উত্তর প্রদেশকী রাজ্যপাল শ্রীমতী অনন্দীবেন পতেল, উত্তর প্রদেশকী মুখ্য মন্ত্রী য়োগী অদিত্যনাথ জী, উপ-মুখ্যমন্ত্রী কেসব প্রসাদ মৌর্য় জী, ব্রজেস পাথক চী, কেন্দ্র মন্ত্রী মন্দলগী ঐগী ইকায়খুম্নরবা খোঙবু অমদি লখনৌ মফমসিগী মীহুৎ শ্রীমান রাজনাথ সিংহ জী, লৈবাক শিনবা থুংবদগী লেঙবিরক্লিবা ইকায়খুম্নরবা মীওইশিং, য়ু.পি.গী মন্ত্রী পুম্নমক অমদি গ্লোবেল ইনভেস্তর্স সম্মিৎ অসিদা লেঙবিরক্লিবা ইন্দস্ত্রীগী তাইবংগী ইকায়খুম্নরবা মীওইশিং, গ্লোবেল ইনভেস্তর ফ্রেতর্নিতী, পোলিসী শেম্বা মীওইশিং, কোর্পোরেৎ লুচিংবশিং, ইচে ইচল অমদি ইচিন ইনাও পুম্নমক!

ময়াম পুম্নমকপু গ্লোবেল ইনভেস্তর্স সম্মিত্তা তরাম্না ওকচরি‍। ঐনা অথোইবা মীথুং ওইনা শরুক য়ারগা ময়ামবু তরাম্না ওকপগী থৌদাং লৌরিবা করিগীনো হায়না অদোম্না খনবিরমগনি, মসিগী মরমদি ঐগী থৌদাং অমসু লৈরি‍। অদোম্না ঐবু ভারতকী প্রধান মন্ত্রী ওইহনবিবতা নত্তনা উত্তর প্রদেশকী এম.পি.সু ওইহনবিরি‍। উত্তর প্রদেশগীদমক্তা ঐগী ইফমদা অখন্নবা নুংশিবগী ইথিল অমা লৈ অমদি য়ু.পি.গী মীয়ামগীদমক ঐগী অখন্নবা থৌদাং লৈ‍। ঐনা থৌদাং অদুবু য়ানবগীদমক ঙসিগী সম্মিৎ অসিদা শরুক য়ারিবনি‍। অদুগা মরম অসি লৈবনা লৈবাক কয়াদগী য়ু.পি.দা লেঙবিরক্লিবা ইনভেস্তর পুম্নমক্কী মফমদা ইকোক নোঞ্জরি, তরাম্না ওকচরি‍।

মরূপশিং,

উত্তর প্রদেশগী লৈমায় অসি মাগী ফজরবা নাৎ অমদি চৎনবী, চাউথোকচনিংঙাই ওইরবা পুৱারী অমদি য়াম্লবা হেরিতেজশিংগীদমক মমিং চৎলি‍। অসিগুম্বা কয়া লৈদুনসু য়ু.পি.গা করিগুম্বা ৱাফম খরগা লোয়নদুনা লৈরি‍। য়ু.পি.দা চাওখৎপা পুরকপা ওইথোক্লোই হায়না মীয়াম্না হায়নরম্মী‍। মফমসগী আইনগী ফীভম ফগৎহনবা ওইথোক্লোই হায়না মীয়াম্না হায়নরম্মী‍। য়ু.পি.বু অনাবা স্তেত অমনি হায়না লৌনরম্মী, মফমসিদা নুমিৎ খুদিং করোর লিশিং কয়াগী ৱাথোক থোক্লম্মী‍। পুম্নমক্না য়ু.পি.দগী মখোয়গী থাজবা মাঙখিরম্মী‍। অদুবু শুপ্নতগী চহি ৫-৬কী মনুংদা য়ু.পি.না মশাগী অনৌবা মশক অমা শেমগত্তুনা মফম অমা কল্লে‍। হৌজিক্তি য়ু.পি.গী লৈঙাক অফবা লৈঙাক্কীদমক খঙনরে‍। হৌজিক্তি য়ু.পি.গী মশক অফবা আইনগী ফীভম, ইং-তপ্পা অমদি তংদু লৈতাবা ফীভমগীদমক খঙনরে‍। হৌজিক মফম অসিদা লনথুম শেমগৎনবগী অনৌবা খুদোংচাবশিং শেমগৎলি‍। হৌখিবা চহি খরসিদা উত্তর প্রদেশকী ইনফ্রাস্ত্রকচর শেমগৎপদা মতমগা চুনবা ইনফ্রাস্ত্রকচর শেমগৎপগী মহৈ উবা ফংলি‍। মৈদগী হৌরগা কন্নেক্তিবিতী ফাওবা অওনবা কয়া পুরক্লি‍। অথুবা মতমদা উত্তর প্রদেশ, মালেমগী ওইবা এয়রপোর্ত ৫ লৈবা লৈবাকসিগী অমত্তা ঙায়রবা স্তেত অমা ওইনসু শকখঙনরগনি‍। দেদিকেতেদ ফ্রৈই কোরিদোরনা য়ু.পি.বু হকথেংননা সমুদ্রগা শমজিন্নরি, গুজরাত অমদি মহারাস্ত্রগী শম্নহল্লি‍। ইনফ্রাস্ত্রকচরগা লোয়ননা লৈঙাক্কী ৱাখল্লোন অমদি থৌওংদা ইজ ওফ দুইং বিজিনেসকীদমক চাউনা অওনবা পুরকপগী মমি তারি‍।

মরূপশিং,

ঙসিদি য়ু.পি.গী মঙলান, থাজবা য়াবা পান্দম অমা ওইরে‍। ঙসি ভারতনা মালেমগী তরং তরংবা মফম অমা ওইরকপগা লোয়ননা য়ু.পি.সু ভারতনা চাওখৎলকপগী খোঙজেলবু থৌদুনা চৎলিবা মরুওইবা থৌদাং লৌরিবা অমা ওইরক্লি‍।

মরূপশিং,

ইন্দস্ত্রীগী খঙ-হৈরবা মীওইশিং মফমসিদা তিল্লরি‍। ময়াম মরক্তগী অয়াম্বদি মীৎয়েঙ শানবা ৱাখল্লোন লৈরিবনি‍। মালেমগী তুংলমচৎকী ফীভমসু অদোমগী মীৎয়েঙদগী লোত্তুনা লৈবা নত্তে‍। অদোম্না ভারতকী শেন্মিৎলোনগী ফীভম অমদি মফমসিগী মেক্রো অমদি মাইক্রো ইকনমিক্স ফন্দামেন্তেলশিংসু মমুৎ তানা য়েংলি‍। লাইচৎ অমগী লানগী শাফুদগী ৱাংম লান্থোরক্তুনা ভারতনা কমদৌনা খ্বায়দগী খোঙজেল য়াঙবা শেন্মিৎলোন ওইরক্লিবনো? ঙসিদি মালেমগী থাজবা য়াবা খোঞ্জেল পুম্নমক্না ভারতকী শেন্মিৎলোন মতৌ অসুম্না খোঙজেল য়াঙনা মাঙদা চঙশিন্দুনা লৈখিগনি হায়বা ৱাফম থম্লি‍। মালেমগী ওইবা লাংফমসিদগী থোরক্তুনা ভারতনা রেজিলিএন্সখক উৎপদা নত্তনা রিকভরীসু খোঙলৈ থুনা ঙম্লক্লিবা কমদৌননো‍।

মরূপশিং,

মসিগী মরুমদা লৈরিবা খ্বায়দগী চাউবা মরমদি ভারত মচাশিংনা মশাদা থমজবা থাজবা হেনগৎলকপা, মশানা মশাবু থাজবা অসিনি‍। ঙসি ভারতকী নহাশিংগী ৱাখল্লোন্দা, ভারতকী খুন্নাইগী ৱাখল্লোন্দা অমদি অনিংবা অপাম্বদা চাউনা অহোংবা অমা উবা ফংলি‍। ঙসি ভারতকী মীপুম খুদিংনা, মপুং ফানা চাওখৎপা উবা পাম্লি‍। মখোয়বু ভারতপু খোঙলৈ থুনা চাওখৎলকপা উবা পাম্লি‍। ভারতকী খুন্নাইগী অনিংবা, অপাম্বনা, ঙসিগী লৈঙাকশিংবুসু ইন্দুনা চৎলি অমদি হায়রিবা অনিংবা অপাম্বসিনা চাওখৎ থৌরাংগী থবকশিংসু খোঙজেল হাপ্লি‍।

অদুগা মরূপশিং,

ঙসি অদোম্না লেঙবিরক্লিবা স্তেত অসিগী মীশিং চাউরাক্না করোর ২৫রোম্নি হায়বসি কাউবিগনু‍। মালেমগী চাউর-চাউরবা লৈবাকশিংদগীসু হেল্লবা মতিং, উত্তর প্রদেশ মথন্তদা লৈরিবনি‍। ভারত পুম্বগী মতৌগুম ঙসি য়ু.পি.দা অচৌবা এস্পিরেস্নেল সোসাইতী অমনা অদোমবু ঙাইদুনা লৈরি‍।

মরূপশিং,

ঙসি ভারতকী সোসিএল, ফীজিকেল অমদি দিজিতেল ইনফ্রাস্ত্রকচরগী লমদা পায়খৎলিবা থবকশিং অসিগী কান্নবা য়ু.পি.নসু চাউনা ফংলি‍। মসিনা মরম ওইরগা, ঙসি খুন্নাই অসি সোসিএল্লী অমদি ফাইনেন্সিএল্লী য়াম্না হেন্না ইনক্লুজিব ওইরে, মরি মখোঙ শম্নবা ওইরে‍। কৈথেল অমগী শক্লোন্দা ভারত হৌজিক্তি অপনবা লৈতবা ফীভম ওইরে, লৈঙাক্কী কাঙলোনশিংসু লায়থোকহল্লে‍। ঙসিদি ভারত্তা তৌদবা য়াদবগী তৌবা নত্তবদা ফিরেপ অমগা লোয়ননা অওনবা পুরকপগী থবক চঙশিল্লি হায়না ঐনা হেক হেক হায়‍। মরম অসিননি ঙসি ভারতনা কম্প্লাইএন্স লিশিং ৪০ হেনববু লোইশিনখ্রিবা, অরিবা কাঙলোন দজন কয়াবু লোইশিনখ্রিবা‍।

মরূপশিং,

ঙসি ভারতনা মায়কৈ অসিদা খোঙজেল লৈনা অমদি পাক চাউনা কোনশিন্দুনা চঙশিল্লি‍। অচৌবা মীওই কাঙলুপ অমগী মথৌ তাবশিংবু ঐখোয়না ফংহল্লি, মরম অসিনা মখোয়না হান্নগী থাক্তগী কাখত্তুনা ৱাখল খনবা ঙম্লক্লি, তুংগীদমক খনবা হৌরক্লি‍। মসিনা ভারত্তা থাজবা থম্নবগী খ্বায়দগী চাউবা মরম্নি‍।

মরূপশিং,

নুমিৎ খরনিগী মমাঙদা ভারত লৈঙাক্না পুথোকখিবা বজেৎ অদুদসু অদোম্না হায়রিবা ফিরেপ অসিবু ময়েক শেংনা উবা ফংবিরমগনি‍। ইনফ্রাস্ত্রকচরদা রেকোর্দ ওইবা চাদিং ঙসিগী লৈঙাক অসিনা তৌরি অমদি চহি খুদিংগী ঐখোয়না হেনগৎহল্লি‍। মরম অসিনা ঙসি অদোমগীদমক ইনফ্রাস্ত্রকচরদা শেল থাদনবগী অনৌবা তাঞ্জাশিং শেমগৎলক্লি‍। ঙসিদি অদোম্না হকশেল, মহৈ মশিং অমদি খুন্নাইগী ইনফ্রাস্ত্রকচরদসু শেল থাদনবগী খুদোংচাবা কয়া লৈরে‍। ভারতনা চঙশিল্লিবা গ্রীন গ্রোথকী লম্বী অসিদা ঐনা অদোমবু অখন্ননা পাউকৎচরি‍। চহি অসিগী বজেত্তা ঐখোয়না লুপা করোর লিশিং ৩৫গী শেনফম অমা ইনর্জী ত্রাঞ্জিসনখক্তগী ওইনা কাইথোক্লিবা অসিনা ঐখোয়গী পান্দম করিনো হায়বা উৎলি‍। মিসন গ্রীন হায়দ্রোজেন্না ঐখোয়গী পান্দম অসিবু হেন্না চেৎশিনহল্লি‍। বজেৎ অসিদা মসিগা মরী লৈনবা মপুং ফাবা ইকোসিস্তেম অমা শেমগৎনবগীদমক খোঙথাঙ কয়া লৌখৎলি‍। ইলেক্ত্রিক মোবিলিতীগী ত্রান্সফোর্মেসনগীদমক অনৌবা সপ্লাই অমদি ভেল্যু চেন অমা ঐখোয়না শেমগৎলে‍।

মরূপশিং,

অনৌবা ভেল্যু অমদি সপ্লাই চেন শেমগৎপগী লমদা য়ু.পি.না মাঙজিল থানা চঙশিল্লক্লিবা অসিদা ঐ নুংঙাইবা ফাওই‍। নাৎ-চৎনবী অমদি মতমসিগী ওইবা ফীভমগা মরী লৈনবা ইন্দস্ত্রীশিংগী, এম.এস.এম.ই.শিংগী ওইবা মপাঙ্গল কল্লবা নেৎৱর্ক অমা ঙসি উত্তর প্রদেশতা মশক মচু নাইনা লৈরি‍। মফম অসিদা ভদোহী কার্পেৎ অমদি বনারসী মুগা ফংই‍। ভদোহী কার্পেৎ ক্লস্তর অমদি বনারসী সিল্ক ক্লস্তরনা মরম ওইরগা ঙসি য়ু.পি. ভারতকী তেক্সতাইল হব অমা ওইরি‍। ঙসি ভাত্তা লৈরিবা অপুনবা মোবাইল মেনুফেকচরিংগী চাদা ৬০ হেনবদি উত্তর প্রদেশখক্তদা লৈরি‍। মোবাইল কম্পোনেন্তকী খ্বায়দগী চাউবা মেনুফেচরিংসু য়ু.পি.দা লৈরি‍। হৌজিক লৈবাকসিগী দিফেন্স কোরিদোর অনিগী মনুংদা অমা য়ু.পি.দা শেমগৎলি‍। য়ু.পি. দিফেন্স কোরিদোরগী থবকশিং খোঙজেল য়াঙনা চঙশিল্লি‍। ঙসিদি মেদ ইন ইন্দিয়া দিফেন্স ইকুইপমেন্তশিংগী দিমান্দ লেপ্পা লৈতনা হেনগৎলক্লি‍। ভারতকী লান্মীদসু ঐখোয়না হেক য়ারিবমখৈ ভারত্তা শাজবা দিফেন্স সিস্তেম, দিফেন্স প্লেৎফোর্ম পীনবা থৌরাং পায়খৎলি‍। অদুগা হায়রিবা অচৌবা থবক অসি লখনৌ লৈহাউগী মথৌ মশক খঙবা ঐখোয়গী রাজনাথ সিংহ জীনা য়েংশিল্লি‍। অসিগুম্বা মতম অসিদা ভারতনা মশক মচু থোকপা দিফেন্স ইন্দস্ত্রী অমা চাওখৎহন্নবা হোৎনরিবা অসিদা অদোম্না শোয়দনা ফর্স মুভর এদভান্তেজ লৌফম থোকই‍।

মরূপশিং,

উত্তর প্রদেশতা দেরী, ঙা য়োকপা, লৌউ-শিংউ অমদি ফুদ প্রোসেসিং সেক্তরগী ওইথোকপা য়াবা য়াম্না লৈ‍। উত্তর প্রদেশতা খেন্নবা মখলগী উহৈ অমদি মনা মশিং কয়া অমা ফংলি‍। মসি হৌজিকসু প্রাইভেৎ সেক্তরনা শরুক য়াশিনবগী চাং য়াম্না অকক্ননা লৈবা সেক্তর অমনি‍। ঐখোয়না ফুদ প্রোসেসিংগীদমক প্রদক্সন লিঙ্ক্দ ইন্সেন্তিব (পি.এল.আই.) স্কীম পুদুনা লাক্লি হায়বা অদোমসু খঙবিরমগনি‍। মসিগী কান্নবা অদোম্না শোয়দনা লৌফম থোকই‍।

মরূপশিং,

ইনপুত্তগী হৌরগা পোস্ত হার্ভেস্ত মেনেজমেন্ত ফাওবদা মতমগা চুনবা ফীভম লৌমীশিংগীদমক্তা থম্নবা ঙসি লৈঙাকসিনা হোৎনরি‍। অপীকপা ইনভেস্তরশিং, এগ্রি ইনফ্রা ফন্দগী কান্নবা লৌবা য়াই‍। মতৌ অসুম্না লৈবাক পুম্বদা য়াম্না চাউবা স্তোরেজ কেপাসিতী লৈহন্নবগীদমক বজেত্তা ঐখোয়না থৌরাং তৌরি‍। মসিসু অপীকপা ইনভেস্তরশিংগী ওইনা য়াম্না অচৌবা তাঞ্জা অমনি‍।

মরূপশিং,

ঙসি ভারতনা ক্রোদ দাইভর্সিফিকেসন্দা, অপীকপা লৌমীশিংদা কান্নবা হেন্না ফংহন্নবা অমদি ইনপুৎ কোস্ত হন্থহন্নবা মরুওইবা মীৎয়েঙ থম্লি‍। মরম অসিনা নেচরেল ফার্মিংগী মায়কৈদা ঐখোয়না খোঙজেল য়াঙনা চঙশিল্লি‍। য়ু.পি.গী লমসিদা গঙ্গাগী তোর্বানগী মায়কৈ অনিমক্তা কিলোমিতর ৫গী লমদা নেচরেল ফার্মিংগী থবক হৌখ্রে‍। হন্দক চহিগী বজেত্তা ঐখোয়না লৌমীশিংগী মতেং পাংনবগীদমক বাইও ইনপুৎ রিসোর্স সেন্তর লিশিং১০ শেমগৎনবা লাউথোকখ্রে‍। মসিনা নেচরেল ফার্মিংবু হেন্না পুক্নিং থৌগৎকদৌরি‍। মসিদসু প্রাইভেৎ ওন্ত্রপ্রিন্যুরশিংনা ইনভেস্তেমেন্ত তৌনবগী খুদোংচাবা য়াম্না লৈগনি‍।

মরূপশিং,

ভারত্তা ঐখোয়গী মিল্লেৎকী ওইবা অনৌবা থৌরাং অমসু হৌদোক্লি‍। ভারতকী মিল্লেৎশিং অসি মীচম মীয়ামগী লোন্দাদা মসিবু মোতা অনাজ কৌই‍। মসিগী মখল কয়া লৈ, মালেমগী কৈথেলদা মসিগী ওইবা মশক অমা লৈহন্নবগীদমক হোৎনরি, ঐখোয়না বজেত্তা হায়রিবা মোতা অনাজ অসিবু – শ্রী অন্ন – হায়বা অনৌবা মমিং অমা থোল্লিবা, মচি ওইবা মচল য়াম্না য়াওবা সুপর ফুদ অসিবু য়োকখৎনবগী থৌরাং লৌখৎলিবা অদোম্না বজেৎকী ৱাফমদা তাবিরমগনি‍। শ্রীফলগী কান্নবা য়াম্না লৈবগুম, শ্রী অন্নসু চাউনা মমিং চৎলগনি‍। ভারতকী শ্রী অন্ন অসিনা মালেমগী ন্যুত্রিসন সিক্যুরিতীগী ইসুগী পাম্বৈ ওইহন্নবা ঐখোয়না হোৎনরি‍। মালেমসিনা চহি অসিবু ইন্তরনেস্নেল ইয়র ওফ মিল্লেৎস হায়না পাঙথোক্লি‍। মরম অসিনা ঐখোয়না মায়কৈ অমদা লৌমীশিংদা শ্রী অন্ন থাননবা পুক্নিং থৌগৎলি, অদুগা নাকল অমদনা মসিগীদমক মালেমগী কৈথেলবুসু শেমগৎলি‍। ফুদ প্রোসেসিং সেক্তরগা মরী লৈনবা মীওইশিংনা রেদী তু ইৎ অমদি রেদী দু কুক শ্রী অন্নগী পোত্থোকশিংগী মতিং থিদোক্তুনা মীওইবা খুন্নাইগী থৌগলসু চাউনা তৌবা য়াগনি‍।

মরূপশিং,

উত্তর প্রদেশতা অতোপ্পা হীরম অমদা য়াম্না পুক্নিং থৌগৎনিংঙাই ওইরবা থবক অমা পায়খৎলি‍। হায়রিবা থবক অসি মহৈ মশিং অমদি স্কিল দিভেলপমেন্তকা মরী লৈনৈ‍। মহায়োগী গুরু গোরখনাথ আয়ুস য়ুনিভর্সিতী, অতল বিহারী বাজপায়ী হেল্থ য়ুনিভর্সিতী, রাজা মহেন্দ্র প্রতাপ সিংহ য়ুনিভর্সিতী, মেজর ধ্যানচন্দ স্পোর্ত য়ুনিভর্সিতী, অসিনচিংবা লূপ কয়ানা তোঙান তোঙানবা স্কিলশিংগীদমক নহাশিংবু শেম শাগনি‍। স্কিল দিভেলপমেন্ত মিসনগী মখাদা হৌজিক ফাওবদা য়ু.পি.গী নহা লাখ ১৬ হেনববু তোঙান তোঙানবা স্কিলশিংদা ত্রেন তৌখ্রে হায়না ঐঙোন্দা তম্মি‍। য়ু.পি. লৈঙাক্না পি.জি.আই. লখনৌ, আই.আই.তি. কানপুরদা আর্তিফিসিএল ইন্তলিজেন্সকা মরী লৈনবা কোর্সশিংসু হৌখ্রে‍। অদুগা ঐনা মফমসিদা লাকপদা, ঐখোয়গী গভর্নর সাহেবান্না চান্সেলর অমা ওইনা মহৈ মশিংগী লমদা য়েংশিল্লিবা মহাক্না ঐঙোন্দা হায়বদা উত্তর প্রদেশকী য়াম্না চাউথোকচনিংঙাই ওইবা ৱাফম অমা ওইনা নেত এক্রেদিতেসন্দা উত্তর প্রদেশকী য়ুনিভর্সিতী ৪না ভারতকী ওইনা অচৌবা মফম কনবা ঙম্লে হায়না পাউদমলকই‍। মসিগীদমক ঐনা মহৈ মশিংগী লমদা লৈবিরিবা মীওইশিং অমদি চান্সেলা মেদামবু থম্মোয়নুংদগী ইকোক নোঞ্জরি‍। লৈবাকসিগী স্তার্ত অপ রিভোলুসন্দা য়ু.পি.গী শক্লোন লেপ্পা লৈতনা হেনগৎলক্লি‍। লাক্কদৌরিবা চহি খরসিদা ইনক্যুবেতর ১০০ অমদি স্তেত-ওফ-দি-আর্ত সেন্তর অহুম লিংখৎনবা পান্দম য়ু.পি. লৈঙাক্না থম্লি‍। মসিনা তাকপদি মফমসিদা লাক্কদৌরিবা ইনভেস্তরশিংনা হৈ-শিংলবা অমদি খঙ হৈরবা নহাশিংগী ওইবা অচৌবা পুল অমা ফংলগনি হায়বনি‍।

মরূপশিং,

নাকল অমদা দবল ইঞ্জিন লৈঙাক্কী ফিরেপ, অদুগা নাকল অমদনা ওইথোকপা য়াবা কয়ানা থল্লবা উত্তর প্রদেশ, মসিদগী হেন্না ফবা পার্ত্নরসিপ অমা অমুক ফংলরোই‍। তাঞ্জা অসি ঐখোয় মাঙহনফদে‍। ভারতকী মতিংনা মালেমগী মতিং ওইরক্কদৌরিবনি‍। ভারতকী তরং তরংবা তুংলমচত্তা মালেমগী তরং তরংবা তুংলমচৎগী থাজবা লৈরি‍। মতিং শেমগৎপগী খোঙচৎ অসিদা ময়াম্না শরুক য়াশিল্লকপা হায়বসি য়াম্না মরুওই‍। চঙশিল্লক্কদৌরিবা অসি পুম্নমক্কী কান্নবা, য়াইফবা ওইরসনু হায়বা ৱাফমসিগা লোয়ননা ইনভেস্তমেন্তকীদমক মাঙদা চঙশিল্লক্লিবা লৈবাকসিগী অমদি মালেমগী ইনভেস্তর পুম্নমকপু য়াম্লবা য়াইফ-পাউজেল পীজরি অমদি উত্তর প্রদেশকী এম.পি. ওইনা ঙসিগী উত্তর প্রদেশগী লৈঙাক, উত্তর প্রদেশগী ঙসিগী ব্যুরোক্রেসী চাওখৎপগী মায়কৈদা খোঙফম চেৎনা লেপ্তুনা চঙশিল্লিবা অসিনা অদোমগী মঙলানশিংবু মঙফাওনহন্নবগীদমক, অদোমগী হোৎনজমলশিং মহৈ য়ালহন্নবগীদমক খোঙফম চেৎনা লেপ্তুনা অদোমগীদমক লেপ্লি হায়না থাজবা পীজরি‍। হায়রিবা থাজবা অসিগা লোয়ননা ঐনা অমুক্কা হন্না লৈবাকসিগী অমদি মালেমগী ইনভেস্তরশিংবু ঐখোয়গী উত্তর প্রদেশকী লমদমসিদা চঙবিরক্নবা পাউকৎচরি, তরাম্না ওকচরি‍।

হন্না হন্না থাগৎচরি‍‍।

*****