প্রধানমন্ত্রীগী লোইশঙ
পি.এম.না নই দিল্লীদা পাঙথোকপা ভিজিলেন্স এৱ্যারনেস ৱীক্কঈ থৌরমদা ৱা ঙাঙখ্রে
সি.ভি.সি.গী অনৌবা কমপ্লেন্ত মেনেজমেন্ত সিস্তেম পোর্তেল হৌদোকখ্রে
“চাওখৎলবা ভারত অমগীদমক, থাজবা লৈহনবা য়াম্না মরুওই”
“মমাঙদা লৈঙাক্না মীয়ামগী থাজবা মাঙহনখিবতা নত্তনা মখোয়না মীয়ামদা থাজবসু ঙমখিদে”
“হৌখিবা চহি ৮সিদা ঐখোয়না অৱাৎ অপা অমদি শাফুগী থৌওংদা অহোংবা পুরক্নবা হোৎনদুনা লাক্লি। লৈঙাক্না সপ্লাই অমসুং দিমান্দগী মরক্তা লৈরিবা অহোবা মেনশিন্নবা হোৎনরি”
“তেক্নোলোজী, সর্ভিস সেচুরেসন অমসুং আত্মনিরভরতা অসিনা শেঞ্জা থুমজা লাকশিন্নবা মরুওইবা পাম্বৈ অহুম্নি”
“চাওখৎলপা ভারত অমগীদমক, ঐখোয়না শেঞ্জা থুমজা শুকয়া য়াদবা এদমিনিস্ত্রেতিব ইকোসিস্তেম অমা শেমগৎপা তাই”
“দিপার্তমেন্তশিং পন্দুনা লৈরিবা শেঞ্জা থুমজাগী কেসতা য়ুম্ফম ওইরগা রেঙ্কিং তৌনবা পাম্বৈ অমা শেমবিয়ু অদুগা মচা খায়বা রিপোর্ত থাগী নৎত্রগা থা অহুম-অহুমগী ওইনা ফোঙবিয়ু”
“শেঞ্জা থুমজা তৌবা মীওই অমত্তদা রাজনিতি-খুন্নাইগী তেংবাং ফংহল্লোইদবনি”
“শেঞ্জা থুমজা তৌবা মীওইশিং মরাল লৈরে হায়বা উৎলবসু জেলদা থাজিনবগী মহুত্তা কয়ারক হন্না মখোয়গী মিংচৎ হেনগৎহনবা য়াওরি। মসি ভারতকী খুন্নাইগী ওইনা অফবা নত্তে”
“শেঞ্জা থুমজা অমদি শেল চাবা ম
Posted On:
03 NOV 2022 12:55PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি নই দিল্লীগী বিজ্ঞান ভবন্দা সেন্ত্রেল ভিজিলেন্স কম্মিসন (সি.ভি.সি.)গী ভিজিলেন্স এৱ্যারনেস ৱীক্কা মরী লৈননা পাঙথোকপা থৌরমদা ৱা ঙাঙলদুনা, সি.ভি.সি.গী অনৌবা কমপ্লেন্ত মেনেজমেন্ত সিস্তেম পোর্তেল হৌদোকখ্রে।
তিল্লিবা মীয়ামদা ৱা ঙাঙলদুনা, প্রধান মন্ত্রীনা ভিজিলেন্স এৱ্যারনেস ৱীক সরদার পতেলগী মপোক কুমওনগা লোয়ননা হৌদোকখি হায়খি। “সরদার পতেলনা মপুন্সি চুপ্পা পুকচেল শেংবা, লৌথুউপ লৌকোই লৈতবা অমদি হায়রিবশিং অসিদা য়ুম্ফম ওইবা মীয়ামগী থৌগল তৌনবগী থৌওং অমা শেমগৎপদা কত্থোক্লম্মী” হায়না মহাক্না হায়খি। এৱ্যারনেস অমসুং এলর্তনে্সকী মতাঙদা চঙশিল্লিবা কেম্পেন অসি হায়রিবা পরিং অসি ইন্দুনা চঙশিনবনি হায়না প্রধান মন্ত্রীনা হায়খি। ভিজিলেন্স এৱ্যারনেস ৱীক্কী কেম্পেন অসি শেঞ্জা থুমজা লৈতবা ভারতকী মঙলান অমদি অপাম্বশিং ফংনবগীদমক পাঙথোক্লিবনি হায়রদুনা মীপুম খুদিংগী পুন্সিদা মসিগী মরুওইবগী মতাঙদা মহাক্না ৱাফম কয়া ফোঙদোকখি।
প্রধান মন্ত্রীনা থাজবা লৈহনবা হায়বসি চাওখৎপা ভারত অমগীদমক য়াম্না মরুওই, মীয়াম্না লৈঙাক্তা থাজবা থম্বনা মীয়াম্না মশাদা থাজবগী চাংসু হেনগৎহল্লি হায়খি। মমাঙদা লৈঙাক্না মীয়াম্না থম্লমবা থাজবা মাঙহনবতা নত্তনা মখোয়না মীয়ামবুসু থাজরমদে হায়বা ৱাফমদা প্রধান মন্ত্রীনা নুংঙাইতবা ফোঙদোকখি। শেঞ্জা থুমজা, ওৎপি নৈবিবা অমদি মচাক মথুমশিং খুত্তা পায়শিন্দুনা মীনায়গুম মতম শাংনা লৈরম্বগী মহৈনা নীংতম্লবা মতুংদসু হেন্না মপাঙ্গল কনখৎলকখি। মসিনা লৈবাকসিগী মীরোল মরিরোমদি শাথিনা মাঙহন তাকহল্লম্মী হায়না মহাক্না হায়খি। “ঐখোয়না চহি কয়া চৎনদুনা লাক্লবা থৌওং অসি অজাদী কা অমৃৎ কাল অসিদা হোংদোকপা তাই”, হায়না প্রধান মন্ত্রীনা ফোঙদোকখি।
শেঞ্জা থুমজাগী মায়োক্তা থেংননবগীদমক মহাক্না রেদ ফোর্ততগী থমখিবা ৱাফম পল্লদুনা, প্রধান মন্ত্রীনা শেঞ্জা থুমজা অমদি মীয়ামগী খোঙজেল তপথহল্লিবা মরুওইবা মরম অনি – মচাক মথুম নীংথিনা লৈতবা অমদি লৈঙাক্না মরম চাদনা শাফু পীবা অসিনি হায়খি। মতম শাংনা হায়রিবা মচাক মথুম অমদি খুদোংচাবা ৱাৎপগী ফীভম অসি থৌওইনা লৈহল্লম্মী অমদি লৈরিবা অহোবা অদু হেন্না পাকথোক চাউথোকহন্দুনা অমসু অমসু কান্নদবা লমজেলদা হিদান্নবগী ফীভম অমা লাকহনখি। লমজেল অসিনা শেঞ্জা থুমজাগী ফীভমদা হেন্না মথৌ হাপখি। অসিগুম্বা অৱাৎপশিংনা থোকহল্লকপা শেঞ্জা থুমজানা লায়রবা অমদি ময়ায় ওইরপ্পা কাঙলুপকী মীওইশিংদা খ্বাইদগী হেন্না শোকহল্লি। “লায়রবা অমদি ময়ায় ওইরপ্পা কাঙলুপকী মীওইশিংনা তঙায় ফদনা চঙদ্রবা য়াদ্রবা এমেনিতীশিং ফংনবা হোৎনবদা মখোয়গী মপাঙ্গল শীজিন্নদুনা লৈরবদি লৈবাকসিনা কমদৌনা চাওখৎলক্কদৌরি?” হায়না প্রধান মন্ত্রীনা হংখি। “মরম অসিননি, ঐখোয়নৌ হৌখিবা চহি ৮সিদা হায়রিবা অৱাৎপা অমদি শাফুতনা থল্লবা সিস্তেম অসিবু হোংদোক্নবা হোৎনদুনা লাক্লিবা। লৈঙাক অসিনা সপ্লাই অমসুং দিমান্দকী মরক্তা লৈরিবা অহোবা অসি মেনশিন্নবা হোৎনরি। মসি ফংবা ঙম্নবগীদমক চঙশিল্লিবা পাম্বৈ অহুমদি, তেক্নোলোজীগী খুমাঙ চাওশিনবা, তঙায় ফদনা চঙদ্রবা য়াদ্রবা সর্ভিসশিং মীপুং তিংনা ফংহনবা, অমদি অরোয়বদা ইরোমদোম লেপচবগী মায়কৈদা খোঙ থাংজিনবনি”, হায়না প্রধান মন্ত্রীনা হায়খি।
তেক্নোলোজী শীজিন্নবগী মতাঙদা, প্রধান মন্ত্রীনা পি.দি.এস.পু তেক্নোলোজীগা মরী শমজিন্নবা অমদি শাজিন্নবা বিনিফিসরী করোর কয়া লৌথোকপা অমদি দাইরেক্ত বেনিফিৎ ত্রান্সফর (দি.বি.তি.) শীজিন্নদুনা লুপা করোর লাখ ২ হেনবগী শেনফম লান্না চৎলমগদবদগী কলহৌবনচিংবশিং পনখি। মতৌ অসুম্না, লৌথুপ লৌকোই লৈতবা দিজিতেল ত্রাঞ্জেক্সন শীজিন্নবা অমদি জি.ই.এম.গী খুত্থাঙদা লৈঙাক্কী পোৎলমশিং অরোন অথুপ লৈতনা লৌবগী থৌওং চত্থবনা চাউনা অহোংবা পুরক্লি।
তঙায় ফদনা চঙদ্রবা য়াদ্রবা খুদোংচাবশিং মীপুম তিংনা ফংহনবগী মতাঙদা পল্লদুনা, প্রধান মন্ত্রীনা লৈঙাক্কী স্কীম খুদিংমক্কী কান্নবা ফংবা য়ারবা বিনিফিসরী খুদিংদা য়ৌশিনবা অমদি মীপুম তিংনা ফংহনবগী পান্দম ফংবনা শেঞ্জা থুমজাগী মফম মুত্থৎপগা লোয়ননা খুন্নাইদা অচান মিরান নাইবগী চৎনবী মুত্থৎলি হায়না ফোঙদোকখি। স্কীম খুদিংমক্কী কান্নবা মীপুং তিংনা ফংহন্নবগীদমক লৈঙাক্না লৌখৎলিবা থৌরাংগী মরমদা ফোঙদোক্লদুনা প্রধান মন্ত্রীনা তোতি শম্বা, পক্কাগী য়ুম, মৈ শম্বিবা অমদি গ্যাস শম্বিবনচিংবা খুদম ওইনা পীখি।
প্রধান মন্ত্রীনা মপান্দগী পুশিল্লকপা পোৎলমশিংদা কা হেন্না তাংদুনা লৈবনা শেঞ্জা থুমজাগী অচৌবা মরম অমা ওইরি হায়খি। মহাক্না আত্মনিরভরতাগী মায়কৈদা লৈঙাক্না খোঙ থাংজিল্লিবগী মরমদা ৱাফম কয়া থমখি অমদি ভারতনা রাইফল্সতগী হৌরগা ফাইতর জেৎ অমসুং ত্রান্সপোর্ত এয়রক্রাফ্ত ফাওবগী মশাগী ওইবা ঙাকশেলগী মচাকশিং পুথোকচরগদবা মরম্না স্কাম থোকপা য়াবগী ওইথোকপা লৈররোই হায়খি।
সি.ভি.সি.বু অরোন অথুপ লৈতবা ফীভম লৈহনবদা মীপুম খুদিংদা পুক্নিং থৌগৎলিবা ইন্সতিত্যুসন অমনি হায়রদুনা, প্রধান মন্ত্রীনা মমাঙদা মহাক্না ‘প্রিভেন্তিব ভিজিলেন্স’গী মরমদা থমখিবা ৱাফম নীংশিংখি অমদি মায়কৈ অদুদা সি.ভি.সি.না হোৎনরিবশিংবু থাগৎখি। মহাক্না ভিজিলেন্স কম্ম্যুনিতীদা মখোয়গী ওদিৎ অমসুং য়েংশিনবগী মওং মতৌশিং মতমগা চুনহন্নবা ৱাফমসু থমখি। “লৈঙাক্না শেঞ্জা থুমজাগী মায়োক্তা লেপ্লিবা খোঙফম অসিমক দিপার্তমেন্ত খুদিংদা লৈহনবা মথৌ তাই। চাওখৎপা ভারত অমগীদমক, ঐখোয়না শেঞ্জা থুমজা শুকয়া য়াদবা এদমিনিস্ত্রেতিব সিস্তেম অমা শেমগৎপা মথৌ তাই”, হায়না মহাক্না হায়খি।
প্রধান মন্ত্রীনা শেঞ্জা থুমজাগা মরী লৈনবা দিসিপ্লিনরী প্রোসীদিংশিং অকক্নবা মতমগী মনুংদা মিসন মোদতা লোইশিন্নবা সিস্তেম অমা পুরক্নবা ৱাফম থমখি। মহাক্না ক্রিমিনেল কেসশিং লেপ্তনা য়েংশিন্নবা ৱাফম হৌদোকখি অমদি দিপার্তমেন্তশিং শেঞ্জা থুমজাগী পন্দুনা লৈরিবা কেসতা য়ুম্ফম ওইদুনা রেঙ্কিং তৌনবগী পাম্বৈ অমা পুথোক্তুনা মদুগী মচা খায়বা রিপোর্ত থাগী নৎত্রগা থা অহুমগী ওইনা ফোঙদোক্নবা ৱাফম থমখি। প্রধান মন্ত্রীনা ভিজিলেন্স ক্লিয়রেন্সকী থৌওংবু তেক্নোলোজী শীজিন্নদুনা স্ত্রীমলাইন তৌনবা ৱাফম থমখি। মরী লৈনবা দিপার্তমেন্তশিংদা লৈরিবা শেঞ্জা থুমজাগী মরুদা চঙশিনবা ঙম্নবগীদমক মীয়ামগী ৱাকৎকী দেতাশিং ওদিৎ তৌবা মথৌ তাই হায়না প্রধান মন্ত্রীনা মখা তাখি।
প্রধান মন্ত্রীনা মীচম মীয়ামবু শেঞ্জা থুমজাগী থবকশিং মীকুপ নাহুম শিংনা শেন্নবদা য়াওহনবা মথৌ তাই হায়খি। “শেল চারিবা মীওই অদু ফনা য়াম্না মতিক লৈবা ওইসনু, মখোয়দু ফীভম অমত্তদা কনখৎপা তৌরোইদবনি, মসি অদোমগুম্বা লূপশিংগী থৌদাংনি। শেল চাবা মীওই অমত্তা রাজনিতিগী-খুন্নাইগী ঙাক্লৌ ফংহল্লোইদবনি, শেল চাবা খুদিংমক খুন্নাইগী ৱায়েলশঙদা লেপহনগদবা ফীভম অমা শেমগৎপসু মথৌ তারে”, হায়না মহাক্না হায়খি। নুংনাংনিংঙাই ওইরবা ফীভমগী মরমদা পল্লদুনা, প্রধান মন্ত্রীনা “শেঞ্জা থুমজা তৌবা মীওইশিং মরাল লৈরে হায়বা উৎলবসু জেলদা থাজিনবগী মহুত্তা কয়ারক হন্না মখোয়গী মিংচৎ হেনগৎহনবা য়াওরি। মসি ভারতকী খুন্নাইগী ওইনা অফবা নত্তে। ঙসিমকসু, মরাল লৈরে খঙলবা শেল চাবা মীওইশিংগীদমক কনাগুম্বা মীওই খরদি ৱা ঙাঙলি। অসিগুম্বা মীওই, অসিগুম্বা শাফুশিং অসিদা খুন্নাইগীদমক মখোয়দা লৈরিবা থৌদাংগী মরমদা খঙহনবা য়াম্না মরু ওইরে। হীরম অসিদা মতিক চাবা থবক লৌখৎপদা অদোমগী দিপার্তমেন্তগী অচৌবা থৌদাং লৈ”, হায়খি।
প্রধান মন্ত্রীনা শেঞ্জা থুমজা অমদি শেল চাবা মীওইশিংগী মায়োক্তা থবক তৌরিবা সি.ভি.সি.গুম্বা ইন্সতিত্যুসনশিংনা মতু মমান শোন্না লৈফম থোক্তে হায়বা ৱাফম ফোঙদোকখি। রাজনিতিগী পান্দম থম্লগা থবক তৌবগী মথৌ তাদে মীচম মীয়ামগী পুন্সি নুংঙাইহন্নবগীদমক থবক তৌগদবনি হায়না মহাক্না হায়খি। “মশাগী ওইজবা থিবা মীওইশিংনা চঙশিল্লিবা থবক থৌরমশিংদা অপনবা পীনবা অমদি হায়রিবা ইন্সতিত্যুসনশিং অসিগা মরী লৈনবা লনাই মীওইশিংগী মিংচৎ থিহন্নবা হোৎনরক্কনি। অদুবু জন্তা জনার্ধন হায়বসি লাইগী মশক্নি, মখোয়না অচুম্বা খঙই অমদি চাংয়েং তৌই, অমদি মতম য়ৌরক্লবদা মখোয়না অচুম্বগীদমক্তা লেপ্লক্কনি” হায়না প্রধান মন্ত্রীনা ফোঙদোকখি। প্রধান মন্ত্রীনা মীপুম খুদিংদা মখোয়গী থৌদাং কত্থোকপগা লোয়ননা য়ানবগীদমক অচুম্বগী লম্বীদা চৎননবা হায়খি অমদি “অদোম্না খোঙফম অমা লেপ্লকপা মতমদা লৈবাক পুম্বনা অদোমগীদমক লেপ্লি” হায়বা ৱাফমসু থমখি।
মহাক্কী ৱারোল লোইশিল্লদুনা, প্রধান মন্ত্রীনা থৌদাং চাউই অদুগা শিংনবশিংসু হোংবা নাই হায়খি। “অদোম্না অমৃৎ কালসিদা অরোন অথুপ লৈতবা অমদি হিদান্নবা য়াবা ইকোসিস্তেম অমা শেম্বদা মরুওইবা শক্লোন লৌরকখিগনি হায়না ঐনা থাজৈ”, হায়না প্রধান মন্ত্রীনা হায়খি। শিংনবশিং লাকশিন্নবগীদমক থবক থৌওংদা লেপ্পা লৈতনা হোংদোক হোংজিন তৌবা মথৌ তাই হায়না মহাক্না ফোঙদোকখি। প্রধান মন্ত্রীনা এসে কম্পিতিসন মায় পাক্লবশিংগা ৱারী ৱাতায় শানবদা নুংঙাইবসু ফোঙদোকখি অমদি তুংদা স্পীচ কম্পিতিসন অমসু হাপচিন্নবা ৱাফম হৌদোকখি। শেঞ্জা থুমজা থেংননবগী মতাঙদা পাঙথোকপা এসেগী মনা ফংলবা ৫গী মনুংদা ৪দি নুপীমচাশিংনা হায়বা ৱাফম থম্লদুনা, প্রধান মন্ত্রীনা নুপামচাশিংদা নীংগ্রী তাখত্তুনা খোঙচৎ অসিদা পুন্না চৎমিন্ননবা ৱাফম থমখি। “তরু তনানবগী মরুওইবা অমোৎপা লৌথোকখ্রবা মতমদতা খঙলকপনি”, হায়না মহাক্না মখা তাখি। “চৎন-কাঙলোনগী ৱাংমদা থবক তৌরিবা মীওইশিং থিজিনবদা তেক্নোলোজীনা পরিং পেপর ত্রেল অমা থম্লম্মী”, হায়না প্রধান মন্ত্রীনা ফোঙদোকখি অমদি শেঞ্জা থুমজাগী মায়োক্তা থেংনরিবা লান্থেং অসিদা হেক য়ারিবমখৈ তেক্নোলোজী শীজিন্ননবা ৱাফম থমদুনা মহাক্কী ৱারোল লোইশিনখি।
প্রিন্সিপাল সেক্রেতরী, দোক্তর পি.কে. মিস্রা, পর্সোনেল এন্দ পার্লিয়ামেন্তরী এফ্যার্সকী রাজ্য মন্ত্রী দোক্তর জিতেন্দ্র সিংহ, কেবিনেৎ সেক্রেতরী, সেন্ত্রেল ভিজিলেন্স কম্মিস্নর, শ্রী সুরেস এন. পতেল অমসুং ভিজিলেন্স কম্মিস্নর শ্রী পি.কে. শ্রীভাস্তব অমসুং শ্রী অর্বিন্দ কুমার থৌরমদুদা শরুক য়াখি।
বেকগ্রাউন্দ
পোর্তেল অসিনা মীয়ামদা মখোয়গী ৱাকৎকী লৈরিবা ফীভমশিংগী অপদেৎ পীদুনা এন্দ-তু-এন্দ ইন্ফোর্মেসন পীননবা মীৎয়েঙ থম্লি। মহাক্না “ইথিক্স এন্দ গুদ প্রাক্তিসেস”কী মরমদা লাইয়েক্কী বুকলেৎ পরিং অমা, “প্রিভেন্তিব ভিজিলেন্স”কী মরমদা খ্বাইদগী ফবা থৌওংশিংগী খোমজিনবা লাইরিক অমদি পব্লিক প্রোকরমেন্তকী মতাঙদা “ভিগেয়ে-বানি”গী অখন্নবা ইসু ফোঙগনি।
পুন্সীগী হীরম খুদিংদা অমত্তা ওইবগী পাউজেল শন্দোক্নবগীদমক স্তেকহোল্দরশিং পুন্না তাশিন খোমজিন্নবগীঈদমক সি.ভি.সি.না চহি খুদিংগী ভিজিলেন্স এৱ্যারনেস ৱীক পাঙথোকই। চহি অসিদা, থৌরম অসিবু ওক্তোবর ৩১দগী নবেম্বর ৬ ফাওবা “করপ্সন-ফ্রী ইন্দিয়া ফোর এ দিভেলপ নেসন” হায়না হীরমসিদা পাঙথোক্লি। পীরিবা ভিজিলেন্স এৱ্যারনেস ৱীক্কী হীরম অসিদা সি.ভি.সি.না লৈবাক পুম্বগী ওইনা পাঙথোকখিবা এসে ইবা চাংদম্নবদা খ্বাইদগী ফজবা এসে ইরকখিবা মহৈরোয় মঙাদা প্রধান মন্ত্রীনা মনাসু লান্থোকখি।
*****
(Release ID: 1873519)
Visitor Counter : 159
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam