প্রধানমন্ত্রীগী লোইশঙ
প্রধান মন্ত্রীনা এন.সি.সি. কেদেৎশিং অমদি এন.এস.এস. ভলুন্তিয়রশিংগী মফমদা ৱা ঙাঙখ্রে
“জয় হিন্দগী মন্ত্রনা পুম্নমক্কী পুক্নিং থৌগৎলি”
“নহাশিংগা ৱারী ৱাতায় শানবা ঐগীদমক্তদি মতম পুম্বদা অখন্নবা ওই”
“এন.সি.সি. অমদি এন.এস.এস.না নহারোলশিংবু লৈবাক্কী পান্দম অমদি লৈবাক্কী ওইবা ৱাফমশিংগী শম্নহল্লি”
“নখোয়না ‘বিক্সিৎ ভারত’কী খ্বায়দগী চাউবা বিনিফিসরী ওইগদৌরিবনি অমদি নখোয়না মসিবু শেমগৎনবগী খ্বায়দগী চাউবা থৌদাং পুদুনা চৎলি”
“মালেম অসিনা মশাগী ওইবা অনৌবা তুংলমচৎ অমা ভারতনা ফংবা ঙম্লিবশিং অসিদা উরি”
“নখোয়গী মায় পাকপগী ঙমখৈ নখোয়গী পান্দমবু লৈবাক্কী পান্দমগা মরী শম্নহল্লবা মতমদা পাকথোক চাউথোরকই। নখোয়গী মায় পাকপবু মালেমসিনা ভারতকী মায় পাকপা ওইনা উগদৌরিবনি”
“ভারতকী নহাশিংনা উবা ঙমদ্রিবা ওইথোকপা য়াবশিংবু লোকশিনগদবনি, ৱাখলনা খল্লুদ্রিবা পাম্বৈশিং থিগদবনি”
“নখোয় নহা ওইরি, মতম অসি নখোয়গী তুংলমচৎ শেমগদবা মতম্নি। নখোয় অনৌবা ৱাখল্লোন অমদি অনৌবা স্তেন্দর্দশিং শেম্লিবনি। নখোয়না অনৌবা ভারতকী লম্বী য়াৎলিবশিংনি”
Posted On:
25 JAN 2023 5:46PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি এন.সি.সি. কেদেৎশিং অমদি এন.এস.এস. ভলুন্তিয়রশিংগী মফমদা ৱা ঙাঙখ্রে। তিল্লিবশিংগী মফমদা ৱা ঙাঙলদুনা, প্রধান মন্ত্রীনা মশিং য়াম্লবা অঙাংশিংনা নেতাজী সুভাস চন্দ্র বোসকুম্না ফিজোল শেত্তুনা প্রধান মন্ত্রীগা শঙ্গায়দা লাকপা হন্দক্না অহানবনি হায়না ফোঙদোকখি। “জয় হিন্দগী মন্ত্রনা পুম্নমক্কী পুক্নিং থৌগৎলি”, হায়না প্রধান মন্ত্রীনা হায়খি।
হৌখিবা চয়োলশিংদা লৈবাকসিগী নহাশিংগা মহাক্কা ৱারী ৱাতায় শানখিববু নীংশিংলদুনা, প্রধান মন্ত্রীনা থা অমগী মমঙদা বীর বাল দিবস পাঙথোকখিবা অমদি মদুদা লৈবাক শিনবা থুংনা বীর সাহেবজাদেশিংগী মথৌনা মরিংজেলবু সেলেব্রেৎ তৌখিবা ৱাফম শিংথাখি। মহাক্না কর্নাতকাদা পাঙথোকখিবা নেস্নেল য়ুথ ফেস্তিবেল, মহাক্কা অগ্নিবীরগী অহানবা বেতচকা, উত্তর প্রদেশগী খেল মহাকুম্ভদা নহা ওইরিবা শান্নরোয়শিংগা, পার্লিয়ামেন্ত অমদি মহাক্কী শঙ্গায়দা অঙাংশিংগা, অমদি বাল পুরস্কার মনা ফংলবশিংগা মহাক্কা ৱারী ৱাতায় শানখিবশিং মহাক্না পনখি। প্রধান মন্ত্রীনা জনুৱারী ২৭তা পাঙথোক্কদৌরিবা পরিক্সা পে চর্চাদা মহৈরোয়শিংগা ৱারী ৱাতায় শান্নগদৌরিবগী মতাঙদসু পনখি।
প্রধান মন্ত্রীনা নহাশিংগা ৱারী ৱাতায় শানরিবা অসিগী মরুওইবা মরম অনিগী মতাঙদা ৱারী লীখি। অহানবদা, নহাশিংগী মতিং, তগৎ তগৎ তেক্লিবা ফীভম, অনৌবা ৱাখল্লোন অমদি পুক্নিং লুপ্পা অসিনা মরম ওইরগা মখোয়বু অহিং নুংথিল নাইদনা কন্না হোৎননবা পুক্নিং থৌগৎলি। “অনিসুবদা, নখোয় পুম্নমক্না ‘অমৃৎ কাল’ অসিদা মঙলানশিংগী অনিংবা অপাম্ববু মহুৎ শিল্লিবনি অমদি নখোয়না ‘বিক্সিৎ ভারত’কী খ্বায়দগী চাউবা বিনিফিসরী ওইগদৌরিবনি অমদি নখোয়না মসিবু শেমগৎনবগী খ্বায়দগী চাউবা থৌদাং পুদুনা চৎলি”, হায়না প্রধান মন্ত্রীনা হায়খি।
প্রধান মন্ত্রীনা মীয়ামগী পুন্সিগী মায়ওন কয়াদা নহাশিংগী শক্লোন হেনগৎলকপা উবসি পুক্নিং থৌগৎনিংঙাইনি হায়খি। মহাক্না পরাক্রম দিবস অমদি অজাদী কা অমৃৎ মহোৎসবকী অতৈ থৌরমশিংদা নহা মশিং য়াম্না শরুক য়াখিববু নীংশিংদুনা মদুদা নহাশিংনা লৈবাকসিগীদমক্তা মঙলিবা মঙলান অমদি কত্থোকপগী মমি তারি হায়বা ৱাফম থমখি।
প্রধান মন্ত্রীনা কোরোনা লাইচৎকী মতমদা এন.সি.সি. অমদি এন.এস.এস. ভলুন্তিয়রশিংগী থৌদাংবু শিংথাখি অমদি অসিগুম্বা লূপশিংবু পুক্নিং থৌগৎনবা লৈঙাক্না পায়খৎলিবা থৌরাংশিং পনখি। লৈবাকসিগী ঙমখৈ অমদি সমুদ্র খোঙবালগী মফমশিংদা থেংনরিবা শিংনবশিংগীদমক নহাশিংবু শেম শাদুনা লৈহন্নবা লৈঙাক্না পায়খৎলিবা থৌরাংশিংগী মতাঙদা পাউদম্লদুনা, প্রধান মন্ত্রীনা লৈবাকসিগী দিস্ত্রিক্ত দজন কয়াদা অখন্নবা থৌরাংশিং পায়খত্তুনা আর্মী, নেভী অমদি এয়রফোর্সকী মতেঙদা লোয়ননা অখন্নবা ত্রেনিংশিং পীরি হায়বা ৱাফম থমখি। হায়রিবা এক্সরসাইস অসিনা নহাশিংবু তুংগীদমক শেম শাদুনা থম্বতা নত্তনা মথৌ তারকপা মতমদা মখোয়বু অহানবা রেস্পোন্দর ওইনা থবক তৌবা ঙমহনগনি হায়না মহাক্না শিংথাখি। প্রধান মন্ত্রীনা লৈবাকসিগী ঙমখৈগী লমদা লৈরিবা খুঙ্গংশিং শেমগৎ শাগৎপগী থবক পায়খৎলিবা ইচঙ থৌরবা ঙমখৈগী থৌরাংশিংগী মতাঙদসু পনখি। “ঙমখৈগী লমদগী ইমুংশিংনা মহৈ মশিং অমদি থবক ফংনবগী হেন্না ফবা খুদোংচাবশিং শেমগৎলবা মখোয় মখোয়গী খুঙ্গংদা হঞ্জখিবা য়ানবগীদমক ঙমখৈগী লমদা লৈবা নহাশিংগী মতিং হেনগৎহন্নবা থৌরাং কয়াসু পায়খৎলি”, হায়না প্রধান মন্ত্রীনা হায়খি।
প্রধান মন্ত্রীনা কেদেৎশিংগী মফমদা মখোয়গী মায় পাকপদা মখোয়গী মমা মপাশিং অমদি ইমুং মনুংগী থৌদাংশিং য়াওরি অমদি মদু ঙমহল্লিবসি ‘সবকা সাথ, সবকা বিস্বাস, সবকা প্রয়াস’ অসিননি হায়খি। “নখোয়গী মায় পাকপগী ঙমখৈ নখোয়গী পান্দমবু লৈবাক্কী পান্দমগা মরী শম্নহল্লবা মতমদা পাকথোক চাউথোরকই। নখোয়গী মায় পাকপবু মালেমসিনা ভারতকী মায় পাকপা ওইনা উগদৌরিবনি”, হায়না প্রধান মন্ত্রীনা ফোঙদোকখি। দোক্তর এ.পি.জে. অব্দুল কলাম, হোমি জহাঙ্গির বাবা অমদি দোক্তর সি.ভি. রমন্নচিংবা সাইন্তিস্তশিং, অমদি মেজর ধ্যানচন্দ অমসুং অতৈ শান্নরোয়শিংবু খুদম ওইনা পীরদুনা, প্রধান মন্ত্রীনা মালেম পুম্বনা মখোয়গী পন্দোলশিং অমদি মায় পাকপশিংবু ভারতকী মায় পাকপনি হায়না লৌনরি হায়বা ৱাফম থমখি। “মালেম অসিনা মশাগী ওইবা অনৌবা তুংলমচৎ অমা ভারতনা ফংবা ঙম্লিবশিং অসিদা উরি”, হায়না মহাক্না হায়খি। সবকা প্রয়াসকী ৱাখল্লোনগী মপাঙ্গলবু শিংথারদুনা, প্রধান মন্ত্রীনা পুৱারী ওইবা মায় পাকপা হায়বসি মীওইবা খুন্নাই পুম্নমক্কী চাওখৎনবগী খোঙফম শেম্লিবশিং অদুবুনি হায়খি।
প্রধান মন্ত্রীনা নহাশিংগী হান্না লৈরমদবা খুদোংচাবা কয়া থোরক্লিবা হৌজিক মতমসিগী তোপ তোপ্পা মশকপু পুথোক্তুনা নৈনখি। স্তার্তঅপ ইন্দিয়া, মেক ইন ইন্দিয়া অমদি আত্মনিরভর ভারতনচিংবা কেম্পেনশিং অমদি মীওইবা খুন্নাইগী তুংলমচত্তা ভারতনা থম্লিবা মীৎয়েঙবু অনৌবা পুক্নিং থৌগৎনিংঙাইগী খুদম ওইনা শিংথাখি। লৈবাক অসিনা এ.আই., মেচিন লর্নিং অমদি অতৈ তুংলমচৎকী ওইবা তেক্নোলোজীশিংগী লমদা মাঙজিল থানা চৎলি হায়না মহাক্না হায়খি। মহাক্না শান্ন-খোৎনবা অমদি অতৈ থবক থৌরমশিংগীদমক শেমগৎলিবা অচৌবা সিস্তেমবুসু শিংথাখি। “নখোয়না পুম্নমক অসিগী শরুক ওইরবনি। নখোয়না উবা ঙমদ্রিবা ওইথোকপা য়াবশিং থিবা তাই; উবা ঙমদ্রিবা হীরমশিংদা চঙশিনবা তাই, অমদি ৱাখলনা খল্লুদবা পাম্বৈশিং থিবা তাই”, হায়না মহাক্না হায়খি।
তুংলমচৎকী পান্দমশিং অমদি ফিরেপশিং লৈবাকসিগীদমক্তা য়াম্না মরুওই হায়বা ৱাফম থম্লদুনা, প্রধান মন্ত্রীনা হৌজিক হৌজিক্কী ওইবা মরুওইনা মীৎয়েঙ চঙগদবা হীরমশিংদসু চপ চানা থবক পায়খৎপা তাই হায়খি। মহাক্না নহাশিংগী মফমদা মখোয় মশাবু লৈবাকসিদা হোংলক্লিবশিংগী মরমদা খঙজিন্নবা অমদি চত্থরিবা কেম্পেনশিংদা পুক্নিং চঙনা শরুক য়ানবা ৱাফম থমখি। স্বছ্চ ভারত কেম্পেনগী মরমদা পল্লদুনা, প্রধান মন্ত্রীনা লৈবাকসিগী নহা খুদিংমক্না মসিবু পুন্সিগী মিসন অমা ওইনা লৌগদবনি হায়রদুনা মখোয় মখোয়গী লৈকায়, খুঙ্গং, তাউন অমদি সিতীশিং লুনা নান্না থম্নবা ৱাফম থমখি। মতৌ অসুম্না, অমৃৎ মহোৎসব মনুংসিদা নীংতম লান্মীশিংগী মতাঙদা ইবা লাইরক অমত্তং ওইরবসু পাননবা মহাক্না হায়খি। মহাক্না মখোয়দা নীংতম লান্মী খরগী মতাঙদা শৈরেং ইবা, ৱারী ইবা নৎত্রগা ভ্লোগ্গিং তৌবনচিংবা ক্রিএতিব ওইবা থবক থৌরম খরা পায়খৎনবা অমদি মখোয়গী স্কুলশিংদা হায়রিবা থবক থৌরমশিং অসিগী মতাঙদা অথোই অহেন তান্নবগী থৌরমশিং পাঙথোক্নবা ৱাফম থমখি। প্রধান মন্ত্রীনা নহাশিংগী মফমদা মখোয় মখোয়গী দিস্ত্রিক্ততা পায়খৎলিবা অমৃৎ সরোবরশিংগী মনাক্তা উ থাবগী থবকশিং পায়খৎনবা অমদি মখোয়বু ঙাক শেন্দুন মপুং মরৈ ফাহন্নবগী মতাঙদা মীয়ামদা পাক শন্না খঙহন্নবা ৱাফমসু থমখি। মহাক্না নহাশিংবু ফিৎ ইন্দিয়া মুভমেন্ততা শরুক য়ানবা অমদি মখোয়গী ইমুংগী মীওইশিংবুসু শরুক য়াহন্নবা ৱাফমসু থমখি। মহাক্না য়ুম খুদিংদা য়োগগী চৎনবী হৌদোক্নবা ৱাফমসু পনখি। প্রধান মন্ত্রীনা নহাশিংগী মফমদা মখোয় মশাবু জি-২০ সম্মিৎকী মতাঙদা ঈ-পাউ অপদেৎ তৌননবা অমদি ভারতগী চেয়রসিপকী মতাঙদা ইচঙ থৌনা ৱারী ৱাতায় তৌননবগীদমকসু হায়খি।
‘ঐখোয়গী হেরিতেজতা চাউথোকচবা’ অমদি মীনায় নাইথাংগী ৱাখল্লোন্দগী নীংতম্বা’ হায়রিবা ফিরেপশিং অসিগী মতাঙদা পল্লদুনা, প্রধান মন্ত্রীনা হায়রিবা ফিরেপশিং অসিগী লমদা নহাশিংনা লৌগদবা শক্লোনগী মরমদা পনখি অমদি মখোয়না লম কোয়বা মতমদা হেরিতেজ মফমশিংসু য়ৌশিন্নবা হায়খি। “নখোয় নহা ওইরি, মতম অসি নখোয়গী তুংলমচৎ শেমগদবা মতম্নি। নখোয় অনৌবা ৱাখল্লোন অমদি অনৌবা স্তেন্দর্দশিং শেম্লিবনি। নখোয়না অনৌবা ভারতকী লম্বী য়াৎলিবশিংনি”, হায়বা ৱাফম থম্লদুনা প্রধান মন্ত্রীনা মহাক্কী ৱারোল লোইশিনখি।
কেন্দ্রগী দিফেমন্স মন্ত্রী, শ্রী রাজ নাথ সিংহ, কেন্দ্রগী স্পোর্তস এন্দ য়ুথ এফ্যার্স মন্ত্রী, শ্রী অনুরাগ সিংহ থাকুর, কেন্দ্রগী ত্রাইবেল এফ্যার্স মন্ত্রী, শ্রী অর্জুন মুন্দা, কেন্দ্রগী রাজ্য মন্ত্রী, শ্রী অজয় ভি, শ্রীমতী রেনুকা সিংহ সরুতা, শ্রী নিসিথ প্রমানিক অমদি অতৈ কয়াসু থৌরমদুদা শরুক য়াখি।
*****
(Release ID: 1893869)
Visitor Counter : 94
Read this release in:
Telugu
,
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Kannada
,
Malayalam