প্রধানমন্ত্রীগী লোইশঙ
azadi ka amrit mahotsav g20-india-2023

জম্মু অমসুং কাস্মির রোজগার মেলাদা প্রধান মন্ত্রী ৱা ঙাংখ্রে


“হৌজিক অরিবা শিংনবশিং তুংওইনরম্বা মতমনি অমসুং অনৌবা কান্নবশিং মপুংফানা খুদোংচাবা লৌগদবনি”

“খোঙজেল য়াংনা চাউখৎনবগীদমক, অনৌবা ৱাখল্লোন অমগা লোয়ন্না, অমসুং অনৌবা থৌরাং অমগা লোয়ন্না ঐখোয় থবক তৌগদবনি”

“ইনফ্রাস্ত্রকচর চাউখৎলকপা অমসুং লম্বী-থোং ফগৎলকপনা মরম ওইদুনা রাজ্য অসিদা তুরিজম সেক্তর ফিবম ফগৎলক্লে”

“কাংলুপ খুদিংমক অমসুং মীওই খুদিংমক চাউখৎপগী কান্নবশিং চপ মান্ননা ফংহন্নবা ঐখোয়না থবক পায়খৎলে”

“জম্মু অমসুং কাস্মিরগী মীয়াম শেঞ্জা-থুমজা পামদে, মখোয়গী চৈনা ঐঙোন্দা মতম পুম্নমক্তা ফাওই”

“জম্মু অমসুং কাস্মির ভারতমচা খুদিংমক্কী চাউথোকচফম্নি। ঐখোয় অমতা ওইনা জম্মু অমসুং কাস্মির অনৌবা থাক অমদা পুখৎকদবনি”

Posted On: 30 OCT 2022 10:32AM by PIB Imphal

ঙসি দিভিও মেসেজগী খুৎথাংদা প্রধান মন্ত্রী শ্রী নরেন্দ্র মোদী জম্মু অমসুং কাস্মির রোজগার মেলাদা ৱা ঙাংখ্রে। মহাক্না হায়খি ঙসি অসি জম্মু অমসুং কাস্মিরগী নহারোলশিংগী মরুওইবা নুমিৎ অমনি। রাজ্য অসিগী তোঙান-তোঙানবা মফম ২০দা সরকারগী থবক তৌনবা এপোইন্তমেন্ত লেত্তরশিং ফংলবা নহারোল লিশিং ৩ থাগৎলদুনা মহাক্না হায়খি নহারোলশিং অসি পি.দব্লিউ.দি, হেল্থ দিপার্তমেন্ত, ফুদ অমসুং সিবিল সপ্লাইস দিপার্তমেন্ত, এনিমেল হসবেন্দরি, জল শক্তি অমসুং ইজুকেসন-কলচর দিপার্তমেন্তশিংদা থবক তৌনবা খুদোংচাবা ফংলগনি। লাক্লিবা নুমিৎ খরনিগী মনুংদা অতোপ্পা দিপার্তমেন্তশিংগী এপোইন্তমেন্ত লেত্তর ৭০০ হেন্না য়েন্থোক্নবা থৌরাং তৌরে।

প্রধান মন্ত্রীনা হায়খি ২১শুবা চহিচাগী দিকেদ অসি জম্মু অমসুং কাস্মিরগী পুৱারিদা মরুওইবা অমনি। হৌজিক অরিবা শিংনবশিং তুংওইনরম্বা মতমনি অমসুং অনৌবা কান্নবশিং মপুংফানা খুদোংচাবা লৌগদবনি। রাজ্য অসি অমসুং মীয়াম চাউখৎনবগীদমক মশিং য়াম্লবা জম্মু অমসুং কাস্মিরগী নহারোলশিং চোঙথোরকপা অসিদা ঐ হরাওই। অখন্নবা অমা ওইনা, জম্মু অমসুং কাস্মিরদা রোজগার মেলা পাংথোক্তুনা, ঐখোয়গী নহারোলশিংনা জম্মু অমসুং কাস্মিরগী চাউখৎ-থৌরাংগী অনৌবা ৱারি অমা ইরগনি।

অনৌবা, অরোন-অথুপ লৈতবা অমসুং মীয়ামগী ইহুল খঙবা লৈঙাক অমা লৈবদগী জম্মু অমসুং কাস্মির লেপ্তনা চাউখৎলক্লিবা অসিগী মতাংদা প্রধান মন্ত্রীনা হায়খি খোঙজেল য়াংনা চাউখৎনবগীদমক, অনৌবা ৱাখল্লোন অমগা লোয়ন্না, অমসুং অনৌবা থৌরাং অমগা লোয়ন্না ঐখোয় থবক তৌগদবনি। ২০১৯দগী হৌনা সরকারগী থবক লিশিং ৩০ হেন্না হাপখ্রে, মসিগী মনুংদা থবক লিশিং ২০ হৌখিবা চহি অমা মখাইগী মনুংদা হাপখি। মতিক চাবশিং খক থবক হাপ্পা হায়বা লাইৱা অসিনা রাজ্য অসিগী নহারোলশিংদা অনৌবা থাজবা অমা লৈহল্লে। জম্মু অমসুং কাস্মিরগী লেপ্তনেন্ত গভর্নর শ্রী মনোজ সিনহা অমসুং রাজ্য অদুগী লৈঙাকনা পায়খৎলিবা থবকশিং প্রধান মন্ত্রীনা থাগৎখি।

 প্রধান মন্ত্রীনা হায়খি কেন্দ্র সরকারনা হৌখিবা চহি ৮ অসিদা থবক পীনবা অমসুং মশানা মশাবু থবক পীজনবা থৌরাং কয়া পায়খৎলে অমসুং থৌরাংশিং অদুগী শরুক অমা ওইনা ওক্তোবর ২২দগী হৌনা লৈবাক্কী মফম কয়াদা রাজগার মেলা পাংথোক্লি। অহানবা তাঙ্কক্কী ওইনা, মথং থা খরগী মনুংদা কেন্দ্র সরকারনা এপোইন্তমেন্ত লেত্তর লাখ ১০ হেন্না য়েন্থোক্কনি। রাজ্য অসিদা থবক ফংবা হেনগৎহন্নবা সরকারনা ললোন-ইতিক্কী থবকশিং পাকথোক-চাউথোকহল্লে। রাজ্য অসিদা শেন থাদরকপা হেনগৎহন্নবা ললোন-ইতিক লাইনা পাংথোক্নপা ঙম্নবা লম্বী শেম্নবা অনৌবা উদোগকী থৌশিল অমসুং বিজিনেস এক্সন প্লান লৈরে। চাউখৎ-থৌরাংগা মরী লৈনবা থবকশিং খোঙজেল য়াংনা পায়খৎলিবা অসিনা রাজ্য অসিগী শেন্মিৎলোন্দা অওনবা অমা পুরক্লগনি।

প্রধান মন্ত্রীনা মখা তানা হায়খি শ্রীনগরদগী সারজা য়ৌবা ইন্তরনেসনেল ফ্লাইত পাইবা হৌখ্রে। লৌমী কয়া লম্বী-থোঙ ফগৎলকপগী খুদোংচাবা ফংলে অমসুং হৌজিক রাজ্য অসিগী এপ্পল থাবা লৌমীশিংগী পোৎথোকশিং রাজ্যগী ৱাংমদা য়াম্না লাইনা য়োনবা ঙম্লে। দ্রোনশিংগী খুৎথাংদা পোৎ-চৈ পুথোক-পুশিনগী থবকশিং পুক্নিং থৌগৎনবা সরকারনা থবক পায়খৎলি।

জম্মু অমসুং কাস্মিরদা লমকোয়বা মীওই লাকপা মশিং হেনগৎলকপগী মতাংদা প্রধান মন্ত্রীনা হায়খি ইনফ্রাস্ত্রকচর চাউখৎলকপা অমসুং লম্বী-থোং ফগৎলকপনা মরম ওইদুনা রাজ্য অসিদা তুরিজম সেক্তর ফিবম ফগৎলক্লে। মীচং-মীখাই নাইদনা খুন্নাইগী কাংলুপ খুদিংমক সরকারগী স্কিমশিংগী কান্নবশিং ফংহনবা হায়বসি ঐখোয়গী থৌদাংনি। কাংলুপ খুদিংমক অমসুং মীওই খুদিংমক চাউখৎপগী কান্নবশিং চপ মান্ননা ফংহন্নবা ঐখোয়না থবক পায়খৎলে। রাজ্য অসিদা অনৌবা এ.আই.আই.এম.এস ২, অনৌবা মেদিকেল কোলেজ ৭, স্তেৎ কেন্সর ইন্সতিতুৎ ২ অমসুং নর্সিং কোলেজ ১৫ লিংখৎতুনা হকশেল অমসুং ইজুকেসনগী মচাক-মথুমশিং ফগৎহন্নবা থবক কয়া পায়খৎলে।

অরোন-অথুপ লৈতনা থবক তৌবদা জম্মু অমসুং কাস্মিরগী মীয়াম্না থাগৎলিবা অসিগী মতাংদা প্রধান মন্ত্রীনা হায়খি সরকারগী থবক ফংলবা নহারোলশিংনা মরুওইনা শেঞ্জা-থুমজা লৈহন্দনবা হোৎনগদবনি। ঐনা মমাঙদা জম্মু অমসুং কাস্মিরগী মীয়াম উনবদা, ঐনা মতম পুম্নমক্তা মখোয়গী অৱাবা অদু খঙখি। লৈঙাক্তা শেঞ্জা-থুমজা তৌবগী চৈনা অদু মখোয়না ফংখি। জম্মু অমসুং কাস্মিরগী মীয়াম্না শেঞ্জা-থুমজা পামদে। শেঞ্জা-থুমজাগী ফত্ত্রবা থবকশিং মরু ফংনা মুৎথৎনবা শিংথানিঙাই ওইরবা থবকশিংগীদমক প্রধান মন্ত্রীনা জম্মু অমসুং কাস্মিরগী লেপ্তনেন্ত গভর্নর শ্রী মনোজ সিনহা অমসুং রাজ্য অদুগী লৈঙাক থাগৎখি।

লোইশিল্লকপগী ৱারোলদা প্রধান মন্ত্রীনা হায়খি ঙসি এপোইন্তমেন্ত লেত্তর ফংলবা নহারোলশিংনা কৎথোকপা অমগা লোয়ন্না থবক তৌগদবনি। জম্মু অমসুং কাস্মির ভারতমচা খুদিংমক্কী চাউথোকচফম্নি। ঐখোয় অমতা ওইনা জম্মু অমসুং কাস্মির অনৌবা থাক অমদা পুখৎকদবনি। ২০১৪৭দা ভারত চাউখৎলবা লৈবাক অমা ওইন্নবা ঐখোয়গী অচৌবা পান্দম অমা লৈরে অমসুং মসি ফংনবা অচেৎপা ফিরেপ অমগা লোয়ন্না ঐখোয় লৈবাক শেমগৎপগী থবক্তা শরুক য়াগদবনি।  

 

*****



(Release ID: 1872022) Visitor Counter : 84