ভারতনা জি-২০গী প্রসিদেন্ত ওইবগী শরুক অমা ওইনা, য়ুথ-২০ গ্রুপকী অহানবা ইন্সেপসন মীতিং ফেব্রুৱারি ৬-ফেব্রুৱারি ৮, ২০২৩ ফাওবা গুৱাহাতিদা পাংথোকখ্রে। মীফম অসিগী পান্দমদি ৱাই-২০গী থিম মঙা থবক ওইনা পাংথোক্নবা এজেন্দা অমা পুথোকপা অমসুং হেন্না ফবা তুংলমচৎ অমগীদমক লৈবাক্কী নহারোলশিংগী ৱাখল্লোন খন্ন-নৈনবনি। মীফম অসিগী শরুক অমা ওইনা পাংথোকপা সেনিমারশিং, দিবেত, ৱার্কশোপশিং অমসুং কুইজ চাংদম্নবশিংদা অসামগী কোলেজ ৩৬ রোমগী নহারোল ১০,০০০ রোম শরুক য়াখি। স্কুল ৪০০০ রোমগী মহৈরোয় লাখ ১০ হেনবশু শরুক য়াখি।

মীফম অদুদা মপান লৈবাকশিংগী দেলিগেদ ২১ অমসুং ভারতকী দেলিগেদ ২০০ শরুক য়াখি। ফেব্রুৱারি ৬তা শকখঙ-মাইখঙনবগী থৌরম অমা পাংথোকখি অমসুং নুমিদাংদাব্রাহ্মাপুত্রা সেন্দবার আইলেন্দদা পাংথোকপা কলচরগী থৌরমদা শৈশকপা পেপোনগী ঈশৈগী থৌরম অমা পাংথোকখি।

ফেব্রুৱারি ৭, ২০২৩দা আই.আই.তি গুৱাহাতিদা পাংথোকপা দেলিগেদশিংগা ৱারি শানবা থৌরম অমদা য়ুথ এফেয়ার্স অমসুং স্পোর্তসকী য়ুনিয়ন মিনিস্তর অনুরাগ সিংহ থাকুর শরুক য়াখি। মহাক্না হায়খি ৱাই-২০ গ্রুপনা নহারোলশিংগীদমক পায়খৎলিবা থবকশিং খুদম ওইনা উৎকনি অমসুং ৱাই-২০ মীফম্না নহারোলশিংনা পুথোরকপা থৌশিলশিং উৎকনি।নুপীনা মাংজিল থাবা চাউখৎ-থৌরাংদা সরকারনা থাজবা থম্লি। ভারতকী রাস্ত্রপতি অসি মহাক্কী লৌশিংনা মরম ওইদুনা অচম্বা ইমুংদগী হৌরকপা ত্রাইবেল নুপী অমনি। হন্দক ভারতকী বজেত অসি ফাইনান্স মিনিস্তর নির্মালা সিতারমন্না পুথোকখি; কামরুপকী দি.সি অসি নুপী অমনি, ভারত সরকারগী য়ুথ এফেয়ার্সকী সেক্রেতরি অসি নুপী অমনি। থৌশিল শেম্বা অমসুং থবক ওইনা পাংথোকপদা ভারত্তা নুপীশিং থৱায় য়াওনা শরুক য়ারি।

অয়ুর্বেদাগী মতাংদা মিনিস্তরনা হায়খি কোবিদ লাইচৎ মনুংদা লায়য়েংনবা অমসুং অনাবদা ফগৎলকপদা য়োগা অমসুং অয়ুর্বেদা পাক-শন্না শীজিন্নখি। সরকারগী থবকশিংনা মরম ওইদুনা হৌখিবা চহি খর অসিদা ভারত মালেমদা স্তার্দ-অপশিং খ্বাইদগী য়াম্না লিংখৎপা লৈবাক অমা ওইরে। ২০১৬দা স্তার্দ-অপ চা খর লৈরম্বদগী, ২০২২দা স্তার্দ-অপ ৮৪,০০০ হেন্না লিংখৎলে।

আই.আই.তি গুৱাহাতিদা পাংথোকখিবা ইন্সেপসন মীতিংগী অনিশুবা নুমিত্তা থিম মঙাদা খন্ন-নৈনবা পাংথোকখি।

 ‘শান্তি পুরকপা অমসুং ৱাখল তামিন্নবা: লান লৈতবা যুগ অমা লৈহনবা’ হায়বা থিমদা রাজ্য মন্ত্রী জেনেরেল ভি.কে সিংহনা হায়খি মী খুদিংমক চাউখৎনবা খুদোংচাবা ফংবা অপুনবা খুন্নাই অমা শেমগৎপা হায়বসি মরুওই অমসুং মসি ঐখোয়না ভারত্তা পাংথোক্লে। ভারত্তা, ঐখোয়না লালহৌবশিংগা ৱারি শান্নরে। ঐখোয়না ফোর্স অসি অরোইবা পাম্বৈ ওইনা শীজিন্নৈ। মরম অসিনা ঐখোয়না মুক্নবশিং ৱারোইশিন পুরকপা ঙম্লিবনি।

বেঙ্গালুরুগী এম.পি তেজাসবী সুর্য়ানা হায়খি করিগুম্বা লান্না মরম ওইদুনা খুন্নাইগী কাংলুপ অমা শাথিনা শোকহল্লবদি, মদু নহারোলশিংনি। লান অমসুং শান্তিগী মতাংদা ৱারি শান্নবদা নহারোলশিং শরুক য়াহনবা হায়বসি য়াম্না মরুওই।

লেপ্তনেন্ত জেনেরেল সাতিস দুৱা(হান্নগী আর্মি কমান্দর)না হায়খি শান্তি পুরকপা হায়বসি লান্মীগী মথৌনি অমসুং লান শোক্নবা নত্তে অমসুং য়ু.এন পিছকিপ্পিং ফোর্সশিংদা ভারতনা খ্বাইদগী মশিং য়াম্না শরুক য়ারি।

উলফাগী হান্নগী মেম্বর, অসামগী সিবসাগরদগী বিপুল কালিতা এলাইজ প্রদিব ভারালিনা হায়খি মহাক ২০০০দা সরকারদা চঙজখি। অসাম অসি ভারতকী শরুক অমা নত্তে হায়না থাজবদগী মহাক উলফা য়াওখি। অদু মখোয় লাল্লে হায়বা মখোয় খঙখি, অসামগী অপুনবা মীশিংগী চাদা ৯৮না মনিংতম্বা অসাম অমগী ৱাখল্লোন শৌগৎতে, মরম অদুনা ঐখোয় খুৎলায় থাদোকপনি। হৌজিক অমা অতোপ্পশিং মতেং পাংনবা ভোলুন্তরি ওর্গনাইজেসন অমা মথৌ পাংথোক্লি। 

এন.দি.এফ.বিগী হান্নগী মেম্বর বিনুএল ৱারিনা হায়খি মহাক ২০০৫তা খুৎলায় থাদোকখি। মখোয় লাল্লে হায়বা খঙলকখি অমসুং জাতিগী ঈচেলদা তিনবা পামখি অমসুং মরম অদুনা মখোয় খুৎলায় থাদোকপনি।

অসামগী দি.জি.পি গ্যানেন্দ্র প্রতাপ সিংহনা হায়খি মুক্নবশিং ৱারোইশিন পুরক্নবা মীয়াম অপাম্বা খঙবা অমসুং থুংহনবা দরকার ওই। লালহৌবশিংগা পাউ ফাউন্নবা, মখোয়গা ৱারি শান্নবা অমসুং খুৎলায় থাদোক্নবা মখোয় ৱাখল তাহন্নবা অসাম সরকারনা পায়খৎলিবা থবকশিংগী মতাংদা অসামগী এ.দি.জি.পি শ্রী হিরেন চন্দ্র নাথনা ফোঙদোকখি।

তুংদা ওইরক্কদবা থবক; ইন্দস্ত্রি ৪.০, ইন্নোবেসন অমসুং ২১শুবা চহিচাগী স্কিলশিংগী মতাংদা জি.ই এভিএসনগী চীফ কন্সলতিং ইঞ্জিনিয়ার দোক্তর উমা মহেশ্বরনা কমদৌনা ইন্দস্ত্রি ৪.০না থবক শুবদা অওনবা পুরকপগে হায়বগী মতাংদা অমসুং অনৌবা তেক্নোলোজিশিংনা অপনবা কয়া পীরবশু হেন্না অফবা পুরক্নবা অহোংবা অসি তঙাইফদে হায়বা ৱাফম ফোঙদোকখি।

মারুত দ্রোনতেক্কী ফাউন্দর অমসুং আই.আই.তি গুৱাহাতি এলুমনস, প্রেম কুমারনা হায়খি দ্রোনগুম্বা অনৌবা তেক্নোলোজিশিংনা ভারত অমসুং মালেমগী খুদোংচাদবা কয়া কোকহনবা ঙমগনি অমসুং হিরম অসিগী মতাংদা ভারতকী ললোন-ইতিক্কী থবকশিংনা মতেং কয়া পাংবা ঙমগনি। একাদেমিয়া অমসুং ইন্দস্ত্রিগী মরক্ত পুন্না থবক তৌমিন্নবগী মরুওইবগী মতাংদা ইন্দস্ত্রিএলিস্ত দোক্তর জি.দি ধানুকানা ৱা ঙাংখি।

 ‘হকশেল, নুঙাই-য়াইফবা অমসুং শান্নবা; নহারোলগী পান্দম’ হায়বা থিম অসিদা সরিতা দেবীনা কমদৌনা শান্নবনা মহাক্কী পুন্সি পুক্নিং থৌগৎনবা মচাক অমা ওইখিবগে হায়বগী মতাংদা পাউদমখি। মহাক্না লালহৌবা য়াওগে তৌরম্বদগী মালেমগী মেদল ৭ ফংখি অমসুং ৱার্ল্দ চেম্পিয়ন বোক্সর অমা ওইনা ২০০১-২০২০ ফাওবা লৈবাক্কী সেবা তৌখিবগী মতাংদা পাউদমখি।

পুক্নিং-ৱাখল নুংঙাইতবা অসিনা কমদৌনা নহারোলশিংদা অনাবা অমা ওইহনবগে অমসুং মশা মরোমদোম শিজবা অসি শিবগী অনিশুবা খ্বাইদগী চাউবা মরম অমনি হায়বগী মতাংদা দোক্তর অসিমা হাওবিজম্না ফোঙদোকখি। মহাক্না হায়খি পুক্নিং-ৱাখল ফনা থম্বা হায়বসি য়াম্না মরুওইনা লৌগদবনি। পুক্নিং-ৱাখল ফনা থম্বা অমসুং নুংঙাইনা হিংবদা শান্নবগী মরুওইবগী মতাংদা শ্রেয়াসি সিংহনা ৱাফম কয়া ফোঙদোকখি।

ফেব্রুৱারি ৮,২০২৩দা লোইশিনবগী থৌরম পাংথোকখি। থিম মঙাগী রিছর্স পেপরশিং অসামগী ইজুকেসন মিনিস্তরনা য়ুথ এফেয়ার্স অমসুং স্পোর্তসকী য়ুনিয়ন মিনিস্তরদা শীন্নখি। য়ুথ এফেয়ার্স অমসুং স্পোর্তসকী য়ুনিয়ন মিনিস্তরনা হ্বাইত পেপরশিং পুথোক্তুনা থৌরম অদু লোইশিনখি।

***