• মসিগী অখন্নবা খোঙচৎ অসিনা ভারতকী অৱাং-নোংপোক্কী অসাম, অরুনাচল প্রদেস, নাগালেন্দ, ত্রিপুরা অমসুং মেঘালয় য়েংনবা খুদোংচাবা পীরে
• “অৱাং-নোংপোক মশক খঙশি:গুৱাহাতিগী ৱাংমদশু” হায়রিবা খৌরাংনা ঙাইরক্লবা ত্রেনগী খোঙচৎ অসি নুমিদাং ১৪/নুংথিল ১৫গী খোঙচত্তা ঙসি দিল্লি সাফদারজুং রেলৱে স্তেসন্দগী খোঙশানখ্রে
• এ.সি ফার্স্ত অমসুং এ.সি সেকেন্দ ক্লাস য়াওরবা অনৌবা দিলক্স এ.সি তুরিস্ত ত্রেন অসিদা লমকোয়বা মীওই পুন্না ১৫৬ তোঙবা য়াগনি
• খোঙচৎ অদুদা অসামগী গুৱাহাতি, সিবসাগর, জোরহাত, কাজিরঙ্গা, ত্রিপুরাগী উনাকোতি, অগরতালা অমসুং উদয়পুর, নাগালেন্দগী দিমাপুর অমসুং কোহিমা অমসুং মেঘালয়গী শিল্লোং অমসুং চেরাপুঞ্জি য়ৌগনি

ভারতকী অৱাং-নোংপোক রাজ্যশিং য়ৌনবা অখন্ননা থৌরাং তৌবা খোঙচৎকী “অৱাং-নোংপোক মশক খঙশি:গুৱাহাতিগী ৱাংমদশু” হায়রিবা ভারত গৌরব ত্রেন ভারত সরকারগী মপান থৌরম অমসুং নাৎকী রাজ্য মন্ত্রী শ্রীমতি মীনাক্সি লেখিনা ঙসি দিল্লি সাফদারজুং রেলৱে স্তেসন্দগী  লমথাখ্রে।

থৌরম অদুদা শ্রীমতি লেখিনা হায়খি চাইত্রা নবরাত্রি/গুদি পারৱা মাঙওইন্না খোঙচৎ অসি হৌখিবগা লোয়ন্না মসিগী ত্রেন অসি অখন্নবা অমনি। ঐনা ময়াম পুম্নমক্তা ঐগী য়াইফ-পাউজেল পীজরি। মসি তশেংনবা ঐখোয় পুম্নমক্কী খুদোল অমনি। মহাক্কী পান্দম অমসুং রেলৱেজ ফগৎহন্নবা থবকশিংগীদমক মহাক্না প্রধান মন্ত্রী থাগৎখি।

ত্রেন অদু ঙসি দিল্লি সাফদারজুং রেলৱে স্তেসন্দগী চেনবা হৌখি অমসুং নুমিৎ ১৫গী খোঙচৎ মনুংদা অসামগী গুৱাহাতি, সিবসাগর, জোরহাত, কাজিরঙ্গা, ত্রিপুরাগী উনাকোতি, অগরতালা অমসুং উদয়পুর, নাগালেন্দগী দিমাপুর অমসুং কোহিমা অমসুং মেঘালয়গী শিল্লোং অমসুং চেরাপুঞ্জি য়ৌগনি।

নুমিদাং ১৪ অমসুং নুংথিল ১৫গী খোঙচৎ মনুংদা, ত্রেন অসি অহানবা ওইনা গুৱাহাতিদা লেপ্লগা কামাখ্যা লাইশঙ য়েংগনি অমসুং তুংদা উমানন্দা লাইশঙদা চৎকনি অমসুং ব্রাহ্মাপুত্রাদা নুমিদাংৱাইরমগী ক্রুইজ অমা তোংগনি। মখা তানা ত্রেন অসি মথংগী পন্থুংফম অরুনাচল প্রদেসকী কোনুং ইতানাগরদগী কিলোমিতর ৩০ লাপ্না লৈবা নহারলাগুন রেলৱে স্তেসনগীদমক গুৱাহাতি থাদোক্কনি। মথংদা অসামগী অহোম কিংদমগী অরিবা কোনুং সিবসাগর য়েংগনি। খোঙচৎ অদুদা সিবসাগরদা লৈবা মমিং লৈরবা সিবা লাইশঙ, সিবদোল য়েংগনি। মখা তানা জোরহাত্তা লৈবা চা হৌফমশিং য়েংগনি অমসুং কাজিরঙ্গদা নুমিদাং অমা লেক্লবা মতুংদা অঙনবা অয়ুক্তা কাজিরঙ্গা নেসনেল পার্কতা জঙ্গল শাফারি অমা লমকোয়বা মীওইশিংনা য়াওগনি।

মমিং চৎলবা উজ্জয়েন্তা কোনুং য়াওনা অগরতালা অমসু উনাকোতিগী মমিং চৎলবা হেরিতেচ সাইতশিং য়েংলবা মতুংদা দিলক্স এ.সি ত্রেন অদু ফুরকাতিং রেলৱে স্তেসন থাদোক্কনি। মথংগী নুমিত্তা উদয়পুরদা নিরমহাল কোনুং অমসুং ত্রিপুরা সুন্দরিমন্দির য়েংগনি। ত্রিপুরাগী মতুংদা, ত্রেন অদু নাগালেন্দগী দিমাপুরগীদকমক খোঙশানগনি। বাদারপুর স্তেসন্দগী লুমদিং জঙ্কসনগী মরক্কী ত্রেন খোঙচৎ মনুংদা লমকোয়বশিংনা অঙনবা অয়ুক্তা মখোয়গী সিতশিংদগী নিংথিরবা মফমশিং উবা ফংগনি। খোনোমা খুঙ্গংদা নাগাগী পুন্সি মহিং য়েংবা য়াওনা মফম কয়া য়েংনবা দিমাপুর স্তেসন্দগী কোহিমা ফাওবা লমকোয়বা মীওইশিংনা বসনা পুগনি। মথংদা ত্রেন অদু গুৱাহাতিদা লেপকনি অমসুং লমকোয়বা মীওইশিং লম্বীদা মেঘালয়গী কোনুং শিল্লোং ফাওবা পুগনি অমসুং লম্বীদা নিংথিরবা উমিয়ম পাৎ য়েংহনগনি। মথংগী নুমিত্তা ইস্তা খাসি হিলস্তা লৈবা চিরাপুঞ্জিদা চৎকনি। নুমিৎ অদুদা শিল্লোং পিক, ইলিফেন্ত ফোলস, নৌখাইলিকাই ঈশিং চাইবী অমসুং মৌসমাই শুরুং য়েংগনি। লমকোয়বা মীওইশিং চিরাপুঞ্জিদগী গুৱাহাতিদা হল্লক্লবা মতুংদা দিল্লিদা হন্নবা ত্রেন তোংগনি। মসিগী ত্রেনগী অপুনবা খোঙচৎ অসিদা লমকোয়বা মীওইশিংনা চাউরাক্না কিলোমিতর ৫৮০০ রোম চৎকনি।

অনৌবা দিলক্স এ.সি তুরিস্ত ত্রেন অসিদা চাফম-থকফম রেসতুরান্ত অনি, চাকশঙ অমা,  কোচশিংদা সোৱার কুবিকলশিং, সেন্সর য়াওবা ৱাসরুমগী খুদোংচাবশিং, ফুত মাসাজ তৌফম অমসুং অপীকপা লাইব্রেরি অমা য়াওরি। মপুংফানা এয়র-কন্দিসন তৌরবা ত্রেন অসিদা এ.সি-১ অমসুং এ.সি-২গী ক্লাসশিং য়াওরি। ত্রেন অসিদা সি.সি.তি.ভি কেমারাশিং, ইলেক্ত্রোনিক সেফশিং অমসুং অখন্নবা সেকুরিতি গার্দশিং কোচ অমমমগী য়াওরি।

লৈবাক অসিদা তুরিজম চাউখৎহন্নবা ভারত সরকারগী ‘এক ভারত শ্রেস্থা ভারত’ অমসুং ‘দেখো অপ্না দেস’ থৌরাংগী মখাদা ভারত গৌরব তুরিস্ত ত্রেন হৌদোকপনি। ত্রেন খোঙচৎ অসিগী মমল মীওই অমদা এ.সি-২ তয়ারদা লুপা ১,০৬,৯৯, মীওই অমদা এ.সি-১(কেবিন)দা লুপা ১,৩১,৯৯০ অমসুং মীওই অমদা এ.সি-১(কোপ)দা লুপা ১,৪৯,২৯০নি। নুমিৎ ১৫গী আই.আর.সি.তি.সি তুরিস্ত ত্রেন অসিগী মমলদা ত্রেন খোঙচৎকী ভারা,  এ.সি হোতেলশিংদা অহিং তুম্বা, চাক্লেন(ভেজ), বস তোংবগী ভারা, ত্রাবেল ইন্সুরেন্স অমসুং গাইদকী চার্জ খুদিংমক য়াওরে। দরকার ওইবা হকশেলগী চেকশিন-থৌরাংশিং আই.আর.সি.তি.সিনা লৌগনি অমসুং লমকোয়বা মীওইশিং নিংশিংদুনা লৈহৌরগদবা খোঙচৎ অমা ওইহৌনবা হোৎনগনি।

*****