুনা কেন্দ্রগী মন্ত্রীনা রাজ্য অসিগী শান্নরোয়শিংনা পুরকখিবা মাইপাকপশিং অমমমতা ওইনা পনখি। মহাক্না লৈবাকপু চাউথোকহনখিবা নুপী শান্নরোয়শিংবু শীংথাখি অমসুং অতোপ্পা রাজ্যশিংনা মীংচৎ হেন্না পুরক্কদবা শান্নরোয় কয়া পুথোক্নবা হেন্না হোৎনরক্কনি হায়বগী থাজবা ফোঙদোকখি।

মহাক্কী ৱারোল পীবা লোইশিনবদা শ্রী অনুরাগ থাকুরনা তোঙান-তোঙানবা রাজ্যশিং অমসুং য়ুনিয়ন তেরিতোরীশিংগী শরুক য়ারিবা স্পোর্তস মন্ত্রীশিংদা মখোয়গী এক্সপরিয়েন্স শিয়র তৌনবা অমসুং মখোয় মশাগী রাজ্যশিংদা স্পোর্তস ইনফ্রাস্ত্রকচর শেমগৎনবা মখোয়না করি থৌশিল পাইখৎখিবগে উৎনবা হায়খি। মহাক্না মখোয়দা অমনা অমগী এক্সপরিয়েন্সশিংদগী তমশিন্নবা অমসুং ভারতপু স্পোর্তসকী সুপরপাৱর অমা ওইনবা পুন্না থবক তৌবা মথৌ তাই হায়খি।

মনিপুরগী মুখ্য মন্ত্রী, শ্রী বিরেন সিংহনা ভারত সরকারগী য়ুথ এফিয়র্স অমসুং স্পোর্তস মন্ত্রালয়না রাজ্য অসিগী জিলা ১৬তা খেলো ইন্দিয়া সেন্তর ৩২ হাংদোকপদা অয়াবা পীরকপগীদমক তৌবীমল খঙবা উৎখি। আর্চরী, হোক্কী অমসুং ৱেৎলিফতিংগী স্পোর্তসকী লম অহুমদা খেলো ইন্দিয়া স্তেৎ সেন্তর ওফ এক্সিলেন্স অথুবদা হৌরগনি হায়না মহাক্না ফোঙদোকখি। মহাক্না হায়খি নেস্নেল স্পোর্তস য়ুনিভর্সিতী (এন.এস.য়ু) লোইশিন্নবা হোৎনরি অমসুং য়ুনিভর্সিতী অসিনা ভারতকী স্পোর্তসকী তুংলমচৎ শেম্বদা মরু ওইবা থৌদাং লৌগনি। মহাক্না রাজ্য সরকারনা রাজ্য অসিদা স্পোর্তস কলচর অমসুং শান্নরোয়শিং প্রমোৎ তৌনবা অঙম্বা মতেং খুদিংমক পীরি হায়না ফোঙদোকখি।

শ্রী এন. বিরেন্না মখা তারদুনা হায়খি পি.পি.পি. মোদেলগী খুত্থাংদা খুমন লম্পাক স্পোর্তস কমপ্লেক্স অপগ্রেদ তৌবগী অমসুং এক্সতর্নেল এদেদ প্রোজেক্তশিং ওইনা থবক পাইখৎলি। স্পোর্তস সাইন্সকী ইন্তিগ্রেসন তৌবা, প্রাইবেৎ পার্তনরশিংগা লোয়ননা চুংশিন্নদুনা হৌগৎলক্লিবা শান্নরোয়শিংগী ত্রেনিংদা আর্তিফিসিএল ইন্তেলিজেন্স অমসুং ভিদিও এনলাইসিস শীজিন্নবনা রাজ্য অসিগী স্পোর্তস চাউখৎহনবদা মতেং ওইগনি।

য়াস অমসুং হোমগী কেন্দ্রগী রাজ্য মন্ত্রী, শ্রী নিশিথ প্রামানিকনা থৌরম অসিদা মহাক্কী ৱারোল পীবদা হায়খি সরকার অসিনা লৈবাক অসিদা স্পোর্তস চাউখৎহন্নবগীদমক অনৌবা স্কিমশিং শেম্মি অমসুং ফোর্ম্যুলেৎ তৌরি। মহাক্না হায়খি মনিপুর অসি কনফরেন্স পাঙথোক্নবা মতিক চারবা  মফম অমা ওইরি অমসুং স্পোর্তস চাউখৎহন্নবগীদমক অমনা অমবু পুক্নিং থৌগৎনবা অমসুং পুন্না থবক তৌনবা রাজ্যশিংগী মরক্তা ইথিল পীনবগী মফম অমা ওইরি।

ইনফোর্মেসন অমসুং ব্রোদকাস্তিং মন্ত্রালগী ইম্ফালদা লৈবা সেন্ত্রেল ব্যুরো ওফ কম্ম্যুনিকেসনগী রিজনেল ওফিসনা শিনবা ফোতো একজিবিসন অমা য়ুথ এফিয়র্স অমসুং স্পোর্তস য়াস অমসুং ইনফোর্মেসন অমসুং ব্রোদকাস্তিংগী কেন্দ্র মন্ত্রী, শ্রী অনুরাগ থাকুর লোয়ননা য়াস অমসুং হোমগী কেন্দ্রগী রাজ্য মন্ত্রী, শ্রী নিসিথ প্রামানিকনা হৌদোকখি। ইম্ফালদা লৈবা সিতী কনভেন্সন সেন্তরদা চিন্তন শিবিরগী শরুক ওইনা আজাদী কা অমৃত মহোৎসব, মিসন লাইফ, ৯ সাল সেবা, সুশাসন অমসুং গরিব কল্যানগী মতাংদা ফোতো-একজিবিসন পাঙথোকখি।

চিন্তন শিবিরগী তেক্নিকেল সেসন্দা য়ুব পোর্তেল, রিকনস্ত্রক্তিং দি নেস্নেল য়ুথ ফেস্তিবেল, খেলো ইন্দিয়া অমসুং ভারত সরকারগী অতোপ্পা স্কিমশিংগী মরমদা, স্পোর্তস সেক্তরগী ইন্নোবেসন হায়বা হীরমশিংদা প্রজেন্তেসন অমসুং ইন্তরেক্তিব সেসনশিংদা খন্ন-নৈনখি।

****