প্রধান মন্ত্রী, শ্রী নরেন্দ্র মোদীনা ঙসি ভিদিও মেসেসকী থোংদা মহারাস্ত্র সরকারগী রোজগার মেলাদা ৱা ঙাংখ্রে। প্রধান মন্ত্রীনা ধান্তেরস্তা কেন্দ্রগী থাক্তা রোজগার মেলাগী ৱাখল্লোন অসি হৌদোকখি। মসি কেন্দ্র সরকারগী থাক্তা থবক লাখ ১০ পীনবগী কেম্পেনগী অহৌবনি। মদুদগী হৌনা প্রধান মন্ত্রীনা গুজরাত অমসুং জে এন্দ কে সরকারশিংগী রোজগার মেলাশিংদা ৱা ঙাংখ্রে। শ্রী মোদীনা হায়খি, “অতেনবা মতমগী মনুংদা রোজগার মেলা পাঙথোকপা অসিনা মহারাস্ত্র সরকারনা নহারোলদা থবক পীনবগী অচেৎপা ফিরেপকা লোয়ননা মাংদা চংশিল্লি হায়বা ময়েক শেংলে। অসিগুম্বা রোজগার মেলাশিং মহারাস্ত্রদা তুংদসু হেন্না পাঙথোক্কদবা অসিদা ঐহাক্না নুংঙাইবা পোকই”। মহারাস্ত্রগী হোম দিপার্তমেন্তদা অমসুং রাজ্য অসিগী রুরেল দিবেলপমেন্ত দিপার্তমেন্তদা এপোইন্তমেন্ত লিশিং কয়া পীরগনি।

প্রধান মন্ত্রীনা হায়খি অমৃত কাল অসিদা নহারোলনা মরু ওইবা থৌদাং লৌবা চাউখৎপা ভারত অমগী পান্দমদা লৈবাক্না থবক পাইখৎলি। মহাক্না হায়, “থবক্কী মওং-মতৌশিং লেপ্পা লৈতনা হোংলক্লি অমসুং সরকারনা তোঙান-তোঙানবা থবক্কী মখলশিংগীদমক খুদোংচাবশিং লেপ্পা লৈতনা পীরি”। মহাক্না হায় মুদ্রা স্কিমনা নহারোলদা কোল্লাতেরেল ফ্রী লোনশিং পীরি অমসুং লুপা করোর লাখ ২০রোমগী লোনশিং হান্ননা পীথখ্রে। মতৌ অসুম্না স্তার্ত-অপশিং অমসুং এম.এস.এম.ই. সেক্তরদা চাউনা মতেং পাংলি। মহারাস্ত্রদা লৈরিবা নহারোলনা মসিদগী কান্নবা ফংলি হায়না মহাক্না মখা তাখি।

প্রধান মন্ত্রীনা হায়খি মদুদি, “সরকারগী খোঙথাংশিংগী মতাংদা খ্বাইদগী মরু ওইবা ৱাফম অসি থবক্কী অমসুং ইশানা ইশাদা থবক পীজবগী খুদোংচাবশিং অসি পুম্নমক্তা, দলিত-শোত্থরবা, ত্রাইবেল, জেনরেল ক্লাস অমসুং নুপীশিংদা থোং মান্ননা ফংহল্লি”। প্রধান মন্ত্রীনা হায়খি সেল্ফ হেল্প গ্রুপশিংগা লোয়ননা থবক তৌরিবা নুপী করোর ৮দা লুপা করোর লাখ ৫গী তেংবাং পীথখি।

প্রধান মন্ত্রীনা হায়খি, “ঙসি সরকারনা ইনফ্রাস্ত্রকচর, ইনফোর্মেসন তেক্নোলোজী অমসুং লৈবাক শিনবা থুংবগী অতোপ্পা লমশিংদা রেকোর্দ ওইবা মওংদা ইনভেস্তমেন্তশিং তৌবা অসিনা অনৌবা থবক্কী খুদোংচাবশিং পীরি”। মহারাস্ত্রগা মরী লৈননা প্রধান মন্ত্রীনা হায়খি মদুদি কেন্দ্র সরকারনা রাজ্য অসিগীদমক লুপা করোর লাখ ২ হেনবগী প্রোজেক্ত ২২৫রোম অয়াবা পীখ্রে। লুপা করোর লিশিং ৭৫ রোমগী রেলৱে প্রোজেক্তশিং অমসুং মোদর্ন রোদশিংগীদমক লুপা করোর ৫০ রোমগী প্রোজেক্তশিং অয়াবা পীখ্রে। মহাক্না হায়, “প্রোজেক্তশিং অসিগী থবক অসি হৌজিক পাইখৎলি নত্ত্রগা অথুবদা থবক পাইখৎগদবা ওইরি”। প্রধান মন্ত্রীনা লোইশিনবদা হায়খি, “সরকারনা ইনফ্রাস্ত্রকচরদা শেনফম চাউনা চাদিং তৌরবা মতমদা মসিনা মরম ওইদুনা থবক্কী অনৌবা খুদোংচাবা করোর কয়া ফংহল্লি”।

*****