প্রধান মন্ত্রী, শ্রী নরেন্দ্র মোদী ফেব্রুৱারী ২৭, ২০২৩দা কর্নাতকাদা চৎকদৌরি‍। অয়ুক্কী পুং ১১:৪৫রোম তাবা মতমদা প্রধান মন্ত্রীনা সিবামোগা এয়রবোর্ত কোয়না চত্তুনা য়েংশিল্লবা মতুংদা, সিবামোগাদা তোঙান তোঙানবা প্রোজেক্তশিং শঙ্গাগনি অমদি উরেপ উয়ুং তমগনি‍। তুংদা, নুংথিল পুং ৩:১৫রোম তাবা মতমদা প্রধান মন্ত্রীনা বেলাগবিদা চাউখৎ থৌরাংগী প্রোজেক্ত কয়া উরেপ উয়ুং তমগনি ঐমদি লৈবাক মীয়ামদা কত্থোক্কনি, অমদি পি.এম.-কিসানগী ১৩শুবা ইন্সতোলমেন্তসু থাদোক্কনি‍।

সিবামোগাদা প্রধান মন্ত্রী

প্রধান মন্ত্রীনা লৈবাক শিনবা থুংনা নোংথক্কী কন্নেক্তিবিতীদা থম্লিবা মরুওইবা মীৎয়েঙ অসিদা সিবামোগা এয়রপোর্ত শঙ্গাগদৌরিবা অসিনা ইনোৎ অমা হাপ্লগনি‍। অনৌবা এয়রপোর্ত অসি লুপা করোর ৪৫০রোম চঙনা শেমগৎপনি‍। এয়রপোর্ত অসিগী পেসেঞ্জর তর্মিনেল বিল্দিং অসিনা পুংদা পেসেঞ্জর ৩০০গী চাংদা পুবা ঙমগনি‍। এয়রপোর্ত অসিনা সিবামোগা অমদি মল্নাদ রীজনগী থংনবা মফমশিংদা কন্নেক্তিবিতীগী ফীভম ফগৎহল্লগনি‍।

প্রধান মন্ত্রীনা সিবামোগাদা রেলৱে প্রোজেক্ত অনিগী উরেপ উয়ুং তমগনি‍। মসিদা সিবামোগা – সিকারিপুর – রনেবেন্নুর নিউ রেলৱে লাইন অমদি কোতেনঙ্গুরু রেলৱে কোচিং দিপো য়াওরি‍। সিবামোগা – সিকারিপুর – রনেবেন্নুর নিউ রেলৱে লাই অসি লুপা করোর ৯৯০রোম চঙনা শেমগৎকদবনি অমদি মলনাদ রীজনগা বেঙ্গলুরু-মুম্বাই মেনলাইনগগী মরক্তা কন্নেক্তিবিতীগী ফীভম ফগৎহনগনি‍। কোতেনঙ্গুরু রেলৱে কোচিং দিপো অসি সিবামোগা ময়োল্লমদা সিবামোগাদগী অনৌবা ত্রেনশিং হৌদোক্নবা অমদি বেঙ্গলুরু অমদি মৈসুরুদা মেন্তেনেন্স ফেসিলিতীশিং চিনবা হন্থহন্নবগীদমক লুপা করোর ১০০ হেন্না চঙনা শেমগৎকদবনি‍।

প্রধান মন্ত্রীনা য়াম্লবা লম্বী শেম্বগী প্রোজেক্তশিং উরেপ উয়ুং তমগনি‍। পুন্না লুপা করোর ২১৫ হেন্না চঙনা শেমগৎকদবা প্রোজেক্তশিং অসিদা বীন্দুর – রানিবেন্নুর শম্নহন্দুনা এন.ঐচ. ৭৬৬সি.দা সিকারিবুর ময়োল্লমগী অনৌবা বাইপাস লম্বী; মেকারবল্লীদগী অগুম্বে ফাওবগী এন.ঐচ. ১৬৯এ.গী শরুক পাকথোকহনবা; অমদি এন.ঐচ. ১৬৯দা থিরথহল্লী তালুক্তা লৈবা ভারথিপুরদা অনৌবা থোং শেমগৎ শাগৎপগী থবকশিং য়াওরি‍।

থৌরম অসিদা, প্রধান মন্ত্রীনা জল জীবন মিসনগী মখাদা লুপা করোর ৯৫০ হেন্না চঙনা শেমগৎপা মল্তি-ভিলেজ স্কিমশিং শঙ্গাগনি অমদি উরেপ উয়ুং তমগনি‍। মসিদা গৌথমপুর অমদি অতৈ খুঙ্গং ১২৭কী মল্তি-ভিলেজ স্কিম অমা শঙ্গাবা অমদি পুন্না লুপা করোর ৮৬০ হেন্না চঙনা শেমগৎকদবা অতৈ মল্তি-ভিলেজ স্কিম অহুমগী উরেপ উয়ুং তম্বা য়াওরি‍। স্কিম মরি অসিনা নীংথিনা মথৌ তৌবা য়ুমথোঙগী তোতি ঈশিংগী কন্নেক্সন পীগনি অমদি পুন্না মীওই লাখ ৪.৪দা কান্নবা পীগনি হায়না পারি‍।

প্রধান মন্ত্রীনা সিবামোগা ময়োল্লমদা লুপা করোর ৮৯৫ হেন্বগী স্মার্ত সিতী প্রোজেক্ত ৪৪শু শঙ্গাগনি‍। প্রোজেক্তশিং অসিদা কিলোমিতর ১১০ শাংবা স্মার্ত রোদ পেকেজ ৮; ইন্তিগ্রেতেদ কম্মান্দ এন্দ কন্ত্রোল সেন্তর অমদি মল্তি-লেবেল কার পার্কিং; স্মার্ত বস সেল্তর প্রোজেক্তশিং; ইন্তলিজেন্ত সোলিদ ৱেস্ত মেনেজমেন্ত সিস্তেম;, সিবপ্পা নাইক পেলেসনচিংবা হেরিতেজ প্রোজেক্তশিং ইন্তরেক্তিব ম্যুজিয়ম ওইনা শেমগৎপা, কঞ্জার্বেন্সী লেন ৯০ শেমগৎপা, পার্ক অমদি রিভরফ্রন্ত প্রোজেক্তশিং শেমগৎপা, অমদি অতৈশিং য়াওরি‍।

বেলাগবিদা প্রধান মন্ত্রী

লৌমীশিংগী য়াইফনবগীদমক প্রধান মন্ত্রীনা লেপ্লিবা ফিরেপকী অতোপ্পা খুদম অমা উৎনবগী খোঙথাঙ অমা ওইনা, প্রধান মন্ত্রী কিসান সম্মান নিধি (পি.এম.-কিসান)গী মখাদা ১৩শুবা ইন্সতোলমেন্তকী লুপা করোর ১৬,০০০লোমগী শেনফম, বিনিফিসরী করোর ৮ হেনবদা দাইরেক্ত বেনিফিৎ ত্রান্সফরগী খুত্থাঙদা থাদোক্কনি‍। স্কিম অসিগীম খাদা ইলিজিবল ওইবা লৌমীশিংদা চহিদা লুপা ৬০০০কী শেনফম লুপা ২০০০গী মান্নবা ইন্সতোলমেন্ত অহুম থোক্না পীরি‍।

থৌরম অসিদা, প্রধান মন্ত্রীনা নৌনা শেমগৎলবা বেলাগবি রেলৱে স্তেসন লৈবাক্কী মফমদা কত্থোক্কনি‍। রেলৱে স্তেসন অসি পেসেঞ্জরশিংদা মালেমগী থাক্কী খুদোংচাবশিং ফংহন্নবগীদমক লুপা করোর ১৯০রোম চঙনা নৌনা শেমগৎপনি‍। প্রধান মন্ত্রীনা লৈবাক্কী মফমদা কত্থোক্কদবা অতোপ্পা রেলৱে প্রোজেক্ত অমদি বেলাগবিদা লৈরিবা লোন্দা-বেলাগবি-ঘদপ্রভা সেক্সনগী মরক্তা পায়খৎপা রেল লাইন দব্লিং প্রোজেক্তনি‍। লুপা করোর ৯৩০ রোম চঙনা শেমগৎলিবা প্রোজেক্ত অসিনা য়াম্না চিনবা মুম্বাই – পুনে – হুব্বলী – বেঙ্গলুরু রেলৱে লাইনগী কেপাসিতী হেনগৎহন্দুনা, লমদম অসোমদা ত্রেদ, কম্মর্স অমদি শেন্মিৎলোনগী থবক থৌওংশিং য়োকখৎকনি‍।

প্রধান মন্ত্রীনা বেলাগবিদা জল জীবন মিসনগী মখাদা লুপা করোর ১৫৮৫রোম চঙনা শেমগৎকদৌরিবা অমদি খুঙ্গং ৩১৫দা মীওই লাখ ৮.৮ হেনবদা কান্নবা পীগদবা মল্তি ভিলেজ স্কিম প্রোজেক্ত তরুক্কী উরেপ উয়ুংসু তমগনি‍।

***