এপ্রিল ৮ অমসুং ৯,২০২৩দা প্রধান মন্ত্রী শ্রী নরেন্দ্র মোদী তেলঙ্গানা, তামিল নাদু অমসুং কর্নাতকাদা চৎকনি।

এপ্রিল ৮গী অয়ুক পুং ১১:৪৫ রোম তাবদা প্রধান মন্ত্রী সিকন্দরবাদ রেলৱে স্তেসন্দা থুংগনি অমসুং সিকন্দরবাদ-ত্রিরুপতি বন্দে ভারত এক্সপ্রেস লমথাগনি। নুমিৎ য়ুংবা মতুং পুং ১২:১৫ রোম তাবদা হায়দ্রবাদকী পেরেদ গ্রাউন্দা পাংথোকপা মীয়ামগী থৌরম অমা মহাক শরুক য়াগনি অমসুং মফম অদুদা মহাক্না এ.আই.আই.এম.এস বিবিনাগর, হায়দ্রবাদ শানবা উরেপ-উয়ুং তমগনি। মহাক্না নেসনেল হায়ৱে প্রোজেক ৫ উরেপ-উয়ুং তমগনি। মহাক্না সিকন্দরবাদ রেলৱে স্তেসন নৌনা শেমগৎনবা উরেপ-উয়ুং তমগনি অমসুং রেলৱেগা মরী লৈনবা অতোপ্পা চাউখৎ-থৌরাংগী প্রোজেকশিং মীয়ামদা কৎথোক্কনি।

নুংথিলগী পুং ৩ রোম তাবদা প্রধান মন্ত্রী চেন্নাই এয়রপোর্ততা থুংগনি অমসুং মফম অদুদা মহাক্না চেন্নাই এয়রপোর্তকী অনৌবা ইন্তেগ্রেতেদ তর্মিনেল বিল্দিং শঙ্গাগনি। নুংথিল পুং ৪ তাবদা প্রধান মন্ত্রীনা এম.জি.আর চেন্নাই সেন্ত্রেল রেলৱে স্তেসন্দগী চেন্নাই-কোয়েম্বতুর বন্দে ভারত এক্সপ্রেস লমথাগনি। নুংথিল পুং ৪:৪৫ রোম তাবদা চেন্নাইদা প্রধান মন্ত্রীনা শ্রী রামকৃষ্ণ মথকী ১২৫শুবা মপোক কুমওন থৌরম শরুক য়াগনি। নুমিদাংৱাইরম পুং ৬:৩০ তাবদা, প্রধান মন্ত্রীনা চেন্নাইগী এলস্ত্রোম ক্রিকেত গ্রাউন্দদা মীয়ামগী থৌরম অমা শরুক য়াগনি অমসুং মফম অদুদা মহাক্না লম্বীগী প্রোজেকশিংগী উরেপ-উয়ুং তমগনি অমসুং শঙ্গাগনি।   

এপ্রিল ৯,২০২৩গী অয়ুক পুং ৭:১৫ রোম তাবদা প্রধান মন্ত্রী বন্দিপুর তাইগর রিজার্বতা চৎকনি। মহাক্না মুদুমালাই তাইগর রিজার্বতা থেপ্পাকাদু ইলিফেন্ত কেম্পশু য়েংগনি। নুমিদাংগী পুং ১১ রোম তাবদা, প্রধান মন্ত্রীনা কর্নাতকা স্তেৎ ওপন য়ুনিভর্সিতি, মাইসুরুদা পাংথোকপা ‘তাইগর প্রোজেক চহি ৫০ মপুংফারকপগী’ থৌরম হৌদোক্কনি। 

তেলঙ্গানাদা প্রধান মন্ত্রী

প্রধান মন্ত্রীনা তেলঙ্গানাদা লুপা করোর ১১,৩০০ হেনবগী প্রোজেকশিং শঙ্গাগনি অমসুং উরেপ-উয়ুং তমগনি।

আই.তি সহর হায়দ্রবাদ অমসুং ভাগবন ভেনকাতেশ্বরগী লৈফম তিরুপতিগা শম্নবা, সিকন্দরবাদ-তিরুপতি বন্দে ভারত এক্সপ্রেস অসি তেল্লবা থা অহুমগী মনুংদা তেলঙ্গানাদগী চেনবা হৌগদবা অনিশুবা বন্দে ভারত ত্রেন্নি। ত্রেন অসিনা সহর অনিগী মরক্তা চৎথোক-চৎশিন্দা চঙবা মতম পুং ৩:৩০দা হন্থহনগনি অমসুং মরুওইনা লাই খুরুম্বা লাকপশিং কান্নগনি।

লুপা করোর ৭২০ চঙনা অমুক হন্না শেমগৎকদৌরিবা সিকন্দরবাদ রেলৱে স্তেসন অসিদা মালেম থাক্কী খুদোংচাবশিং ফংহন্নবা শেমগৎকনি অমসুং ফজনা দিজাইন তৌরবা স্তেসন বিল্দিং শেমগৎকনি। নৌনা শেমগৎকদৌরিবা স্তেসন অসিদা দবল-লেভেলগী অপাকপা রুপ প্লাজা লৈগনি অমসুং মফম অমদা পেসেঞ্জরশিংগী খুদোংচাবা পুম্নমক ফংহনগনি অমসুং পেসেঞ্জরশিং রেলদগী অতোপ্পা মওংদা চৎখিবা য়ানবা খুদোংচাবশিং লৈগনি।

মীয়াম য়াম্না য়াংনা, নুংঙাইনা অমসুং খুদোংচাবা কয়াগা লোয়ন্না চৎথোক-চৎশিনগী খুদোংচাবা পীনবা হায়দ্রবাদ-সিকন্দরবাদ সবঅর্বান সেক্সন্দা প্রধান মন্ত্রীনা অনৌবা মল্তি-মোদাল ত্রান্সপোর্ত সর্বিস(এম এম তি এস) ১৩ প্রধান মন্ত্রীনা লমথাগনি। সিকন্দরবাদ-মহাবুবনাগর প্রোজেক দব্লিং অমসুং ইলেক্ত্রিফিকেসন প্রধান মন্ত্রীনা লৈবাক মীয়ামদা কৎথোক্কনি। কিলোমিতর ৮৫ হেন্না শাংবা প্রোজেক অসি লুপা করোর ১,৪১০ হেন্না চঙনা পায়খৎখিবনি। প্রোজেক অসিনা ত্রেনশিং খোঙজেল হেনগৎহনবদা মতেং পাংগনি। 

হায়দ্রবাদকী পেরেদ গ্রাউন্দা পাংথোকপা মীয়ামগী থৌরম অমদা, প্রধান মন্ত্রীনা এ.আই.আই.এম.এস বিবিনাগর, হায়দ্রবাদ শানবা উরেপ-উয়ুং তমগনি। মসি লৈবাক অসিদা হকশেলগী ইনফ্রাস্ত্রকচর মপাঙ্গল কনখৎহন্নবা প্রধান মন্ত্রীগী পান্দমগী খুদম অমনি। এ.আই.আই.এম.এস বিবিনাগর অসি লুপা করোর ১৩৫০ চঙনা শেমগৎকদবনি। এ.আই.আই.এম.এস বিবিনাগর লিংখৎপা অসিনা তেলঙ্গানাগী মীয়ামদা মগুন লৈবা অৱাংবা থাক্কী অনা-লায়য়েংগী খুদোংচাবশিং মখোয়গী থোঙজিলদা ফংহনবা ঙম্লগনি।

থৌরম মনুংদা, প্রধান মন্ত্রীনা লুপা করোর ৭৮৫০ হেনবগী নেসনেল হায়ৱে প্রোজেকশিং উরেপ-উয়ুং তমগনি। হায়রিবা লম্বীগী প্রোজেকশিং অসিনা তেলঙ্গানা অমসুং অন্ধ্র প্রদেস অনিমক্তা লম্বী-থোঙগী ফিবম ফগৎহল্লগনি অমসুং লমদম অসিগী শেন-থুম অমসুং খুন্নাই চাউখৎহনবদা মতেং পাংগনি।

তামিল নাদুদা প্রধান মন্ত্রী

প্রধান মন্ত্রীনা চেন্নাই ইন্তরনেসনেল এয়রপোর্তকী অনৌবা ইন্তেগ্রেতেদ তর্মিনেল বিল্দিং(ফেজ-১) শঙ্গাগনি, মসি লুপা করোর ১২৬০ চঙনা শেমগৎপনি। মসিগী অনৌবা ইন্তেগ্রেতেদ তর্মিনেল বিল্দিং অসি হাপচিনবদগী এয়রপোর্ত অসিগী পেসেঞ্জরশিং সেবা তৌবা ঙম্বগী শক্তি ২৩ মিল্লিয়ন পেসেঞ্জর পর এনম(এম পি পি এ)দগী ৩০ এম.পি.পি.এদা হেনগৎলগনি। অনৌবা তর্মিনেল বিল্দিং অসিদা মমাঙঙৈগী চৎনবীশিংগী শক্তমশিং হায়বদি কোলাম, শারি, লাইশঙশিং য়াওহন্দুনা তামিল কলচরগী মমি অমা তারি অমসুং মহৌশাগী অতোপ্পা শক্তমশিং য়াওরি।

এম.জি.আর চেন্নাই সেন্ত্রেল রেলৱে স্তেসন্দা পাংথোকপা থৌরম অমদা, প্রধান মন্ত্রীনা চেন্নাই-কোয়েম্বতুর বন্দে ভারত এক্সপ্রেস লমথাগনি। প্রধান মন্ত্রীনা তাম্বারাম অমসুং শেঙ্গোতিগী মরক্তা এক্সপ্রেস সর্বিস লমথাগনি। মহাক্না থিরুথুরাইপোন্দি-অগাস্থিয়ামপালিগী দেমু অমা লমথাগনি,মসিনা কোয়েম্বতুর, তিরুবরুর অমসুং নাগাপত্তিনম জিলাশিংগী মীয়াম কান্নবা পীগনি।

প্রধান মন্ত্রীনা থিরুথুরাইপোন্দি-অগাস্থিয়ামপালিগী মরক্তা কিলোমিতর ৩৭ গেজ ওন্থোকপা শঙ্গাগনি ,মসি লুপা করোর ২৯৪ চঙনা লোইশিনখিবনি। মসিনা নাগাপত্তিনম জিলাদা অগাস্থিয়ামপালিদগী চানবা থুম অমসুং ইন্দস্ত্রিগী থুম পুথোক-পুশিনদা কান্নবা পীগনি।

চেন্নাইদা প্রধান মন্ত্রীনা শ্রী রামকৃষ্ণ মথকী ১২৫শুবা মপোক কুমওন থৌরম শরুক য়াগনি। ১৮৯৭দা চেন্নাইদা শ্বামী রামকৃষ্ণনন্দানা শ্রী রামকৃষ্ণ মথ হৌদোকখি। রামকৃষ্ণ মথ অমসুং রামকৃষ্ণ মিসন অসি মীওইবা অমসুং খুন্নাইগী য়াইফনবা মখল কয়াগী থবকশিং পাংথোকপা স্পিরিচুএল ওর্গনাইজেসন অমনি।

চেন্নাইগী এলস্ত্রোম ক্রিকেত গ্রাউন্দদা পাংথোকপা মীয়ামগী থৌরম অমদা, প্রধান মন্ত্রীনা লুপা করোর ৩৭০০গী লম্বীগী প্রোজেকশিংগী উরেপ-উয়ুং তমগনি অমসুং শঙ্গাগনি। প্রোজেকশিং অদুগী মনুংদা মদুরাই সহরদা কিলোমিতর ৭.৩ শাংবা ইলাভেতেদ কোরিদোর অমসুং নেসনেল হায়ৱে ৭৮৫গী কিলোমিতর ২৪.৪ লেন মরিগী লম্বী শঙ্গাবা য়াওরি। প্রধান মন্ত্রীনা নেসনেল হায়ৱেজ-৭৪৪গী লম্বীগী প্রোজেকশিং উরেপ-উয়ুং তমগনি। লুপা করোর ২৪০০গী প্রোজেক অসিনা তামিল নাদু অমসুং কেরলাগী মরক্তা চৎথোক-চৎশিনগী খুদোংচাবা হেনগৎহনগনি অমসুং লাই খুরুম্বা মীওইশিংনা মদুরাইগী মিনাক্সি লাইশঙ, শ্রীবিলিপুথুরগী অন্দাল লাইশঙ অমসুং কেরলাগী সবারিমালাদা চৎনবগী খুদোংচাবা ফংলগনি।

কর্নাতকাদা প্রধান মন্ত্রী

অয়ুক্তা প্রধান মন্ত্রীনা বন্দিপুর তাইগর রিজার্বতা চৎকনি অমসুং ঙাক-শেনবগী থবকশিংদা শরুক য়ারিবা স্তাফশিং অমসুং সেল্ফ হেল্প গ্রুপশিংগা উনগনি। মহাক্না মুদুমালাই তাইগর রিজার্বতা থেপ্পাকাদু ইলিফেন্ত কেম্পশু য়েংগনি অমসুং শামুগী কেম্প অদুদা মহুতশিং অমসুং কাবাদিশিংগা ৱারি শানগনি। হন্দক পাংথোকখিবা ৫শুবা মেনেজমেন্ত ইফেক্তিবনেস ইভালুএসন এক্সরসাইজদা স্কোর খ্বাইদগী য়াম্না ফংখিবা তাইগর রিজার্বশিংগী ফিল্দ দিরেক্তরশিংগা প্রধান মন্ত্রীগা ৱারি শানগনি।

প্রধান মন্ত্রীনা ইন্তরনেসনেল বিগ কেতস এল্লাইন্স(আই বি সি এ)শু হৌদোক্কনি। এসিয়াদা শা তানবা অমসুং আইন্না য়াদবা মওংদা লম্লক্কী শা-উচেকশিং ললোনবা থিংনবা মালেমগী লুচিংবশিংগী চুঙশিন্নবা অমা শেম্নবা জুলাই, ২০১৯দা প্রধান মন্ত্রীনা খঙহনখ্রে। প্রধান মন্ত্রীগী পাউজেলগী শরুক অমা ওইনা, চুঙশিন্নবা অসি হৌদোক্লে। মালেমগী মরুওইবা অচৌবা হৌদোং ৭ হায়বদি কৈ, নোংশা, কবো কৈ, স্নো লিওপার্দ, পুমা, জাগুয়ার অমসুং চিতাহ কন্নবা অমসুং ঙাক-শেন্নবা ইন্তরনেসনেল বিগ কেতস এল্লাইন্সনা থবক পায়খৎকনি।

প্রধান মন্ত্রীনা ‘তাইগর প্রোজেক চহি ৫০ মপুংফারকপগী’ থৌরম হৌদোক্কনি। থৌরম মনুংদা মহাক্না, ‘অমৃত কাল কা ভিজন ফোর তাইগর কঞ্জর্বেসন’, ৫শুবা মেনেজমেন্ত ইফেক্তিবনেস ইভালুএসন ওফ তাইগর রিজার্বসকী রিপোর্ত ফোঙগনি। প্রধান মন্ত্রীনা তাইগর প্রোজেক চহি ৫০ মপুংফারকপগী নিংশিং শেনয়েক অমা ফোঙগনি।

*****