পুনেগী ফিল্ম অমসুং তেলিভিজন ইন্সতিত্যুত ওফ ইন্দিয়ানা মখোয়গী সেন্তর ফোর ওপন লর্নিং (সি.এফ.ও.এল.) খোঙথাং মখাদা, নেস্নেল ফিল্ম দিভেলপমেন্ত কোর্পোরেসন (এন.এফ.দি.সি.) অমসুং ইন্তর্তেনমেন্ত সোসাইতী ওফ গোৱা (ই.এস.জি.)না গোৱাদা নবেম্বর ২০দগী ২৮ ফাওবা পাংথোক্কদৌরিবা ইন্তর্নেস্নেল ফিল্ম ফেস্তিবেল ওফ ইন্দিয়াগী ৫৩শুবা ইদিসনগী শরুক অমা ওইনা নাম্ম-শোয়বা মীওইশিংদা লেম্না পীগদবা কোর্স অনি লাউথোকখ্রে। আই.এফ.এফ.আই. ৫৩দা লাউথোকখিবশিং অদুদি ওতিজমগী ফিভম লোয়নবা মীওইশিংদা স্মার্তফোন শিজিন্নদুনা ফিল্ম নম্বগী বেসিক পীবা অমসুং ৱিলচেয়র শিজিন্নদুনা লৈরবা মীওইশিংদা স্ক্রীন এক্তিং তৌবগী বেসিক কোর্স পীবনি।  

মীপুম খুদিংনা আর্ত শেম্বগী খুদোংচাবা ফংহনবগী পান্দমগা লোয়ননা এফ.তি.আই.আই.না নাম্ম-শোয়বা মীওইশিংবু মপাঙ্গল হাপ্তুনা সিনেমা নম্বগী মেজিক্কী শরুক ওইহন্নবা তোঙানবা কোর্স কয়া পাংথোক্লি। আই.এফ.এফ.আই. ৫৩দা লৈগদৌরিবা কোর্সশিং অসি নুমিৎ ৮নি শাংগনি অমসুং নবেম্বর ২১দগী ২৮ ফাওবা চত্থগনি। কোর্স অমনা মদুদা শরুক য়াবশিংবু মোদর্ন দে এমেচ্যর ওইহন্নবা হোৎনরি অমসুং কোর্স অমনা মখোয়গী এক্তর ওইবগী নুংগী হৈ-শিংবা ফোংদোকহন্নবা হোৎনরি।

ওতিজমগী ফিভম লোয়নবা মীওইশিংদা স্মার্তফোন শিজিন্নদুনা ফিল্ম নম্বগী বেসিক পীগদৌরিবসি ভিজুএল কম্ম্যুনিকেসনগী লমদা মমিং লৈরবা প্রোফেস্নেল অমা ওইরিবা অজমল জামীনা তাক্কনি। মহাক্না লান অমসুং য়েৎনবা লৈবা মফমদগী পাউদম্লকপদগী দোক্যুমেন্তরী, প্রোমোস্নেল ফিল্ম, সোফ ফিচর অমসুং শোগুম্বা লম কয়াদা তোঙানবা মনা কয়া ফংখ্রবনি। সিনেমাতোগ্রাফর, ফিল্মমেকর অমসুং ফোরোগ্রাফর অমা ওইনা মহাক্না লৈবাক অমসুং মালেমগী থাক্তা মমিং লৈরবা লুপ কয়াগী ইকায় খুম্ননীংঙাই ওইরবা প্রোজেক্ত কয়াদা থবক তৌরকখ্রবনি।

কোর্স অসিদা সিনেমা লোল করিনো তাকপদগী হৌরগা স্মার্তফোন শিজিন্নদুনা ফিল্ম নম্বা অমসুং ইদিতিং তৌবগী তোঙানবা মোদ্যুল কয়া মনুং চনগনি। মোদ্যুল অসিদা স্ক্রিনিং অমসুং রিভিয়ু সেসন্সু য়াওগনি। রেজিস্তর তৌবগী অকুপ্পা মরোলগীদমক্তা, এফ.তি.আই.আই.গী ওফিসিএল ৱেবসাইত্তা চঙবীয়ু: https://www.ftii.ac.in/p/vtwa/basic-course-in-smartphone-film-making-21st-28th-november-2022-for-individuals-suffering-from-autism-in-goa

ৱিলচেয়র লোয়নদুনা লৈবা মীওইশিংদা এক্তিং তৌবগী বেসিক স্ক্রিন কোর্স অসিনা জিজোয় পি.আর.না তাক্কনি। মহাক অসি পুনেগী ফিল্ম অমসুং তেলিভিজন ইন্সতিত্যুত ওফ ইন্দিয়াগী ইন-চার্জ দীন (ফিল্ম) অমসুং এক্তিংগী এসোসিএত প্রোফেসরনি। মহাক মশামক্না থিএতর আর্তিস্ত, ফিল্ম এক্তর, ত্রেনর অমসুং প্রদ্যুসর অমা ওইনা মহাদেশ ৪ শিনবা থুংবদা ফিল্ম ৫৫ অমসুং ইন্তর্নেস্নেল থিএতর ৪০০ রোমদা শক্তম লাংখ্রে।

এক্তিং কোর্স অসিদা মোদ্যুল ৬ লৈগনি, নত্যসাস্ত্রা করিনো তাকপগা লোয়ননা হৌদোক্কনি। কোর্স অসিনা হস্য রাস নত্ত্রগা কোমেদীদা অখন্নবা মিৎয়েং থমগনি। মুবমেন্ত, এক্তিং গেম অমসুং অতোপ্পগী মমাংদা এক্তিং তৌবা ঙমদবগী মতৌ লৈহন্দনবা তেংবাংবা সেন্স এৱিয়র্নেস গেমশিংনা কোর্স অসিগী মরু ওইবা মতৌ ওইগনি। রেজিস্তর তৌবগীদমক্তা লিঙ্ক অসিদা অকুপ্পা মরোল ফংগনি: https://www.ftii.ac.in/p/vtwa/basic-course-in-screen-acting-21st-to-28th-november-2022-for-individuals-on-wheelchair-in-goa

কোর্স অনিমক গোৱাগী মেকিনেজ প্লাজাগী আর্ত গেল্লরীদা পাংথোক্কনি।

*****