প্রধান মন্ত্রী, শ্রী নরেন্দ্র মোদীনা বেসিক ত্রেনিং হৌখ্রবা সর্ভিস অহুমগী অগ্নিবীর অহানবা বেতচকী মফমদা জনুৱারী ১৬, ২০২৩দা ভিদিও কন্ফরেন্সিংগী খুত্থাঙদা ৱা ঙাঙখ্রে‍। প্রধান মন্ত্রীনা অগ্নিবীরশিংবু লম্বী য়াৎলিবা অগ্নিপথ স্কীমগী লময়ানবা ওইরকপদা নুংঙাইবা ফোঙদোকখ্রে‍। অওনবা পুরক্কদবা থৌরাং অসিনা ঐখোয়গী খুৎলায় পায়বা লান্মীশিংবু মপাঙ্গল কনখৎহনবদা অমদি মখোয়গী তুংলমচৎকীদমক শেম শাহনবদা অহোংবা পুরক্কনি হায়বা ৱাফম মহাক্না থমখি‍। নহা ওইরিবা অগ্নিবীরশিংনা আর্ম্দ ফোর্সবু হেন্না নহা ওইহনবা অমদি তেক সেভী ওইহনবা ঙম্লগনি হায়বা ৱাফমসু প্রধান মন্ত্রীনা থমখি‍।

অগ্নিবীরশিংগী মতিং থাগৎলদুনা, মখোয়গী পুক্নিং ৱাখলদা লৈবাকসিগী ফিরালবু মতম পুম্নমক্তা ৱাংনা পাইহল্লিবা আর্ম্দ ফোর্সকী থৌনাগী মমি তারি হায়না মহাক্না হায়খি‍। খুদোংচাবা অসিদগী মখোয়না ফংহৌগদৌরিবা এক্সপরিএন্স অসিনা পুন্সিগী চাউথোকচনিংঙাইগী হৌরকফম অমা ওইগদৌরিবনি হায়না মহাক্না হায়খি‍।

প্রধান মন্ত্রীনা অনৌবা ভারত অসি অনৌবা পাঙ্গলনা থল্লি, অমদি ঐখোয়গী খুৎলায় পায়বা লান্মীশিংবু মতমগা চুনহন্নবা লোয়ননা মখোয়বু আত্মনিরভর ওইহন্নবা থৌরাং পায়খৎলি হায়খি‍। ২১শুবা চহিচাগী লান থেংনবগী মওং মতৌ হোংলক্লি হায়না মহাক্না হায়খি‍। কন্তেক্তলেস ৱারফ্যারগী অনৌবা মায়ওনশিং অমদি সাইবর ৱারফ্যারগী শিংনবশিং নৈনরদুনা, মহাক্না তেক্নোলোজীনা খুমাঙ চাওশিনহল্লবা লান্মীশিংনা ঐখোয়গী খুৎলায় পায়বা লান্মীশিংগী মরুওইবা শক্লোন লৌগনি হায়খি‍। হৌজিক্কী নহা মীরোলসিদা হায়রিবা মতিং অসি অখন্ননা য়াওই, অমদি লাক্কদৌরিবা মতমদা অগ্নিবীরশিংনা ঐখোয়গী আর্ম্দ ফোর্সতা মাঙজিল থাবা শক্লোন লৌগনি হায়না মহাক্না মখা তাখি‍।

প্রধান মন্ত্রীনা স্কীম অসিনা কমদৌনা নুপীশিং মপাঙ্গল কনখৎহনবা ঙমগনি হায়বা ৱাফমসু থমখি‍। নুপী অগ্নিবীরশিংনা ঈশিং লান্মীগী চাউথোকচবদা মতিং হাপ্লিবসিদা মহাক্না নুংঙাইবা ফোঙদোকখি, অমদি লান্মী শঙলুপ অহুম্মক্তা নুপী অগ্নিবীরশিং য়াওরক্নবা মীৎয়েঙ থম্লি হায়খি‍। সিয়াচিন্দা মথৌ তৌরিবা নুপী লান্মীশিং অমদি মোদর্ন ফাইতর প্লেনশিং পাইরিবা নুপীশিংগী খুদম পীরদুনা প্রধান মন্ত্রীনা হীরম কয়াদা নুপীশিংনা কমদৌনা আর্ম্দ ফোর্সপু লমজিংলিবগে হায়বা ৱাফম নীংশিংখি‍।

প্রধান মন্ত্রীনা তোঙান তোঙানবা মফমশিংদা থবক তাবনা মখোয়না খেন্নবা এক্সপরিএন্সশিং ফংহৌনবগী খুদোংচাবা পীগনি অমদি মখোয়না তোঙান তোঙানবা লোলশিং অমদি নাৎ অমসুং পুন্সি মহিংশিংগী মরমদা খঙহৌনবা হোৎনগদবনি হায়খি‍। তীমৱর্ক অমদি লুচিংবগী ৱাখল লৌশিং খঙজিনহৌবনা মখোয়গী পুন্সিদা অনৌবা মায়ওন অমা হাপকনি হায়খি‍। মহাক্না অগ্নবীরশিংবু মখোয়না পামজবা হীরমশিংদা লৈরিবা মখোয়গী স্কিলশিং হেন্না ফগৎহন্নবা হোৎনবগা লোয়ননা অনৌবা কয়াসু তমশিন্নিংবগী ইখৌ লাংবা লৈহন্নবা ৱাফম থমখি‍। নহা অমদি অগ্নিবীরশিংগী মতিংবু থাগৎলদুনা, মখোয় অসিনা ২১শুবা চহিচাসিদা লৈবাক অসিগী লুচিংবা ওইরক্কদৌরিবনি হায়না ফোঙদোকপগা লোয়ননা প্রধান মন্ত্রীগী ৱাফম লোইশিনখি‍।

ঙাক-শেল মন্ত্রী, শ্রী রাজনাথ সিংহগী তরাম্না ওকপগী ৱারোলদা মহাক্না সেক্তর খুদিংনা অনৌবা পান্দম থম্নরিবা অমসুং মদুবু ফংনবা খোঙজেল য়াঙনা চঙশিনবগী ফম্বাক ওইরিবা প্রধান মন্ত্রীগী ‘এক ভারত স্রেস্থ ভারত;কী মঙলানবু থাগৎখি। ঙাক-শেল মন্ত্রালয় (এম.ও.দি.)না লৈবাক অসিগী মপাঙ্গল হেনগৎহন্নবা ৱারেপ কয়া অমা লৌখ্রে অমসুং অগ্নিপথ স্কিম অসিদি ঐখোয়না পাংথোকখিবা খ্বাইদগী মরু ওইবা অমসুং মমাংদা অমুক্তা পাংথোকখিদ্রিবা রিফোর্ম অমনি হায়না মহাক্না হায়খি।

ঙাক-শেল মন্ত্রীনা মালেমগী লেপ্তনা হোংলিবা ফিভম অমসুং জিওপোলিতিক্সকী মতাংদা তংদু লৈতাবগী ফিভম লৈত্রিবা অসিগী মরকসিদা লৈবাক্কী সেক্যুরিতী এপ্পারেতস মপাঙ্গল হেনগৎহনবা অসিনা সরকারগী খ্বাইদগী অহানবা মিৎয়েং চঙবা থৌওংনি হায়না ফোংদোকখি। মসিগুম্বা ফিভম অসিদা, অগ্নিপথ স্কিম্না ঐখোয়গী আর্ম্দ ফোর্সকী শক্তাকপু নহা অমসুং তেক সেভী ওইবগী শক্তম অমা পীগনি হায়না মহাক্না হায়খি। শ্রী রাজনাথ সিংহনা হায়খিবদা হৌজিক হোৎনরিবা খুদিং অসিদি অগ্নিবীরশিংবু আর্ম্দ ফোর্সকা লোয়ননা মখোয়গী পাঙ্গল অমসুং লৌশিংগী মতেংদগী খুন্নাইদা তেংবাংবা ঙমহন্নবনি। স্কিম অসিদি মপাঙ্গল লৈবা অমসুং নুংঙাই য়াইফবা “অনৌবা ভারত” অমস শেম্বগী মাইকৈদা চঙশিনবা লমজিং খোংথাং অমনি।

শ্রী রাজনাথ সিংহনা মীয়াম্না মসিগী রিক্রুতমেন্তকীদমক্তা মশিং য়াম্না থোক্লক্তুনা স্কিম অসিবু মীয়াম্না থৱাই য়াওনা অয়াবা ফোংদোকপা অসিদা নুংঙাইবা ফোংদোকখি। নুপাশিংগা লোয়ননা ত্রেনিং তৌরিবী নুপী অগ্নিবীরশিংবু মহাক্না অখন্ননা পন্দুনা থাগৎখি।

এম.ও.দি. য়াওনা তোঙানবা মন্ত্রালয়শিংনা অগ্নিবীরগী য়াইফ য়ুম্বালগীদমক্তা মাঙ থানা থোক্লক্লি হায়বা ৱাফমদা ঙাক-শেল মন্ত্রীনা মীয়ামগী পুক্নিং চিংশিনখি। “ঙাক-শেল মন্ত্রালয়, সেন্ত্রেল আর্ম্দ পুলিস ফোর্স অমসুং রেলৱে মন্ত্রালয়শিংগী তোঙানবা বিভাগশিংদা অগ্নবীরশিংগীদমক্তা মশিং য়াম্লবা ফম কয়া খাক্তুনা থম্লি। এম.ও.দি. অমসুং এজুকেসন মন্ত্রালয়না অগ্নিবীরশিংবু মহৈ-মশিং নিংথীনা তমহন্নবগীদমক্তা থবক থৌরম কয়া পুন্না শীন-লাঙলি। থবক্কী মতম লোইরবা মতুংদা মশাগী কারবার হৌদোকচনিংবা অগ্নিবীরশিংদা অনেম্বা রেত্তা লোন পীনবগীদমক্তা শেল থুম মন্ত্রালয়গা খুৎশম্নদুনা থবক থৌরম কয়াসু শীন লাঙলি। অগ্নিবীরশিংনা সুরক্ষাবীর ওইবখক নত্তনা সমৃধিবীরসু ওইগনি”, হায়না মহাক্না হায়খি। প্রধান মন্ত্রীগী মঙলান অমসুং মমল নাইরবা ৱাখল্লোনশিংনা অগ্নিবীর খুদিংদা ইথিল পীদুনা লমজিংগনি হায়বগী থাজবা লৈ হায়না শ্রী রাজনাথ সিংহনা ফোংদোকখি।

প্রধান মন্ত্রীগী ৱারোল অসি অগ্নিবীর ত্রেনিং সেন্তর খুদিংদা লাইব তেলিকাস্ত তৌখি অমসুং থৌরমসিদা দিফেন্স স্তাফকী চীফ অনিল চাউহান, এয়র স্তাফকী চীফ এয়র চীফ মার্শেল ভি.আর. চাউধারী, নেভেল স্তাফকী চীফ এদমিরেল আর. হরি কুমার, আর্মী স্তাফকী চীফ জেনেরেল মনোজ পান্দে অমসুং দিফেন্স মন্ত্রালয়গী অতোপ্পা সেনিয়র ওফিসরশিংনা শরুক য়াখি।

*****