নমস্কাৰ,

বিশ্ব বিনিয়োগকাৰী সন্মিলনলৈ বিশ্বৰ বিভিন্ন স্থানৰ পৰা অহা সকলো বন্ধুক ভাৰতলৈ স্বাগতম, নম্মা কৰ্ণাটকলৈ স্বাগতম আৰু নম্মা বাংগালুৰুলৈ স্বাগতম জনাইছো৷ কালি কৰ্ণাটকে ৰাজ্যখনৰ প্ৰতিষ্ঠা দিৱস উদযাপন কৰিছে। কৰ্ণাটকবাসীক আৰু যিসকলে কানাড়া ভাষাক নিজৰ জীৱনৰ অংগ কৰি লৈছে, তেওঁলোক সকলোকে অভিনন্দন জনাইছো। এইখন সেই ঠাই য’ত পৰম্পৰাৰ লগতে প্ৰযুক্তিও আছে। এইখন সেই ঠাই য’ত প্ৰকৃতি আৰু সংস্কৃতিৰ এক আচৰিত মিশ্ৰণ সকলোতে দেখা যায়। এই ঠাইখনেই ইয়াৰ আচৰিত স্থাপত্যৰ বাবেও পৰিচিত আৰু লগতে ভাইব্ৰেণ্ট ষ্টাৰ্ট-আপৰ সৈতেও পৰিচিত। প্ৰতিভা আৰু প্ৰযুক্তিৰ কথা আহিলেই প্ৰথমে মনলৈ আহে ব্ৰেণ্ড বাংগালুৰু আৰু এই নামটো কেৱল ভাৰততে নহয় সমগ্ৰ বিশ্বতে প্ৰতিষ্ঠিত হৈছে। কৰ্ণাটকৰ এই ভূমি অতি সুন্দৰ প্ৰাকৃতিক হটস্পটৰ বাবে জনাজাত। অৰ্থাৎ কানাড়া ভাষা কোমল ভাষা, ইয়াৰ চহকী সংস্কৃতি আৰু কানাড়া মানুহৰ সকলোৰে প্ৰতি থকা আত্মীয়তাই সকলোৰে হৃদয় জয় কৰে।

বন্ধুসকল,

কৰ্ণাটকত বিশ্ব বিনিয়োগকাৰী সন্মিলনৰ আয়োজন হোৱাত মই সুখী হৈছো। এই অনুষ্ঠানটো প্ৰতিযোগিতামূলক আৰু সহযোগিতামূলক যুক্তৰাষ্ট্ৰৰ এক নিখুঁত উদাহৰণ। ভাৰতত উৎপাদন আৰু পেছাদাৰিত্ব আৰু উৎপাদন বহুলাংশে নীতিগত সিদ্ধান্তৰ ওপৰত ৰাষ্ট্ৰৰ নিয়ন্ত্ৰণৰ ওপৰত নিৰ্ভৰশীল। গতিকে ভাৰত যদি আগুৱাই যাব লগা হয়, তেনেহ’লে ৰাজ্যসমূহে আগবাঢ়ি যোৱাটো প্ৰয়োজনীয়। ৰাজ্যসমূহে নিজেই বিশ্ব বিনিয়োগকাৰী সন্মিলনৰ জৰিয়তে আন দেশৰ সৈতে নিৰ্দিষ্ট খণ্ডত অংশীদাৰিত্ব কৰিছে, এইটো এটা অতি ভাল কথা। মই দেখিছোঁ যে সমগ্ৰ বিশ্বৰ সকলো কোম্পানীয়ে এই অনুষ্ঠানত অংশগ্ৰহণ কৰিছে। মোক কোৱা হৈছে যে এই মঞ্চত হাজাৰ হাজাৰ কোটি টকাৰ অংশীদাৰিত্ব কৰা হ’ব। ইয়াৰ দ্বাৰা যুৱক-যুৱতীসকলৰ বাবে বৃহৎ পৰিসৰত কৰ্মসংস্থাপনৰ সুযোগ সৃষ্টি হ’ব।

বন্ধুসকল,

একবিংশ শতিকাত ভাৰত আজি য’ত আছে তাৰ পৰা অবিৰতভাৱে আগবাঢ়িব লগা হৈছে। যোৱা বছৰ ভাৰতে প্রায় ৮৪ বিলিয়ন ডলাৰৰ অভিলেখ প্রত্যক্ষ বিদেশী বিনিয়োগ লাভ কৰিছিল৷ আৰু আপুনি এইটোও জানে যে এই ফলাফলবোৰ আহি আছে যেতিয়া সমগ্ৰ বিশ্বই ক’ভিড বিশ্ব মহামাৰীৰ প্ৰভাৱ আৰু যুদ্ধৰ পৰিস্থিতিৰ সৈতে যুঁজি আছে। সকলোতে অনিশ্চয়তা। ভাৰততো যুদ্ধ আৰু মহামাৰীয়ে সৃষ্টি কৰা পৰিস্থিতিৰ বিপৰীত প্ৰভাৱ পৰিছে। ইয়াৰ পিছতো আজি সমগ্ৰ বিশ্বই বৰ আশাৰে ভাৰতৰ ফালে চাই আছে। এই সময়ছোৱা অৰ্থনৈতিক অনিশ্চয়তাৰ, কিন্তু সকলো দেশেই এটা কথাত নিশ্চিত যে ভাৰতীয় অৰ্থনীতিৰ মৌলিক দিশবোৰ শক্তিশালী। আজিৰ খণ্ড খণ্ডিত যুগত ভাৰতে বিশ্বৰ সৈতে সংযোগ স্থাপন আৰু বিশ্বৰ বাবে কাম কৰাত গুৰুত্ব দিছে। এই যুগত যোগান শৃংখল স্থবিৰ হৈ পৰিছে যদিও এই যুগত ভাৰতে প্ৰতিজন আৰ্তজনক ঔষধ আৰু ভেকচিন যোগান ধৰাৰ আশ্বাস দিছে। এয়া বজাৰৰ উঠা-নমাৰ যুগ, কিন্তু ১৩০ কোটি ভাৰতীয়ৰ আকাংক্ষাই আমাৰ ঘৰুৱা বজাৰৰ শক্তিৰ নিশ্চয়তা প্ৰদান কৰিছে। আৰু আটাইতকৈ ডাঙৰ কথাটো হ’ল এইটো বিশ্ব সংকটৰ যুগ হ’লেও, কিন্তু সমগ্ৰ বিশ্বৰ বিশেষজ্ঞ, বিশ্লেষক আৰু অৰ্থনৈতিক বিশেষজ্ঞসকলে ভাৰতক উজ্বল স্থান বুলি অভিহিত কৰিছে। আৰু আমি আমাৰ মৌলিক কথাবোৰৰ ওপৰত অহৰহ কাম কৰি আছো যাতে ভাৰতৰ অৰ্থনীতি দিনক দিনে শক্তিশালী হৈ উঠে। যোৱা কেইমাহমানত ভাৰতে যিমান মুক্ত বাণিজ্য চুক্তি কৰিছে, তাৰ সংখ্যাই বিশ্ববাসীৰ আগত আমাৰ প্ৰস্তুতিৰ আভাস দিছে।

বন্ধুসকল,

আমাৰ যাত্ৰা ক’ৰ পৰা আৰম্ভ হৈছিল, আজি আমি ক’ত উপনীত হ’লোঁ, সেই কথা মনত ৰখাটো গুৰুত্বপূৰ্ণ। ৯-১০ বছৰ আগতে আমাৰ দেশখনে নীতিগত পৰ্যায়ত আৰু একে স্তৰতে সংকটৰ সৈতে যুঁজি আছিল। সেই পৰিস্থিতিৰ পৰা দেশখনক উলিয়াই আনিবলৈ আমাৰ দৃষ্টিভংগী সলনি কৰাৰ প্ৰয়োজন আছিল। বিনিয়োগকাৰীসকলক ৰঙা ফিটাৰ মেৰপাকত সোমোৱাৰ পৰিৱৰ্তে আমি বিনিয়োগৰ বাবে ৰেড কাৰ্পেটৰ পৰিৱেশ সৃষ্টি কৰিলোঁ। নতুন জটিল আইন বনোৱাৰ পৰিৱৰ্তে আমি সেইবোৰ যুক্তিসংগত কৰিলোঁ। আমি নিজে ব্যৱসায় চলোৱাৰ পৰিৱৰ্তে ব্যৱসায়ৰ বাবে ভূমি সাজু কৰি ৰাখিছো যাতে আনসকল আগবাঢ়ি আহিব পাৰে। আমি যুৱক-যুৱতীসকলক নিয়মৰ দ্বাৰা বান্ধ খাই থকাৰ পৰিৱৰ্তে তেওঁলোকৰ সামৰ্থ্য বৃদ্ধিৰ সুযোগ দিলোঁ।

বন্ধুসকল,

সাহসী সংস্কাৰ, বৃহৎ আন্তঃগাঁথনি আৰু শ্ৰেষ্ঠ প্ৰতিভাৰ দ্বাৰাহে নতুন ভাৰত গঢ়ি তোলা সম্ভৱ। আজি চৰকাৰৰ প্ৰতিটো ক্ষেত্ৰতে সাহসী সংস্কাৰ কৰা হৈছে। অৰ্থনৈতিক ক্ষেত্ৰত জিএছটি আৰু আইবিচিৰ দৰে সংস্কাৰ কৰা হৈছিল। বেংকিং খণ্ডত সংস্কাৰ আৰু শক্তিশালী সামষ্টিক অৰ্থনৈতিক মৌলিক দিশৰ জৰিয়তে অৰ্থনীতি শক্তিশালী কৰা হৈছিল। একেদৰে ইউপিআইৰ দৰে পদক্ষেপৰ জৰিয়তে দেশত ডিজিটেল বিপ্লৱ অনাৰ প্ৰস্তুতি চলোৱা হৈছিল। আমি ১৫০০ৰো অধিক পুৰণি আইন বিলুপ্ত কৰিলোঁ, প্ৰায় ৪০ হাজাৰ অপ্ৰয়োজনীয় অনুসৰণ বাতিল কৰিলোঁ। আমি বহু বিধানকো অপৰাধমুক্ত কৰি দিছো। আমি কৰ্পৰেট কৰ হাৰ হ্ৰাস কৰাৰ দৰে পদক্ষেপ গ্ৰহণ কৰিছো, লগতে অজ্ঞাত মূল্যায়নৰ দৰে সংস্কাৰৰ জৰিয়তে স্বচ্ছতা বৃদ্ধি কৰিছো। ভাৰতত প্ৰত্যক্ষ বিদেশী বিনিয়োগৰ বাবে নতুন খণ্ডৰ দুৱাৰ মুকলি কৰা হৈছে। ভাৰতত ড্ৰোন, ভূ-স্থানীয় খণ্ড, মহাকাশ খণ্ড আনকি প্ৰতিৰক্ষা খণ্ডতো বিনিয়োগক অভূতপূৰ্ব জোৰ দিয়া হৈছে।

বন্ধুসকল,

সংস্কাৰৰ সমান্তৰালকৈ আন্তঃগাঁথনিৰ ক্ষেত্ৰতো ভাৰত অতি দ্ৰুতগতিত আগবাঢ়িছে। আধুনিক আন্তঃগাঁথনিৰ বাবে ভাৰতে পূৰ্বতকৈ অধিক গতিৰে আৰু বৃহৎ পৰিসৰত কাম কৰি আছে। আপুনি বিমানবন্দৰৰ উদাহৰণ ল’ব পাৰে। বিগত ৮ বছৰত কাৰ্যকৰী বিমানবন্দৰৰ সংখ্যা দুগুণ বৃদ্ধি পাইছে। প্ৰায় ৭০টা বিমানবন্দৰৰ পৰা এতিয়া ১৪০টাতকৈও অধিক বিমানবন্দৰত বিমান চলাচল আৰম্ভ কৰিছে। আৰু এতিয়া ভাৰতত আৰু বহু নতুন বিমানবন্দৰ নিৰ্মাণ কৰা হৈছে। একেদৰে মেট্ৰ’ ৰে’লৰ পৰিসৰ ৫খন চহৰৰ পৰা ২০খন চহৰলৈ বৃদ্ধি পাইছে। শেহতীয়াকৈ আৰম্ভ কৰা ৰাষ্ট্ৰীয় লজিষ্টিক নীতিয়ে উন্নয়নৰ গতি ত্বৰান্বিত কৰাত আৰু অধিক সহায় কৰিব।

বন্ধুসকল,

বিশেষকৈ পিএম গতিশক্তি ৰাষ্ট্ৰীয় মাষ্টাৰ প্লেনৰ প্ৰতি বিনিয়োগকাৰীসকলৰ দৃষ্টি আকৰ্ষণ কৰিব বিচাৰিছো। গতিশক্তি ৰাষ্ট্ৰীয় মাষ্টাৰ প্লেনে আন্তঃগাঁথনি নিৰ্মাণৰ ধৰণ সলনি কৰিলে। এতিয়া যেতিয়া কোনো প্ৰকল্পৰ পৰিকল্পনা কৰা হয়, তেতিয়া ইয়াৰ ৩টা মাত্ৰা প্ৰথমে বিবেচনা কৰা হয়। উন্নয়নশীল আন্তঃগাঁথনিৰ লগতে বৰ্তমানৰ আন্তঃগাঁথনিৰ মানচিত্ৰ প্ৰস্তুত কৰা হয়। তাৰ পিছত ইয়াক সম্পূৰ্ণ কৰিবলৈ হস্ৰ আৰু অতি কাৰ্যক্ষম পথৰ বিষয়ে আলোচনা কৰা হয়। ইয়াত অন্তিম স্থানৰ ব্যক্তিসকলক অতি গুৰুত্বপূৰ্ণ কৰি ৰখা হৈছে, যত্ন লোৱা হৈছে। আৰু সেই সামগ্ৰী বা সেৱাক বিশ্বমানৰ কৰি তোলাত গুৰুত্ব দিয়া হয়।

বন্ধুসকল,

আজি যিসময়ত বিশ্বই উদ্যোগ ৪.০ ৰ দিশে আগবাঢ়িছে, সেই সময়ত এই শিল্প বিপ্লৱত ভাৰতীয় যুৱক-যুৱতীসকলৰ ভূমিকা আৰু ভাৰতীয় যুৱক-যুৱতীসকলৰ প্ৰতিভা দেখি বিশ্বই আচৰিত হৈছে। ভাৰতৰ যুৱক-যুৱতীসকলে বছৰ বছৰ ধৰি শতাধিক ইউনিকৰ্ণ নিৰ্মাণ কৰিছে। ভাৰতত ৮ বছৰত ৮০হাজাৰৰো অধিক ষ্টাৰ্টআপ গঠন হৈছে। আজি ভাৰতৰ প্ৰতিটো খণ্ডই যুৱ শক্তিৰ শক্তিৰে আগবাঢ়িছে। যোৱা বছৰ ভাৰতে অভিলেখ ৰপ্তানি কৰিছে। ক’ভিডৰ পিছৰ পৰিস্থিতিত এই কৃতিত্ব অতি গুৰুত্বপূৰ্ণ হৈ পৰে। ভাৰতৰ যুৱক-যুৱতীসকলৰ সামৰ্থ্য সম্প্ৰসাৰণৰ বাবে ভাৰতীয় শিক্ষা ব্যৱস্থাতো আমি গুৰুত্বপূৰ্ণ পৰিৱৰ্তন সাধন কৰিছো। ভাৰতত বছৰ বছৰ ধৰি বিশ্ববিদ্যালয়, প্ৰযুক্তি বিশ্ববিদ্যালয় আৰু পৰিচালনা বিশ্ববিদ্যালয়ৰ সংখ্যা ৫০ শতাংশ বৃদ্ধি পাইছে।

বন্ধুসকল,

বিনিয়োগ আৰু মানৱ পুঁজিৰ ওপৰত গুৰুত্ব দিলেহে উন্নয়নৰ উচ্চ লক্ষ্যত উপনীত হ’ব পাৰি। এই চিন্তাধাৰাৰ ওপৰত আগবাঢ়ি আমি স্বাস্থ্য আৰু শিক্ষা খণ্ডত বিনিয়োগক প্ৰসাৰিত কৰিলোঁ। আমাৰ লক্ষ্য হৈছে উৎপাদনশীলতা বৃদ্ধি কৰা আৰু লগতে মানৱ পুঁজিৰ উন্নতি কৰা। আজি এফালে আমি বিশ্বৰ অন্যতম বৃহৎ উৎপাদন উদ্গনি আঁচনি ৰূপায়ণ কৰিছো আৰু আনফালে আমি বিশ্বৰ সৰ্ববৃহৎ স্বাস্থ্য নিশ্চয়তা আঁচনিখনকো নিৰাপত্তা প্ৰদান কৰিছো। এফালে আমাৰ দেশত প্ৰত্যক্ষ বিদেশী বিনিয়োগ দ্ৰুতগতিত বৃদ্ধি পাইছে আৰু আনফালে চিকিৎসা মহাবিদ্যালয় আৰু চিকিৎসালয়ৰ সংখ্যাও বৃদ্ধি পাইছে। এফালে আমি ব্যৱসায়ৰ পথত থকা বাধাবোৰ আঁতৰাইছো, আনফালে আমি ডেৰ লাখ স্বাস্থ্য আৰু সুস্থতা কেন্দ্ৰও নিৰ্মাণ কৰিছো। এফালে আমি দেশজুৰি ঘাইপথৰ নেটৱৰ্ক স্থাপন কৰিছো আৰু আনফালে আমি ৰাইজক শৌচাগাৰ আৰু বিশুদ্ধ খোৱাপানী যোগান ধৰাৰ অভিযানতো নিয়োজিত হৈছো। এফালে আমি মেট্ৰ’, বিমানবন্দৰ আৰু ৰে’লৱে ষ্টেচনৰ দৰে ভৱিষ্যতৰ আন্তঃগাঁথনি সৃষ্টিৰ কাম কৰি আছো, আনফালে আমি হাজাৰ হাজাৰ স্মাৰ্ট স্কুলো নিৰ্মাণ কৰি আছো।

বন্ধুসকল,

নবীকৰণযোগ্য শক্তিৰ ক্ষেত্ৰত ভাৰতে আজি যি স্থান লাভ কৰিছে সেয়া সমগ্ৰ বিশ্বৰ বাবে এক আদৰ্শ। বিগত ৮ বছৰত দেশৰ নবীকৰণযোগ্য শক্তিৰ ক্ষমতা ৩ গুণ আৰু সৌৰশক্তিৰ ক্ষমতা ২০ গুণ বৃদ্ধি পাইছে। সেউজ বৃদ্ধি আৰু বহনক্ষম শক্তিৰ প্ৰতি আমাৰ পদক্ষেপে আৰু অধিক বিনিয়োগকাৰীক আকৰ্ষণ কৰিছে। যিসকলে নিজৰ খৰচ ঘূৰাই দিব বিচাৰে আৰু লগতে এই পৃথিৱীৰ প্ৰতি নিজৰ দায়িত্ব পালন কৰিব বিচাৰে, তেওঁলোকে আশাৰে ভাৰতৰ ফালে চাই আছে।

বন্ধুসকল,

আজি কৰ্ণাটকৰ লগত আন এটা বৈশিষ্ট্য যোগ হৈছে। কৰ্ণাটকত ডাবল ইঞ্জিনৰ শক্তি আছে অৰ্থাৎ একেটা দলৰ নেতৃত্বত আছে কেন্দ্ৰীয় চৰকাৰ আৰু ৰাজ্য চৰকাৰ। ইয়াৰ উপৰিও বহু ক্ষেত্ৰত কৰ্ণাটক দ্ৰুতগতিত উন্নতি হৈছে। কৰ্ণাটক সহজ ব্যৱসায়ত শীৰ্ষ ৰেংকিঙৰ ভিতৰত নিজৰ স্থান বজাই ৰাখিছে। এই কাৰণেই প্ৰত্যক্ষ বিদেশী বিনিয়োগৰ ক্ষেত্ৰত কৰ্ণাটকৰ নাম শীৰ্ষ ৰাজ্যৰ তালিকাত অন্তৰ্ভুক্ত হৈছে। ভৱিষ্যতৰ ৫০০ কোম্পানীসমূহৰ ভিতৰত ৪০০টা কৰ্ণাটকত আছে। ভাৰতৰ ১০০ টা প্লাছ ইউনিকৰ্ণৰ ভিতৰত ৪০ টাতকৈও অধিক কৰ্ণাটকত আছে। কৰ্ণাটকক আজি বিশ্বৰ সৰ্ববৃহৎ প্ৰযুক্তি ক্লাষ্টাৰ হিচাপে গণ্য কৰা হৈছে। উদ্যোগৰ পৰা তথ্য প্ৰযুক্তি, ফিনটেকৰ পৰা বায়’টেক, ষ্টাৰ্ট-আপৰ পৰা বহনক্ষম শক্তিলৈকে ইয়াত কৰ্ণাটকত এটা নতুন উন্নয়নৰ কাহিনী লিখিছে৷ কিছুমান উন্নয়নৰ পৰিসংখ্যা এনেকুৱা যে কৰ্ণাটক ভাৰতৰ আন আন ৰাজ্যকে নহয়, কিছুমান দেশকো প্ৰত্যাহ্বান জনাইছে। আজি ভাৰতে ৰাষ্ট্ৰীয় অৰ্ধপৰিবাহী অভিযানৰ সৈতে উৎপাদন ডমেইনৰ এক নতুন পৰ্যায়ত প্ৰৱেশ কৰিছে। ইয়াত কৰ্ণাটকৰ ভূমিকা অতি গুৰুত্বপূৰ্ণ। ইয়াৰ টেক ইক’-চিষ্টেমে চিপ ডিজাইন আৰু মেনুফেকচাৰিক নতুন উচ্চতালৈ লৈ যাব।

বন্ধুসকল,

আপোনালোকে জানেনে, এজন বিনিয়োগকাৰীয়ে মধ্যমকালীন মিছন আৰু দীৰ্ঘম্যাদী দৃষ্টিভংগীৰে আগবাঢ়ি যায়। আৰু ভাৰতৰ এটা প্ৰেৰণাদায়ক দীৰ্ঘম্যাদী দৃষ্টিভংগীও আছে। নেন’ ইউৰিয়াই হওক, হাইড্ৰ’জেন শক্তিয়েই হওক, সেউজ এমোনিয়াই হওক, কয়লা বাষ্পীকৰণেই হওক বা মহাকাশ উপগ্ৰহেই হওক, আজি ভাৰতে নিজৰ বিকাশৰ লগে লগে বিশ্বৰ উন্নয়নৰ মন্ত্ৰৰ সৈতে আগবাঢ়িছে। এয়া ভাৰতৰ অমৃতকাল। স্বাধীনতাৰ অমৃত কালত দেশৰ জনসাধাৰণে নতুন ভাৰত গঢ়াৰ প্ৰতিশ্ৰুতি লৈছে। আমি ২০৪৭ চনৰ ভিতৰত এখন উন্নত ভাৰত গঢ়ি তোলাৰ লক্ষ্য নিৰ্ধাৰণ কৰিছো। ইয়াৰ বাবে আপোনাৰ বিনিয়োগ আৰু ভাৰতৰ প্ৰেৰণাক একত্ৰিত কৰাটো অতি প্ৰয়োজনীয়। কাৰণ অন্তৰ্ভূক্তিমূলক, গণতান্ত্ৰিক আৰু শক্তিশালী ভাৰতৰ বিকাশে বিশ্বৰ বিকাশ ত্বৰান্বিত কৰিব। সেইবাবেই আমি কওঁ যে, ভাৰতত বিনিয়োগ কৰা মানে, অন্তৰ্ভূক্তিত বিনিয়োগ, গণনন্ত্ৰত বিনিয়োগ । ভাৰতত বিনিয়োগৰ অৰ্থ হ’ল বিশ্বৰ বাবে বিনিয়োগ৷ ভাৰতত বিনিয়োগৰ অৰ্থ হ’ল, এখন ভাল পৃথিৱীৰ বাবে বিনিয়োগ । ভাৰতত বিনিয়োগৰ অৰ্থ হ’ল, পৰিষ্কাৰ-নিৰাপদ গ্ৰহৰ বাবে বিনিয়োগ। আহক আমি একেলগে কোটি কোটি মানুহৰ জীৱন সলনি কৰাৰ লক্ষ্যৰে আগবাঢ়ি যাওঁ। এই অনুষ্ঠানৰ লগত জড়িত সকলোলৈ মোৰ শুভেচ্ছা জ্ঞাপন কৰিলোঁ। কৰ্ণাটকৰ মুখ্যমন্ত্ৰী, তেওঁৰ সমগ্ৰ দল, কৰ্ণাটক চৰকাৰ আৰু কৰ্ণাটকৰ সকলো ভাই-ভনীলৈ মোৰ আন্তৰিক অভিনন্দন, সকলোকে বহুত বহুত ধন্যবাদ জনালো।

***

DS/SH/DK/AK/DB