ভারতকী রাস্ত্রপতি শ্রীমতি দ্রৌপদি মুর্মুনা ঙসি (ফেব্রুৱারী ২৫,২০২৩)দা দিল্লীদা ৯৯শুবা দিল্লী য়ুনিভর্সিতীগী চহিগী কনভোকেসন্দা ৱা ঙাংখ্রে।

থৌরম অদুদা ৱা ঙাংলদুনা রাস্ত্রপতিনা হায়খি মদুদি দিল্লী য়ুনিভর্সিতীনা ভারতকী ইনাক খুনবা অমসুং তোঙান-তোঙানবা মশকশিং উৎলি হায়না হায়বা য়াই। মসিমসু হায়বা য়াই মদুদি ভারত্তা লৈরিবা অমসুং মপান্দা মাংজিল থারিবা কয়া অসিদা দিল্লী য়ুনিভর্সিতীগী শরুক অমদি অদুমক য়াওই। অদুমওইনমক, ইন্সতিত্যুসন অমত্তনা মখোয়দা থম্লিবা মায় পাকপগী ইকাইখুম্নবা অসিদা য়েংদুনা লৈবদি য়ারোই। খোঙজেল য়াঙনা অহোংবা কয়া লৈরিবা ঙসিগী মালেম অসিদা, ইন্সতিত্যুসন অমনা লেপ্পা লৈতনা মশাগী ওইবা অনৌবা পুথোক্নবা হোৎনগদবনি। দিল্লী য়ুনিভর্সিতী কম্ম্যুনিতী অসিনা লৈবাক অসিগী অতোপ্পা য়ুনিভর্সিতীশিংবু মীথোই মীহেনবা ওইনবা হীরম কয়াদা লুচিংগদবনি অমসুং মসিদগী অৱাংবা থাক্কী মহৈ মশিংদা মালেমগী থাক্তা চাংদম্নবা য়াবা মফম অমা কনগদবনি।

রাস্ত্রপতিনা হায়খি মদুদি ঐখোয়না লোল অমসুং নাৎ খুদিংমকপু ইকাইখুম্নগদবনি অমসুং তরাম্না ওক্কদবনি, অদুবু ঐখোয়গী হৌরকফমদদি মতম চুপ্পদা শম্নদুনা লৈহনগদবনি। ময়োল চোংহনবা অমসুং অনৌবা পুথোকপগী ৱাখল্লোন অসিসু মরাদগী লাক্কদবনি। মহাক্না নহাশিংদা গান্ধীজিগী মালেম পুম্বদা ফংলিবা ৱাখল লৌশিং কয়া অসিবু লৌশিন্নবা পাউতাক অদু ইনবগা লোইননা ভারতকী লৈহাওগা শম্নদুনা লৈনবা পুক্নিং চিংশিনখি।

মহৈরোইশিংদা ৱা ঙাংলদুনা রাস্ত্রপতিনা হায়খি মদুদি মহাক্না মহাক্কী খুঙ্গংদগী শহরদা মহৈ তম্নবা লাকখিবা অহানবা নুপী মচানি। মখোয়গী ক্লাস ফম্মিন্নবশিংগী মরক্তসু মখোয়গী মমাংদা য়ুনিভর্সিতীগী মহৈ তম্বা লৈখিদ্রিবা খুঙ্গং অমসুং ইমুং মনুংদগী লাকপয়া কয়া অমা য়াওরমগনি। অদুগুম্বা মহৈরোইশিং অসি য়াম্না হৈশিংই অমসুং হোৎনবা কল্লি। মখোয়না য়ুনিভর্সিতীদা মখোয়গী মঙলানশিং মঙফাওননবগী অচৌবা ৱাখল্লোনগা লোইননা লাকখি। মখোয়সি মরক মরক্তা 'হন্থনা য়েংবীবগী' চৈথেং ফংখি। মসি ৱাখল লৈবা খুন্নাই অমদদি কৈদৌনুংদা থোকহল্লোইদবনি। অসিগুম্বা অহানবা চারোলগী মহৈরোইশিংবু পুক্নিং থৌগৎপদা ওজাশিং অমসুং মহৈরোইশিংগী থৌদাং লৈ।

রাস্ত্রপতিনা হায়খি মদুদি ঐখোয়না মহৈরোই নুপীমচাশিংগী লূ নানবা তোইলেত, মালেমগী থাক্তা লৈবা লেবোরেতরীশিং, অশেংবা মগুন চেনবা মহৈ অমসুং নাম্মা শোইরবা মীওইশিংগী অৱাৎপশিংগুম্বা লৈরিবা তঙাইফদবা খুদোংচাদবশিং য়েংশিনগদবনি।

রাস্ত্রপতিনা হায়খি মদুদি চাউখৎপা অমসুং খুন্নাইরোলদা লৈরিবা লৈবগী ৱাখল্লোন অসিনা মরম ওইদুনা মোৎশিনবা, অইং অশা হোংলকপা, অমসুং পুন্সি মহিংগা মরী লৈনবা লাইনা কয়া অমনা অকনবা শক্লোন লৌরক্লি। ঐখোয়গী হৌখ্রবা মীরোলশিংনা অফবা থবক কয়া অমা তৌবীরম্মি অদুবু মখোয়না অশোইবা খরসু তৌখ্রে। মহাক্না নহা ওইরিবা মীরোলশিং অসিদা অফবা থবকশিংবু মাংজিল থানা পুখৎনবা অমসুং অশোইবশিং অদুবু শেমদোক্নবা পুক্নিং চিংশিনখি।

রাস্ত্রপতিনা হায়খি মদুদি মহৈ তম্বগী মরুওইবা পান্দমদি হেন্না ফবা মীওইবা অমা ওইনবা হোৎনবনি। পুন্সিদা অচৌবা ওইবা হায়বসি য়াম্না ফৈ অদুবু হেন্না ফবা মীওইবা অমা ওইবা হায়বসিনা হেন্না অফবা ওইরি। মার্সতা পুন্সি তাব্রা হায়বা থিজিনবসি য়াম্না ফবা অমনি, অদুবু অফবা ৱাখল্লোন খনবা অফবা থৱাই থিবনা হেন্না মরুওই। মহাক্না মহৈরোইশিংদা অনৌবা মঙলান অমসুং অচৌবা মঙলান মঙদুনা অনৌবা ভারত অমসুং অনৌবা মালেম অমা শেমগৎনবা পুক্নিং চিংশিনখি।

রাস্ত্রপতিগী ৱারোল পাবীনবা মফম অসিদা নম্বীয়ু -

***************