প্রধানমন্ত্রীগী লোইশঙ
পি.এম.না ওক্তোবর ৯-১১ ফাওবা গুজরাত্তা চৎকনি
পি.এম.না ওক্তোবর ১১দা উজেন্দা চত্তুনা শ্রী মহাকাল লোক মীয়ামদা কত্থোক্কদৌরি
পি.এম.না গুজরাত্তা লুপা করোর ১৪,৫০০গী ওইগদবা প্রোজেক্তশিং মীয়ামদা কত্থোক্কদৌরি অমদি উরেপ উয়ুং তমগদৌরি
পি.এম.না মোধেরাবু ভারতকী অহানবা পুং ২৪ চুপ্না সোলার পৱারনা চলাইবা খুঙ্গঙ ওইনা লাউথোক্কদৌরি; মেহসানাদা লুপা করোর ৩৯০০ হেনবগী প্রোজেক্তশিং মীয়ামদা কত্থোক্কদৌরি অমদি উরেপ উয়ুং তমগদৌরি
পি.এম.না মোধেস্বরী মাতা লাইশঙদা দর্শন অমসুং পুজা পাঙথোক্কনি অমদি মেহসানাদা লৈবা সন তেম্পলদা চৎকনি
পি.এম.না ভারুচতা কেমিকেল অমসুং ফার্মাসিউতিকেল সেক্তরদা মীৎয়েঙ থম্লিবা লুপা করোর ৮০০০ হেনবগী প্রোজেক্তশিং মীয়ামদা কত্থোক্কনি অমদি উরেপ উয়ুং তমগনি
পি.এম.না অহমদবাদতা লুপা করোর ১৩০০গী ওইগদবা হেল্থকেয়র ফেসিলিতীশিং মীয়ামদা কত্থোক্কনি অমদি উরেপ উয়ুং তমগনি; মোদী সৈখসনিক সঙ্কুলকী অহানবা তাঙ্ককসু শঙ্গাগনি
জানগরদা লুপা করোর ১৪৬০গী ওইগদবা ঈথৈ লৌখোং, মৈ, ৱাতর সপ্লাই অমসুং অর্বান ইনফ্রাস্ত্রকচরগা মরী লৈনবা প্রোজেক্তশিং মীয়ামদা কত্থোক্কনি অমদি উরেপ উয়ুং তমগনি
Posted On:
08 OCT 2022 12:04PM by PIB Imphal
প্রধান মন্ত্রী শ্রী নরেন্দ্র মোদীনা ওক্তোবর ৯দগী ১১ ফাওবা গুজরাত্তা চৎকনি, মদুগী মতুংদা ওক্তোবর ১১দা মধ্য প্রদেশ চৎকনি।
ওক্তোবর ৯গী অয়ুক পুং ৫:৩০ তাবা মতমদা, প্রধান মন্ত্রীনা মেহসানাগী মেধোরাদা য়াম্লবা প্রোজেক্তশিং শঙ্গাগনি অমদি উরেপ উয়ুং তমগনি। তুংদা নুমিদাংৱাইরম পুং ৬:৪৫ তাবা মতমদা মোধেস্বরী মাতা লাইশঙদা দর্শন অমসুং পুজা পাঙথোক্কনি, মদুগী তুংদা পুং ৭:৩০ তাবা মতমদা সুর্য়া মন্দীরদা চৎকনি।
ওক্তোবর ১০গী অয়ুক পুং ১১ তাবা মতমদা প্রধান মন্ত্রীনা ভারুচকী অমোদতা তোঙান তোঙানবা প্রোজেক্তশিং লৈবাক মীয়ামদা কত্থোক্কনি অমদি উরেপ উয়ুং তমগনি। নুংথিল পুং ৩:১৫রোম তারকপা মতমদা, প্রধান মন্ত্রীনা অহমদবাদতা মোদী সৈকশনিক সঙ্গুল শঙ্গাগনি। তুংদা নুমিদাংৱাইরম পুং ৫:৩০ তাবা মতমদা প্রধান মন্ত্রীনা জামনগরদা প্রোজেক্ত কয়ামরুম মীয়ামদা কত্থোক্কনি অমদি উরেপ উয়ুং তমগনি।
ওক্তোবর ১১গী নুংথিল পুং ২:১৫ তাবদা, প্রধান মন্ত্রীনা অহমদবাদকী সিভিল হোস্পিতাল অসর্ৱাদা প্রোজেক্ত কয়া মীয়ামদা কত্থোক্কনি অমদি উরেপ উয়ুং তমগনি, মদুগী তুংদা মহাক্না উজেন্দা লৈবা শ্রী মহাকালেস্বর লাইশঙদা চত্তুনা মফমদুদা নুমিদাংৱাইরম পুং ৫:৪৫রোম তারকপা মতমদা দর্শন অমসুং পুজা পাঙথোক্কনি। মদুগী তুংদা নুমিদাংৱাইরম পুং ৬:৩০রোম তাবদা শ্রী মহাকাল লোক মীয়ামদা কত্থোক্কনি, অদুগা পুং ৭:১৫ তাবদা উজেন্দা মীয়ামগী মীফম অমা শরুক য়াগনি।
মেহসানাদা পি.এম.
প্রধান মন্ত্রীনা মেহসানাগী মোধেরাদা মীয়ামগী মীফম অমা শরুক য়াদুনা লুপা করোর ৩৯০০ হেনবগী প্রোজেক্তশিং লৈবাক মীয়ামদা কত্থোক্কনি অমদি উরেপ উয়ুং তমগনি।
প্রধান মন্ত্রীনা মোধেরা খুঙ্গঙবু পুং ২৪ চুপ্না সোলার পৱারনা চলাইবা খুল ওইনা লাউথোক্কনি; অসিগুম্বা মখলগী অহানবা ওইরিবা ক্রোজেক্ত অসিনা মোধেরা হায়রিবা সন-তেম্পলগী তাউন অসিদা সোলার পৱারনা চলাইবগী মঙলান অদু মঙফাওনহল্লি। মসিদা লৈমায়দা খিনবা সোলার পৱার প্লান্ত অমসুং লনাই মীওইশিংগী য়ুমথক অমদি লৈঙাক্কী ওফিসকী য়ুমথক্তা রুফতোপ সোলার সিস্তেম ১৩০০ হেন্না খিন্দুনা বেত্তরী ইনর্জী স্তোরেজ সিস্তেম (বি.ই.এস.এস.ৱ অমদা পুল্লপ পুনশিল্লি। প্রোজেক্ত অসিনা ভারতকী রিনিউএবল ইনর্জীগী মতিংনা কমদৌনা গ্রাসরুত্তা মীয়ামবু মপাঙ্গল কলহনবগে হায়বদু উৎলি।
প্রধান মন্ত্রীনা লৈবাক মীয়ামদা কত্থোক্কদৌরিবা প্রোজেক্তশিংদি অহমদবাদ-মেহসানা গেজ কন্ভর্জন প্রোজেক্তকী সাবরমতি-জগুদান শরুক্কী গেজ কন্ভর্জন; ও.এন.জি.সি.গী নন্দসন জিওলোজিকেল ওইল প্রদক্সন প্রোজেক্ত; খেরাবাদগী সিঙ্গোদা পাৎ ফাওবগী সুজলাম সুফলান কেনেল; থরোই দামদা য়ুম্ফম ওইবা বরনগর খেরালু অমসুং ধরোই গ্রুপ রিফোর্ম স্কীম; বেচ্রাজী মোধেরা-চনস্মা স্তেত হায়ৱেগী শরুক অমা ফোর লেন্দা ওনখৎপগী প্রোজেক্ত; উঞ্জা-দসাজ উপেরা লাদোল (ভনখর এপ্রোচ রোদ)গী শরুক অমা পাকথোকপগী প্রোজেক্ত; রিজনেল ত্রেনিং সেন্তর, সরদার পতেল ইন্সতিত্যুৎ ওফ পব্লিক এদমিনিস্ত্রেসন (এস.পি.আই.পি.এ.), মেহসানাগী অনৌবা বিল্দীং; অমসুং মোধেরাগী সন তেম্পলগী প্রোজেক্সন মেপিং অমদি অতৈ অতৈ য়াওরি।
প্রধান মন্ত্রীনা উরেপ উয়ুং তমগদৌরিব প্রোজেক্তশিংদি এন.ঐচ.-৬৮গী পতনদগী গোজারিয়া ফাওবগী শরুক লেন মরিদা ওনখৎপা; মেহসানা দিস্ত্রিক্তকী জোতানা তালুকাদা লৈবা চালাসন খঙ্গঙদা শেমগৎকদবা ৱাতর ত্রীতমেন্ত প্লান্ত; দুধসাগর দেরীদা অনৌবা ওতোমেতেদ মিল্ক পাউদর প্লান্ত অমসুং য়ু.ঐচ.তি. মিল্ক কার্তোন প্লান্ত; জেনেরেল হোস্পিতাল মেহসানাগী রিদিভেলপমেন্ত অমসুং রিকন্সত্রক্সন; অমসুং মেহসানা অমসুং অৱাং গুজরাৎকী অতৈ দিস্ত্রিক্তশিংগী রিভেম্প দিস্ত্রিব্যুসন সেক্তর স্কীম অমসুং অতৈ অতৈ য়াওরি।
মীয়ামগী মীফম মতুংদা, প্রধান মন্ত্রীনা মোধেস্বরী মাতা লাইশঙদা দর্শন অমসুং পুজা পাঙথোক্কনি। মহাক্না সন তেম্পলদসু চত্তুনা ফজরবা প্রোজেক্সন মেপিং সো অমা মীৎয়েঙ তাগনি।
ভারুচতা পি.এম.
প্রধান মন্ত্রীনা ভারুচকী অমোদতা লুপা করোর ৮০০০ হেনবগী প্রোজেক্তশিং লৈবাক মীয়ামদা কত্থোক্কনি অমদি উরেপ উয়ুং তমগনি।
ভারতপু ফার্মাসিউতিকেল সেক্তরদা মরোমদোম লেপচবা ঙম্বা লৈবাক অমা ওইহন্নবগী অতোপ্পা খোঙথাং অমদা, প্রধান মন্ত্রীনা জাম্বুসরদা বল্ক দ্রগ পার্ক অমগী উরেপ উয়ুং তমগনি। ২০২১-২২দা বল্ক দ্রগ পুশিল্লকপনা অপুনবা ফার্মাসিউতিকেল ইম্পোর্তকী ৬০% হেনখি। প্রোজেক্ত অসিনা ইম্পোর্তকী মহুৎ শিনবদা অমদি ভারতবু বল্ক দ্রগকী মতাঙদা মরোমদোম লেপচবা ঙম্বা লৈবাক অমা ওইহনবদা মরুওইবা শক্লোন লৌগনি। প্রধান মন্ত্রীনা ইন্তস্ত্রিএল এস্তেতশিংদগী শেংদোক্লবা ফত্তবা ঈশিং থাদোকখিনবগী দীপ সী পাইপলাইন প্রোজেক্ত দহেজতা উরেপ উয়ুং তমগনি। প্রধান মন্ত্রীনা উরেপ উয়ুং তমগদবা অতোপ্পা প্রোজেক্তশিংগী মনুংদা অঙ্ক্লেস্বর এয়রপোর্তকী অহানবা তাঙ্কক অমসুং এম.এস.এম.ই. সেক্তরদা ইনোৎ হাপকদবা অঙ্গক্লেস্বর অমসুং পনোলিদা শেমগৎকদবা মর্তিলেভেল ইন্দস্ত্রিএল সেদশিং য়াওরি।
প্রধান মন্ত্রীনা য়াম্লবা ইন্দস্ত্রিএল পার্কশিং শেমগৎপগী অচৌবা থৌরম অমা পাঙথোক্কনি। মসিদা ভালিয়া (ভারুচ), অমিরগর (বনস্কন্থ), চাকালিয়া (দহোর) অমসুং ভনর (ছোতা উদয়পুর)দা শেমগৎকদবা ত্রাইবেল ইন্দস্ত্রিএল পার্ক মরি; মুদেথা (মনস্কন্থ)দা শেমগৎকদবা এগ্রো ফুদ পার্ক; কক্বারী দান্তী (ভলসদ)তা শেমগৎকদবা সী ফুদ পার্ক; অমসুং খন্দিবাব (মাহিসাগর)দা শেমগৎকদবা এম.এস.এম.ই. পার্ক য়াওরি।
থৌরম অদুদা, প্রধান মন্ত্রীনা কেমিকেল সেক্তরদা ইনোৎ হাপকদবা প্রোজেক্ত কয়ামরুম মীয়ামদা কত্থোক্কনি। মহাক্না দহেজতা মেগাৱাৎ ১৩০গী কোজেনেরেসন পৱার প্লান্তগা পুনবা ৮০০ তি.পি.দি. কোস্তিক সোদা প্লান্ত অমা মীয়ামদা কত্থোক্কনি। মসিগা লোয়ননা, মহাক্না দহেজতা লৈবা কেপাসিতী নোংমদা এম.তি. ৭৮৫ ওইরম্বদগী নোংমদা এম.তি. ১৩১০দা হেনগৎহল্লবা হান্নদগী লৈরিবা কোস্তিক সোদা প্লান্তগী চাউথোরকপা শরুকসু মীয়ামদা কত্থোক্কনি। প্রধান মন্ত্রীনা দহেজতা ক্লোরোমিথেন চহিদা এম.তি. লাখ অমা পুথোক্কদবা প্রোজেক্ত অমসু মীয়ামদা কত্থোক্কনি। প্রধান মন্ত্রীনা মীয়ামদা কত্থোক্কদবা অতোপ্পা প্রোজেক্তশিংদি মপান্দগী পুশিল্লকপা পোৎলমগী মহুৎ শিনগদবা দহেজতা শেমগৎপা হাইদ্রেজাইন হাইদ্রেৎ প্লান্ত, আই.ও.সি.এল. দহেজ-মোয়লী পাইপলাইন প্রোজেক্ত, ভারুচ অন্দরগ্রাউন্দ দ্রেনেজ অমসুং উম্লা অসা পনেথা লম্বীগী এস.তি.পি. ৱর্ক অমসুং লম্বী পাকথোকপা অমদি মপাঙ্গল কনখৎহনবা য়াওরি।
অহমদবাদতা পি.এম.
ওক্তোবর ১০দা, প্রধান মন্ত্রীনা ফীভম চাদ্রবা মহৈরোয়শিংগী মহৈ মশিংগী ওইবা কম্প্লেক্স অমা ওইরিবা মোদী সৈকশনিক সঙ্কুলগী ফেজ ১ শঙ্গাগনি। প্রোজেক্ত অসিনা মহৈরোয়শিংদা মায়কৈ শুনা চাওখৎপা পুরক্নবগী মথৌ তাবা খুদোংচাবশিং ফংহনবদা মতেং ওইগনি।
ওক্তোবর ১১দা, প্রধান মন্ত্রীনা অহমদাবাদকী সিভিল হোস্পিতাল অসর্ৱাদা লুপা করোর ১৩০০লোমগী তোঙান তোঙানবা হেল্থকেয়র ফেসিলিতীশিং মীয়ামদা কত্থোক্কনি অমদি উরেপ উয়ুং তমগনি। মসিদা য়ু.এন. মেহতা ইন্সতিত্যুৎ ওফ কার্দিওলোজী এন্দ রিছর্চ সেন্তরগী অনৌবা অমদি হেন্ন ফগৎলবা কার্দিয়াক কেয়রগী ফেসিলিতীশিং অমসুং অনৌবা হোস্তেল বিল্দীং অমা; ইন্সতিত্যুৎ ওফ কিদ্নী দিজীজেজ এন্দ রিছর্চ সেন্তরগী অনৌবা হোস্পিতাল বিল্দীং; গুজরাৎ কেন্সর এন্দ রিছর্চ ইন্সতিত্যুৎকী অনৌবা বিল্দীং য়াওরি। প্রধান মন্ত্রীনা লায়রবা অনাবশিংগী ইমুং মনুংদা লৈফম চাফম পীননবা সেল্তর হোমগী উরেপ উয়ুংসু তমগনি।
জামনগরদা পি.এম.
প্রধান মন্ত্রীনা জামনগরদা লুপা করোর ১৪৬০ হেনবগী প্রোজেক্তশিং লৈবাক মীয়ামদা কত্থোক্কনি অমদি উরেপ উয়ুং তমগনি। প্রোজেক্তশিং অসি ঈথৈ লৌখোং, মৈ, ৱাতর সপ্লাই অমসুং অর্বান ইনফ্রাস্ত্রকচরগা মরী লৈনবা ঙাক্তনি।
প্রধান মন্ত্রীনা সৌরাস্ত্র অবতরন ইরিগেসন (সৌনি) য়োজনা লিঙ্ক ৩ (উন্দ দামদঈ সোন্মতি দাম ফাওবা)গী পেকেজ ৭, সৌনি য়োজনা লিঙ্ক ১ (উন্দ-১ দামদগী সনি দাম ফাওবা)গী পেকেজ ৫ অমসুং হরিপার ৪০ মেগাৱাৎ সোলর পি.ভি. প্রোজেক্ত লৈবাক মীয়ামদা কত্থোক্কনি।
প্রধান মন্ত্রীনা উরেপ উয়ুং তমগদবা প্রোজেক্তশিংদি কালাবার, জামনগর তালুকাগী কালাবার গ্রুপ ওগমেন্তেসন ৱাতর সপ্লাই স্কীম, মোর্বী-মালিয়া-জোরিয়া গ্রুপ ওগমেন্তেসন ৱাতর সপ্লাই স্কীম, লালপুর বাইপাস জংসন ফ্লাইওভর থোং, হাপা মার্কেৎ য়ার্দ রেলৱে ক্রোসিং, অমসুং সিৱর কল্লেক্সন পাইপলাইন অমসুং পম্পিং স্তেসন নৌনা শেমজিনবা য়াওরি।
উজেন্দা পি.এম.
প্রধান মন্ত্রীনা শ্রী মহাকাল লোক লৈবাক মীয়ামদা কত্থোক্কনি। মহাকাল লোক প্রোজেক্তকী ফেজ ১না লাইশঙ অসিদা লাই খুরুম্বা লাক্লিবা মীওইশিংদা মালেমগী থাক্কী এমেনিতীশিং ফংহন্দুনা মখোয়গী এক্সপরিএন্স হেনগৎহনবদা মতেং ওইগনি। প্রোজেক্ত অসিনা মফম অসিদা মী চিন্বা হন্থহন্নবা অমসুং হেরিতেজ স্ত্রকচরশিংবু ঙাক শেন্দুনা থম্নবা অমদি হান্নগী ফিভমদা হঞ্জিলহন্নবা থৌরাংদা অখন্নবা মীৎয়েঙ থম্লি। প্রোজেক্ত অসিগী মখাদা, লাইশঙ মনুং অসি হান্নদগী শরুক তরেৎকী ময়াদা চাউথোক্লগনি। প্রোজেক্ত অসিগী অপুনবা শেন্ফম লুপা করোর ৮৫০গী ময়াদা ওইগনি। হৌজিক লাইশঙ অসিদা চহিদা মীওই করোর ১.৫রোম লাক্লিবা অসি শরুক অনি হেনগৎলক্কনি হায়না পানরি। প্রোজেক্ত অসি তাঙ্কক অনি থোক্না শেমগৎনবা থৌরাং তৌরি।
মহাকাল পথ অসিদা প্রভু সিভগী অনন্দ তান্দব স্বরুপ (জগোয়গী মওং)শিং উৎপা য়ুম্বী ১০৮ য়াওরি। প্রভু সিভগী পুন্সিগী শক্লোন কয়া উৎপা লাইনিংগা মরী লৈনবা নুংদা হকপা শক্তমশিং মহাকাল পথ অসিদা য়াওরি। পথ অসিগী ফক্লাংদা য়েক্লিবশিং অসি লৈশেম্বগী থৌওং, গনেস পোকপা, সতি দক্সগী ৱারীনচিংবা সিভ পুরানাদা য়ুম্ফম ওইবনি। হেক্তর ২.৫ হেন্না পাক চাউবা প্লাজাগী মফম অসি থম্বাল হৌবা ইকোনশিংনা কোয়শিল্লি অমদি ইফুৎশিংগা লোয়ননা সিভগী মীতমশিং খিল্লি। মফম পুম্বসি অর্তিফিসিএল ইন্তলিজেন্স অমসুং সর্ভিলেন্স কেমেরাগী মতেংনা পুং ২৪ চুপ্না ইন্তিগ্রেতেদ কম্মান্দ এন্দ কন্ত্রোল সেন্তরনা য়েংশিন্দুনা লৈগনি।
***
(Release ID: 1866062)
Visitor Counter : 159
Read this release in:
Odia
,
Assamese
,
English
,
Urdu
,
Marathi
,
Hindi
,
Bengali
,
Punjabi
,
Gujarati
,
Tamil
,
Telugu
,
Kannada
,
Malayalam