কেমিকেল্স অমসুং ফর্তিলাইজর মন্ত্রালয়
azadi ka amrit mahotsav g20-india-2023

প্রধান মন্ত্রীনা প্রধান মন্ত্রী কিসান সম্রুদ্ধী কেন্দ্র ৬০০ শঙ্গাখ্রে


প্রধান মন্ত্রী ভারতিয় জন উর্বারক পরিয়োজনা – ৱন নেসন ৱন ফর্তিলাইজর হৌদোকখ্রে

পি.এম.না মতম পুম্নমক্তা লৌউ-শিংউ সেক্তরদা ‘মীৎয়েঙ চোইদনা’ থবক পায়খৎলি হায়না দোক্তর মনসুখ মন্দাবিয়ানা হায়রি

নেনো য়ুরিয়া কম্মর্সিএল ওইনা পুথোকপা মালেমগী মনুংদা ভারতনা অহানবা লৈবাক ওইরে: দোক্তর মনসুখ মন্দাবিয়া

Posted On: 17 OCT 2022 3:48PM by PIB Imphal

প্রধান মন্ত্রী, শ্রী নরেন্দ্র মোদীনা ঙসি নই দিল্লীদা লৈবা ইন্দিয়ন এগ্রিকলচরেল রিছর্চ ইন্সতিত্যুত্তা পি.এম. কিসান সম্মান সম্মেলন ২০২২ হৌদোকখ্রে‍। প্রধান মন্ত্রীনা কেমিকেল অমসুং ফর্তিলাইজর মন্ত্রালয়গী মখাদা প্রধান মন্ত্রী কিসান সম্রুদ্ধী কেন্দ্র (পি.এম.কে.এস.কে.) ৬০০সু শঙ্গাখি‍। মসিগী মথক্তা প্রধান মন্ত্রী ভারতিয় জন উর্বারক পরিয়োজনা – ৱন নেসন ৱন ফর্তিলাইজরসু প্রধান মন্ত্রীনা হৌদোকখি‍। থৌরম অদুদা, প্রধান মন্ত্রীনা প্রধান মন্ত্রী কিসান সম্মান নিধী (পি.এম.-কিসান)গী মখাদা লুপা করোর ১৬,০০০কী ১২শুবা ইন্সতোলমেন্তকী শেনফম দাইরেক্ত বেনিফিৎ ত্রান্সফরগী খুত্থাঙদা থাদোকখি‍। প্রধান মন্ত্রীনা এগ্রি স্তার্তঅপ কনক্লেব অমসুং একজিবিসনসু হৌদোকখি‍। থৌরম অদুদা, প্রধান মন্ত্রীনা হারগী ই-মেগাজিন ‘ইন্দিয়ন ইদ্জ’সু ফোঙখি‍। শ্রী মোদীনা স্তার্তঅপ একজিবিসনগী থীম পেবিলিয়ন্দা চত্তুনা মফমদুদা থেন্দুনা থম্লিবা পোত্থোকশিং য়েংশিনখি‍।

তিল্লিবা মীয়ামগী মফমদা ৱা ঙাঙলদুনা, প্রধান মন্ত্রীনা মফম অমদা জয় জৱান, জয় কিসান, জয় বিজ্ঞান অমসুং জয় অনুসন্ধান লৈরিবা অদুবু শিংথাখক, অমদি হায়রিবা লাইৱা অসিগী অহিংবা শক্তম ঐখোয়না মফমসিদা উবা ফংলি হায়না হায়খি‍। কিসান সম্মেলন অসি লৌমীশিংগী পুন্সি মহিং লায়থোকহন্নবা, মখোয়গী মতিং হেনগৎহন্নবা অমদি খুমাঙ চাওশিল্লবা লৌউ-শিংউগী তেক্নিকশিং য়োকখৎনবা পাম্বৈ অমনি হায়না মহাক্না মখা তানা ফোঙদোকখি‍।

“ঙসি প্রধান মন্ত্রী সমৃদ্ধী কেন্দ্র ৬০০ হেন্না শঙ্গারে,” হায়না শ্রী মোদীনা হায়খি‍। হায়রিবা কেন্দ্রশিং অসি হার য়োন্নবগী অচম্বা মফম অমখক্তা নত্তনা লৈবাকসিগী লৌমীশিংগী অচেৎপা মরী অমা শেমগৎনবা থৌওং অমনি হায়না মহাক্না মখা তানা ফোঙদোকখি‍। প্রধান মন্ত্রী কিসান সম্মান নিধী (পি.এম.-কিসান)গী অনৌবা ইন্সতোলমেন্তগী মতাঙদা, প্রধান মন্ত্রীনা শেলশিং অসি লৌমীশিংগী একাউন্তশিংদা মরক্কী মীওই অমত্তা য়াওদনা হকথেংননা য়ৌরি হায়না ফোঙদোকখি‍। “লুপা করোর ১৬,০০০কী অতোপ্পা ইন্সতোলমেন্ত অমা লৌমী ইমুংশিংদা পি.এম. কিসান সম্মান নিধী ওইনা থাদোক্লে”, হায়না শ্রী মোদীনা হায়রদুনা, হায়রিবা ইন্সতোলমেন্তকী শেনফম অসি লৌমীশিংদা দিৱালী মমাঙদা য়ৌহনবা ঙমবদা নুংঙাইবা ফোঙদোকখি‍। ঙসি, লৌমীশিংদা ভারত ব্রান্দকী অহোঙবা মমলগী হার শোয়দনা ফংহন্নবগীদমক পায়খৎপা স্কীম, প্রধান মন্ত্রী ভারতিয় জন উর্বারক পরিয়োজনা – ৱন নেসন ৱন ফর্তিলাইজরসু হৌদোক্লি হায়নসু প্রধান মন্ত্রীনা হায়খি‍।

শুবা নোম্বা কনবা লৌমীশিংদা চাউনা কান্নহনগদবা খোঙথাঙশিংগী মরমদা পল্লদুনা, প্রধান মন্ত্রীনা ভারত অসি নেনো য়ুরিয়া মহী পুথোকপদা মশানা মপুং ফাজবা ফীভমগী মায়কৈদা খোঙজেল য়াঙনা চঙশিল্লি হায়বা ৱাফম থমখি‍। “নেনো য়ুরিয়া অসি শেঞ্জং হন্থরগা পোত্থোক হেন্না পুথোক্নবগী পাম্বৈ অমনি”, হায়না শ্রী মোদীনা ফোঙদোকখি‍। মসিগী কান্নবশিং পল্লদুনা, য়ুরিয়া বোরা অমগী মহুৎ নেনো য়ুরিয়া বোত্তল অমখক্না শিনবা য়ারগনি হায়না প্রধান মন্ত্রীনা হায়খি‍। মসিনা য়ুরিয়া পুথোক পুশিন তৌবগী মমল মশক থোক্না হন্থহল্লগনি হায়না মহাক্না মখা তাখি‍।

প্রধান মন্ত্রীনা ভারতকী য়ুরিয়া রিফোর্ম স্তোরীদা পুরক্লিবা অনৌবা থৌরাং অনিগী মরমদা পনখি‍। অহানবদা, লৈবাক শিনবা থুংনা প্রধান মন্ত্রী কিসান সম্রুদ্ধী কেন্দ্র হায়না মিংথোনবা হারগী দুকান লাখ ৩.২৫ হাংদোক্নবা থৌরাং অমগী কেম্পেন ঙসি হৌদোক্লি‍। মসি লৌমীশিংনা হার অমসুং মরূ লৈবদা নত্তনা লৈহাউ চাংয়েং তৌবা অমদি লৌউ পথাপশিংগী কান্নরবা ঈ-পাউশিং লৌফমসু ওইগনি‍। অনিসুবদা, ৱন নেসন, ৱন ফর্তিলাইজরগা লোয়ননা, হারগী ফবা ফত্তবগী চাং অমসুং ফংবা ফংদবগী ফীভমগী মরমদা লৌমীশিংদা লৈরম্বা চমম্নবা পুম্নমক কোকহল্লগনি‍। “হৌজিক্তি লৈবাক পুম্বদা য়োল্লিবা য়ুরিয়া অসি মমিং চপ মান্নরগনি, ব্রান্দ চপ মান্নরগনি অমদি ক্বালিতী চপ মান্নরগনি, অদুগা হায়রিবা ব্রান্দ অসিনা ভারত ওইরগনি‍। হৌজিক্তি লৈবাক পুম্বদা য়ুরিয়া অসি ভারত ব্রান্দ খক্তদা ফংলগনি”, হায়না শ্রী মোদীনা ফোঙদোকখি‍। মসিনা য়ুরিয়াগী মমল হন্থহন্দুনা ফংবগী চাং হেনগৎহল্লগনি হায়না মহাক্না মখা তাখি‍।

থৌরমদুদা ৱা ঙাঙলদুনা, কেমিকেল অমসুং ফর্তিলাইজরগী কেন্দ্র মন্ত্রী দোক্তর মনসুখ মন্দাবিয়ানা থৌরমসিদা পি.এম.না শরুক য়ারিবসিদা মহাক্না লৌমীশিংগীদমক্তা লেপ্লিবা খোঙফমগী মমি তারি হায়না ফোঙদোকখি‍। পি.এম.গী লুচিং মখাদা অনৌবা থৌরাংশিং পায়খৎলি হায়নসু মহাক্না হায়খি‍। পি.এম.না মতম পুম্নমক্তা লৌউ-শিংউগী লমদা ‘মীৎয়েঙ চোইদনা’ থবক পায়খৎলি অমদি লৈঙাক্না লৌমীশিংগী মপাঙ্গল কনখৎহন্নবা থৌরাং কয়া পায়খৎখ্রে হায়না মহাক্না ফোঙদোকখি‍। লৌউ-শিংউদা অনৌবা তেক্নোলোজী শীজিন্নবা ওইরবসু, ‘স্মার্ত তেক্নোলোজী’ শীজিন্ননবা পুক্নিং থৌগৎপা নৎত্রগা লৌমীশিংগী পোত্থোক্কীদমক হেন্না ফবা কৈথেল ফংহনবদা ওইরবসু, পি.এম.গী লুচিং মখাদা মায় পাকপা কয়া ফংবা ঙম্লে হায়না কেন্দ্র মন্ত্রীনা মখা তারদুনা ফোঙদোকখি‍।

লৌউ-শিংউগী লমদা থিজিন হুমজিনবদসু পুক্নিং থৌগৎলি অমদি মসিনা মরম ওইরগা, নেনো য়ুরিয়া কম্মর্সিএল ওইনা পুথোকপদা মালেমগী মনুংদা ভারতনা অহানবা লৈবাক ওইরে হায়না দোক্তর মনসুখ মন্দাবিয়ানা মখা তাখি‍। কিসান সমৃদ্ধী কেন্দ্র ৬০০ অসিনা লৌমীশিংবু হীরম কয়াদা মপাঙ্গল কনখৎহল্লগনি হায়না মন্ত্রীনা হায়খি‍।

প্রধান মন্ত্রী কিসান সম্রুদ্ধী কেন্দ্র (পি.এম.কে.এস.কে.)শিং অসিনা লৈবাকসিগী লৌমীশিংগী মথৌ তাবশিং ফংহল্লগনি অমদি লৈহাউ চাংয়েং তৌবা, মরূ অমসুং হার য়াওনা এগ্রি-ইনপুৎশিং (হার, মরূ, মচাক মথুম) ফংহনগনি হায়নসু মন্ত্রীনা পাউদমখি‍। হায়রিবা কেন্দ্রশিং অসিনা লৌমীশিংদা এৱ্যারনেস পীবদসু মতেং পাংগনি‍।

বেকগ্রাউন্দ

থৌরম অসিদা লৈবাক্কী মফম পুম্নমক্তগী লৌমী ১৩,৫০০ হেনবা অমসুং এগ্রি স্তার্তঅপ ১৫০০ রোমনা শরুক য়ারি‍। তোঙান তোঙানবা ইন্সতিত্যুৎশিংদগী লৌমী করোর অমা হেনবনা থৌরম অসিদা ভর্চুএল ওইনা শরুক য়ারি। মীফম অসিদা থিজিল্লোয়, খুজিন থৌরাং য়াৎপা মীওই অমদি অতৈ স্তেকহোল্দরশিংসু শরুক য়ারি‍।

প্রধান মন্ত্রীনা কেমিকেল অমসুং ফর্তিলাইজর মন্ত্রালয়গী মখাদা প্রধান মন্ত্রী কিসান সম্রুধী কেন্দ্র (পি.এম.কে.এস.কে.) ৬০০ শঙ্গাখ্রে। স্কীক অসিগী মখাদা লৈবাকসিদা লৈরিবা হারগী রিতেল দুকানশিং তাঙ্কক নাইনা পি.এম.কে.এস.কে. ওন্থোক্কদৌরি‍। পি.এম.কে.এস.কে.শিংনা লৌমীশিংগী মখল মথেল কয়াগী মথৌ তাবশিং অমদি এগ্রী ইনপুৎশিং (হার, মরূ, মচাক মথুম) ফংহনগনি; লৌমীশিংগী মরক্তা এৱ্যারনেস পীগনি; তোঙান তোঙানবা লৈঙাক্কী স্কীমশিংগী মরমদা ঈ-পাউ ফংহনগনি অমদি ব্লোক/দিস্ত্রিক্ত থাক্কী আউৎলেৎশিংদা লৈরিবা রিতেলরশিংগী কেপাসিতী বিল্দিংগী থৌরম চাং নাইনা পাঙথোক্কনি‍। হারগী রিতেল দুকান লাখ ৩.৩ হেনববু পি.এম.কে.এস.কে. ওন্থোক্নবা থৌরাং তৌরি‍।

প্রধান মন্ত্রীনা ভারত জন উর্বারক পরিয়োজনা – ৱন নেসন ৱন ফর্তিলাইজরসু হৌদোকখি‍। স্কীম অসিগী মখাদা, প্রধান মন্ত্রীনা, কম্পেনীশিংবু “ভারত” হায়বা ব্রান্দ মমিং অমখক্কী মখাদা হার পুথোক্তুনা য়োনবদা মতেং ওইগদবা, ভারত য়ুরিয়া বেগ হৌদোকখি‍।

****



(Release ID: 1868529) Visitor Counter : 134