ਖਾਣ ਮੰਤਰਾਲੇ ਨੇ ਮੌਲਿਕ/ਅਪਲਾਈਡ ਭੂ-ਵਿਗਿਆਨ, ਖਣਨ ਅਤੇ ਸਬੰਧਤ ਖੇਤਰਾਂ ਵਿੱਚ ਯੋਗਦਾਨ ਲਈ ਭੂ-ਵਿਗਿਆਨ-2022 ਵਿੱਚ ਰਾਸ਼ਟਰੀ ਪੁਰਸਕਾਰਾਂ ਲਈ ਨਾਮਜ਼ਦਗੀਆਂ ਨੂੰ ਸੱਦਾ ਦਿੱਤਾ ਹੈ। 1966 ਵਿੱਚ ਸਥਾਪਿਤ ਕੀਤੇ ਗਏ ਅਤੇ ਸਾਲਾਨਾ ਅਧਾਰ 'ਤੇ ਦਿੱਤੇ ਜਾਣ ਵਾਲੇ, ਇਹ ਪੁਰਸਕਾਰ ਭੂ-ਵਿਗਿਆਨੀਆਂ ਨੂੰ ਉੱਤਮਤਾ ਲਈ ਯਤਨ ਕਰਨ ਲਈ ਉਤਸ਼ਾਹਿਤ ਕਰਨ ਲਈ ਮੰਤਰਾਲੇ ਦੀ ਇੱਕ ਪਹਿਲ ਹੈ। ਰਾਸ਼ਟਰੀ ਭੂ-ਵਿਗਿਆਨ ਪੁਰਸਕਾਰ ਤਿੰਨ ਸ਼੍ਰੇਣੀਆਂ ਵਿੱਚ ਹਨ:

ਰਾਸ਼ਟਰੀ ਭੂ-ਵਿਗਿਆਨ ਪੁਰਸਕਾਰ - ਲਾਈਫਟਾਈਮ ਅਚੀਵਮੈਂਟ: ਲਾਈਫਟਾਈਮ ਅਚੀਵਮੈਂਟ (ਸਿੰਗਲ ਪੁਰਸਕਾਰ) ਉਸ ਵਿਅਕਤੀ ਨੂੰ ਦਿੱਤਾ ਜਾਵੇਗਾ, ਜਿਸ ਨੇ ਐੱਨਜੀਏ ਨਿਯਮ 2022 ਦੀ ਧਾਰਾ -2 ਵਿੱਚ ਦੱਸੇ ਅਨੁਸਾਰ ਕਿਸੇ ਵੀ ਵਿਸ਼ੇ ਵਿੱਚ ਨਿਰੰਤਰ ਅਤੇ ਮਹੱਤਵਪੂਰਨ ਯੋਗਦਾਨ ਲਈ ਇੱਕ ਅਸਧਾਰਨ ਤੌਰ 'ਤੇ ਉੱਚ ਜੀਵਨ ਭਰ ਦੀ ਪ੍ਰਾਪਤੀ ਕੀਤੀ ਹੈ। ਪੁਰਸਕਾਰ ਵਿੱਚ 5,00,000 ਰੁਪਏ ਨਕਦ ਅਤੇ ਇੱਕ ਸਰਟੀਫਿਕੇਟ ਦਿੱਤਾ ਜਾਂਦਾ ਹੈ।

ਰਾਸ਼ਟਰੀ ਭੂ-ਵਿਗਿਆਨ ਪੁਰਸਕਾਰ: ਰਾਸ਼ਟਰੀ ਭੂ-ਵਿਗਿਆਨ ਪੁਰਸਕਾਰ (10 ਪੁਰਸਕਾਰ) ਵਿਅਕਤੀਆਂ ਜਾਂ ਟੀਮ ਨੂੰ ਐੱਨਜੀਏ ਨਿਯਮ 2022 ਦੀ ਧਾਰਾ-2 ਵਿੱਚ ਦਰਸਾਏ ਗਏ ਕਿਸੇ ਵੀ ਵਿਸ਼ੇ ਵਿੱਚ ਸ਼ਾਨਦਾਰ ਯੋਗਦਾਨ ਦੀ ਮਾਨਤਾ ਵਜੋਂ ਦਿੱਤੇ ਜਾਣਗੇ। ਹਰ ਇੱਕ ਪੁਰਸਕਾਰ ਵਿੱਚ 3,00,000 ਰੁਪਏ ਨਕਦ ਅਤੇ ਇੱਕ ਸਰਟੀਫਿਕੇਟ ਦਿੱਤਾ ਜਾਂਦਾ ਹੈ। ਟੀਮ ਪੁਰਸਕਾਰ ਦੇ ਮਾਮਲੇ ਵਿੱਚ, ਇਨਾਮੀ ਰਾਸ਼ੀ ਬਰਾਬਰ ਵੰਡੀ ਜਾਵੇਗੀ।

ਰਾਸ਼ਟਰੀ ਯੁਵਾ ਭੂ-ਵਿਗਿਆਨਕ ਪੁਰਸਕਾਰ: ਯੁਵਾ ਭੂ-ਵਿਗਿਆਨਕ ਪੁਰਸਕਾਰ (ਸਿੰਗਲ ਪੁਰਸਕਾਰ) 35 ਸਾਲ ਤੋਂ ਘੱਟ ਉਮਰ ਦੇ ਵਿਅਕਤੀ ਨੂੰ 31 ਦਸੰਬਰ 2021 ਨੂੰ ਭੂ-ਵਿਗਿਆਨ ਦੇ ਕਿਸੇ ਵੀ ਖੇਤਰ ਵਿੱਚ ਸ਼ਾਨਦਾਰ ਖੋਜ ਕਾਰਜ ਲਈ ਦਿੱਤਾ ਜਾਵੇਗਾ। ਇਸ ਪੁਰਸਕਾਰ ਵਿੱਚ 1,00,000 ਰੁਪਏ ਤੋਂ ਵੱਧ ਦਾ ਨਕਦ ਇਨਾਮ, 5,00,000 ਰੁਪਏ ਦੀ ਖੋਜ ਗ੍ਰਾਂਟ ਅਤੇ ਪੰਜ ਸਾਲਾਂ ਵਿੱਚ ਤਸੱਲੀਬਖਸ਼ ਸਲਾਨਾ ਪ੍ਰਗਤੀ ਦੇ ਅਧਾਰ 'ਤੇ ਇੱਕ ਸਰਟੀਫਿਕੇਟ ਦਿੱਤਾ ਜਾਂਦਾ ਹੈ।

ਭਾਰਤ ਦਾ ਕੋਈ ਵੀ ਨਾਗਰਿਕ, ਜਿਸ ਨੇ ਐੱਨਜੀਏ ਨਿਯਮ 2022 ਦੀ ਧਾਰਾ-2 ਵਿੱਚ ਦਰਸਾਏ ਕਿਸੇ ਵੀ ਖੇਤਰ ਵਿੱਚ ਮਹੱਤਵਪੂਰਨ ਯੋਗਦਾਨ ਪਾਇਆ ਹੈ, ਨੂੰ ਇਨ੍ਹਾਂ ਪੁਰਸਕਾਰਾਂ ਲਈ ਯੋਗ ਮੰਨਿਆ ਜਾਵੇਗਾ। ਨਾਮਜ਼ਦਗੀਆਂ 1 ਨਵੰਬਰ 2022 ਤੋਂ ਰਾਸ਼ਟਰੀ ਪੁਰਸਕਾਰ ਪੋਰਟਲ, ਯਾਨੀ https://www.awards.gov.in 'ਤੇ ਆਨਲਾਈਨ ਪ੍ਰਾਪਤ ਕੀਤੀਆਂ ਜਾ ਰਹੀਆਂ ਹਨ। ਨਾਮਜ਼ਦਗੀਆਂ ਪ੍ਰਾਪਤ ਕਰਨ ਦੀ ਆਖਰੀ ਮਿਤੀ 30 ਨਵੰਬਰ 2022 ਹੈ। ਰਾਸ਼ਟਰੀ ਪੁਰਸਕਾਰ ਪੋਰਟਲ 'ਤੇ ਔਨਲਾਈਨ ਮਾਧਿਅਮ ਤੋਂ ਇਲਾਵਾ ਹੋਰ ਕਿਸੇ ਵੀ ਮਾਧਿਅਮ ਰਾਹੀਂ ਕੀਤੀਆਂ ਨਾਮਜ਼ਦਗੀਆਂ ਸਵੀਕਾਰ ਨਹੀਂ ਕੀਤੀਆਂ ਜਾਣਗੀਆਂ।

ਵਧੇਰੇ ਵੇਰਵਿਆਂ ਲਈ, ਵੈੱਬਸਾਈਟ https://www.awards.gov.in 'ਤੇ 'ਰਾਸ਼ਟਰੀ ਭੂ-ਵਿਗਿਆਨ ਪੁਰਸਕਾਰ ਨਿਯਮ 2022' ਦੇਖੋ। ਇਸ ਸਬੰਧ ਵਿੱਚ ਡਾਇਰੈਕਟਰ (ਤਕਨੀਕੀ), ਖਾਣ ਮੰਤਰਾਲਾ, ਕਮਰਾ ਨੰਬਰ 306-ਡੀ, ਸ਼ਾਸਤਰੀ ਭਵਨ, ਡਾ. ਰਾਜੇਂਦਰ ਪ੍ਰਸਾਦ ਰੋਡ, ਨਵੀਂ ਦਿੱਲੀ - 110 001, ਟੈਲੀਫੈਕਸ - 01123385329, ਈਮੇਲ: ngawards-mines[at]gov[dot]in ਤੋਂ ਵੀ ਜਾਣਕਾਰੀ ਪ੍ਰਾਪਤ ਕੀਤੀ ਜਾ ਸਕਦੀ ਹੈ।

****

ਏਕੇਐੱਨ/ਆਰਕੇਪੀ