ইনফোর্মেসন অমসুং ব্রোদকাস্তিং মন্ত্রালয়
আই.এফ.এফ.আই. ৫৩দা মনিপুরী সিনেমাগী নীংথিরবা চহি ৫০বু সেলেব্রেৎ তৌগদৌরি
Posted On:
19 NOV 2022 8:40PM by PIB Imphal
#IFFIWood, ১৯ নবেম্বর ২০২২
অৱাং নোংপোক্কী স্তেত নিপানগী মনুংদা অমা ওইরিবা মনিপুর – ‘জুৱল সিতী ওফ ইন্দিয়া’না ইন্তরনেস্নেল ফিল্ম ফেস্তিবেল ওফ ইন্দিয়া (আই.এফ.এফ.আই.)গী ৫৩শুবা ইদিসন্দা অৱাং নোংপোক ভারতকী ফিল্মশিং য়োকখৎপগী মৈরা পায়গদৌরি।
মনিপুরী সিনেমাগী সনা ফুদোংবা চহি পাঙথোক্নবগীদমক, আই.এফ.এফ.আই. ৫৩-এসিয়াগী খ্বাইদগী লিরবা ফিল্ম ফেস্তিবেল অসিদা – ইন্দিয়ন পেনোরমাগী মখাদা মনিপুর স্তেত ফিল্ম দিভেলপমেন্ত সোসাইতীনা খনগৎলবা ফীচর ফিল্ম মঙা অমদি নন-ফীচর ফিল্ম মঙা উৎকদৌরি। অহানবা মনিপুরী ফীচর ফিল্ম, দেব কুমার বোসনা লমজিং লমতাকপা ‘মতমগী মনিপুর’ কৌবা ফিল্ম অসি এপ্রিল ৯, ১৯৭২দা ফোঙখিবদগী হৌরগা ঙসি ফাওবা চহি খুদিংগী এপ্রিল ৯বু মনিপুরী সিনেমা পোক্লকখিবগী থৌরম পাঙথোক্তুনা লাক্লি।
পদ্মশ্রী মনা ফংলবা দাইরেক্তর অরিব স্যাম শর্মনা লমজিং লমতাকপা ফীচর ফিল্ম ইশানৌনা হৌদোক্তুনা অমদি নন-ফীচর ফিল্ম সেক্সনদা রতন থিয়াম: দি মেন ওফ থিএতরগা লোয়ননা অতৈ ফিল্মশিং উত্তুনা, সিনেমাবু পামজবশিংনা মনিপুর স্তেতকী ইনাক খুল্লবা নাৎকী পারী পুরীগী লন, ইচঙ থৌরবা ৱারী লীবগী মওং মতৌ, জগোয়, ঈশৈ, চৎনবী অমদি থিএতরগী মহাও লৌবা ফংগনি।
অরিবম স্যাম শর্ম, ওকেন অমকচম, নির্মলা চনু, বোরুন থোকচোম, রোমি মৈতৈ অমতি অতৈ মনিপুরী ফিল্মগী লময়ানবশিংনা গোৱাদা পাঙথোক্কদৌরিবা আই.এফ.এফ.আই.গী ৫৩শুবা ইদিসন অসিদা মনিপুরী সিনেমাগী ফজরবা মচৎকী চহি ৫০বু সেলেব্রেৎ তৌনবগীদমক শরুক য়াগনি।
ইশানৌ
অরিবম স্যাম শর্মনা লমজিং লমতাকপা, ফিল্ম ইশানৌ তম্ফা কৌবী নুপী প্রোতাগোনিস্ত, মহাক্কী মপুরোইবা অমদি মহাক্কী অঙাংশিংদা য়ুম্ফম ওইবনি। তম্ফানা নুপীশিংতগী ওইবা লাইনিংগী কাঙবু মাইবীশিংগী শিন্ফমদা মহাকপু চঙননবা খল্লক্লবনি হায়না খন্দুনা মাইবী গুরু থিবদা মহাক্কী ইমুং মনুং থাদোক্লম্বদগী মখোয়গী পুন্সিদা খঙহৌদনা অপনবা কয়া থোরকখি।
ব্রোজেন্দ্রগী লুহোংবা
এস.এন. চান্দ সাজতিনা লমজিং লমতাকপা ফিল্ম অসিদা দোক্তর অমা ওইরিবা ব্রোজেন্দ্রনা মমাগী অপাম্বা মতুং ইন্না নুপী অমা লুহোংলম্মী, অদুবু লুহোংলবা মতুংদসু মহাক্কী মায়থোঙ ফাওবা য়েংউ য়াখিদে। তুংদা, ঈশৈ নোংমাইগী থৌরম অমদা, মহাক্না মশক মতৌ ফজরবী নুপী অমা থেংনখি অমদি মীৎকা মীৎকা মীৎচান্নখি। মহাক মরালনা মপোৎ ফারবা থম্মোয় পুদুনা য়ুমদা হল্লকখি অদুবু হায়রিবা নুপী অদু মহাক্কী নুপী ওইরমবদা মহাক পুমঙক ঙকখি।
লোক্তাক লাইরেম্বী
শৈরেংগুম্লবা খোঙচৎ অমদা, ফিল্ম অসিনা মনিপুরগী পাৎ লোক্তাক পাৎকী চম্না হিংজবা মীওইশিংবু পুদুনা চৎলি, অদুগা খুৎলায় অমা শোয়দনা থেংনরুবদগী ঙামী অমবু অনৌবা থাজবগী ইথিল অমা পোকহল্লক্তুনা হিংসাগী মায়কৈদা খোঙলৈ থুনা পুশিনখি। হাওবম পবন কুমারনা লমজিং লমতাকপনি।
মতমগী মনিপুর
ফিল্ম অসিনা মিদল-ক্লাস ইমুং অমগী, থবক্তগী পোত্থারবা তোনসা অমদি মহাক্কী মপুং মরৈ ফারবা মচা অহুমগী ৱারী লীরি। পুম্নমক খুন্নাইগী অনৌবা অমদি অরিবা মমলশিংদা থাজবা ঙাক্তনি অমদি মখোয়গী পুন্সিগী তোঙান তোঙানবা মায়কৈদা লম্ফাং চৎনখি। ইমুং অদু মচেৎ মচেৎ তানা কায়রগদবা মাল্লম্মী, অদুবু মখোয় অমনা অমবু হেন্না মমুৎ তানা খঙনবা হৌরক্তুনা নুংঙাইনা হিংমিন্ননবা ফিরেপ লৌনখি। দেব কুমার বোসনা লমজিং লমতাকপনি।
ফিজিগী মনি
ওইনাম গৌতম্না লমজিং লমতাক্লিবা - ফিজিগী মনিগী নুপী প্রোতাগোনিস্ত – য়াইফবীনা মহাক্কী ইমুংগা অমুক হন্না হঞ্জিন্ননবগী মিসন অমদা খোঙ থাংলকই। মহাক্না মহাক্কী মমা মপা অমদি মখোয়বু থাদোক্তুনা চৎখ্রবা মহাক্কী মপুং সনাজাওবগগী মরক্তা লৈনরিবা মুক্নবনা থল্লবা মরী অদু শমজিন্ননবা হোৎনরি। ফিল্ম অসিনা য়াইফবীগী হৌখিবা অমদি হৌজিক ওইরিবা পুন্সি, মনিপুরগী হোংলক্লিবা সোসিও-পোলিতিকেল সিনরিওদা তাউথদুনা চৎলি।
রতন থিয়াম: দি মেন ওফ থিএতর
ফিল্ম অসিনা মনিপুরগী কোরস রেপর্তরী থিএতরগী ফাউন্দর-দাইরেক্তর রতন থিয়ামগী পুন্সিবু উৎলি। মশক নাইরবা মনিপুরী শৈরেং ইবা, প্লেরাইতর, লাইয়েকপা, ম্যুজিক্সিয়ন, থিএতর গুরু অমনি। মহাক ২০১৩দগী ২০১৭ ফাওবা লেমজনিংঙাই ওইরবা নেস্নেল স্কুল ওফ দ্রামাগী চেয়রপর্সন ওইনা থৌ পুরম্মী। মহাক ১৯৮৭দগী ১৯৮৯ ফাওবা নেস্নেল স্কুল ওফ দ্রামাগী দাইরেক্তর ওইনা থৌ পুরম্মী। মুভী অসি অকেন অমকচম অমদি নির্মলা চনুনা লমজিং লমতাকপনি।
ইলিশা অমগী মহাও
এন. কুঞ্জমোহনগী নেস্নেল একাদমী মনা ফংখ্রবা ৱারী মচাদা য়ুম্ফম ওইবা ফিল্ম অসিদা চাউবনা তুরেলদগী ঙা ফাদুনা মহাক্কী ইমুং থাক্নবা হোৎনবগী মতৌ উৎলি। নুমিৎ কয়ানিগী মতুংদা চাউবা অমদি মহাক্কী মচানুপানা ইলিশা (হিলসা) অমা থাখি, নুংঙাইনা, ইলিশা অদুবু থোংনবগীদমক ময়ুমদা হল্লকখি, অদুবু চাউবনা ফারক্লিবা ঙা অদু চেঙ ৱান্নবগীদমক য়োনবা তাখিবনা থোংবা ফংখিদে। ফিল্ম অসি নিংথৌজা লনচানা লমজিং লমতাকপনি।
লুক এৎ দি স্কায়
চহি ৪০ শুরবা হাই মনিপুরগী মনুং হঞ্জিনবা খুল অমদা মীখলদা মীয়াম্না পাম্নবা কেন্দিদেত্তা শৌগত্তবগীদমক খুঞ্জাশিংনা তান্থোরক্তুনা মহাক্কী ইমুংগা লৈখি। খুদোংথিবা কয়া থেংনরগসু, হাইনা মহাক্কী ভোৎ থাদনবগী অমদি মহাক্কী মীহুৎ খঞ্জনবগী মঙমগীদমক লান্থেংনখি। ফিল্ম অসি অসোক ভৈলযনা লমজিং লমতাকপনি।
দি সাইলেন্ত পোইত
বোরুন থোকচোম্না লমজিং লমতাকপা ফিল্ম অসিনা, মশা মথন্তা শিজনবগা হোৎনবগী মরালদা মীয়াৎ তাদুনা মনিপুরগী চেকশিন্না ঙাক শেল্লিবা লায়েংশঙগী কৈশুমশঙদা মহাক্কী নোৎবুক্তা খোরি খোৎলিবা এক্তিভিস্ত ইরোম সর্মিলা চনুগী শৈরেং ইবগী মশক মওংগী ৱারী লীরি।
দি তেন্তেদ মিরর
স্কুল চৎলিবা নুপামচা ‘চাউরেন’ মহাক্কী মরূপ সনাবু মখোয়গী ফুতবোল কোচনা তীম কেপ্তেন ওইনবগীদমক খনখিবদা কল্লকপা ফাওরকখি। মহাক্না সনাদা কেমিকেল চাইশিল্লবা মনা মশিং চাননবা পীদুনা তমথিবা থৌওং অমা চত্থখি অমদি মথঙগী নুমিত্তা সনা শান্নবা লাকখিদে। ফিল্ম অসি রোমি মৈতৈনা লমজিং লমতাকপনি।
* * *
(Release ID: 1877412)
Visitor Counter : 146