উপ রাস্ত্রপতী, শ্রী জগদিপ ধনখরনা ঙসি নগালেন্দগী কোনুং কোহিমা মনাক্তা লৈবা নগা হেরিতেজ ভিলেজ, কিসামাদা হোর্নবিল ফেস্তিবেলগী ২৩শুবা ইদিসন হৌদোকখ্রে‍। উপ রাস্ত্রপতীনা নগালেন্দগী রাজ্যপাল অমদি মুখ্য মন্ত্রীগা লোয়ননা হৌদোকপগী শেনবুং থিন্দুনা “কুম্হৈশিংগী কুম্হৈ” অদুবু হৌদোক্লে হায়না লাউথোকখি‍।

ইপ রাস্ত্রপতী ওইনা নগালেন্দা অহানবা খোঙচত্তা লাকখিবা শ্রী ধনখরবু হৌদোকপগী থৌরমদুদা সিফী (ত্রেদিস্নেল নগা কোকয়েৎ) অমদি অমুলা কখা (নগা ফি) খুদোল তমদুনা তরাম্না ওকখি‍।

তিল্লিবা মীয়ামগী মফমদা ৱা ঙাঙলদুনা, উপ রাস্ত্রপতীনা ভারত অসি নাৎকী লম অমনি অমদি ভারত মচাশিংনা মখোয়গী ত্রাইবেলগী নাৎকীদমক চাউথোকচৈ হায়খি‍।

নগাশিংবু মখোয়গী তোপ তোপ্পা নাৎ অমদি অথোইবা পুৱারীগীদমক থাগৎলদুনা, শ্রী ধনখরনা হায়খি, “ঐনা ত্রাইবেলগী নাৎপু ইকায় খুম্নজরি‍। ঐনা ত্রাইবেলগী ইনর্জীবু ইকায় খুম্নজরি‍।”

স্তেত অদুগী মহৌশাগী ফজববু পুক্নিং হুনা ফজৈ হায়রদুনা, মহাক্না স্তেত অসিদা মপুং ফানা শীজিন্নদ্রিবা খ্বাইদগী চাউবা তুরিজমগী মতিং লৈ হায়খি‍।

নগালেন্দবু লৈবাকসিদা নুপীগী মায়োক্তা চত্থবা ক্রাইম মশিং খ্বায়দগী হন্থবগীদমক থাগৎলদুনা, উপ রাস্ত্রপতীনা স্তেত অসিনা নুপী মপাঙ্গল কলহনবগী লম্বী তাক্লি হায়খি‍।

ঙসিদগী ভারতনা জি-২০ প্রেসিদেন্সীগী থৌদাং লৌরে হায়বা ৱাফম থম্লদুনা, শ্রী ধনখরনা মথং চহিগী এপ্রিল থাদা স্তেত অসিদা জি২০গী মীফম অমা পাঙথোকপা মতমদা মালেম অসিনা নগাগী মীওক মীচান খঙবা ঙম্লগনি হায়খি‍। থৌরম অদুদা, উপ রাস্ত্রপতীনা ফেস্তিবেল অসিবু কোমেমোরেৎ তৌনবা পোস্তেজ স্তাম্প অমসু ফোঙখি‍।

হোর্নবিল ফেস্তিবেল হৌদোক্লবা মতুংদা, উপ রাস্ত্রপতীনা নগা হেরিতেজ ভিলেজ, কিসামাদা লৈবা আর্ত গেলরী অমদি মোরুংদা চৎখি‍।

অঙনবদা, উপ রাস্ত্রপতীনা নগালেন্দগী রাজ্যপাল, প্রোফেসর জগদিস মুখী, মুখ্য মন্ত্রী, শ্রী নেফিউ রিও, উপ মুখ্য মন্ত্রী, শ্রী ৱাই পেতন অমসুং মন্ত্রী মন্দলগা রাজ ভবন, কোহিমাদা উনখি‍।

*****