ভারত ইমানা য়াইফরে,

ভারত ইমানা য়াইফরে,

মধ্য প্রদেশকী রাজ্যপাল, শ্রী মঙ্গুভাই পতেল, মুখ্য মন্ত্রী শিবরাজজী, রেলৱে মন্ত্রী অশ্বিনীজী, অতোপ্পা দিগনিতরীশিং, অমসুং ভোপালগী ঐহাক্কী নুংশিরবা ইচিল-ইনাওশিং!

অহানবদা ঐহাক্না ইন্দোরগী মন্দিরদা রাম নবমীদা থোকখিবা থৌদোক অদুগীদমক অৱাবা ফোঙদোকচরি। থৌদোক অসিদা মনুং মতম চাদনা ঐখোয়বু থাদোক্তুনা চৎখ্রবশিংগী ইমুং মনুংগী অৱাবদা শরুক য়াজরি। অশোক অপন নংখ্রবা ভক্তাশিং, হোস্পিতালদা হৌজিক লায়েং চত্থরিবা পুম্নমক অথুবদা ফগৎলক্নবা ঐহাক্না থৌনিজরি।

মরুপশিং,

ঙসি এম.পি.না মাগী অহানবা ভন্দে ভারত এক্সপ্রেস ত্রেন ফংজরে। ভন্দে ভারত এক্সপ্রেসনা ভোপাল অমসুং দিল্লীগী খোঙচৎ হেন্না খোঙজেল য়াংশিনহল্লগনি। ত্রেন অসিনা প্রোফেস্নেল, নহা, অমসুং বিজিনেসমেনশিংগীদমক অনৌবা ফেসিলিতীশিং পুদুনা লাক্লগনি।

মরুপশিং,

থৌরম অসি পাঙথোকফম ওইখিবা মতমগা চুনবা অমদি অচৌবা রানী কমলাপতি স্তেসন শঙ্গাবগী খুদোংচাবা ময়াম্না ঐঙোন্দা পীনবীখি। ঙসি ঐহাক্না মফম অসিদগী দিল্লী ফাওবগী ভারতকী খ্বাইদগী অনৌবা ভন্দে ভারত ত্রেন লমথাবগী খুদোংচাবসু পীবীখি। প্রধান মন্ত্রী অমনা অতেনবা মতমগী মনুংদা চপ মান্নবা স্তেসন অমদা অমুক হন্না লাকখিবা হায়বা অসি রেলৱেগী পুৱারীদা তাংনা থোকপা থৌদোক ওইরগনি। অদুবু অনৌবা ভারত্তা অনৌবা সিস্তেমশিং শেম্লি, অনৌবা চৎনবীশিং শেম্লি। ঙসিগী থৌরম অসি মসিগী চপ চারবা খুদম অমা ওইরি।

মরুপশিং,

হৌজিক্তা মফম অসিদা পেসেঞ্জর অমা ওইনা ঐহাক্না স্কুল কারিবা অঙাংশিংগা লোয়ননা মীকুপ খরা লেনমিন্নখি অমসুং মখোয়গা লোয়ননা ৱারী শাখি। ত্রেন অসিগী মতাংদা খঙনীংবা অমসুং খৌরাংবা অদু উবদা নুংঙাইবা পোকই। অমরোমদা ভন্দে ভারত ত্রেন অসি চাউখৎলক্লিবা ভারতকী থৱায় য়াওবা অমসুং ইথক্কী খুদম অমনি। অমসুং ঙসিগী থৌরমগী মতম লেপ্পা মতমদা এপ্রিল ১দা থৌরম অমা লৈ হায়না ঐঙোন্দা তাকপীরকখি। ঐহাক্না হায়খি ইনাও করিগীদমক এপ্রিল ১দা শিল্লিবনো। মসিগী পাও অসি পাওচেদা  য়াওরকপা মতমদা কোংগ্রেস ইচিল-ইনাওশিংনা মোদীনা এপ্রিল ফুল তৌরগনি হায়না শোইদনা ফোঙদোরক্কনি। অদুবু নখোয়না এপ্রিল ১দা ত্রেন অসি লমথাবা উবা ফংলি।

মরুপশিং,

মসি ঐখোয়গী হৈ-শিংবা, ঐখোয়গী তৌবা ঙম্বা, ঐখোয়গী থাজবগী খুদমসু ওইরি। ভোপালদা লাক্লিবা ত্রেন অসিনা তুরিজমদা চাউনা মতেং পাংলগনি। মসিনা মরম ওইদুনা সাঞ্চী স্তুপ, ভীমবেতকা, ভোজপুর অমসুং উদয়গিরি গুফা অসিগুম্বা তুরিস্তকী মফমশিংগী ত্রাফিসু হেনগৎহল্লগনি। অমসুং তুরিজম হেনগৎলকপা মতমদা থবক্কী খুদোংচাবা কয়া অমা হেনগৎলক্কনি, মীয়ামগী ইনকমসু হেনগৎলক্কনি। হায়বদি ভন্দে ভারতনা মীয়ামগী ইনকম হেনগৎনবা পাম্বৈ অমা ওইরগনি, মসিনা লমদম অসিগী চাউখৎ থৌরাংগী পাম্বৈ অমসু ওইরগনি।

মরুপশিং,

২১শুবা ভারতনা অনৌবা ৱাখল্লোন অমসুং অনৌবা এপ্রোচকা লোয়ননা হৌজিক থবক পাইখৎলি। মমাংগী সরকারনা য়াশিন্নবা পুরক্নবা চিনখিবনা মখোয়না ইরৈবাকচাশিংগী অপেনবা পোক্নবা থবক্তা মীৎয়েং চংবা ঙমদনা লাকখি। মখোয়না ভোৎ বেঙ্ক থীবদা থবক চিনখি। ঐখোয়দি ইরৈবাকচাশিংগী অপেনবা পোক্নবা হোৎনদুনা লাকখি। মমাংগী সরকারনা ৱাফম অমদা হেন্না মীৎয়েং চংখি। মখোয়না লৈবাক্কী ইমুং অমা খক্তদগী খনখি। লৈবাক্কী লায়রবা ইমুংশিং, লৈবাক্কী মিদল ক্লাসকী ইমুংশিং মশা মতোমদা থাদোকপী। ইমুংশিং অসিগী আশা অমদি অনীংবশিংগী মতাংদা কনা অমত্তনা হংলমখিদে। ঐখোয়গী ইন্দিয়ন রেলৱেজনা মসিগী মাংদা শং-শং উরিবা খুদম ওইরি। ইন্দিয়ন রেলৱেজ অসি ভারতকী মীচম প্রজানা তোংনবনি। দিকেদ কয়া মমা-মপা, অঙাংশিং, মপু-মবেন, মীপুম খুদিংমক্না চত্থোক চৎশিন তৌনবগী অচৌবা পাম্বৈ রেলনা ওইদুনা লাকখি। ভারতকী অচম্বা ইমুংশিংনা চত্থোক-চৎশিন তৌনবা পাম্বৈ অসি মতমগী মতুং ইন্না চুনহনবা মথৌ তাদব্রা? ফীভম চাদবা মওংদা রেলৱেবু অদুমক লৈহনবা হৌনব্রা?

মরুপশিং,

নীংখা তম্বা ফংলবা মতুংদা ভারত্তা অচৌবা রেদী-মেদ রেলৱে নেৎৱার্ক অমা লাকখি। করিগুম্বা মতম অদুগী সরকারনা পাম্লবদি রেলৱেজ অদু য়াম্না থুনা মতমগা চুনবা ওইহনবা য়ারম্বনি। অদুবু রাজনিতীগী ওইবা কান্নবনা মরম ওইদুনা মসিদা মীৎয়েং চংলমখিদে। নীংখা তম্বা ফংলবা মতুং দিকেদ কয়া হৌখ্রবসু অৱাং নোংপোক্কী রাজ্যশিং ত্রেন্না শম্নহনখিদে। ২০১৪দা নখোয়গী শেবা তৌনবা ঐঙোন্দা খুদোংচাবা পীবা মতমদা ঐহাক্না মসি হৌজিক্তি অসুম্না থমলরোই হায়না ৱারেপ লৌখি, রেলৱে শেমগৎনবা লেপখি। হৌখিবা চহি ৯দা ইন্দিয়ন রেলৱেজপু মালেমগী খ্বাইদগী ফবা রেল নেৎৱার্ক করম্না ওইহনগদগে হায়বা অসিদা মীৎয়েং চংদুনা লাকখি। ২০১৪গী মমাংদা ইন্দিয়ন রেলৱেজকী মতাংদা করি পাও লৈরম্বগে নখোয়না নীংথিনা খঙই। অসিগুম্বা অচৌবা রেল নেৎৱার্ক অসিদা অনমেন গেৎ লিশিং কয়া লৈ। তোইনা খুদোংথিবা থৌদোক থোকপগী পাও তাই। স্কুলগী অঙাংশিং লৈখিদবগী নুংঙাইতবা পাও তাখি। ঙসি বোর্দ গেজ নেৎৱার্ক অসিদা অনমেন গেৎ য়াওদ্রে। মমাংদা ত্রেন এক্সিদেন্ত অমসুং পুন্সি অমদি লনথুম মাংবগী থৌদোকশিং নুমিৎ খুদিংগী তারমখি। ঙসি ইন্দিয়ন রেলৱে অসি হেন্না শাফবা ওইবা ঙম্লে। মেদ ইন ইন্দিয়া কবচ সিস্তেম অসি পেসেঞ্জরগী শাফনবা রেলৱেজতা এক্সপান্দ তৌখি।

মরুপশিং,

এক্সিদেন্তশিংদগী শাফবা খক্তা নত্তনা খোঙচৎ মনুংদা পেসেঞ্জর অমত্তনা ৱাকৎলকপদা খুদক্তা থবক পাইখৎহনখি। ইমর্জেন্সী লাকপা মতমদা অতেনবা মতমগী মনুংদা তেংবাং পীখি। ঐখোয়গী ইচে-ইচল অমদি ইচানুপীশিংদা কান্নবা পীনবা শিল-লাংখি। মমাংদা লুনানবগী মতাংদা ৱাকৎ কয়া লাক্লমখি। রেলৱে স্তেসনশিংদা ঙাইহাক লৈবা অসি তন্দি ফংবগা পাঙ্খক ওইরমখি। মসিগী মথক্তা ত্রেনশিং পুং কয়া থেংনা য়ৌরকপা য়াওখি। ঙসিদু লুনানবা অমসুং ত্রেন থেংনবগী ৱাকৎ হন্থরক্লি। মমাংদা কনা অমত্তনা তাবীদবগদগী মীয়াম্না ৱাকৎপা লেপখি। তিক্কেৎশিংগী কালা বজার তৌবগী ৱাকৎ কয়া লৈরমখি। মেদিয়াদা মসিগী স্তিং ওপরেসনশিং চত্থবগী পাও য়াওখি। অদুবু ঙসিদি তেক্নোলোজী শীজিন্নদুনা অসিগুম্বা সমস্যাশিং কোকহনবা ঙমখি।

মরুপশিং,

ঙসি ইন্দিয়ন রেলৱেস অসি অপীকপা ক্রাফমেন অমসুং আর্তিসেনশিংনা লৈবাক্কী কাচিন কোয়া খুদিংমক্তা মখোয়গী পোত্থোকশিং য়ৌহন্নবা অচৌবা পাম্বৈ অমা ওইরক্লি। ৱান স্তেসন, ৱান প্রদক্তকী স্কিম মখাদা লমদম অমগী মমিং লৈরবা ফীরোল, আর্তৱার্ক, অয়েকপা লাই, হেন্দিক্রাফ, কোল-লিক অসিনচিংবা অসি স্তেসন্দা পেসেঞ্জরনা পুরকপা ঙম্লে। লৈবাক অসিদা আউৎলেৎ ৬০০ হাংখ্রে। অতেনবা মতমগী মনুংদা পেসেঞ্জর লাখ অমা হেনবনা মসিদগী পোৎ লৈখিবদা ঐহাক্না নুংঙাইবা পোকই।

মরুপশিং,

ঙসি ইন্দিয়ন রেলৱেজ অসি লৈবাক্কী খুদোংচাবা ফংহন্নবা শেমগৎপগা মান্নরে। ঙসি রেলৱে স্তেসন কয়া মতমগা চুনবা মওংদা শেমগৎলি। ঙসি লৈবাক্কী স্তেসন ৬০০০তা ৱাই-ফাই ফেসিলিতী ফংহল্লে। লৈবাক্কী অচৌবা রেলৱে স্তেসন ৯০০ হেনবদা সি.সি.তি.ভি.শিং হাপ্পা লোইখ্রে। ঐখোয়গী ভন্দে ভারত এক্সপ্রেস অসিনা লৈবাক পুম্বদা শোন্ননবা মচাক ওইরি। ত্রেন অসিগী সীৎশিং অসি চহি চুপ্পা থনদুনা লৈ। লৈবাক্কী মফম কয়াদগী ভন্দে ভারত ত্রেন চেলহন্নবা দিমান্দ তৌনরক্লি। এম.পি.শিংদগী চীথি কয়া লাকখি, মখোয়না করি হায়রি? স্তেসন অসিদা স্ত্রেন খাম্বীনবা হায়রকপা ওইখি। ঙসিদি এম.পি.শিংনা ইরকখিবা চীথিশিং অদু থুংহনবা ঙমখি।

মরুপশিং,

রেলৱে পেসেঞ্জরশিংদা ফেসিলিতীশিং হেনগৎহন্নবা কেম্পেন খোঙজেল য়াংনা চত্থরি। চহি অসিগী বজেৎতা রেলৱেজতা অচৌবা শেনফম কাইথখি। রেলৱেজ চাউখৎহন্নবগী মতমদা কয়া ঙাংনরমদে। অদুবু চাউখৎনবগী ফিরেপ অসি ময়েক শেংবনা অনৌবা লম্বী থোরক্লি। হৌখিবা চহি ৯দা ঐখোয়না রেলৱেজকী বজেৎ হেনগৎহনখি। মধ্য প্রদেশকীদমক হন্দক রেলৱে বজেৎ লুপা করোর লিশিং ১৩ হেন্না কাইথখি। অমরোমদা ২০১৪গী মমাংদা মধ্য প্রদেশকীদমক রেলৱে বজেৎ অসি লুপা করোর ৬০০ খক্তা ওইরমখি।

মরুপশিং,

ঙসি ইলেক্ত্রিফিকেসনগী থবক চত্থরিবা আসি রেলৱেজতা মোদর্নাইজেসন করম্না পাঙথোক্লি হায়বগী খুদম ওইরি। ঙসি নখোয়না লৈবাক্কী শরুক অমা নত্ত্রগা অমদা ১০০% ইলেক্ত্রিফিকেসন তৌবগী মতাংদা নুমিৎ খুদিংগী তাবা ফংলি। মধ্য প্রদেশ অসি চাদা ১০০ ইলেক্ত্রিফিকেসন তৌখিবা রাজ্য ১১গী মনুংদা চল্লি। ২০১৪গী মমাংদা চহি খুদিংগী রেলৱে রুৎ কিলোমিতর চাংচৎ ওইনা ৬০০ ইলেক্ত্রিফাইদ তৌখি। হৌজিক চহি অমদা কিলোমিতর চাংচৎ ওইনা ৬০০০ ইলেক্ত্রিফাইদ তৌখি। মসিনা ঐখোয়গী সরকারনা থবক তৌবগী খোঙজেল।

মরুপশিং,

ঙসি মধ্য প্রদেশ অসি শোত্থনা লৈতবা অসিদা নুংঙাইবা পোকই। হৌজিক মধ্য প্রদেশনা লেপ্পা লৈতনা চাউখৎপগী অনৌবা চহিচা অমা পুরক্লি। লৌউ-শিংউ নত্ত্রগা ইন্দস্ত্রী ওইরবসু ঙসিগী এম.পি.গী শক্তিনা ভারতকী শক্তি হেনগৎহল্লি। এম.পি.গী পরফোর্মেন্স অসি চাউখৎ-থৌরাংগী পেৱামিতরদা শীংথানীংঙাই ওইরি। মতম অমদা মধ্য প্রদেশ অসি বিমারু কৌরমখি। ঙসিদু মধ্য প্রদেশ অসি লায়রবশিংগীদমক য়ুমশিং শাবদা মাংজিল থারিবা রাজ্যশিংগী মরক্তা চনবা ঙম্লে। মধ্য প্রদেশনা য়ুমথোং খুদিংদা ঈশিং পীবগী অফবা থবক তৌরি। ঐখোয়গী মধ্য প্রদেশকী লৌমীশিংনা গেহু য়াওনা মহৈ-মরোং কয়া পুথোকপদা চাউনা রেকোর্দ থম্মি। ইন্দস্ত্রীশিংগী ৱাফমদসু রাজ্য অসিনা অনৌবা রেকোর্দশিং থম্মি। খোঙথাং পুম্নমক অসিনা মফম অসিদা লৈরিবা নহারোলশিংগীদমক লোইনাইদ্রবা খুদোংচাবশিং পীরি।

মরুপশিং,

চাউখৎপা লৈবাক অমা শেম্নবা খোঙথাংশিং লৌখৎলিঙৈ চৈরক্তা ঐহাক্না ইরৈবাকশিংবু ৱাফম অমদা পুক্নিং চীংশিনজনীংই। ২০১৪দগী হৌদুনা লৈবাক অসিদা মীওই খরনা মীয়ামদা ফোঙনা ঙাংলি অমসুং মখোয়গী ফিরেপ লাউথোক্লি। মখোয়না মোদীগী মীংচৎ থীহনগনি হায়রি। মসিগীদমক মীওই কয়ানা লোৎতুনা হায়রিবা মীওইশিং অদুবু শৌগৎলি। অমসুং খরনা লৈবাক্কী মপালদা লৈদুনা মখোয়গী থবক তৌরি। মীওইশিং অসিনা মোদীগী মীংচৎ থিহন্নবা হোৎনরি। অদুবু ঙসি ভারতকী লায়রবা, ভারতকী মিদল ক্লাস, ভারতকী ত্রাইবেল, ভারতকী দলিৎ-শোত্থরবশিং, ভারত মচা খুদিংমক্না মোদীগী চুঙ্গোই ওইদুনা লৈরি। মরম অসিনা মীওইশিং অদুনা শাওনীংবা পোক্লি। মীওইশিং অদুনা অনৌবা লালোং অমা পাইখৎখি। ২০১৪দা মখোয়না মোদীগী মীংচৎ থিহন্নবা ৱাশকখি। হৌজিক মীওইশিং অসিনা মোদীগী মোংফম তৌনবা ৱাশক্লি। কন্সপিরেসীশিংগী মরক্তা ইরৈবাকচা খুদিংমক্না লৈবাক্কী চাউখৎ থৌরাংদা মীৎয়েং চংগদবনি, জাতি শেমগৎপদা মীৎয়েং চংগদবনি। চাউখৎ ভারত অমদা মধ্য প্রদেশকী থৌদাং হেন্না হেনগৎলক্লি। অনৌবা ভন্দে ভারত এক্সপ্রেস অসি ফিরেপ অসিগী শরুক অমনি। মতমগা চুনবা ত্রেন অসিগীদমক মধ্য প্রদেশকী প্রজা পুম্নমক, ভোপালগী ইচিল-ইনাওশিংবু নুংঙাইবা ফোঙদোকচরি। হন্না-হন্না থাগৎচরি।

***