ভারত ইমানা য়াইফরে‍।

ভারত ইমানা য়াইফরে‍।

কর্নতকাগী মীপুম খুদিংমক,

হন্না হন্না খুরুমজরি!

ফম্পাকথক্তা লেঙশিনবিরিবা ইকায়খুম্নরবা স্বামী জী, কর্নতকাগী গভর্নর শ্রী থাৱরচন্দ গেহলোই জী, মফমসিগী মীয়াম্না য়াবা মুখ্য মন্ত্রী শ্রী বসবরাজ বোম্মই জী, হান্নগী মুখ্য মন্ত্রী শ্রীমান য়েদিয়ুরপ্পা জী, কেন্দ্রগী মন্ত্রীমন্দলগী ঐগী খোঙলোয়শিং, স্তেত লৈঙাক্কী মন্ত্রী, এম.পি.শিং, এম.এল.এ.শিং, অতৈ মীওইশিং অমদি মশিং য়াম্না লেঙবিরক্লিবা ঐগী নুংশিরবা ইচিল ইনাওশিং‍।

ঙসি ঐ বেঙ্গলুরুদা য়াম্না মরুওইবা নুমিৎ অমদা লাকপগী খুদোংচাবা ফংলিবা অসি ঐগী লাইবক ফবনি‍। ঙসি কর্নাতকাগী, লৈবাকসিগী অথোইবা মপারী ২গী মপোক কুমওন নুমিৎনি‍। লম্বোইবা কনকতাস জীনা ঐখোয়গী খুন্নাইবু লমজিংবিরম্মী অদুগা ওনকে ওব্যাজীনা ঐখোয়গী লীক্লম, ঐখোয়গী নাৎপু ঙাক্নবগীদমক থৌদাং লৌরম্মী‍। হায়রিবা অথোইবা মীওই অনিসু ঐনা ইকোক নোঞ্জরি‍।

মরূপশিং,

ঙসি হায়রিবা অথোইবা মীওই ইকায়খুম্নবা উৎচবগা লোয়ননা ঐখোয় বেঙ্গলুরুগী, কর্নাতকাগী চাওখৎপা অমদি পারী পুরীগী লনথুম অনিমকপু মপাঙ্গল কলহন্নবা থবক পায়খৎলি‍। ঙসি কর্নাতকানা অহানবা মেদ ইন ইন্দিয়া বন্দে ভারত ত্রেন য়ৌরক্লে‍। ত্রেন অসি চেন্নাই, লৈবাকসিগী  স্তার্তঅপ কেপিতেল বেঙ্গলুরু অমদি পারী পুরীগী লন-থুমগী ময়োল্লম মঅসুরুবু শমজিন্নহল্লগনি‍। কর্নতকাগী মীয়াম, অয়োধ্যা, প্রয়াগরাজ অমদি কাসীগী দর্শন ফংহনগদবা ভারত গৌরব কাসী ত্রেনসু ঙসিদগী হৌগদৌরি‍। ঙসি কেম্পেগৌরা ইন্তরনেস্নেল এয়রপোর্তকী অনিসুবা তর্মিনেলসু শঙ্গারি‍। ঐনা সোসিএল মিদিয়াদা এয়রপোর্তকী অনৌবা তর্মিনেলগী মমি খরা থাগৎখি‍‍। অদুগা ঙসি মফমদুদা চৎলুবগা তর্মিনেল অসি মমিদা য়াম্না ফজরিবদুদগী য়াম্না হেন্না পুক্নিং হুবা, মতমগা চুনবা ওইরম্মী‍। বেঙ্গলুরুগী মীয়াম্না মতম কয়াগী মমাঙদগী পামদুনা লাক্লবা ৱাফম অসি ঙসি ঐখোয়গী লৈঙাক্না মপুং ফাহল্লে‍।

মরূপশিং,

ঐ নাদপ্রভু কেম্পেগৌদাগী ফীত ১০৮ ৱাংবা মীতম মায়খুম হাংদোক্নবা তাঞ্জা ফংখি‍। নাদপ্রভু কেম্পেগৌদাগী অচৌবা মীতম অসিনা ঐখোয়বু তুংগী বেঙ্গলুরু, তুংগী ভারতকীদমক লেপ্পা লৈতনা কত্থোকপগী ৱাখল্লোনগা লোয়ননা হোৎননবা থৌনা হাপ্লি‍।

ইচিল ইনাওশিং,

ইকায়খুম্নরবা স্বামী জীনা থৌজাল পীবিরম্বা অসিবু ফংজবা য়াম্না লাইবক ফবনি, মসিগীদমক ঐনা থম্মোয় শেংনা থাগৎচবা ফোঙদোকচরি‍।

মরূপশিং,

ঙসি মালেম পুম্বদা ভারত স্তার্তঅপশিংগীদমক খঙনরি‍। হায়রিবা ভারতকী শক্তম অসিবু হেন্না মপাঙ্গল কলহন্নবদা ঐখোয়গী বেঙ্গলুরুগী অচৌবা থৌদাং য়াওরি‍। স্তার্ত অপশিং অসি কম্পনী অমখক্কী ৱাফম নত্তে‍। স্তার্তঅপ হায়বসি পুক্নিংগী ইহুল অমনি, করিগুম্বা অনৌবা খরনা তৌননবা, চুম্নবগী ৱাখলগী ৱাংমদা ৱাখল খন্নবগী ইহুলদুনি‍। স্তার্তঅপ অমা হায়বসি থাজবা অমনি, লৈবাকসিনা থেংনরিবা শিংনবা খুদিংমক্কী পাম্বৈ অমনি‍। অসুম্না বেঙ্গলুরুনা স্তার্তপগী ইহুল অমগী মশক তাক্লি‍। হায়রিবা স্তার্তঅপকী ইহুল অসিনা ভারতপু ঙসি মালেমদা তোঙানবা থাক অমদা লেপ্লি‍

ইচিল ইনাওশিং,

ঙসি মফমসিদা পাঙথোক্লিবা থৌরম অসিসু বেঙ্গলুরুগী অসিগুম্লবা নহাশিংগী স্পিরিৎকী মতিক অদুগী খুদম্নি‍। ঙসিদগী হৌদোক্লিবা বন্দে ভারত এক্সপ্রেস অসিসু শুপ্নতগী অনৌবা ত্রেন অমখক নত্তে, মসি অনৌবা ভারতকী অনৌবা শক্তম্নি‍। ২১শুবা চহিচাগী ভারতকী রেলৱে করম্বা মওংদা ওইরক্কদগে হায়বগী শক্লোন অমনি‍। বন্দে ভারত এক্সপ্রেস, ভারত হৌজিক লেপ-লেপ্তুনা চৎপগী মতমদু তুংদা থম্লম্লে হায়বগী খুদম অমসুনি‍। হৌজিক ভারত খোঙজেল য়াঙনা চেনবা পাম্লি অমদি মসিগীদমক হোৎনবা য়াবা পুম্নমক হোৎনরি‍।

মরূপশিং,

লাক্কদৌরিবা চহি ৮-১০ অসিদা ঐখোয়না ইন্দিয়ন রেলগী মশক মওং হোংদোক্নবগী পান্দমগা লোয়ননা চঙশিল্লি‍। বন্দে ভারত ত্রেন৪০০ হেনবা, বিস্তা দোম কোচশিং ইন্দিয়ন রেলৱেগী অনৌবা শক্তম ওইগদৌরিবনি‍। পোৎ পুবা ত্রেনশিংগীদমক অখন্নবা ফ্রৈত কোরিদোরনা ত্রান্সপোর্তেসনগী খোঙজেল য়াঙ্খৎহনগনি অমদি মতমসু মাঙহল্লোই‍। খোঙজেল য়াঙনা পায়খৎলিবা ব্রোদগেজ ওন্থোকপগী থবক, অনৌ-অনৌবা মফমশিংবু রেলৱেগী মেপ্তা হাপচিল্লকপগী থবক পায়খৎলি‍। ময়ামসিগী মরক্তা ঙসি লৈবাকসিনা ঐখোয়গী রেলৱে স্তেসন মতমগা চুনবা ওইহল্লি‍। ঙসি করিগুম্বা অদোম্না বেঙ্গলুরুগী সর এম. বিস্বেস্বরয় জী রেলৱে স্তেসন্দা চৎলবদি, অদোম্না তোঙানবা তাইবংপাল অমা থেংনগনি‍। ঐখোয়গী পান্দমদি লৈবাক শিনবা থুংবদা লৈরিবা রেলৱে স্তেসনশিংবু মতমগা চুনহনবা অসিনি‍। হায়রিবা ৱাখল্লোন অসিগা লোয়ননা কর্নাতকাগী বেঙ্গলুরু কান্তোনমেন্ত, বেস্বন্তপুর রেলৱে স্তেসনশিংসু নৌনা শেমগৎলি‍।

মরূপশিং,

ময়োল্লমশিংগী মরক্তা কন্নেক্তিবিভী ফগৎহনবনা চাওখৎপা ভারত অমা পুরকপদা অচৌবা থৌদাং লৌগদৌরিবনি‍। লৈবাকসিদা এয়র কন্নেক্তিবিতী হেক য়ারিবমখৈ পাকথোক চাউথোকহনগদবনি, ঐখোয়গী এয়রপোর্তশিং পাকথোক চাউথোকহনবনা মতমসিগী তঙাই ফদ্রবা থৌরাংনি‍। বেঙ্গলুরু এয়রপোর্তকী অনৌবা তর্মিনেল অসিনা মসিবু শীজিন্নগদৌরিবা পেসেঞ্জরশিংদা অনৌবা খুদোংচাবা কয়া পীগনি‍। ঙসি ভারত মালেমগী নোংথক্কী লম্বীগী খ্বাইদগী খোঙজেল য়াঙনা চাওখৎলক্লিবা কৈথেলশিংগী মরক্তা অমা ওইরি‍। লৈবাকসিনা খুমাঙ চাওশিল্লকপগা লোয়ননা এয়রপোর্তশিংদা পেসেঞ্জর মশিংসু হেনগৎলক্লি‍। মরম অসিননি ঐখোয়গী লৈঙাক্না লৈবাকসিদা অনৌবা এয়রপোর্তশিং শাগৎলক্লিবা‍। ইং ২০১৪গী মমাঙদা লৈবাকসিদা এয়রপোর্ত ৭০রোমতমক লৈরম্মী‍। হৌজিক্তি মশিং অসি শরুক অনি হেনগত্তুনা ১৪০ হেন্না লৈরে‍। মশিং হেনগৎলকপগা লোয়ননা হায়রিবা এয়রপোর্তশিং অসিনা নহাশিংগী অনৌবা খউদোংচাবা কয়া শেমদুনা ময়োল্লমশিংগী লল্লোন ইতিক্কী মতিংসু হেনগৎহল্লি‍।

মরূপশিং,

ঙসি মালেমগী মফম খুদিংদগী ভারত্তা হান্না পানরুদবা চাংদা শেল থাদরকপা অসিনা কর্নতকাদসু চাউনা কান্নবা ফংলি‍। অদোম খনবা ঙম্বিবরা, মালেম পুম্বনা কোবিদ লাইচৎ থেংনরিঙৈ হৌখিবা চহি অহুমসিদা কর্নাতকাদা লুপা করোর লাখ ৪রোমগী ইনভেস্তমেন্ত লাকখি‍। এফ.দি.আই. চিংশিনবদা কর্নতকানা লৈবাকসিদা মাঙজিল থানা চৎলি‍। লাক্লিবা ইনভেস্তমেন্ত অসি আই.তি. সেক্তরখক্তদা নত্তে‍। বাইওতেক্নোলোজীদগী হৌরগা দিফেন্স মেনুফেকচরিং ফাওবদা লৈরিবা সেক্তর খুদিংদা লাক্লি‍। কর্নতকাদা লৈবাকসিগী এয়রক্রাফ্ত অমদি স্পেসক্রাফ্ত ইন্দস্ত্রীদা চাদা ২৫ লৈ‍। লৈবাকসিগী লান্মীগী এয়রক্রাফ্ত অমসুং হেলিকোপ্তরশিংগী চাদা ৭০রোমদি মফমসিদা শাবনি‍। কর্নতকা লৈবাকসিগী ওইনা ইলেক্ত্রিক ভেহিকল পুথোকপদসু মাঙজিল থারি‍। ঙসি ফোর্চুন ৫০০ কম্পেনীশিংগী মরক্তগী ৪০০ হেনবদি কর্নতাকাদা চলাইরি‍। অদুগা হায়রিবা লিস্ত অসি লেপ্পা নাইদনা হেনগৎলক্লি‍। মসি পুম্নমকসি ঙসি কর্নাতকানা দবল ইঞ্জিন লৈঙাক লৈবগীনি‍।

ইচিল ইনাওশিং,

ঙসি লৈঙাক্লোন্দা ওইরবসু নৎত্রগা ফিজিকেল অমদি দিজিতেল ইনফ্রাস্ত্রকচরগী লমদা ওইরবসু ভারতনা তোপ তোপ্পা থাক অমদা থবক পায়খৎলি‍। ঙসি মালেম পুম্বনা ভারতকী দিজিতেল পেমেন্ত ভিম য়ু.পি.আই.গী মরমদা তাবদা ঙক্নরি‍। মসিবু চহি ৮গী মমাঙদা ওইথোক্কনি হায়না খন্নরম্বরানে‍? ভারত্তা ৫জি তেক্নোলোজী পুথোরক্কনি হায়বসিবু অদোম্না নীংবিরুবরা? পুম্নমক অসিদা বেঙ্গলুরুগী নহাশিং, মফমসিগী প্রোফেস্নেলশিংগী  অচৌবা থৌদাং য়াওরি‍। ২০১৪ মমাঙগী ভারত্তা, অসিগুম্বা থবক থৌওংশিং অসি ৱাখলগী ৱাংমদনি‍। মসিগী মরমদি মতমদুদা লৈরম্বা লৈঙাক্কী ৱাখল্লোন অরিবা মতমগী ওইরম্মী‍। মমাঙদা লৈঙাক্না খোঙজেল য়াঙবা হায়বসি ফংবদা ৱাগদবা অদুগা পাকথোক চাওথোকপা অসি খুদোংথিবা মায়োক্ননবনি হায়না খল্লম্মী‍। ঐখোয়না লৈরম্লিবা মীৎয়েঙ অসিবু হোংদোকখি‍। ঐখোয়না খোঙজেল য়াঙববু ভারতকী অপম্বা অদুগা পাকথোক চাউথোকপনা ভারতকী থৌনা ওইনা লৌই‍। মরম অসিনা ঙসি ভারতনা পি.এম. গতিশক্তি নেস্নেল মাস্তর প্লানগী মখাদা লৈবাকসিদা ইনফ্রাস্ত্রকচর শেমগৎলি‍। মমাঙদা ইনফ্রাস্ত্রকচর শেমগৎপদা লৈরম্বা ফীভম ঐখোয় পুম্নমক্না খঙনরবা ৱাফম্নি‍। লৈরম্লিবা প্রোব্লেম অদু খুৎশম্ননা চৎমিন্নবা ৱাৎপগীনি‍। দিপার্তমেন্ত মশিং য়াম্লিবমখৈ, এজেন্সী মশিং য়াম্লিবমখৈ শেমগৎ শাগৎপদা মতম লৌরম্মী‍। ঐখোয়না পুম্নমকপু ফম্পাক অমত্তদা পুশিল্লক্নবা ফিরেপ লৌখি‍। ঙসিদি পি.এম. গতিশক্তি নেস্নেল মাস্তর প্লানগী মখাদা, তোঙান তোঙানবা এজেন্সীশিংদা মরোল ১৫০০ হেনবগী দেতা ফংহল্লি‍। ঙসি মন্ত্রালয় দজন কয়া, কেন্দ্র অমদি স্তেত লৈঙাক্কী দিপার্তমেন্ত দজন কয়া ফম্পাক অসিদা শরুক য়ারক্লি‍। ঙসি লৈবাকসিনা নেস্নেল ইনফ্রাস্ত্রকচর পাইপলাইনগী মখাদা ইনফ্রাগী লমদা লুপা করোর লাখ ১১০রোম থাদনবা পান্দম থম্লি‍। লৈবাকসিদা লৈরিবা ত্রান্সপোর্তকী পাম্বৈ পুম্নমক্কী খুত্থাঙদা শমজিন্ননবা অমদি তেংবাংনবনা লৈবাকসিগী মল্তিমোদেল ইনফ্রাস্ত্রকচরগী মপাঙ্গল কলহনগনি‍। মতম খরগী মমাঙদা, লৈহবাকসিনা নেস্নেল লোজিস্তিক্স পোলিসীসু হৌদোকখি‍। পোলিসী অসিনা লৈবাকসিদা ত্রান্সপোর্তেসনগী মমল হন্থহনবদা, ত্রান্সপোর্তেসনবু ইনোভেতিব ওইহনবদা মতেং ওইগনি‍।

মরূপশিং,

ভারতপু চাওখৎপা ওইহনবদা ফিজিকেল ইনফ্রাস্ত্রকচরগা লোয়ননা লৈবাকসিগী সোসিএল ইনফ্রাস্ত্রকচরসু মপাঙ্গল কনখৎহনবা চপ চানা মরু ওই‍। কর্নতাকাগী দবল ইঞ্জিন লৈঙাক্না সোসিএল ইনফ্রাদা চপ চানা মীৎয়েঙ চঙলিসি ঐ নুংঙাই‍। হৌখিবা চহি নিপানসিদা লৈবাকসিগী লায়রবশিংগীদমক য়ুম করোর অহুমলোম শাখ্রে‍। কর্নতকাদসু লায়রবশিংগীদমক পক্কাগী য়ুম লাখ ৮ হেন্না শানবা অয়াবা পীখ্রে‍। ‘জল জীবন মিসন’গী মখাদা শুপ্নগী চহি অহুমদা য়ুমথোঙ করোর ৭ হেনবদা তোতি ঈশিংগী খুদোংচাবা ফংহল্লি‍। অহানবা ওইনা তোতিগী ঈশিং খুঙ্গঙগী য়ুমথোঙশিংদা য়ৌরে‍। আয়ুস্মান ভারত স্কীমগী মখাদা লৈবাকসিগী লায়রবা মীওই করোর ৪দা লায়েংশঙদা লেম্না লায়েংবগী খুদোংচাবা ফংহল্লি‍। কর্নতকাগী লায়রবা অনাবা মীওই লাখ ৩০ হেনবসু স্কীম অসিগী কান্নবা ফংলি‍। হায়রিবা স্কীম অসিগী কান্নবা ফংলিবশিং অসিগী মনুংদা অয়াম্বদি ঐখোয়গী ইমা, ইচেল-ইচল অমদি ইচানুপীশিংনি হায়বা তাবদা ঐ নুংঙাইবা ফাওই‍।

ইচিল ইনাওশিং,

ঙসি অপীকপা লৌমী, অপীকপা লল্লোনমী, ঙামী, নৎত্রগা স্ত্রীত ভেন্দরশিং ওইরবসু মীওই করোর কয়া অহানবা ওইনা লৈবাকসিগী চাওখৎ খোঙথাঙদা শরুক য়ারক্লি‍। পি.এম. কিসান সম্মান নিধীগী মখাদা লৈবাকসিগী লৌমী করোর ১০ হেনবগী বেঙ্ক একাউন্তশিংদা লুপা করোর লাখ ২ও২৫রোম শেন্ফম ত্রান্সফর তৌখ্রে‍। কর্নতকাগী অপীকপা লৌমী লাখ ৫৫ হেনবসু লুপা করোর লিশিং ১১ রোম ফংখি‍। পি.এম. স্বানিধীগী মখাদা লৈবাকসিগী স্ত্রীত ভেন্দর লাখ ৪০ হেনবনা শেলগী তেংবাং ফংখ্রে‍। মসিদসু কর্নতকাগী স্ত্রীত ভেন্দর লাখ ২রোম মসিগী কান্নবা ফংখি‍।

মরূপশিং,

হন্দক ওগস্ত ১৫দা ঐনা লাল কিলাদগী লৈবাকসিগী পারী পুরীগী লনগী চাওথোকচনিংঙাই ওইরবা ৱাফমশিংগী মরমদা ৱা ঙাঙখি‍। হায়রিবা লনশিং অসি নাৎকী অমদি লাইনিংলোনগী লন্নি‍। ঙসি গৌরব ভারত রেলনা লৈবাকসিগী লাইনিংগী মফমশিং শমজিন্নহল্লি অমদি ‘এক ভারত শ্রেস্থ ভারত’কী ৱাখল্লোনবু মপাঙ্গল কনখৎহল্লি‍। চহি অসিদা লৈবাকসিগী তোঙান তোঙানবা মফমশিংদগী ত্রেন অসিগী খোঙচৎ ৯ মপুং ফাখ্রে‍। সির্দী তেম্পল, শ্রী রামায়ন য়াত্রা, দিব্য কাসী য়াত্রানচিংবা মফমশিংদা ত্রেনশিং অসিনা পেসেঞ্জরশিংদা নুংঙাইরবা মহাওশিং পীরি‍। ঙসি, কর্নাতকাদগী কাসী, অয়োধ্যা, অমদি প্রয়াগরাজ খোঙচৎ হৌরি‍। মসিনা মরম ওইরগা কর্নতকাগী মীয়ামবু কাসী অয়োধ্যাগী দর্শন তৌবা ফংহনবদা মতেং ওইরগনি‍।

ইচিল ইনাওশিং,

ভগবৎ-ভক্তি অমসুং খুন্নাইগী মতিংগা লোয়ননা খুন্নাই অসিনা মরী ফনা লৈগদগে হায়বসিদা লম্বোইবা কনকদাস জীনা পুক্নিং থৌগৎলি‍। নাকল অমদা মহাক্না কৃষ্ণভক্তিগী লম্বী খনখি, অদুগা নাকল অমদনা ‘কুল-কুল-কুল ভেন্দু হোদেদাদাদিরি’ হায়রদুনা মহাক্না ফুরুপ খেন্নবগী হন্থনা য়েংবা মীৎয়েঙ মুত্থৎনবা পাউজেল পীখি‍। ঙসি মালেম পুম্বদা মিল্লেৎ, হায়বসি কোর্স গ্রেনগী মরুওইবা ৱাফম খন্নরি‍। লম্বোইবা কনকদাস জীনা মতমদুদা মিল্লেৎকী মরুওইবা পুথোক্লমখি‍। মহাক্না হায়রম্বা ৱাফমদি রাম ধন্য চরিতে হায়বসিনি‍। মহাক্না কর্নতকাদা খ্বাইদগী পাম্নবা মিল্লেৎ রাগিবু খুদম ওইনা পীরদুনা খুন্নাইদা থোং মান্নবা পুরক্নবগী পাউজেল চেনখি‍।

ইচিল ইনাওশিং,

ঙসি, নাদপ্রভু কেম্পেগৌদা জীনা মঙজরম্বা মঙলানগী মখাদা বেঙ্গলুরু ময়োল্লম শেমগৎনবা ঐখোয়না হোৎনরি‍। ময়োল্লম অসিদা খুন্দারিবশিংগী মফমদা কেম্পেগৌদা জীগী চাউরবা থৌদাং লৈরি‍। খুন্দারিবা মওং মতৌ অসি শেমগৎপদা মচা খায়বা মওং মতৌ অসি অঙকপনি, ময়ামদা মান্নদবা মওংনি‍। চহিচা কয়াগী মমাঙদা, লল্লোন ইতিক, নাৎ অমদি খুদোংচাবগী থৌরাং অমা মীয়ামগীদমক য়াৎখ্রবনি‍। মহাক্কী মীৎয়েঙ শানবা মতৌগী কান্নবা বেঙ্গলোরগী মীয়াম্না ফংলি‍। ঙসি লল্লোন ইতিক্কী মশক মওং হোংখ্রবসু ‘পীত’না বেঙ্গলোরগী লল্লোন ইতিক্কী পুন্সি লম্বী ওইরি‍। বেঙ্গলুরুগী নাৎ মশক ফজহনবদা নাদপ্রভু কেম্পেগৌদাজী থৌদাং য়াম্না চাউই‍। মফমসিগী মমিং চৎলবা গবি-গঙ্গাধরেস্বর মন্দির ওইরবসু নৎত্রগা বসবনগুদী মন্দির ওইরবসু কেম্পেজৌদাজীনা বেঙ্গলুরুগী নাৎকী থৱায় হাপলম্মী‍। বেঙ্গলুরু ময়োল্লমগী মীয়াম্না মতম পুম্নমক্তা কেম্পাগৌদাজীগী লম তোনশিন্দুনা লৈহৌরগনি‍।

মরূপশিং,

বেঙ্গলুরু অসি মালেমগী ওইবা ময়োল্লম অমা ওইরে‍। ঐখোয়গী পারী পুরীগী লন ঙাক শেন্দুনা মফমসিবু মতমগা চুনবা ইনফ্রাস্ত্রকচর শেমগত্তুনা হেন্না মশক ফজহনবা তাই‍। পুম্নমক অসি হোৎনরবা মতমদতা ঙমগদৌরিবনি‍। ঐনা অমুক্কা হন্না অনৌবা প্রোজেক্তশিং অসিগীদমক পুম্নমক্কী মফমদা নুংঙাইবা ফোঙদোকচরি‍। মফমসিদা লেঙবিরক্তুনা থৌজাল পীনবিরম্বা লম্বোইবশিংগী মফমদা ঐনা ইকায়খুম্নজরি‍। কর্নতকাগী নহা, ইমা, ইচে-ইচল, লৌমীশিংনা ঐঙোন্দা থৌজাল পীনবিরি‍। ঐনা পুম্নমকপু থম্মোয়নুংদগী থাগৎচবা ফোঙদোকচরি‍।

থাগৎচরি!

***