امور داخلہ اور امداد باہمی کے مرکزی وزیر جناب امت شاہ نے آج گجرات کے گاندھی نگر میں انڈین ڈیری ایسوسی ایشن (آئی ڈی اے) کے زیر اہتمام 49ویں ڈیری انڈسٹری کانفرنس میں بطور مہمان خصوصی شرکت کی۔ اس موقع پر گجرات کے وزیر اعلیٰ بھوپیندر پٹیل سمیت کئی معززین موجود تھے۔

اپنے خطاب میں جناب امت شاہ نے کہا کہ ڈیری دنیا کے لیے ایک کاروبار ہے لیکن 130 کروڑ کی آبادی والے ہندوستان جیسے ملک میں یہ روزگار کا ذریعہ ہے، دیہی معیشت کو مضبوط کرنے کا متبادل ہے، مسائل کا حل ہے۔ غذائیت کی کمی اور خواتین کو بااختیار بنانے کے لیے بے پناہ امکانات کا ایک شعبہ ہے۔ انہوں نے کہا کہ ہندوستان کی آزادی کے بعد سے اگر ہم ڈیری صنعت کی ترقی پر نظر ڈالیں تو یہ ظاہر ہوتا ہے کہ ڈیری سیکٹر نے ان تمام پہلوؤں کو ملک کی ترقی کے ساتھ جوڑا ہے۔ جناب شاہ نے کہا کہ کوآپریٹیو ڈیری جس نے کسانوں کی خوشحالی کے لیے کام کیا ہے، اس میں اس کا بہت بڑا تعاون ہے۔ کوآپریٹو ڈیری نے ملک کی غریب خواتین کسانوں کو خود کفیل بنانے کی راہ ہموار کی ہے۔ انہوں نے کہا کہ آزادی کے 75ویں سال میں وزیر اعظم جناب نریندر مودی نے ‘‘سہکار سے سمردھی’’ کے منتر کو پورا کرنے کے لیے امداد باہمی کی وزارت کی تشکیل کی۔

مرکزی وزیر داخلہ اور امداد باہمی کے وزیر نے کہا کہ انڈین ڈیری ایسوسی ایشن 1948 میں آزادی کے فوراً بعد قائم ہوئی تھی اور آئی ڈی اے نے ملک میں ڈیری سیکٹر کی ترقی میں اہم کردار ادا کیا ہے۔ انہوں نے کہا کہ اس کانفرنس میں ہندوستان کے ڈیری سیکٹر کو دنیا میں سب سے مضبوط بنانے کے لئے جامع بحث کرنے کی کوشش کی گئی ہے۔ انہوں نے کہا کہ ہمارے ڈیری اور مویشی پالن کا شعبہ ملک کی جی ڈی پی میں 4.5 فیصد کا تعاون کرتا ہے اور زراعت کے شعبے میں ڈیری سیکٹر کا حصہ 24 فیصد ہے جس کی مالیت تقریباً 10 لاکھ کروڑ روپے ہے اور یہ دنیا میں سب سے زیادہ ہے۔ جناب شاہ نے کہا کہ ڈیری ہماری معیشت کا ایک مضبوط حصہ ہے اور روزگار کے معاملے میں 9 کروڑ دیہی گھرانوں کے تقریباً 45 کروڑ لوگ، خاص طور پر معمولی کسان اور خواتین، آج ڈیری کے شعبے سے براہ راست منسلک ہیں۔

جناب امت شاہ نے کہا کہ ہمارے ڈیری سیکٹر نے گزشتہ دہائی میں 6.6 فیصد کی سالانہ شرح سے ترقی کی ہے۔ انہوں نے کہا کہ امداد باہمی کی وزارت، نیشنل ڈیری ڈیولپمنٹ بورڈ (این ڈی ڈی بی) اور وزیر اعظم جناب نریندر مودی کی طرف سے تشکیل کردہ مویشی پروری کا محکمہ ملک میں 2 لاکھ پنچایتوں میں دیہی ڈیری قائم کرے گا اور اس کے بعد ڈیری سیکٹر کی ترقی کی شرح بڑھے گی اور یہ 13.80 فیصد تک پہنچ جائے گی۔ انہوں نے کہا کہ ہماری دودھ کی پروسیسنگ کی صلاحیت تقریباً 126 ملین لیٹر یومیہ ہے جو کہ دنیا میں سب سے زیادہ ہے۔ جناب شاہ نے کہا کہ ہم اپنی کل دودھ کی پیداوار کے 22 فیصد پر عملدرآمد کرتے ہیں، جس سے کسانوں کو آمدنی میں اضافہ کی صورت میں فائدہ ہوتا ہے۔ انہوں نے کہا کہ ڈیری مصنوعات کی برآمد میں دودھ پاؤڈر، مکھن اور گھی جیسی مصنوعات کا بھی بڑا حصہ ہے اور اس میں بے پناہ صلاحیت موجود ہے۔ انہوں نے کہا کہ وزیر اعظم جناب نریندر مودی کی قیادت والی حکومت نے برآمدات کے لیے ایک کثیر ریاستی کوآپریٹو سوسائٹی بنائی ہے اور اسے ان 2 لاکھ دیہی ڈیریوں سے جوڑنے سے برآمدات میں 5 گنا اضافہ ہونے کا امکان ہے۔

امداد باہمی کے مرکزی وزیر نے کہا کہ دنیا کے ڈیری منظر نامے پر نظر ڈالیں تو 1970 میں ہندوستان میں روزانہ تقریباً 6 کروڑ لیٹر دودھ پیدا ہوتا تھا اور یہ دودھ کی قلت والا ملک تھا۔ انہوں نے کہا کہ 2022 میں یہ پیداوار بڑھ کر 58 کروڑ لیٹر یومیہ ہو گئی ہے اور ڈیری سیکٹر نے اس میں بہت بڑا کردار ادا کیا ہے۔ انہوں نے کہا کہ 1970 سے 2022 تک ہندوستان کی آبادی میں 4 گنا اضافہ ہوا ہے جبکہ دودھ کی پیداوار میں 10 گنا سے زیادہ اضافہ ہوا ہے۔ انہوں نے کہا کہ 1970 میں ملک میں فی کس دودھ کی کھپت 107 گرام تھی، آج یہ بڑھ کر 427 گرام فی کس ہو گئی ہے جو کہ عالمی اوسط 300 گرام سے زیادہ ہے۔ جناب شاہ نے کہا کہ وزیر اعظم جناب نریندر مودی کی قیادت والی حکومت ڈیری سیکٹر کی ترقی کے لیے کوئی موقع ضائع نہیں کرے گی اور تمام کوششیں کی جا رہی ہیں تاکہ ہندوستان دنیا میں دودھ برآمد کرنے والا سب سے بڑا ملک بن کر ابھرے۔

جناب امت شاہ نے کہا کہ آج ملک میں سفید انقلاب-2 کی ضرورت ہے اور ہم وزیر اعظم جناب نریندر مودی کی قیادت میں اس سمت میں آگے بڑھ رہے ہیں۔ انہوں نے کہا کہ ڈیری سیکٹر میں کوآپریٹو ماڈل آمدنی، غذائیت، مویشیوں کی دیکھ بھال، انسانی مفادات کا تحفظ، روزگار اور خواتین کو بااختیار بنانے سمیت تمام پہلوؤں کا احاطہ کرتا ہے۔ جناب شاہ نے کہا کہ پورے نظام میں کسان اور صارف کے درمیان درمیانی افراد کو ختم کرکے، کوآپریٹو ماڈل کسان کو زیادہ سے زیادہ منافع فراہم کرتا ہے۔ انہوں نے کہا کہ وزیر اعظم جناب نریندر مودی کی قیادت میں حکومت ڈیری سیکٹر میں کوآپریٹو ماڈل کو مضبوط بنانے کی کوششیں کر رہی ہے۔

مرکزی وزیر داخلہ اور امداد باہمی کے وزیر نے کہا کہ آج دودھ کی پیداوار میں ہندوستان کا حصہ 21 فیصد تک پہنچ گیا ہے اور امول ماڈل نے اس میں بہت زیادہ تعاون کیا ہے۔ انہوں نے کہا کہ وزیر اعظم جناب نریندر مودی کی قیادت والی حکومت ہندوستان میں ڈیری سیکٹر کی 360 ڈگری ترقی کے لیے ہر ممکن کوشش کر رہی ہے۔ جناب شاہ نے کہا کہ ملک میں 2 لاکھ پرائمری دودھ پروڈکشن سوسائٹیوں کے قیام کے بعد دنیا کی دودھ کی پیداوار کا 33 فیصد ہندوستان میں ہونے کا امکان ہے اور اس کے لیے وزیر اعظم مودی کی قیادت میں حکومت، ریاستی حکومتیں اور کوآپریٹو موومنٹ کو ملکر کام کرنا پڑے گا. انہوں نے کہا کہ ہندوستان کو دودھ کی پیداوار کے ساتھ ساتھ دودھ کی ڈبہ بندی کے آلات کے میدان میں دنیا کی سب سے بڑی منڈی بننا چاہئے۔ جناب شاہ نے کہا کہ ہمیں اس مقصد کے ساتھ آگے بڑھنا ہے کہ 34-2033 تک ہندوستان ہر سال تقریباً 330 ایم ایم ٹی دودھ کی پیداوار کے ساتھ دنیا کا 33 فیصد دودھ پیدا کرے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ش ح۔ م ع۔ع ن

 (U: 2934)