ভারতকী রাস্ত্রপতি, শ্রীমতি দ্রৌপদি মুর্মুনা ঙসি নাগালেন্দ সরকারনা মহাকপু ইকায় খুম্নবা ওইনা শীনবা থৌরমদা শরুক য়াখ্রে অমসুং এজুকেসন, রোদ ইনফ্রাস্ত্রকচর অমসুং ফাইনেন্সিএল সেক্তরগা মরী লৈনবা তোঙানবা প্রোজেক্ত কয়া ঙসি (নবেম্বর ২, ২০২২) কোহিমাদগী ভর্চুএলগী খুত্থাংদা  শঙ্গাবগা লোয়ননা উরেপ উয়ুং তমখ্রে।

রাস্ত্রপতিনা ঙসিগী থৌরমদা ৱা ঙাঙবদা রাজ্য অমনা চাউখৎপদা ইনফ্রাস্ত্রকচর চাউখৎপনা য়াম্না মরু ওইবা পেরামীতর অমা ওই। ভারত সরকারগী ‘এক্ত ইস্ত পোলিসী’না অৱাং নোংপোক লমদম্না মপুং ওইনা চাউখৎপদা মিৎয়েং চঙই। মহাক্না প্রধান মন্ত্রী গ্রাম সরক য়োজনাগী মখাদা ঙসি শঙ্গাখিবা শোরোক অমসুং থোংশিংনা লমদম অসিগী কন্নেক্তিবিতীদা মশক থোক্না তেংবাংগনি হায়বগী থাজবা ফোংদোকখি।

নাগালেন্দগী দাইনামিক ওইরবা নহাশিং অসি তেলেন্ত য়াম্না লৈ হায়না রাস্ত্রপতিনা হায়খি। ৮০% হেনবগী লিতরেসী রেত লৈদুনা, নাগালেন্দগী স্কিল লৈরবা নহা ওইরিবা নুপা অমসুং নুপীশিংনা ইংলিশ লোল নীংথিজনা খঙই অমসুং আই.তি., হোস্পিতালিতী অমসুং অতোপ্পা সেক্তর কয়াদা ভারত শিনবা থুংবদা থবক তৌরি। মখোয়গী তসেংবা মতিক ফংবা ঙমহন্নবগীদমক্তা হোলিস্তিক এজুকেসন ফংহনবা হায়বসি য়াম্না মরু ওইবা ৱাফম ওইরি। নুপীমচাশিংগী স্কুল অমসুং হোস্তেলগা মরী লৈনবা অনৌবা খোঙথাং, এক্লাব্যা মোদেল রেসিদেন্সিএল স্কুল, স্মার্ত ক্লাসরুম প্রোজেক্তশিংনা রাজ্যসিগী এজুকেসন্দা মশক থোকপা শাফু পীগনি হায়বগী মহাক্না থাজবা ফোংদোকখি।

রাজ্যসিগী নুপীশিংগী লিতরেসী রেতনা লৈবাক্কী চাংচত্তগী হেল্লি অমসুং লৈবাক মনুংদা নুপীশিংগী খ্বাইদগী তেক্ত কায়দবা মফম অমসু নাগালেন্দনা ওইরি হায়না রাস্ত্রপতিনা হায়খি। মসিগুম্বা মতৌ অসিনা নাগালেন্দগী খুন্নাইনা নুপীশিংবু কয়া য়াম্না ইকায় খুম্নবগে হায়বা উৎলি হায়না মহাক্না মখা তাখি। নাগালেন্দগী নুপীশিংনা মাং থানা থোক্লক্তুনা মীয়ামগী পুন্সিদা শরুক য়াবগী চাং হেনগৎহনসি হায়না মহাক্না নুপীশিংগী মফমদা থমখি। নুপীশিংবু করিগুম্বা মপাঙ্গল লৈহনবা মতমদা, খুন্নাইদা চাউখৎপা লৈরক্কনি হায়না মহাক্না হায়খি।

নাগালেন্দনা মখোয়গী লোকেল সেল্ফ গবর্নেন্সকী চৎনবী অসিবু নাগালেন্দ ভিলেজ অমসুং ত্রাইবেল কাউন্সিল এক্ত, ১৯৭৮গী খুত্থাংদা ইন্সতিত্যুস্নেলাইজ তৌখিবা অসি মখোয়গী ওইনা য়াম্না চাউথোকচনীংঙাইনি হায়না রাস্ত্রপতিনা হায়খি। ভিলেজ কাউন্সিল অমসুং ভিলেজ দিভেলপমেন্ত বোর্দনা নাগালেন্দ শিনবা থিংবগী দিসেন্ত্রেলাইজ গবর্নেন্সকী ইস্তাব্লিশ ওইরবা থৌওং ওইরি হায়না মহাক্না হায়খি। সর্ভিস দেলিবরী হেন্না ফগৎহন্নবগীদমক্তা পব্লিক সেক্তর ইন্সতিত্যুসনশিংগী মেনেজমেন্ত নীংথিনা পাংথোক্নবগীদমক্তা সরকার অমসুং কম্ম্যুনিতীশিংগী মরক্তা অফবা পার্ত্নরশিপ অমা শেম্নবগীদমক্তা কম্ম্যুনিতাইজেসনগী অনৌবা থৌওং নাগালেন্দনা হৌদোকখিবা অসিদা মহাক্না নুংঙাইবা ফোংদোকখি।

নাগালেন্দদা চত্থরিবা লৌউ-শিংউবগী চাউরাকপা ৭০%না নাৎকী চৎনবী অমসুং ওর্গানিক ওইরিবসিদা মিৎয়েং চঙলদুনা, রাস্ত্রপতিনা অৱাং নোংপোক ভারত অপুনবনা লৈবাক্কী ওর্গানিক ফুদ বাস্কেত ওইবা ঙম্বগী মতিক লৈ হায়না ফোংদোকখি। নাগালেন্দগী অফবা মগুন চেনবা এগ্রো অমসুং হোর্তিকলচরগী পোত্থোকশিং মীয়াম্না য়াম্না পাম্নৈ। নাগালেন্দগী এগ্রো পোত্থোক অহুম – নাগা ত্রী তোমেতো, নাগা ককম্বর অমসুং নাগা মির্চা অসিবু জি.আই. তেগ তৌখিবদা মহাক্না নুংঙাইবা ফোংদোকখি। রাজ্য সরকারনা নেচ্যুরেল্লী নাগালেন্দ আউতলেত হাংদোকপনা লোকেল ওন্তোপ্রিনর, লৌমী অমসুং ফিশা লোন্সা তৌবশিংগী মফমদা মখোয়গী নাৎকী হেন্দিক্রাফ অমসুং হেন্দলুমগী পোত্থোক, ফজরবা নাগা শাউল অমসুং তোঙান তোঙানবা ওর্গানিক পোত্থোক য়োনবগী অনৌবা প্লেতফোর্ম অমা পীরে হায়না মহাক্না হায়খি।

নাগালেন্দদা তুরিজমগী চাউখৎপা য়াবগী পাম্বৈ অমসুং মতিক মরাং কায়না লৈ হায়না রাস্ত্রপতিনা হায়খি। নাগা ত্রাইবশিং অসি মখোয়গী মতিক লৈবা চৎনবী অমসুং ইনাক খুনবা হেরিতেজকীদমক্তা মমিং চৎলি অমসুং হায়রিবা মতৌশিংনা ‘য়ুনিতী ইন দাইবর্সিতী’গী মোত্তো অসিবু নীংথিনা তাক্লি। জগোই ঈশৈনা নাগাশিংগী পুন্সিগী তৎন-থানবা য়াদ্রবা মচল অমা ওইরি। রাজ্যসিগী মতৌ য়াম্বা অমসুং ফজরবা চৎনবী উৎপগীদমক্তা হোর্নবিল ফেস্তিবেলনা মমিং চৎপা প্লেতফোর্ম ওইরি।

নাগালেন্দ তোঙানবা হীরম কয়াদা মশক থোক্না চাউখৎপা ঙম্লে হায়না রাস্ত্রপতিনা হায়খি। মসিগুম্বা মায় পাকপসিগীদমক্তা, মহাক্না মমাংদা পানখিবা অমসুং হৌজিক্কী সরকার অমসুং নাগালেন্দগী মীয়াম্বু থাগৎখি। নাগালেন্দনা রাজ্য ওইখিবগী চহি ৬০ মপুং ফারকপসিদা, মীয়াম খুদিংনা হেন্না নুংঙাই য়াইফবা অমসুং চাউখৎপা নাগালেন্দ অমগীদমক্তা খোঙফম চেৎপা তাবনি হায়না মহাক্না হায়খি।

রাস্ত্রপতিগী অপুনবা ৱারোল পানবগীদমক্তা মফমসিদা ক্লিক তৌবীয়ু -

***