ভারত লৈঙাক্কী মাইক্রো, স্মোল এন্দ মেদিয়ম এন্তরপ্রাইজেজ (এম.এস.এম.ই.) মন্ত্রালয়না ওক্তোবর ১৫, ২০২২দা মন্ত্রালয়গী এন.এস.এস.ঐচ. স্কীম অমসুং অতৈ স্কীমশিংগী মরমদা খঙহন্নবা অমদি ওন্ত্রপ্রিন্যুরসিপ কলচর য়োকখৎনবগীদমক মীজোরমগী আইজোলদা লৈবা দোরপুই মল্তিপর্পজ সেন্তরদা নেস্নেল এস.সি.-এস.তি. হব (এন.এস.এস.ঐচ.) কনক্লেব পাঙথোকখ্র‍ে‍।অতৈ মীথুংশিংগা লোয়ননা মিজোরম লৈঙাক্কী দিপার্তমেন্ত ওফ কম্মর্স এন্দ ইন্দস্ত্রীগী প্রিন্সিপাল সেক্রেতরী মিস এস্থর লালরুয়তকিমিনা শরুক য়াখিবা থৌরমদুদা মিজোরম লৈঙাক্কী ইকায়খুম্নরবা হকশেল অমসুং য়াইফ-য়ুম্বাল, হাইয়র এন্দ তেক্নিকেল এজুকেসন, কম্মর্স অমসুং ইন্দস্ত্রীগী মন্ত্রী দোক্তর আর. লালথংলিয়ানানা অথোয়বা মীথুং ওইনা শরুক য়াখি‍। থৌরম অদুদা এস.সি.-এস.তি. ওন্ত্রপ্রিন্যুর ৩০০ হেনবনা শরুক য়াখি‍।

ভারত লৈঙাক্কী এম.এস.এম.ই. মন্ত্রালয়গী জোইন্ত সেক্রেতরী মিস মর্সী ইপাউনা থৌরমদুদা শরুক য়াখিবা মীথুংশিংবু তরাম্না ওকখি‍। পুম্নমক্কী চাওখৎনবগীদমক এম.এস.এম.ই. মন্ত্রালয়না নেস্নেল এস.সি.-এস.তি. হব স্কীম অসি এস.সি./এস.তি. ওন্ত্রপ্রিন্যুরশিংগী ইকোসিস্তেম অমা শেমগৎনবা অমদি পব্লিক প্রোকরমেন্ত পোলিসীদা পীরিবা পব্লিক প্রোকরমেন্তকী চাং ৪% য়ৌহন্নবগীদমক মখোয়বু শরুক য়াহনবদা খুৎশম্ননা পুননবগী পান্দমদা পায়খৎলি হায়না মহাক্না হায়খি‍। তরাম্না ওকপগী ৱারোল মতুংদা ভারত লৈঙাক্কী এম.এস.এম.ই. মন্ত্রালয়গী সেক্রেতরী শ্রী বি.বি. স্বাইন্না মরুওইবা ৱারোল থমখি‍। মহাক্কী ৱারোলদা, শ্রী স্বাইন্না এম.এস.এম.ই.শিংগী কেপাসিতী হেনগৎহন্নবা অমদি মখোয়বু য়োকখৎনবা অমদি ভারত্তা ওন্ত্রপ্রিন্যুরসিপ কলচর য়োকখৎনবগীদমক পুম্নমক কোনশিন্দুনা পায়খৎলিবা থৌরাংশিংগী মরমদা মচা খায়না ফোঙদোকখি‍।

অথোইবা মীথুং দোক্তর লালথংলিয়ানানা এন.এস.এস.ঐচ. স্কীমগী বিনিফিসরীশিংবু তারম্না ওক্তুনা অমদি থৌরমদুদা শরুক য়ারিবা মচিন তুমখৎলক্লিবা ওন্ত্রপ্রিন্যুরশিংগী পুক্নিং থৌগৎখি‍। থৌরমদুদা ৱা ঙাঙলদুনা, দোক্তর লালথংলিয়ানানা, “মিজোরমগী এস.সি.-এসোতি. ওন্ত্রপ্রিন্যুরশিংনা এন.এস.এস.ঐচ. অমসুং মন্ত্রালয়না পায়খৎলিবা অতৈ স্কীমশিংগী কান্নবা লৌবা উবদা নুংঙাইবা ফাওই,” হায়না ফোঙদোকখি‍। শরুক য়ারিবশিংবু কনক্লেব অসিদা শরুক য়ারিবা তোঙান তোঙানবা লূপশিংগী মীহুৎশিংগা ৱারী ৱাতায় শাননবা অমদি মখোয়দগী লৌবা য়াবা কান্নবা অমদি খুদোংচাবশিংগী মরমদা খন্ননবা ৱাফম মহাক্না থমখি‍। স্তেত অসিদা এম.এস.এম.ই সেক্তর চাওখৎপগী থাক ৱাংখৎহন্নবা স্তেত লৈঙাক্না ভারত লৈঙাক্কী এম.এস.এম.ই. মন্ত্রালয়গা খুৎশম্ননা চৎমিন্নবা মথৌ তাই হায়বা ৱাফমসু মহাক্না থমখি‍।

থৌরম অদুনা হান্না লৈরবা অমদি নৌনা থবক পায়খৎনিংলিবা এস.সি.-এস.তি. ওন্ত্রপ্রিন্যুরশিংগী মফমদা সি.পি.এস.ই.শিং, লেন্দিং ইন্সতিত্যুসনশিং, জি.ই.এম., আর.সেতিনচিংবশিংগা ৱারী ৱাতায় শাননবা ইন্তরেক্তিব ওইবা ফম্পাক অমা পীরি‍। থৌরমদুদা ফুদ কোর্পোরেসন ওফ ইন্দিয়া, পৱার গ্রীদ কোর্পোরেসন লিমিতেদ, নোর্থ ইস্তর্ন ইলেক্ত্রিক পৱার কোর্পোরেসন লিমিতেদনচিংবা সি.পি.এস.ই.শিংনা শরুক য়ারদুনা মখোয়গী ভেন্দর ইম্পেনেল তৌবগী থৌওং অমসুং লৌগদবা পোত্থোক/সর্ভিসশিংগী মচা খায়বা ৱাফমশিংগী মরমদা প্রজেন্তেসন উৎখি‍। থৌরম অদুদা য়ুকো বেঙ্ক, স্তেত বেঙ্ক ওফ ইন্দিয়া, নোর্থ ইস্তর্ন দিভেলপমেন্ত ফাইনান্স কোর্পোরেসন (নেদফি)নচিংবা শেলথুমগী ইন্সতিত্যুসনশিংনা এম.এস.এম.ই. সেক্তরদা লৈরিবা শেল পুথোক্নবগী তোঙান তোঙানবা স্কীমশিংগী মরমদা মচা খায়না পাউদমখি‍। জি.ই.এম. আর.সেতিনচিংবা লৈঙাক্কী লূপ অতৈসু থৌরমদুদা শরুক য়াখি অমদি এম.এস.এম.ই.শিংবু তেংবাংনবগীদমক মখোয়গী তোঙান তোঙানবা স্কীমশিংগী মরমদা পাউদমখি‍। থৌরম অদুদা উদ্যম রেজিস্ত্রেসন তৌনবগী অমসুং জি.ই.এম.গী ফেসলিতেসন দেস্কশিং থমদুনা মফমদুমক্তদা শরুক য়ারিবা এস.সি./এস.তি. এম.এস.ই.শিংগী রেজিস্ত্রেসনগী থবক থৌরম তৌবা য়াহনখি‍।

এম.এস.এম.ই. সেক্তরবু মখোঙ শোম্বিবা অসি লৈবাকসিগী শেন্মিৎলোন মশা ফনা থম্নবগী মরুওইবা ৱাফম অমনি‍। তুং কোইনা চৎননবা অমদি মালেমগী ভেল্যু চেন্দা চুনবা ফীভম পুরক্নবগীদমক লৈঙাক্না এম.এস.এম.ই.শিং মপাঙ্গল কনখৎহন্নবা লেপ্পা লৈতনা হোৎনরি‍। অসিগুম্বা মখলগী স্তেতকী থাক্তা পাঙথোকপা কনক্লেবশিংনা এস.সি./এস.তি. এম.এস.এম.ই.শিংবু লৈঙাক্না পীরিবা তোঙান তোঙানবা মতেংশিংগী মরমদা খঙহনবগা লোয়ননা অনৌবা ৱাখল্লোনশিং লৌশিন্দুনা মখোয়গী মঙম পাকথোক চাউথোকহনবদা মতেং পাংলি‍।

*********