প্রধানমন্ত্রীগী লোইশঙ
প্রধান মন্ত্রীনা মধ্য প্রদেসকী ভোপালগী কম্লাপতি স্তেসন্দা বন্দে ভারত এক্সপ্রেস লমথাখ্রে
ইন্দোরদা রাম নবমীদা মীওই কয়া লৈখিদবদা অৱাবা ফোঙদোকখ্রে
“ভারত রেলৱেজগী পুৱারিদা অতাংবা থৌদোক অমা ওইনা তেল্লবা মতমগী মনুংদা প্রধান মন্ত্রী অমনা রেলৱে স্তেসন অমদা অনিরক চৎখ্রে”
“অনৌবা ৱাখল্লোন অমসুং থৌরাং অমগা লোয়ন্না হৌজিক ভারতনা থবক পায়খৎলি”
“বন্দে ভারত অসি ভারতনা মথুম-মরাং হৌবা অমসুং হরাওবগী খুদম অমনি। মসিনা ঐখোয়গী হৈশিংবা, থাজবা অমসুং তৌবা ঙম্বা ফোঙদোক্লে”
“ভোৎ ফংফম মীয়াম পেনহন্নবা হোৎনবদা মখোয় থবক চিল্লি, ঐখোয়না মীয়ামগী দরকার ওইবশিং ফংহন্নবা থবক পাংথোক্লি”
“‘স্তেসন অমা পোৎথোক অমা’গী মখাদা পোৎফম ৬০০ থবক তৌরি অমসুং অতেনবা মতমগী মনুংদা পোৎ লাখ ১ য়োনখ্রে”
“ভারত রেলৱেজ অসি লৈবাক অসিগী ইচম চম্বা ইমুংশিংগী খুদোংচাবা অমগা মান্নরে”
“ঙসি মধ্য প্রদেসনা লেপ্তনা চাউখৎলকপগী অনৌবা ৱারি অমা ইরি”
“মতম অমদা ‘বিমারু’ হায়না খঙনরম্বা রাজ্য অসি চাউখৎপগী হিরম খুদিংমক্তা মধ্য প্রদেসকী থবক অসি শিংথানিঙাইনি”
“ভারতকী লায়রবা, ভারতকী মিদল ক্লাস, ভারতকী ত্রাইবেলশিং, ভারতকী দলিত-বেকৱার্দ, ভারতমচা খুদিংমক ঐ ঙাকথোক্নবা চুঙ্গোই ওইরে”
Posted On:
01 APR 2023 5:11PM by PIB Imphal
ঙসি প্রধান মন্ত্রী শ্রী নরেন্দ্র মোদীনা ভোপাল অমসুং নিউ দিল্লি মরক্কী বন্দে ভারত এক্সপ্রেস মধ্য প্রদেসকী ভোপালগী রানি কম্লাপতি রেলৱে স্তেসন্দগী লমথাখ্রে। মফম অদুদা থুংলবগা, প্রধান মন্ত্রীনা রানি কম্লাপতি-নিউ দিল্লি বন্দে ভারত এক্সপ্রেস য়েংখি অমসুং অঙাংশিং অমসুং ত্রেনগী ক্রিউশিংগা ৱারি শানখি।
ইন্দোরদা লাইশঙ অমদা রাম নবমীদা থোকখিবা অৱাবা থৌদোক অদুগী নুংঙাইতবা ফোঙদোক্লদুনা প্রধান মন্ত্রীনা মহাক্কী ৱা ঙাংবা হৌখি অমসুং লৈখিদ্রবশিংগী মফমদা ইকায়খুম্নবা উৎখি অমসুং মখোয়গী ইমুং-মনুংশিংগী অৱাবা শরুক য়াখি। থৌদোক অদুদা শোক্লবশিং অথুবদা অনাবা ফগৎলক্নবা মহাক্না য়াইফ-পাউজেল পীখি।
মখোয়গী অহানবা বন্দে ভারত এক্সপ্রেস ত্রেন চেনবা হৌবদা প্রধান মন্ত্রীনা মধ্য প্রদেসকী মীয়াম থাগৎপা ফোঙদোকখি। মহাক্না হায়খি ত্রেন অসিনা দিল্লি অমসুং ভোপালগী মরক্তা চৎথোক-চৎশিনগী মতম হন্থহল্লগনি অমসুং শীনফম কয়াগী মীওইশিং অমসুং নহারোলশিংদা খুদোংচাহল্লগনি।
প্রধান মন্ত্রীনা হায়খি ঙসিগী থৌরম পাংথোকফম মফম রানি কম্লাপতি স্তেসন শঙ্গাবা অসি মহাক্কী লাইবক ফবনি। দিল্লি য়ৌবা ভারতকী অনৌবা বন্দে ভারত এক্সপ্রেস লমথাবগী খুদোংচাবা ফংবগীদমক থাগৎপা ফোঙদোকচরি। ঙসি অসি ভারত রেলৱেজগী পুৱারিদা অতাংবা থৌদোক অমা ওইনা তেল্লবা মতমগী মনুংদা প্রধান মন্ত্রী অমনা রেলৱে স্তেসন অমদা অনিরক চৎখ্রে।ঙসিগী থৌরম অসি অনৌবা ভারত্তা অনৌবা কাংলোন অমা অমসুং অনৌবা চৎনবীশিং শেম্বগী অচৌবা খুদম অমনি।
মহাক্না থৌরম অদুদা স্কুলগী মহৈরোয়শিংগা ৱারি শানবা অমসুং অঙাংশিংনা ত্রেনগী মরমদা খঙনিংবা পোকপগী মতাংদা প্রধান মন্ত্রীনা ফোঙদোকখি। মহাক্না হায়খি লম্বী অমদা, বন্দে ভারত অসি ভারতনা মথুম-মরাং হৌবা অমসুং হরাওবগী খুদম অমনি। মসিনা ঐখোয়গী হৈশিংবা, থাজবা অমসুং তৌবা ঙম্বা ফোঙদোক্লে।
প্রধান মন্ত্রীনা হায়খি ত্রেন অসিনা তুরিজমদা কান্নবা পীদুনা সাঞ্চি, ভিমবেক্তা, ভোজপুর অমসুং উদায়াগিরিদা লমকোয়বা মীওইশিং লাকপা হেনগৎলগনি। মসিনা থবক ফংবগী খুদোংচাবশিং, শেন্থোক অমসুং মশানা মশাবু থবক পীজবা হেনগৎহল্লগনি। মমাঙগী সরকারশিংনা মীয়ামগী দরকার ওইবশিং পাংথোক্তনা ভোৎ বেঙ্ক পেনহন্নবা থবক পাংথোকখি। ভোৎ ফংফম মীয়াম পেনহন্নবা হোৎনবদা মখোয় থবক চিল্লি, ঐখোয়না মীয়ামগী দরকার ওইবশিং ফংহন্নবা থবক পাংথোক্লি।ভারত রেলৱে অসি ইমুং কয়াগী চৎথোক-চৎশিনগী পাম্বৈনি, অদুগা করিগী মসি হান্না মতমগা চুনবা মওংদা শেমগৎত্রিবনো।
প্রধান মন্ত্রীনা হায়খি নিংতম্বা ফংলবা মতুংদা ভারতনা ফংহৌবা হান্নদগী লৈরক্লবা রেল নেতৱার্ক হৌখিবা সরকারশিংনা ইরাই লাইনা শেমগৎপা য়াবনি অদুবু রাজনিতিগী খুদোংচাবশিং য়েংবা মরম্না রেলৱেগী চাউখৎ-থৌরাংশিং পায়খৎখিদে। নিংতম্বা ফংলবা চহি কয়াগী মতুংদা, অৱাং-নোংপোক রাজ্যশিং রেল নেতৱার্কতা শেম্নদে। ভারতকী রেলৱেজ মালেমদা খ্বাইদগী ফবা রেল নেতৱার্ক ওইনা শেমগৎনবা সরকারনা থবক পায়খৎলে। রেল নেতৱার্ক অসিগী মী শেন্নদবা গেৎশিংনা মরম ওইদুনা মী শিবগী থৌদোকশিং থোকহনবনি। ঙসিদি ব্রোদ গেজ নেতৱার্কতা মী শেন্নদবা গেৎ অমতা লৈত্রে। মমাঙদা ত্রেন এক্সিদেন্তশিংদা মী শিবা অমসুং লন-থুমশিং মাঙবগী থৌদোকশিং য়াম্না তোইনা থোক্লমখি অদুবু ঙসিদি ভারত রেলৱে অশোই-অঙাম থোক্ত্রে। পেসেঞ্জরশিংগী সেকুরিতি হেন্না ফগৎনবা ভারত্তা শাবা ‘কভচ’গী শীজিন্নফম পাংথোক-চাউথোক্লে।
শ্রী মোদীনা হায়খি খোঙচৎ মনুংদা খুদোংথিবা অমা থোকপা মতমদা খুদক্তা চঙশিনবা অসিনা মরুওইনা নুপীশিংদা কান্নবা য়াম্না পী। তেক্নোলোজিগী মতেংনা লু-নানবা, মতম চাবা অমসুং তিক্কেতশিং নারোন্দা য়োনবগী থবকশিং য়েংশিল্লে। ‘স্তেসন অমা পোৎথোক অমা’ থৌরাংগী মখাদা মফম অমগী খুৎহৈবশিংগী পোৎথোকশিং মফম অমদগী মফম অমদা পুবদা রেলৱে শক্তি লৈরবা খুৎলায় অমা ওইরে। স্কিম অসিগী মখাদা, ত্রেন তোংলিবশিংনা জিলা অমগী হেন্দিক্রাফশিং, কলা, থোং-থাক্নবা কোন-লিকশিং, ফিরোলশিং অমসুং অয়েকপা লাইশিং স্তেসন অদুদগী লৈবা য়াগনি। লৈবাক অসিদা পোৎফম ৬০০ থবক তৌরি অমসুং অতেনবা মতমগী মনুংদা পোৎ লাখ ১ য়োনখ্রে।
প্রধান মন্ত্রীনা হায়খি ঙসিদি ভারত রেলৱেজ অসি লৈবাক অসিগী ইচম চম্বা ইমুংশিংগী খুদোংচাবা অমগা মান্নরে। রেলৱে স্তেসনশিং মতমগা চুনবা মওংদা শেমগৎলে, স্তেসন ৬০০০দা ৱাই.ফাইগী খুদোংচাবা লৈরে অমসুং স্তেসন ৯০০দা সি.সি.তি.ভি থম্লে। নহারোলশিংগী মরক্তা বন্দে ভারত এক্সপ্রেস পাম্নরে অমসুং লৈবাক্কী মফম খুদিংদা বন্দে ভারত পাম্নবা হেনগৎলক্লে।
প্রধান মন্ত্রীনা হায়খি চহি অসিগী বজেত্তা রেকোর্দ ওইনা রেলৱেগী শেনফম কাইথোক্লে। অচেৎপা ফিরেপ লৈরবা মতমদা, পাংথোক্কে খল্লিবা অদু ময়েক শেংই অমসুং অচেৎপা ফিরেপ লৈ, নৌবা লম্বী উরকই। হৌখিবা চহি ৯ অসিদা রেলৱেগী বজেত লেপ্তনা হেনগৎলক্লি অমসুং রেলগা মরী লৈনবা বজেত্তা মধ্য প্রদেসনা লুপা করোর ১৩,০০০ ফংলে, মসি ২০১৪গী মমাঙদা লুপা করোর ৬০০ ওইখিবা অদুগা চাংদম্নরবনি।
রেলৱে মতমগা চুন্না শেমগৎপগী খুদম পীরদুনা, প্রধান মন্ত্রীনা হায়খি নুমিৎ খুদিংগী লৈবাক্কী মফম খরদা রেলৱে নেতৱার্ক চাদা ১০০ ইলেক্ত্রিক ফংহনবা ঙম্লে। চাদা ১০০ ইলেক্ত্রিক ফংহনবা রাজ্য ১১গী মনুংদা মধ্য প্রদেসশু য়াওরে। চহি অমদা রেলৱে লম্বী ইলেক্ত্রিক ফংহনবগী চাং কিলোমিতর ৬০০দগী কিলোমিতর ৬০০০দা হেনগত্তুনা শরুক ১০ হেনগৎলে।
মহাক্না হায়খি ঙসি মধ্য প্রদেসনা লেপ্তনা চাউখৎলকপগী অনৌবা ৱারি অমা ইরি। লৌউ-শিংউ নত্ত্রগা উদোগ ওইগেরা, মধ্য প্রদেসকী থৌনা হেনগৎলকপা অসি ভারতকী থৌনা হেনগৎলকপনি।মতম অমদা ‘বিমারু’ হায়না খঙনরম্বা রাজ্য অসি চাউখৎপগী হিরম খুদিংমক্তা মধ্য প্রদেসকী থবক অসি শিংথানিঙাইনি। লায়রবশিং য়ুম শাবদা মাঙজিল থাবা রাজ্যশিংগী মনুংদা মধ্য প্রদেসশু য়াওরে। য়ুমথোঙ খুদিংদা থক্নবা ঈশিং পীবদা রাজ্য অসিনা অফবা থবক অমা পাংথোক্লি। গেহু য়াওনা মহৈ-মরোং কয়া পুথোকপদা রাজ্য অসিগী লৌমীশিংনা অনৌবা রেকোর্দ কয়া থম্লে। রাজ্য অসিদা উদোগশিংনা নহারোলশিংগীদমক মপান নাইদ্রবা খুদোংচাবা কয়া পীরি।
প্রধান মন্ত্রীনা হায়খি লৈবাক মনুং অমসুং মপান্দা মহাক্কী মিংচৎ থিহন্নবা থবক কয়া পায়খৎলি। ভারতকী লায়রবা, ভারতকী মিদল ক্লাস, ভারতকী ত্রাইবেলশিং, ভারতকী দলিত-বেকৱার্দ, ভারতমচা খুদিংমক ঐ ঙাকথোক্নবা চুঙ্গোই ওইরে। মীয়াম্না লৈবাক্কী চাউখৎ-থৌরাংদা মীৎয়েং চঙগদবনি। ঐখোয়না চাউখৎলবা ভারত্তা মধ্য প্রদেসকী থৌদাং হেনগৎহনগদবনি। মসিগী অনৌবা বন্দে ভারত এক্সপ্রেস অসি মসিগী ৱারেপ অসিগী শরুক অমনি।
থৌরম অদুদা মধ্য প্রদেসকী রাজ্যপাল শ্রী মঙ্গু ভাই পতেল, মধ্য প্রদেসকী চীফ মিনিস্তর শ্রী সিবরাজ সিংহ চৌহান অমসুং রেলৱেজগী য়ুনিয়ন মিনিস্তর শ্রী অশ্বিনি বৈষ্ণোশু শরুক য়াখি।
নুঙগীৱারোল
বন্দে ভারত এক্সপেসনা লৈবাক অসিদা পেসেঞ্জরশিং চৎথোক-চৎশিনগী অনৌবা মশক অমা তাক্লে। ভোপালগী রানি কম্লাপতি রেলৱে স্তেসন অমসুং নিউ দিল্লি রেলৱে স্তেসনগী মরক্তা হৌদোক্লিবা অনৌবা ত্রেন অসি ১১শুবা বন্দে ভারত সর্বিস অমসুং লৈবাক অসিদা ১২শুবা বন্দে ভারত ত্রেন ওইগনি। লৈবাক অসিনা মশানা শাজবা বন্দে ভারত এক্সপ্রেস ত্রেন অসিদা অনৌবা পেসেঞ্জরশিংগী খুদোংচাবশিং য়াওরে। মসিনা রেল তোংলিবশিং য়াংবা, হেন্না নুংঙাইবা অমসুং হেন্না খুদোংচাবা পীরগনি, তুরিজম চাউখৎহল্লগনি অমসুং লমদম অসিগী শেন্মিৎলোন চাউখৎহনগনি।
*****
(Release ID: 1912961)
Visitor Counter : 132
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Malayalam