পর্সোনেল, জেনেরেল এদমিনিস্ত্রেসন অমসুং এদমিনিস্ত্রেতিব রিফোর্ম্স য়েংশিল্লিবা স্তেত/য়ু.তি.শিংগী প্রিন্সিপাল সেক্রেতরীশিংগী চহিগী মীফমদা ৱা ঙাঙলদুনা সেন্ত্রেল দিপ্যুতেসন হায়বসি লৈবাকসিগী ফেদরেল স্ত্রকচরগী শরুক্নি হায়রদুনা মন্ত্রীনা স্তেত লৈঙাকশিংদা হীরম অসিগী মতাঙদা কেন্দ্র লৈঙাক্তা কোওপরেৎ তৌরক্নবা ৱাফম থমখি‍। ওল ইন্দিয়া সর্ভিস ওফিসর হায়বসি স্তেত অমসুং কেন্দ্র লৈঙাক অনিমক্কী মরুওইবা শক্লোন অমনি হায়না মহাক্না হায়খি‍।

ওল ইন্দিয়া সর্ভিসেসকী কেদর মেনেজমেন্তকী চৎনদুনা লৈরিবা স্ত্রকচর অমা লৈরি অমদি মসিবু মওং চুম্না ইনবা মথৌ তাই হায়না দোক্তর জিতেন্দ্র সিংহনা হায়খি‍। ওল ইন্দিয়া সর্ভিস ওফিসরশিং কেন্দ্রদা মথৌ তৌহনবা হায়বসিসু মসিগী মনুং চনবা কাঙলোন অমনি হায়না মন্ত্রীনা মখা তাখি‍।

কেন্দ্র লৈঙাক্না স্তেত/কেন্দ্রদা অৱাংবা থাক্তা থবক তৌহনবা ঙম্নবগীদমক কান্নদ্রবশিং খত্তোকখিনবা এ.আই.এস. (দি.সি.আর.বি.) রুল্স, ১৯৫৮গী রুল ১৬(৩)গী মখাদা পীরকপা সর্ভিস অসিগী মেম্বরশিংগী সর্ভিস রেকোর্দ রিভিউ তৌবগী থবক ইচঙ থৌনা পায়খৎলি হায়না দোক্তর জিতেন্দ্র সিংহনা পাউদমখি‍। দি.ও.পি. এন্দ তি.গী ৱাফম মতুং ইন্না পন্দুনা লৈরিবা সর্ভিস অসিগী মেম্বরশিংগী সর্ভিস রেকোর্দশিংগী রিভিউ পুম্নমক খোঙজেল য়াঙনা লোইশিনবদা স্তেত লৈঙাকশিংনা মতেং পাংলকখিবগীদমক মন্ত্রীনা শিংথাখি

চৎলিবা চহিসিদা, কেন্দ্র লৈঙাক্না সিভিল সর্ভিসেস একজামিনেসনগী খুত্থাঙদা আই.এ.এস. ওফিসর ১৮০ মায় পাক্না এলোৎ তৌখ্রে অমদি ভেকেন্সী ৪৩৪না অথুবা মতমদা স্তেত সর্ভিসশিংদগী লৌশিন্দুনা মেনশিল্লগনি‍। কেন্দ্র লৈঙাক্না মতম মতমগী মতুং ইন্না থোকপা ওল ইন্দিয়া সর্ভিসেস ওফিসরশিংগী ইফেক্তিব সর্ভিস অমসুং ভিজিলেন্স মেনেজমেন্তকা মরী লৈনবা চৎন-পথাপশিং ঙাক্না চৎননবা স্তেত লৈঙাকশিংদা হায়গনি হায়না মন্ত্রীনা ফোঙদোকখি‍।

কোবিদ লাইচৎ মতুংদা, পুম্নমক্কা মরী লৈনবা অমদি ইন্তরেস্তা লৈবা ৱাফমশিং খন্ননবগীদমক পর্সোনেল মেত্তরশিংগী থবক পুরিবা স্তেত সেক্রেতরীশিংগী চহিগী মীফম পাঙথোকপগী চৎনবী হৌজিক চত্থরিবা মীফম অসিনা অমুক হিঙ্গৎহল্লে হায়না দোক্তর জিতেন্দ্র সিংহনা ফোঙদোকখি‍।

ত্রেনিংগী মরমদা, লৈঙাক্কী ওফিসরশিংদগী খ্বাইদগী ফবা মতিং পুথোক্নবগীদমক মখোয়বু মতিক চানা ত্রেন তৌবা মথৌ তাই অমদি কেন্দ্র লৈঙাক্না অসিগুম্বা ওফিসরশিং অসিগী মতিং লৈবা ত্রেনিং মোদ্যুলশিং শেমদুনা থম্লে হায়না দোক্তর জিতেন্দ্র সিংহনা ফোঙদোকখি‍। স্তেত লৈঙাক্কী ওফিসিএলশিংগী, মরুওইনা কত্তিং এদ্জ থাক্তা মথৌ তৌরিবশিংগী মোদ্যুল অমা কেন্দ্র লৈঙাক্না শেম্লে হায়রদুনা স্তেত লৈঙাকশিংদা মসিগী খুদোংচাবা মপুং ফানা লৌনবা ৱাফম থমখি‍।

ওল ইন্দিয়া সর্ভিসেসকী ওফিসরশিংনা ইন্দিয়ন এদমিনিস্ত্রেসনগী য়াঙলেন শরু ওইরি অমদি লৈঙাক্কী পোলিসী প্রোগ্রামশিং মপুং ফানা পায়খত্তুনা অফবা লৈঙাক পুরক্নবগী পান্দমশিং ফংবা ঙম্নবগীদমক ভারত লৈঙাক অমসুং স্তেত লৈঙাকশিংনা পুন্না থবক তৌমিন্নবা মরু ওই হায়না মন্ত্রীনা ফোঙদোকখি‍। দিপার্তমেন্ত অসিগা অতৈ স্তেকহোল্দরশিংগা চাং নাইনা ৱারী ৱাতায় শানবা য়াননবা ফম্পাক অমা মথৌ তাই হায়না মহাক্না হায়খি‍।

ভারত লৈঙাক অমসুং স্তেত লৈঙাকশিংনা লৈবাক অসিদা খ্বাইদগী মশিং য়াম্না থবক পীরি‍। লৈঙাক্কী থবক অমা হায়বসি খুন্নাইগী কাঙলুপ খুদিংগী মীপুম খুদিংমক্কী খ্বাইদগী পাম্নবা থবক্নি‍। মীয়াম্না লৈঙাক্কী থবক পাম্নরিবসি মসিনা পীরিবা খ্বাইদগী ফবা ফেসিলিতীশিং, সেলরী পেকেজ অমসুং জোব সিক্যুরিতীখক্তা নত্তনা থবক খনবগী মওং মতৌ অসি লৌথুপ লৌকোই লৈতবা অমদি মেরিত্তা য়ুম্ফম ওইবা অসিনসুনি‍।

“কেন্দ্র লৈঙাক্না হাঙদুনা লৈরিবা ফমশিং মিসন মোদতা মেনশিন্নবা থৌরাং লৌখৎলে হায়বা পাউ অসি ময়ামদা তমজরি, অমদি স্তেত লৈঙাকশিংনসু চপ মান্নবা থৌরাং লৌখৎলক্কনি হায়না থাজবা থমজরি‍। লৈঙাক্কী থবক অমা ফংবা হায়বসিনা মীপুম খুদিংগী মঙলান ওইরগসু, থবক অদুবু পুকচেল শেংনা কত্থোকপগা লোয়ননা তৌবা অমদি মীয়াম্না থম্লিবা থাজবা থবক ওইনা পাঙথোকপদসু চপ চানা মীৎয়েঙ থমগদবনি, মরুওইনা ঙসিগী লৈরিবা ফীভমসিদা তঙাইফদবনি,” হায়না দোক্তর জিতেন্দ্র সিংহনা হায়খি‍।

দোক্তর জিতেন্দ্র সিংহনা সেক্রেতরী, দি.ও.পি. এন্দ তি. অমদি মহাক্কী কাঙবুবু ৱারী ৱাতায় শানবগী মীফম অসিবু চাং নাইনা পাঙথোকপা থৌরম অমা ওইহন্নবা হোৎনরিবা অসিগীদমক থাগৎখি অমদি দি.ও.পি.তি.না স্তেত লৈঙাকশিংগী মীহুৎশিংগা মখশ তানা ৱারী ৱাতায় শাননবা শিল্লকপদা মহাক্কী মায়কৈদগীসু পাংবা য়াবা মতেং পাংগনি হায়না মখা তাখি‍।

<><><><>