কেন্দ্রগী য়ুম্লৈ-কৈরৈ অমসুং কোওপরেশনগী মন্ত্রী, শ্রী অমিত শাহনা ঙসি মহারাস্ত্রগী রায়গরদা দা. অপ্পাসাহেব ধর্মাধিকারিদা চহি ২০২২গীদমক্তা “মহারাস্ত্রগী ভুশন”গী মনা পীখি। থৌরম অসিদা, মহারাস্ত্রগী মুখ্য মন্ত্রী, শ্রী একনাথ শিন্দে, উপ মুখ্য মন্ত্রী, শ্রী দেবেন্দ্র ফদনাবিস অমসুং অতোপ্পা অঙম-অথৌ কয়া অমনা শরুক য়াখি।

ৱা ঙাংবা মতমদা, শ্রী অমিত শাহনা হায়খি মদুদি মিংচৎ তান্নবগীদমক্তা অনিংবা-অপাম্বা অমত্তা য়াওদনা মীয়ামগী পুন্সিগীদমক্তা খুনাইগী সেবা টৌখিবা সোচিয়েল ৱার্কের অমা ওইনা অপ্পাসাহেবকীদমক্তা মীয়াম্না য়াম্না ইকাইখুম্নৈ অমসুং চেৎনা থাজৈ। মহাক্না হায়খি মদুদি অপ্পাসাহেবনা তৌখিবা কত্থোকপা, অচেৎপা ফিরেপ লৈবা অমসুং সেবা তৌবা খক্তনা অসিগুম্না ইকাইখুম্নবা অমসুং চেৎনা থাজবা অসি ফংবা ঙমগনি। অপ্পাসাহেবকীদমক্তা মীয়ামগী মীনুংশি, থজবা অমসুং ইকাইখুম্নবা অসি মহাক্কী থবক অমসুং ভেল্যু, অমসুং নানাসাহেবনা তাকপী-তম্বীরম্বা অদুবু ইকাইখুম্নবীবনি। শ্রী শাহনা হায়খি মদুদি মীয়ামগী মতুং ইনবগী মহুত্তা, ঐখোয়না ঙপ্পাসাহেবগুম্না মহাক্কী মতুং ইলহনবগুম্না থবক তৌগদবনি।

কেন্দ্রগী য়ুম্লৈ-কৈরৈ অমসুং কোওপরেশনগী মন্ত্রিনা হায়খি মদুদি ইমুং অমগী মীরোল অহুমদা খুনাইগী সেবা তৌবগী চৎনবী লৈবা অসি পুৱারিদা য়াম্না তাংনা থোকই। অহানবদা, নানাসাহেব, মথংদা অপ্পাসাহেব অমসুং হৌজিক্না সচিন ভাউ অমসুং মহাক্কী মচিল-মনাওশিংনা খুনাইগী সেবা তৌবগী চৎনবী অসি মখাতানা চত্থরি। মহাক্না হায়খি মদুদি অপ্পাসাহেবপু মহারাস্ত্র ভুশন মনা পীদুনা মহারাস্ত্র সরকারনা মহাকপু ইকাইখুম্নবদা নত্তনা মী করোর কয়া অমবু মহাকগুম্না পুন্সি মহিং হিংনবশু পুক্নিং থৌগৎলি।

শ্রী অমিত শাহনা হায়খি মদুদি মহারাস্ত্রদা লৈরিবা রায়গরগী লম অসি য়াম্না ফাওরবা ছত্রপতি শিৱাজিগী শেংলবা লম্নি। মসিগী লমদম অসিনা লৈবাক অসি চৎনবী অহুম চত্থরক্লি। অহানবদা, ছত্রপতি শিৱাজি মহারাজনা হৌদোরকখিবা লৈবাক্কীদমক্তা ইচং-থৌবা অমসুং কত্থোকপগী চৎনবী। মহারাস্ত্রগী লমদগী হৌরক্তুনা লৈবাক শিনবা থুংনা, অফাওবা নিংতম লান্মী খুদম ওইনা ৱীর সাৱরকর, ৱাসুদেব বলৱন্ত ফদকে, চাপেকর মচিল-মনাওশিং অমসুং লোকমান্য বাল গঙ্গাধর তিলক্না স্বরাজ অমসুং ইজৎকীদমক্তা মখোয়গী পুন্সি অদুবু কত্থোকখি। অনিশুবদা, ‘ভক্তি’গী লমদা য়াম্না ফাওরবা সন্ত সমর্থ রামদাস অমসুং সন্ত তুকারামদগী হৌরগা সন্ত নামদেবনা লৈবাক অসিদা লম্বি তাকপীখি। অহুমশুবদা, মহারাস্ত্রা মশামক্তগী হৌরকপা সোসিয়েল কন্সিয়সনেসকী চৎনবী। সোসিয়েল রিফোর্মরশিং খুদম ওইনা মহাত্মা জ্যোতিভা ফুলে, সাৱিত্রি বাই ফুলে, বাবাসাহেব দা. ভিমরাও অম্বেদকর অমসুং খুনাইগী ওইবা খোংজং কয়া অমদা মাংজিল থাদুনা লাকখিবা মীওইশিং অদু মহারাস্ত্রগী ফাওরবা লমদম অসিগী খুদোলনি। মসিগী চৎনবী অসিদা, নানাসাহেব অমসুং অপ্পাসাহেবনা মসিগী সোসিয়েল কন্সিয়সনেস অসিবু পুরক্নবগী য়াম্না চাউরবা থবক অমা তৌখি।

কেন্দ্রগী য়ুম্লৈ-কৈরৈ অমসুং কোওপরেশন মন্ত্রীনা হায়খি মদুদি ঐখোয়গী উপনিশদশিংদা পনলম্লিবা “সর্বে ভৱান্তু সুখিনাহ, সর্বে সান্তু নিরামায়া”গী ৱাখল্লোন অসিবু থবক ওইনা ওন্থোকপা হায়বসি য়াম্না লুই। মহাক্না হায়খি মদুদি মসিগী ৱাখল্লোন অসিগী মখাদা, মীওই অমনা মহাক্কী খুনাইগী পুন্সিগী শরুক অয়াম্বা মশাগীদমক্তা থবক তৌবা অদু নত্তনা খুনাইগীদমক্তা অমসুং অতোপ্পশিংগীদমক্তা থবক তৌবা অদুনা মশক তাকই। ৱা ঙাংদুনা তাকখিবা পরাদি য়াম্না কুইনা লৈতে অমসুং মতমগী মতুং ইন্না কাওখি অদুবু কনাগুম্বা অমগী থবক্না তাকপীরম্বা পরাদি পুন্সি চুপ্পগী ওইনা লেংদনা লৈহৌই। শ্রী শাহনা হায়খি মদুদি অপ্পাসাহেবনা মী লাখ অমসুং করোর কয়া অমবু মশাগীদমক্তা থবক তৌবদা নত্তনা খুনাই অমসুং অতোপ্পশিংগীদমক্তা থবক তৌনবা তম্বীখি। সর্বে ভাৱন্তু সুকিনাহ”গী মন্ত্রদা য়ুম্ফম ওইদুনা, লৈবাক অসিনা মথৌ তারকপা মতমদা অপ্পাসাহেবনা অতোপ্পশিংগীদমক্তা হিংলিবা মীওই লাখ কয়া অমবু লমজিংদুনা মহাক্কা লোইননা থবক তৌখি।  মসিগী থবকশিং অসিনা মরম ওইরগা প্রধান মন্ত্রী, শ্রী নরেন্দ্র মোদীনা লুচিংবা সরকার অসিনা অপ্পাসাহেবপু পদ্মা এৱার্দকা লোইনা ইকাইখুম্নখি।

শ্রী অমিত শাহনা হায়খি মদুদি ‘মহারাস্ত্র ভুশন এৱার্দ’ অসি ১৯৯৫দা হৌদোকখি অমসুং মদুগী মতুংদগী মহারাস্ত্র অমসুং লৈবাককী খুনাইগী পুন্সিদা শরুক য়াখিবা মীওই কয়া অমবু মনা পীখ্রে। মহাক্না হায়খি মদুদি পুরুশোত্তম লক্সমন দেশপান্দে, স্বর কোকিলা লাতা মঙ্গেস্কর, আশা ভোস্লে, সাইন্তিস্ত ৱিজয় ভতকর, রাঘুনাথ মাশেল্কর, জয়ন্ত নার্লিকর, অনিল কাকোদকর, শিবশাহির বাবাসাহেব পুরান্দারে, শক্নাইরবা আর্তিস্ত সুলোচনা জী অমসুং নানসাহেবপু মহারাস্ত্র ভুশনগী মনাগা লোইননা ইকাইখুম্নখ্রে। মহাক্না হায়খি হৌজিক্তি নানাসাহেবকী ইমুং-মনুংশিংদগী অপ্পাসাহেবনা মনা অসি ফংখ্রে। মহারাস্ত্র ভুশনগী মনা অসিবু অনিশুবা ওইনা চপ মান্নবা ইমুং অমত্তদা পীখিবা হায়বসি মসিনা অহানবনি। শ্রী শাহনা হায়খি মদুদি “লেপ্তনা চংশিন্সি” হায়রিবা খোল্লাও অসিগা লোইননা অপ্পাসাহেবনামহাক্কী থবকশিং অদুনা খুনাইবু লমজিংখি। মহাক্না অঙাংশিংগী ফগৎহন্নবগীদমক্তা, মহৈ-মশিং তম্নবগী মচাক-মথুমশিং লেম্না য়েন্থোকপা, উ-ৱা থাবা, লু নানবা, ঈ দান তৌবা, কুম্মৈশিংগী মনুংদা অমোৎ-অকাইশিং খোমগৎপগী তোপ-তোপ্পা থৌওংশিং, গুহাশিং শেংদোকপা, নুপীশিংবু এমপাৱর তৌবা, ত্রাইবলশিংগী য়াইফ-থৌরাং, দ্রগ ফ্রী ওইবা খুনাই, সুপর্সতিশন অমসুং ইলিতরেসী মুত্থৎপগী মতাংদা থবক কয়া অমা তৌখি অমসুং মসিগী লমশিং অসিদা খুদম কয়া অমা থমখি। শ্রী অমিত শাহনা অপ্পাসাহেবকী পুন্সি নুংশাংনবগীদমক্তা নিজখি অমসুং মহাক্কী মতুং ইল্লিবা মীওই লাখ কয়া অমবু অপ্পাসাহেবকী লমজিং-লমতাক্কী মতুং ইন্না চহি কয়া অমা মখাতানা খুনাইগীদমক্তা মখাতানা থবক তৌবা ঙম্বা ওইয়ু হায়দুনা য়াইফ-পাউজেল পীখি। মহাক্না মহারাস্ত্রগী মুখ্য মন্ত্রী, শ্রী একনাথ শিন্দে, উপ মুখ্য মন্ত্রী, শ্রী দিবেন্দ্র ফদনাবিসবু অপ্পাসাহেবগুম্বা মতিক চারবা মীশক অমদা মহরাস্ত্র ভুশন পীবগীদমক্তা থাগৎপা ফোংদোকখি।

*******