“হোরর হায়বসি মালেম পুম্বনা খঙনবা লোলনি; ঐখোয়না মসিদা অকীবা ফাওই। ঐখোয় অসি পোকপদগী অকীবা ফাওরকই। ঐখোয়না হীরম খুদিংগী অকীবা ফাওই – অশীবা, শোইনাইবা, নুংশিবা মীওই মাঙবা। ঐহাক্না কীবা পুম্নমক অদোমসু কীগনি”। অমেরিকাগী ফিল্ম-মেকর জোন কার্পেন্তর, “মাস্তর ওফ হোরর ফিল্ম” হায়না মীয়াম্না খঙনবা মহাক্না মহাকপু ইথিল পীরিবা ফিল্ম জোনর অসিগী মতাংদা হায়রিবসিদা হেঞ্জিনবা ৱাফম অমত্তা য়াওদে। অদোম করি হায়নীংবগে? দ্রাকুলাদগী একজোর্জিস্ত নত্ত্রগা হেরেদিতরী অমসুং কঞ্জ্যুরিংগুম্বা অকীবা ফিল্মশিংনা মালেম পুম্বগী মীয়ামগী পুক্নিং চিংশিল্লি। লৈবাক অমসুং লোল খুদিংনা অয়েংবা মীয়াম্বু তসেংনা কীহনখিবা ফিল্ম য়াম্লদ্রবদা দজন অমদি শোইদনা পুথোক্লমগনি। ঐখোয়গী অকীবা ফাওবগী ইথিলবু নীংথিনা শিজিন্নদুনা ফিল্মশিং অসিনা মালেমগী সিনেমাগী পাক্লবা ইপাকসিদা মশাগী মফম অমা কনবা ঙম্লি।

হোরর জোনরবু মীয়াম্না পাম্নবগী মতৌবু নীংথিনা খঙলদুনা হন্দক্কী ইন্তর্নেস্নেল ফিল্ম ফেস্তিবেল ওফ ইন্দিয়া (আই.এফ.এফ.আই.)গী ৫৩শুবা ইদিসন অসিনা মুভী স্ক্রিন্দগী মপান থোক্লকবফাওবদা অদোম্বু কিদুনা অদুম লৈহনগদবা নৌনা পুথোকপা ফিল্ম মরিগী পরিং, ‘মেকেবর দ্রীমস’ লান্থোকচরি। সুপর্নেচ্যুরেল ফিল্ম পেকেজকী মনুং চনবা ফিল্মশিংদি:

নাইত সাইরেন (স্লোভাকিয়া/২০২২)

তেরেজা বোতোবানা দাইরেক্ত তৌবা নাইত সাইরেন ফিল্ম অসিনা অৱাবা কয়ানা থল্লবা মশাগী অঙাং ওইরিঙৈগী মতমগী পাউখুম থীনবগীদমক্তা মশাগী চিংগী খুঙ্গংদা হল্লকখিবী নহা ওইরিবী নুপী অমগী ৱারী লিরি। অদুবু, মহাক্না অচুম্বা খঙদোক্নবা হোৎনরকপা মতমদা, অরিবা মতমগী ৱারী ওইনা লীনবা থৌদোক অমনা হৌজিক মতমগী অশেংবা মতমদা অয়েৎপা পীরকপা হৌরকখি অমসুং খুঙ্গংগী মীয়াম্না মহাকপু ভুত শান্নবনি হায়না মরাল শীবা হৌরকখি।

তাঙ্কক তরেৎ থোক্না লান্থোক্লিবা ফজবা অমসুং পুক্নিং চিংশিনবা হোরর ফিল্ম অসিনা হৌজিক মতমগী স্লোভাকিয়াদা থাইনগী থাজনবা অমা নৌনা ফোঙলকপা অমসুং নুপীবু হন্থনা য়েংবা, কাঙলুপ অমবু হন্থনা য়েংবা অমদি মীয়াম পুম্বনা পাখৎনবগুম্বা হৌজিক্কী মোদর্ন মালেমদা থোক্লিবা থৌওং কয়া নৈনরি।

মীয়াম্না খঙনবা চৎনবীগী ৱাংমা লান্দুনা নীংতম্লগে হায়বা ৱারেপ লৌবদা করিগী মথৌ তাই হায়বগী পাউজেলসু ফিল্ম অসিনা পীরি।

হ্যুসেরা (পেরু/২০২২)

হ্যুসেরা অসিদি মেক্সিকোগী ফিল্ম-মেকর মিসেল গার্জা কার্বেরানা দাইরেক্ত অমসুং পুন্না ইমিন্নবা সুপর্নেচ্যুরেল বোদী হোরর ফিল্ম অমনি।  মসিদা নাতালিয়া সোলিয়ন্না ফত্তবা লাই-তিনগী শাফুনা অৱাবা নংহল্লবা মীরোনবী নুপী ভেলেরিয়াগী শক্তম লাংলি। মমা ওইগদৌবগী ঙাইদুনা লৈরিবী ভেলেরিয়ানা মশাদা চমম্নবা ফাওবা অমসুং মিরাংগুম্বা শক্তম অমদি সুপর্নেচ্যুরেল ওইবা অতোপ্পা অকীবা থৌওং কয়ানা মরম ওইরগা অকীবা অমা ফাওনরকপগী থৌওংদগী নান্থোকপা ঙমদবগী মতৌ থেংনখি। হিংচাবশিং অসিগা মাইয়োক্নগে হায়বগী ৱাখল্লোনগা লোয়ননা, মহাক্না কনাগীস্য খন্দনা নুংঙাইনা লৈথোকপগী মহাক্কী অরিবা পুন্সি মহিং হিংবা হৌরকখি। মসিদা মহাক্কী মমাংগী অমসুং অহানবা নুংশিবা, ওক্তাবিয়াগা অমুক হন্না মরী হৌরকপগী থৌওংসু মনুং চনখি।

মেক্সিকো অমসুং পেরুগী ইন্তর্নেস্নেল কো-প্রদক্সন অসি জুন ৯, ২০২২দা ত্রাইবেকা ফেস্তিবেলদা প্রিমিয়র তৌখি অমসুং বেস্ত ন্যু নেরেতিব দাইরেক্তর অমসুং নোরা এফ্রোন এৱার্দসু লৌখি।

ভেনস (স্পেন/২০২২)

ভেনস অসি হৌজিক মতমগী ভুত শান্নবগী থৌওং কয়াগা লোয়নদুনা অর্বান সর্ভাইবেল ইনভাইরনমেন্ততা য়ুম্ফম ওইদুনা স্পেন লোলদা নম্বা সুপর্নেচ্যুরেল হোরর ফিল্ম অমনি। জাউমে বালাগ্বেরোনা দাইরেক্ত তৌবা ফিল্ম অসি সোনী পিকচর ইন্তর্নেস্নেল প্রদক্সন অমসুং এমাজোন প্রাইম ভিদিওনা পুন্না পুথোকমিন্নরিবা ফিল্ম তরুক ‘দি ফিয়র কল্লেক্সন’গী অনিশুবা ফিল্মনি। অহানবা ফিল্ম অদুনা ‘এলেক্স দে লা ইগ্লেসিয়াস ভেনেসিয়া ফ্রেনিয়া’ (২০২১)নি।

অমেরিকাগী অইবা ঐচ.পি. লবক্রাফগী অতেনবা হোরর ৱারী ‘দি দ্রীম ইন দি ৱিৎচ হাউস’না ফিল্ম অসিগী ৱারীগী ইথিলনি। বেল্লে জগোই শাবী অমনা মহাক্কী থবক মফমদগী গুলি বোরা অমা হুরানবা থৌওংদগী ফিল্মগী ৱারী হৌই। মহাক্কী থৌরাংনা পামদবা থৌওংদা তারকপা মতমদা, গুন্ডা খরনা মহাকপু তান্নরকপা মতমদা, মহাক্না মচেগী ফ্লেত্তা লোৎকে খনখি। মহাকপু থিরিবা মীওইশিংদগী হেন্না শাথীবা অমসুং অকীবা মতৌ অমনা মহাক্কী লোৎফমদা ঙাইদুনা লৈরমখি। মীয়াম্না খঙনবা হোরর সাউন্দ অমসুং ইলেক্ত্রোনিক্স ম্যুজিক্কী ফজবা খোঞ্জেল কয়াগা লোয়ননা মিক্স তৌবা সাউন্দত্রেক অমসুং ফিল্মগী ৱারী ফাওবদা, বালাগ্বেরোনা লবক্রাফকী ৱাখল্লোন্দগী হেনবা তোপ-তোপ্পা অমসুং নুংঙাইবা মতৌ কয়া শেম্লি।

হেতচিং (ফিনলেন্দ, স্বিদেন/২০২২)

হেন্না বর্গহোল্মনা দাইরেক্ত তৌবা ফিন্নিশ লোলগী সাইকোলোজিকেল বোদী হোরর, হেতচিং অসি জনুৱারী ২৩, ২০২২দা সন্দেন্স ফিল্ম ফেস্তিবেলদা প্রিমিয়র তৌখি। মসিনা জেরার্দমর ইন্তর্নেস্নেল ফেন্তাস্তিক ফিল্ম ফেস্তিবেলদা গ্রান্দ প্রি অমসুং প্রি দ্যু জ্যুরী জিয়ুনেস মনা ফংখি।

ফিল্ম অসি মমিং চৎপা মশাগী ব্লোগকী খুত্থাংদা মালেমগী মফমদা অফবা অমসুং নুংঙাই য়াইফবা ইমুং অমগী শক্তম তাক্নবা হোৎনবদা কা হেন্না থৱাই য়াওবী, মমাবু পেলহনবনা মশাগী লাইনীং ওইরিবী নহা ওইরিবী জিম্নাস্ত তিঞ্জাগী পুন্সিদা মপুং ওইনা নৈনরি। ৱাখলনা লাম্বা ফংদগী ঙকপা য়েরুম অমা নোংমা তিঞ্জানা থেংনখি অমসুং ময়ুমদা পুরকখি। মরুমদুনা হেক কোকপা মতমদা, মহাক্না জিবদুবু ‘অলি’ হায়না মিংথোনখি অমসুং নমথদুনা লৈরবা তিঞ্জাগী ৱাখল্লোনগী মতুং ইন্না চৎপা মহাক্কা চপ মান্নবা জিব অমা ওইনা চাউরকখি।

অদোম্না হৌজিক করি অমুক ঙাইরিবগে? লাকপীরো, নবেম্বর ২০দগী ২৮, ২০২২ ফাওবদা গোৱাগী পানাজিদা পাংথোক্লিবা আই.এফ.এফ.আই. ৫৩দা ঐখোয় পুন্না অকীবা ফাওমিন্নরসি। দিলেগত অমসুং মীদিয়াশিংনা https://my.iffigoa.org/ দা রেজিস্তর তৌবীয়ু।

***