ভারতকী রাস্ত্রপতী, শ্রীমতি দ্রৌপদি মুরমুনা ঙসি (নবেম্বর ৪, ২০২২) আইজোলদা মিজোরম লেজিস্লেতিব এসেমব্লীগী মেম্বরশিংগী মফমদা ৱা ঙাঙখ্রে‍।

থৌরমদুদা ৱা ঙাঙলদুনা, রাস্ত্রপতীনা চীংগী লমদা ওইরিবা লৈমায়গী ফীভম্না চাওখৎপা পুরকপদা অখন্ননা শিংনবা পীরি; অদুম ওইনমক ভিজোরম্না পেরামিতর পুম্নমক্তা, মরুওইনা হ্যুমেন দিভেলপমেন্তকী লমদা নীংথিনা থবক তৌরি‍। মহৈ মশিং অমসুং হকশেলবু অফবা লৈঙাক্লোনগী য়ুম্বী পুংবা ওইনা লৌদুনা খুজিল থৌরাং য়াৎপা অমদি এদমিনিস্ত্রেতরশিংনা সেক্তর অনিসিদা ফংলিবা খুদোংচাবশিংগী ফীভম ফগৎহন্নবা ৱাফম চুম্না থম্বিরম্মী‍। অসিগুম্বা মফম অমদা লৈরিবা মতিং ফুদোকহনবদা কন্নেক্তিভিতীনা খ্বাইদগী চাওবা মরম ওইগদৌরিবনি হায়না মহাক্না হায়খি‍। খুঙ্গঙগী লম্বী, হায়ৱে অমসুং থোং শেমগৎপনা মহৈ মশিং অমসুং হকশেলগী পান্দমশিং ফংবদা মতেং পাংবতা নত্তনা শেন্মিৎলোনগী খুদোংচাবা কয়াসু পুথোরকই‍।

রাস্ত্রপতীনা হৌজিক অসি মীওইবা খুন্নাইবু হেন্না মতিং লৈনা থৌগল তৌবদা শীজিন্নরিবা অনৌবা তেক্নোলোজীগী মতম্নি হায়খি‍। মতমগী লম্বীদা চঙশিনবগা লোয়ননা, ঐখোয়না ঐখোয়গী হৌরকফমসু থাগোন্নদুনা লৈগদবনি হায়না মহাক্না পাউতাক পীখি‍। ত্রাইবেল মেজোরিতী স্তেত অমা ওইনা মিজোরম্না মাগী হৌখিবা মতমবু থিজিন্দুনা হৌজিক্কী সিস্তেম অসিগা ঈরোয়ননা হিংগৎহনবা য়াগদবা প্রি-মোদর্ন মতমগী লৈঙাক্লোনগী খ্বাইদগী ফবা থৌওংশিং থিজিনবা য়াই‍ হায়না মহাক্না হায়খি‍।

মিজোরম লেজিস্লেতিব এসেমব্লীনা চহি অসিগী মে থাদা গোল্দন জুবিলী পাঙথোকখিববু পল্লদুনা, রাস্ত্রপতীনা হৌখিবা চহিশিংদা হাউস অসিনা য়েৎনবগী, অফবা মওংদা খন্ন-নৈনবগী অমদি অমনা অমবু ইকায় খুম্নবগী ফিদম অমা মীয়ামগী ৱায়েৎশিংগী পাম্বৈ পুথোক্নবগীদমক শেমগৎলক্লি‍। মিজোরম এসেমব্লীনা নেভা (নেস্নেল ই বিধান সভা) শীজিন্নদুনা দিজিতেলদা ওনখৎপদা মাঙজিল থাবা শক্লোন লৌরি খঙবদা মহাক্না নুংঙাইবা ফোঙদোকখি‍। মিজোরমদা, নুপীশিংবু শান্ন-খোৎনবদা, নাৎগী থৌরমদা নৎত্রগা লল্লোন ইতিক্তা ওইরবসু পুন্সিগী হীরম খুদিংদা মপাঙ্গল কনহল্লি হায়না মহাক্না হায়খি‍। মীয়ামগী পুন্সিদা, মরুওইবা স্তেত অসিগী লো শেম্লিবশিংগী মরক্তা নুপী মীহুৎ মশিং হেনগৎহনগদবনি হায়বা ৱাফমসু মহাক্না থমখি‍।

মিজোরম অমসুং অতৈ অৱাং-নোংপোক লমদমশিং চাওখৎপা হায়বসি লৈবাকসিনা চাওখৎপগী হেন্না ৱাংবা পন্দোল লোম্নবা হোৎনবদা চপ চানা মরুওই হায়না রাস্ত্রপতীনা ফোঙদোকখি‍। মালেমগী থাক্তা ভারতকী ফীভম ৱাংখৎলক্লি‍। ঐখোয়গা ঐখোয়গী য়ুমলোন্নবশিংগা, মরুওইনা খা-নোংপোক এসিয়াগা, লৈনরিবা মরী অসি ঐখোয়দা মমল য়াম্না ৱাংই‍। ঐখোয়গী ‘এক্ত ইস্ত পোলিসী’না এসিয়া-পেসিফিক রিজন্দা লৈরিবা ঐখোয়গী হেন্না পাকথোক চাউথোকপা য়ুমলোন্নবশিংগী লৈনরিবা মরী ফগৎহনবদা অৱাং-নোংপোক্তা অহেনবা মীৎয়েঙ থম্লি‍। মমাঙদা শেন্মিৎলোনগী থৌরম অমা ওইরম্বদগী, পোলিসী অসি হৌজিক্তি স্ত্রেতেজিক অমসুং কলচরেগী ওইবা মশকসু য়াওরক্লে‍। মিজোরম্না লমদম অসিদা লৈরিবা য়ুমলোন্নবশিংগা অফবা মরী থম্নবগী লৈবাক্কী থৌরাং অসিদগী কান্নবসু ফংগনি অমদি থৌদাংসু য়াগনি‍।

মালেমগী থাক্তা ঐখোয়গী ৱাংখৎলক্লিবা ইথিল অসিগা লোয়ননা থৌদাংসু হেন্না চাওখৎলকই হায়না রাস্ত্রপতীনা হায়খি‍। খুদম ওইনা, ক্লাইমেৎ এক্সন্দা ঐখোয়না লমজিংদুনা অকোয়বগী ফীভম কায়থরকপগী চৈথেং থেংননবা খ্বাইদগী ফবা থৌওংশিং মালেমগী মফমদা উৎলি‍। মরকসিদা, ঐখোয়না – লনাই মীওই, খুজিল থৌরাং য়াৎলিবা, কাঙলোন শেম্লিবা অমদি লৈবাক ঙাক্লিবা অমমম ওইনা মালেম অসিবু মতেং পাংনবগীদমক ঐখোয়গী থাক ৱাংখৎহনবা তাই‍।  মিজোরম্না ভারতকী স্তেতশিংগী মনুংদা উমংগী শরুক খ্বাইদগী চাউনা লৈদুনা অখন্নবা অমদি ইনাক খুল্লবা বাইওদাইভর্সিতীশিংগী ফিদম্নিংঙাই ওইরবা য়ুম অমা পীরি‍। হিমালয়, মসিগী খুদোংথিনিংঙাই ওইরবা ইকোলোজী অমদি ফ্লোরা অমসুং ফোনাশিং অসি মমল নাইদ্রবা হেরিতেজনি‍। মখোয়বু তুংদা লাক্কদৌরিবা মীরোলশিংগীদমক ঐখোয়না য়োকখৎকদবনি‍।

রাস্ত্রপতীগী ৱারোল য়েংনবগীদমক চান্বিদুনা মফমসিদা নম্বিয়ু‍ -

***