କୋଭିଡ-୧୯ ପରିପ୍ରେକ୍ଷୀରେ ସତର୍କ ରହି ମାସ୍କ ପିନ୍ଧିବା ଭଳି କୋଭିଡ ଉପଯୁକ୍ତ ବ୍ୟବହାର ପାଳନ ଯେତିକି ଗୁରୁତ୍ୱପୂର୍ଣ୍ଣ ଭୁଲ ବା ମିଛ ଖବର ପ୍ରସାରଣ ରୋକି ସତ୍ୟ ଓ ପ୍ରାମାଣିକ ଖବର ପ୍ରଦାନ କରିବା ସେତିକି ଗୁରୁତ୍ୱପୂର୍ଣ୍ଣ । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୋଭିଡ ପ୍ରତିକାର ଓ ପ୍ରବନ୍ଧନର ବିଭିନ୍ନ ଦିଗ ସମ୍ପର୍କରେ ସୂଚନା ଶେୟାର କରାଯାଉଛି । ଏହି ଯାଞ୍ଚ ହୋଇଥିବା ସତ୍ୟ ସୂଚନା ବ୍ୟବହାର ଓ ଶେୟାର କରିବା ପାଇଁ ମୁଁ ସମସ୍ତଙ୍କୁ ଅନୁରୋଧ କରୁଛି । ଭାରତୀୟ ମେଡିକାଲ ସଂଘ (ଆଇଏମଏ)ର ପ୍ରତିନିଧି ଓ ଦେଶର ବିଭିନ୍ନ ସ୍ଥାନରୁ ଭାଗ ନେଇଥିବା ପ୍ରାୟ ୧ ଶହ ଡାକ୍ତରଙ୍କ ସହ ଭର୍ଚ୍ୟୁଆଲ ମାଧ୍ୟମରେ ଆଲୋଚନା ବେଳେ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡଃ ମନସୁଭ ମାଣ୍ଡଭୀୟ ଏହା କହିଛନ୍ତି ।

ଡାକ୍ତର ଓ ଆଇଏମଏ ସଦସ୍ୟମାନେ କୋଭିଡ- ୧୯ ସମ୍ପର୍କରେ କେବଳ ପ୍ରାମାଣିକ ସୂଚନା ସାର୍ବଜନୀନ କରିବାକୁ ଡଃ ମାଣ୍ଡଭୀୟ ଅପିଲ କରିଛନ୍ତି । “ଦେଶର କୋଭିଡ- ୧୯ ବିରୋଧୀ ଲଢେଇ ବେଳେ ଆପଣମାନେ ଆମର ରାଷ୍ଟ୍ରଦୂତ ଥିଲେ । ମୁଁ ଆପଣମାନଙ୍କ ଅବଦାନକୁ ସ୍ୱୀକାର କରୁଛି ଓ ସ୍ୱାସ୍ଥ୍ୟ ପେଶାଦାରମାନଙ୍କ ନିଃସ୍ୱାର୍ଥ ଅବଦାନ ଓ ସେବା ଭାବନାକୁ ସାଲ୍ୟୁଟ କରୁଛି । କୋଭିଡ- ୧୯ ରୋଗ ସମ୍ପର୍କରେ ସୂଚନା ପ୍ରଦାନ କରିଏହାର ପ୍ରତିରୋଧ ଓ ପ୍ରବନ୍ଧନ ସମ୍ପର୍କରେ ଲୋକଙ୍କୁ ଶିକ୍ଷିତ କରି ଅବିଶ୍ୱସନୀୟ ସୂଚନା ପ୍ରସାର ରୋକିବାରେ ଆପଣମାନେ ଆମର ଭାଗୀଦାର ଓ ରାଷ୍ଟ୍ରଦୂତ ହୁଅନ୍ତୁ ବୋଲି ଆହ୍ୱାନ କରୁଛି ।“ ଡାକ୍ତରମାନେ ପୂର୍ବପରି ଏହି ଲଢେଇରେ ସମର୍ପିତ ଭାବେ କାମ କରିବା ଜାରି ରଖିବେ ବୋଲି ସେ ଆଶା ବ୍ୟକ୍ତ କରିଛନ୍ତି ।

ଆକଳନ ନକରି ଓ ଲୋକଙ୍କୁ କେବଳ ପ୍ରାମାଣିକ ଓ ସଠିକ ସୂଚନା ପ୍ରଦାନ ପାଇଁ ଡଃ ମାଣ୍ଡଭୀୟ ବୈଠକରେ କହିଛନ୍ତି । ଆମ ନାଗରିକମାନେ ପରାମର୍ଶ ପାଇଁ କୋଭିଡ ଯୋଦ୍ଧାଙ୍କ ଉପରେ ଭରସା କରନ୍ତି ଓ ନିକଟରେ ସାରା ବିଶ୍ୱରେ କୋଭିଡ- ୧୯ ମାମଲା ବଢିଥିବାରୁ ସଠିକ ସୂଚନା ପ୍ରଦାନ କରି ଗୁଜବ, କପୋଳକଳ୍ପିତ ଖବର ତଥା ପ୍ରକାରାନ୍ତେ ଡର ରୋକିବା ଆମ ବିଶେଷଜ୍ଞମାନଙ୍କ ଦାୟିତ୍ୱ ପାଲଟିଛି । ନାଗରିକମାନଙ୍କୁ କୋଭିଡ- ୧୯ ତଥ୍ୟ, ଟୀକାକରଣ କାର୍ଯ୍ୟକ୍ରମ ଓ ସରକାରଙ୍କ ଉଦ୍ୟମ ଆଦିର ବର୍ତ୍ତମାନ ସ୍ଥିତି ସମ୍ପର୍କରେ ଅବଗତ କରାଇ ଲୋକଙ୍କ ମନରେ ଉପୁଜିଥିବା ସାମାନ୍ୟ ଭୟ ଦୂରେଇବାକୁ ସେ ଗୁରୁତ୍ୱ ପ୍ରଦାନ କରିଛନ୍ତି । ସ୍ଥିତିକୁ ହାଲକାରେ ନନେବାକୁ ସେ ସତର୍କ କରାଇ ଦେଇଛନ୍ତି । ଟେଷ୍ଟ- ଟ୍ରାକ-ଟ୍ରିଟ-ଟୀକାକରଣ ଓ କୋଭିଡ ଉପଯୁକ୍ତ ବ୍ୟବହାର ପାଳନ କରିବା ଓ ସମ୍ବେଦନଶୀଳ ଗୋଷ୍ଠୀଙ୍କୁ ପ୍ରିକସନ ଡୋଜ ନେଇଯିବାକୁ ଆହ୍ୱାନ ଦେଇଛନ୍ତି । କେବଳ ନିରନ୍ତର ସାମୂହିକ ପ୍ରୟାସ ମାଧ୍ୟମରେ ଆମେ ଏପର୍ଯ୍ୟନ୍ତ ମିଳିଥିବା ଉପଲବ୍ଧିକୁ ସଂରକ୍ଷିତ ରଖିବାରେ ସକ୍ଷମ ହେବା ବୋଲି ସେ ଗୁରୁତ୍ୱାରୋପ କରିଛନ୍ତି ।

ଆସନ୍ତାକାଲିର ପ୍ରସ୍ତାବିତ ମକ ଡ୍ରିଲ ସମ୍ପର୍କରେ ସୂଚନା ପ୍ରଦାନ କରି ଡଃ ମାଣ୍ଡଭୀୟ ଗୁରୁତ୍ୱାରୋପ କରିଛନ୍ତି ମହାମାରୀ ପ୍ରବନ୍ଧନରେ ନିଜର ପୂର୍ବ ଅଭିଜ୍ଞତା ଆଧାରରେ ଆମେ ଅନେକ କାର୍ଯ୍ୟ କରୁଛୁ । ସେହି କ୍ରମରେ ଆସନ୍ତାକାଲି ସାରା ଦେଶରେ ମକ ଡ୍ରିକ ହେବ । ଏହି ପ୍ରକାର ପ୍ରୟାସ ଆମ ସଂଚାଳନ ତତ୍ପରତାକୁ ସୁଦୃଢ କରିବ, ଯଦି କୌଣସି ତ୍ରୁଟି ପରିଲକ୍ଷିତ ହୁଏ ତାହା ସୁଧାରି ସାର୍ବଜନୀନ ସ୍ୱାସ୍ଥ୍ୟ ପ୍ରତିକ୍ରିୟାକୁ ମଜବୁତ ହେବାରେ ସାହାଯ୍ୟ କରିବ ।

ପ୍ରଥମରୁ କୋଭିଡ- ୧୯ ବିରୋଧୀ ଲଢେଇରେ ଆଗଧାଡିରେ ରହିଥିବା ଡାକ୍ତର ଓ ବିଶେଷଜ୍ଞମାନେ ମାନନୀୟ ପ୍ରଧାନମନ୍ତ୍ରୀ ଓ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀଙ୍କ ଅଧ୍ୟକ୍ଷତାରେ ସମୟ ସମୟରେ ହୋଇଥିବା ବୈଠକକୁ ପ୍ରଶଂସା କରିବା ସହ କୋଭିଡ- ୧୯ ବିରୋଧୀ ସାମୂହିକ ଲଢେଇରେ ଯୋଗଦାନ ପାଇଁ ସହମତି ବ୍ୟକ୍ତ କରିଛନ୍ତି । ମାନନୀୟ ପ୍ରଧାନମନ୍ତ୍ରୀଙ୍କ ବାର୍ତ୍ତାକୁ ଆଗେଇ ନେବାକୁ ଡଃ ମାଣ୍ଡଭୀୟ ବିଗତ କିଛି ଦିନ ମଧ୍ୟରେ ଅନେକ ବୈଠକରେ ଅଧ୍ୟକ୍ଷତା କରିଛନ୍ତି । ସମସ୍ତ ହିତଧାରକଙ୍କୁ ପରାମର୍ଶ ଓ ମତାମତ ପ୍ରଦାନ କରିବା ପାଇଁ ମଂଚ ପ୍ରଦାନ କରିବା ଏହାର ଉଦ୍ଦେଶ୍ୟ ଥିଲା ।

ବୈଠକରେ ଏଏସ ଶ୍ରୀ ଲବ ଅଗ୍ରୱାଲ, ଡିଜିଏଚଏସ ଡା ଅତୁଲ ଗୋୟଲ, ଆଇଏମଏ ସଦସ୍ୟ, ବିଶିଷ୍ଟ ଡାକ୍ତର ଓ ବିଶେଷଜ୍ଞମାନେ ଉପସ୍ଥିତ ଥିଲେ ।

SR