وزیر اعظم جناب نریندر مودی نے آج ویڈیو کانفرنسنگ کے ذریعے انڈمان اور نکوبار جزائر کے 21 سب سے بڑے بے نام جزیروں کو 21 پرم ویر چکر ایوارڈ یافتہ افراد کے نام سے منسوب کرنے کی تقریب میں شرکت کی۔ پروگرام کے دوران انہوں نے نیتا جی سبھاش چندر بوس دیپ پر تعمیر کی جانے والی نیتا جی کے نام وقف قومی یادگار کے ماڈل کی بھی نقاب کشائی کی۔ اس تاریخی موقع پر مرکزی وزیر داخلہ اور وزیر تعاون جناب امت شاہ نے پورٹ بلیئر میں منعقد ایک خصوصی تقریب میں شرکت کی۔ انہوں نے پرم ویر چکر ایوارڈ یافتہ صوبیدار میجر ریٹائرڈ (اعزازی کیپٹن) یوگیندر سنگھ یادو، صوبیدار میجر سنجے کمار، نائب صوبیدار بنا سنگھ اور دیگر فوجیوں کے اہل خانہ کو اعزاز سے نوازا۔ انڈمان اور نکوبار جزائر کے لیفٹیننٹ گورنر امیر بحریہ ڈی کے جوشی سمیت کئی معززین بھی اس پروگرام میں موجود تھے۔

جناب امت شاہ نے اپنے خطاب میں کہا کہ آج کا دن ملک کی تینوں افواج کے لیے بہت اہم دن ہے کیونکہ اس سے پہلے دنیا کے کسی بھی ملک نے فوجیوں کی بہادری کو ان کے نام سے منسوب نہیں کیا ہے۔ آج، وزیر اعظم نریندر مودی کی ہمارے پرم ویر چکر ایوارڈ یافتہ افراد کی ہمیشہ کے لیے یادگار بنانے کی کوشش تینوں افواج کے لیے بہت حوصلہ افزا ہے۔ انہوں نے کہا کہ آج نیتا جی سبھاش چندر بوس کے 126ویں یوم پیدائش کو پورے ملک میں پراکرم دیوس کے طور پر منایا جا رہا ہے۔ اس موقع پر انڈمان اور نکوبار جزائر کے سبھاش دیپ میں نیتا جی کی یادگار بنانے کا بھی فیصلہ کیا گیا ہے، جہاں وہ تحریک آزادی کے دوران ٹھہرے تھے۔ جناب شاہ نے کہا کہ وزیر اعظم نریندر مودی کی طرف سے لیے گئے یہ دونوں فیصلے جزائر انڈمان اور نکوبار کی آزادی کی یادوں کو پورے ملک سے جوڑیں گے اور ان فیصلوں کے ذریعے ہندوستان کی نوجوان نسل میں حب الوطنی اور بہادری کا جذبہ پیدا ہوگا۔

مرکزی وزیر داخلہ نے کہا کہ کبھی کبھی کسی زمین میں ایسا عنصر ہوتا ہے کہ وہ بار بار سب کی توجہ اپنی طرف کھینچ لیتا ہے۔ 1857 کے انقلاب کے بعد جب انگریزوں نے آزادی پسندوں پر بے رحمانہ تشدد شروع کیا تو جزائر انڈمان اور نکوبار کی اس سرزمین پر ہمارے انقلابیوں کو سیلولر جیل میں رکھا گیا، اس وقت انڈمان اور نکوبار کی اس سرزمین نے مجاہدین آزادی کو ایک ماں کی طرح تسلی دی تھی۔ انہوں نے کہا کہ نیتا جی کی ملک کو آزاد کرانے کی کوششوں کی وجہ سے ’آزاد ہند فوج‘ نے ملک کے اس حصے کو آزادی سے نوازا اور نیتا جی نے اس جزیرے پر پہلی بار ترنگا لہرایا۔

مرکزی وزیر داخلہ اور وزیر تعاون نے کہا کہ انڈمان اور نکوبار جزائر سیلولر جیل کی وجہ سے پہلے ہی آزادی کی زیارت گاہ بن چکے تھے، پھر نیتا جی نے آزاد کرایا اور اس پاک سرزمین پر ترنگا لہرایا۔ نیتا جی کے نقش قدم پر چلتے ہوئے وزیر اعظم جناب نریندر مودی نے شہید دیپ، سوراج دیپ اور سبھاش دیپ کا نام دیا اور آج 21 جزیروں کا نام ان لوگوں کے نام کیا جنہوں نے اپنی جانوں کا نذرانہ دے کر ملک کی آزادی اور خودمختاری کے لیے جدوجہد کی۔ جناب شاہ نے کہا کہ آج 21 جزیروں کا نام ان بہادروں کے نام پر رکھ کر وزیر اعظم نریندر مودی نے ان کی بہادری کو سراہا ہے۔ جب بھی پورے ہندوستان کی تاریخ لکھی جائے گی تو یہ واقعہ سنہری حروف سے لکھا جائے گا۔

جناب امت شاہ نے کہا کہ آج نیتا جی سبھاش چندر بوس کی 126ویں یوم پیدائش پر، جنہوں نے ملک کی آزادی کی جدوجہد میں بے مثال تعاون کیا، ایک سبھاش یادگار کا بھی اعلان کیا گیا ہے۔ نیتا جی سبھاش چندر بوس نے ملک کو آزاد کرانے کے لیے منفی 45 ڈگری درجہ حرارت اور منفی موسمی حالات سے گزرتے ہوئے کولکتہ سے برلن تک 15000 کلومیٹر کا سفر کیا، لیکن بد قسمتی سے آزادی کے مقصد کے لیے ان کے تعاون کو دبانے کی بہت سی کوششیں کی گئیں۔ لیکن کہا جاتا ہے کہ ہیروز اپنی یادداشت کے لیے کسی کے محتاج نہیں ہوتے، یاد ان کی بہادری سے جڑی ہوتی ہے۔ وزیر داخلہ نے کہا کہ 23 جنوری کو پراکرم دیوس قرار دیا گیا تھا اور اسی دن یہ اعلان کیا گیا ہے کہ سبھاش دیپ کو سبھاش چندر بوس کی یادگار کے طور پر تیار کیا جائے گا تاکہ لوگ نسل در نسل نیتا جی سبھاش چندر بوس کو خراج عقیدت پیش کر سکیں۔ جناب شاہ نے کہا کہ وہ ان دونوں فیصلوں کے لیے پورے ملک کی جانب سے وزیر اعظم کا شکریہ ادا کرنا چاہیں گے۔

جناب امت شاہ نے کہا کہ آج سبھاش جزیرے پر نیتا جی کی یادگار کا اعلان کیا گیا ہے۔ اس کے علاوہ میوزیم، روپ وے، لیزر لائٹ اینڈ ساؤنڈ شو، تفریحی پارک اور کھانے پینے کی جگہوں کا انتظام بھی کیا جائے گا۔ انہوں نے کہا کہ حکومت ہند کی یہ کوشش ہے کہ اس یادگار کو اس طرح تیار کیا جائے کہ آنے والی کئی نسلیں تحریک آزادی کے جنگجو سبھاش چندر بوس کی بہادری سے متاثر ہو سکیں اور ان کی اقدار کو اپنا سکیں۔

مرکزی وزیر داخلہ اور وزیر تعاون نے کہا کہ وزیر اعظم نریندر مودی کی قیادت میں حکومت کے قیام کے بعد 2015 سے دفاعی افواج کے لیے بہت سے اقدامات کیے گئے ہیں۔ ون رینک ون پنشن کا مسئلہ حل ہوا، اس میں تاریخی تبدیلیاں کی گئیں۔ فوج کے انتظامی ڈھانچے، نظام کو خود کفیل بنانے کی کوششیں کی گئیں اور تینوں افواج کو جدید ہتھیاروں اور جدید مواصلاتی نظام سے لیس کرنے کے لیے بہت سے اقدامات کیے گئے۔ آج، 21 پرم ویر چکر کے اعزاز میں 21 جزیروں کو ان کے نام سے منسوب کرنے کے لیے ایک اہم قدم اٹھایا گیا ہے۔ جناب شاہ نے کہا کہ یہ دونوں فیصلے ہندوستان کی نوجوان نسل کو حب الوطنی اور بہادری کا پیغام اور اقدار دیں گے۔

**************

ش ح۔ ف ش ع- م ف

U: 761