ঙসি গুৱাহাতিদা জি-২০গী মখাদা অহানবা য়ুথ-২০(ৱাই২০) ইন্সেপসন মীতিং ২০২৩ হৌখ্রে। মীফমগী মাংওইন্না মেদিয়াদা ৱা ঙাংবদা য়ুথ এফেয়ার্স মিনিস্ত্রিগী সেক্রেতরি শ্রীমতি মিতা রজিবলোচান্না হায়খি ৱাই২০গী খন্নবদা নহারোলশিং শরুক য়াহন্নবা থাজবা থম্লি অমসুং হেন্না ফবা তুংলমচৎ অমগী মখোয়গী ৱাখল্লোনশিং মখোয়গা খন্নগনি।

শ্রীমতি রজিবলোচান্না হায়খি নুমিৎ হুম্নিগী থৌরম অসিদা ৱাই-২০গী থিম মঙা খন্নগনি, হায়রিবা থিমশিং অদুদি তুংলমচৎকী থবক: ইন্দস্ত্রি ৪.০, ইন্নোবেসন অমসুং ২১শুবা চহিচা; ক্লাইমেত চেঞ্জ অমসুং অমাং-অতা থোকপা হন্থহনবা: পুন্সিগী লম্বী অমা ওইনা তুংকোইনা চৎনগদবা থবকশিং পাংথোকপা; শান্তি পুরকপা অমসুং ৱাখল তামিন্নবা: লান লৈতবা যুগ অমা লৈহনবা; তুংলমচৎগীদমক: গনতন্ত্র অমসুং লৈবাক ঙাকপদা নহারোল; হকশেল, নুংঙাই-য়াইফবা অমসুং শান্নবা: নহারোলগী পান্দম হায়বা অসিনি। থিম অমমম্না লৈবাক্কী তোঙান-তোঙানবা মফমশিংগী মীয়ামগী খোল্লাউ তাবা ফংগনি অমসুং হায়রিবা থিমশিং অসিদা লমদম অমমমগী মখোয় মশাগী পান্দমশিং উবা ফংগনি অমসুং মরম অসিনা লৈবাক শীনবা থুংনা খন্ন-নৈনবা মীফমশিং পাংথোকপনি।

শ্রীমতি রজিবলোচান্না হায়খি য়ুথ এফেয়ার্স অমসুং স্পোর্তসকী য়ুনিয়ন মিনিস্তর শ্রী অনুরাগ থাকুরনা ৱাই-২০ দেলিগেদশিংগা লোয়ন্না ‘য়ুথ দাইলোগ’ অমা পাংথোক্লবা মতুংদা তোঙান-তোঙানবা থিমশিংদা হ্বাইত পেপর ফেব্রুৱারি ৮দা পুথোক্কনি।

ফেব্রারি ৭তা আই.আই.তি গুৱাহাতিদা পাংথোক্কদৌরিবা খন্ন-নৈনবা থৌরমগী মতাংদা মহাক্না হায়খি অৱাং-নোংপোক্তা শান্তি পুরক্নবা অমসুং ৱাখল তামিন্ননবা হিরমদা শক্নাইরবা ৱাঙাংলোয়শিংনা খন্ন-নৈনবা পাংথোক্কনি। অৱাং-নোংপোক অসি লালহৌবগী ইরাং লৈবগী পুৱারি অমা লৈরি অমসুং মসিগী থিম অসি অসাম অমসুং অৱাং-নোংপোক পুম্নমক্কী য়াম্না চুনৈ।

খন্ন-নৈনবা অদুদা উলফা অমসুং এন.দি.এফ.বিগী চঙজরক্লবা লালহৌবা অনি শরুক য়াগনি।

মেদিয়াদা ৱা ঙাংবদা অসাম সরকারগী প্রিন্সিপাল সেক্রেতরি শ্রী কলয়ান চক্রবর্তিনা হায়খি নহারোলশিং য়ুথ-২০গী মরমদা খঙহন্নবা রাজ্য সরকার অমসুং য়ুথ এফেয়ার্স মিনিস্ত্রিনা থবক কয়া পায়খৎলে। য়ুথ-২০গী থিম মঙাদা পাংথোকপা সেমিনারশিং, দিবেতশিং, ৱার্কশোপশিং অমসুং কুইজ চাংদম্নবদা অসামগী মহৈলোয়শঙ ৩৬ রোম শরুক য়ারি। য়ুথ-২০গী থৌরমশিংদা চাউরাক্না স্কুল ৪০০০ রোম শরুক য়ারি।

আই.আই.তি গুৱাহাতিগী দিরেক্তর, প্রোফেসার পারামেশ্বর কে.আইয়রনা হায়খি আই.আই.তি গুৱাহাতিনা ৱাই-২০গী তেক্নিকেল সেসনশিং অমসুং খন্ন-নৈনবা য়ুম্বু ওইবা অসি চাউথোকচৈ। গ্রিন হায়দ্রোজেন পুথোক্নবা তেক্নোলোজিদা আই.আই.তি গুৱাহাতি অসি মরুওইবা রিছর্স সেন্তর অমনি অমসুং তেক্নোলোজি খর ইন্দস্ত্রিদা পীনবা থৌরাং তৌরে। ২১শুবা চহিচাগী স্কিলশিং, ক্লাইমেত চেঞ্জ,পুন্সিগী তুংকোইনা চৎনগদবা লম্বী অমা শেম্বা, শান্তি পুরকপা অমসুং ৱাখল তামিন্নবগী মতাংদা মরুওইবা খন্ন-নৈনবশিং আই.আই.তি গুৱাহাতিদা পাংথোক্কনি।

আই অমসুং বি মিনিস্ত্রিগী এন.ই জোনগী দিরেক্তর জেনেরেল শ্রী বি নরায়ন্না হায়খি পি.আই.বি গুৱাহাতিনা অসাম সরকারগী ইজুকেসন দিপার্তমেন্তগা লোয়ন্না পাউ লৌনবা, দোকুমেন্ত তৌনবা অমসুং ফোতো নম্নবা মহৈরোয় ৫০ ত্রেনিং পীরে। হায়রিবা ত্রেন তৌরবা মহৈরোয় ৫০গী মনুংদা মহৈরোয় ৯থবক ফবগীদমক পি.আই.বিনা ইকায়খুম্নবা উৎনবা খনগৎলে।

অসামগী চীফ মিনিস্তর শ্রী হিমান্তা বিশ্বা শর্মানা অসামগী মহৈরোয়শিং অমসুং অখঙ-অহৈশিংগী রিছর্স পেপরশিং পুথোক্কনি। মসিগী মথক্তা, আই.আই.তি গুৱাহাতিদা তেক্নিকেল সেসনশিং অমসুং খন্ন-নৈনবশিং পাংথোক্কনি; শক্নাইরবা ৱাঙাংলোয়শিংগী মনুংদা জেনেরেল ভি.কে সিংহ, শ্রী জি.পি সিংহ, হিমা দাস য়াওরি। মখা তানা, ৱাই-২০ দেলিগেদশিং শকখঙ-মাইখঙনবগী থৌরম ব্রাহ্মাপুত্র সেন্দবার আইলেন্দতা পাংথোক্কনি।

জি-২০ মীফমশিংগী নহারোলশিংগী মীফম অমা ওইরিবা ৱাই-২০ অসি ২০১২দগী হৌদোকখি অমসুং মসি নহারোলশিং জি-২০গা থবক তৌমিন্নবা য়ানবা নহারোলশিংগীদমক ওফিসিএল ওইনা শকখঙলবা অমতা ঙাইরবা মফম্নি। মসি জি-২০গী মখাদা ওফিসিএল ওইনা থবক তৌবা লুপ ৮গী মনুংদা অমনি।

মসি লৈবাক শীনবা থুংনা পাংথোক্লবা মতুংদা অগস্ত থাদা লোইশিনগদবা য়ুথ-২০ মীফম ১৭গী মনুংদা অহানবা মীফম্নি।

*****