প্রধান মন্ত্রী শ্রী নরেন্দ্র মোদীজিগী সবকো দৱাই, সস্তি দৱাই পান্দমগী মখাদা য়ুনিয়ন হেল্থ মিনিস্ত্রিনা তোঙান-তোঙানবা থবক কয়া পায়খৎলে। মাইকৈ অসিদা, অনা-লাইয়েংগী থবক খুদিংমক্তা মমল হোঙবা মগুন লৈবা হিদাক-লাংথকশিং ফংহনবদা নেসনেল লিস্ত ওফ ইসেন্সিএল মেদিসিন্স(এন এল ই এম)না মরুওইবা থৌদাং অমা লৌরি। মসিনা মগুন লৈবা হিদাকশিং মমল হোঙনা পুথোকপা হেনগৎহনগনি অমসুং লাইয়েংবদা মীয়ামগী আউত-ওফ-পোক্কেৎ-এক্সপেন্দিচর(ও ও পি ই) হন্থহনবা ঙমগনি হায়না নেসনেল লিস্ত ওফ ইসেন্সিএল মেদিসিন্স (এন এল ই এম) ২০২২ হৌদোকপা থৌরমদা য়ুনিয়ন হেল্থ মিনিস্তর দোক্তর মনসুখ মন্দাবিয়ানা ঙসি নিউ দিল্লিদা ফোঙদোকখ্রে।

লিস্ত অসিদা হিদাক ৩৮৪ হাপচিল্লে অমসুং মসিদা অনৌবা হিদাক ৩৪ য়াওরি অমসুং হান্নগী লিস্ততগী হিদাক ২৬ লৌথোক্লে। হিদাক-লাংথকশিং কাংলুপ ২৭ থোক্না খাইদোক্লে।

থৌরম অদুদা য়ুনিয়ন হেল্থ মিনিস্তরনা হায়খি হকশেলগী দরকার ওইবা, কান্নবা, অশোই-অঙাম লৈতবা, মগুন লৈবা অমসুং মমল হোঙবা হিদাক-লাংথকশিং অসি “তঙাইফনা চঙদ্রবা য়াদ্রবা হিদাকশিং” হায়না খঙনৈ। এন.এল,ই.এমগী মরুওইবা পান্দমদি মমল, অশোই-অঙাম লৈতবা অমসুং কান্নবা হায়বা মরুওইবা হিরম অহুম অসিদা য়েংলগা হিদাক-লাংথকশিং মরম চানা শীজিন্নবা হেনগৎহনবনি। মসিনা অনা-লাইয়েংগী খুদোংচাবশিং ফজনা শীজিন্নবা অমসুং বজেত, হিদাক লৈনবগী থৌশিলশিং, হকশেলগী ইন্সুরেন্স, প্রেস্ক্রাইপ তৌবগী হৈনবীশিং হেনগৎহনবা, য়ু.জি/পি.জিগী মেদিকেল ইজুকেসন অমসুং ফার্মাসিউতিকেল পোলিসিশিং শেম্বদা মতেং পাংলি। এন.এল,ই.এমদা অনা-লাইয়েংগী থবকশিংদা য়ুম্ফম ওইরগা হিদাক-লাংথকশিং অসুম্না খাইদোক্লি; পি-প্রাইমারি; এস-সেকেন্দরি অমসুং তি-তর্সিয়ারি।

মহাক্না হায়খি চেকশিন্না খনগৎলবা হিদাকশিংগী লিস্ত অমনা লাইয়েংবা, মমল হোঙবা অমসুং মগুন লৈবা লাইয়েং অমসুং হিদাক-লাংথকশিং ফজনা ফংহনবগী থবকশিং মপুংফানা পাংথোকপা ঙমগনি হায়বা ৱাখল্লোন্দা থবক অসি পাংথোকপনি। এন.এল,ই.এম অসি মতিক চারবা দোকুমেন্ত অমনি অমসুং মসি মীয়ামগী হকশেলগী হোঙলক্লিবা ফিবমশিং অমসুং ফার্মাসিউতিকেলগী লৌশিং হেনগৎলকপগী মতুংইন্না চাং নাইনা হোংদোক-হোংজিন তৌরি। অহানবা ওইনা ১৯৯৬তা এন.এল,ই.এম শেমখি অমসুং মসি ২০০৩, ২০১১ অমসুং ২০১৫দা অহুমলক শেমদোকখ্রে।

য়ুনিয়ন মিনিস্তরনা মখা তানা হায়খি য়ুনিয়ন হেল্থ মিনিস্ত্রিনা ২০১৮দা মনিংতম্বা স্তেন্দিং নেসনেল কম্মিতি ওন মেদিসিন্স(এস এন সি এম) শেমখ্রে। কম্মিতি অসিনা মরীলৈনবশিং অমসুং অখঙ-অহৈশিংগা তান্নরগা এন.এল,ই.এম ২০১৫ অমুক হন্না শেমদোকখি অমসুং মসিগী এন.এল,ই.এম ২০২২গী রিপোর্ত হেল্থ মিনিস্ত্রিদা পীশিনখি। ভারত সরকারনা কম্মিতিগী রিকমেন্দেসনশিং অয়াবা পীখ্রে অমসুং লিস্ত অদু চৎনখ্রে। মরী লৈনবশিংদগী ফংবা সাইন্তিফিক ওইবা ৱাফমশিং অমসুং হাপচিন্নবা/লৌথোক্নবা প্রিন্সিপালদা য়ুম্ফম ওইরগা এন.এল,ই.এম শেম্বগী থবক পায়খৎপনি।

লৈবাক অসিগী মীয়াম মমল হোঙবা অনা-লাইয়েংগী খুদোংচাবশিং ফংহন্নবা এন.এল,ই.এম শেমদোক-শেমজিন তৌবদা শরুক য়াখিবশিং থাগৎলদুনা রাজ্য মন্ত্রী দোক্তর ভারতি প্রভিন পৱারনা হায়খি এন্তিমাইক্রোবিএল রেসিস্তেন্স(এ এম আর)গী মতাংদা মীয়াম ৱাখল তাহনবা অসি ঐখোয়গী সাইন্তিস্তশিং অমসুং মীয়ামগী অনৌবা শিংনবা অমা ওইরি অমসুং এ.এম.আরগী মতাংদা ঐখোয়না খুম্নাই অসি ৱাখল তাহনবা মথৌতারি।

অখঙ-অহৈশিং, উদোগকী মীওইশিং অমসুং সরকারগী থৌশিল শেম্বা অখঙ-অহৈশিংদগী লৌখৎলকপা মরী লৈনবশিংগা ৱা তানরবা মতুংদা অমসুং  মরুওইবা দব্লিউ.ঐচ. ও ই.এম.এল ২০২১ য়েংলবা মতুংদা এন.এল,ই.এম ২০২২ শেমদোকপগী থবক পাংথোকখিবনি।

এন.এল,ই.এমদা হাপচিন্নবা মখাগী তঙাইফদবা অসি ঙাক্লে :

১. ভারতকী মীয়ামগী হকশেলগী খুদোংচাদবা লায়না অমদা কান্নবা ওইগদবনি

২. দ্রগস কন্ত্রোল্লর জেনেরেল ইন্দিয়া(দি সি জি আই)না অয়াবা/লাইসেন্স পীরবা ওইগদবনি

৩. সাইন্তিফিক ওইনা প্রমান লৈরিবা কান্নবা অমসুং অশোই-অঙাম থোক্তবা ওইগদবনি

৪. পুথোকপদা শেন য়াম্না চঙদবা অমসুং কান্নবা ওইগদবনি

৫. হৌজিক চৎনরিবা অনা-লাইয়েংগী নিয়মশিংগা চুশিন্নবা ওইগদবনি

৬. ভারতকী নেসনেল হেল্থ প্রোগ্রামশিংগী মখাদা রিকমেন্দ তৌগদবনি(খুদম; লিম্ফেতি ফিলারিয়াসিস ২০১৮ মুৎথৎনবা থৌরাংদা আইভরমেকতিন শরুক অমা ওইরি)

৭. মান্নবা থেরাপেউতিক ক্লাস, প্রোতোতাইপ অমদা হিদাক অমদগী হেন্না ফংলবদি কাংলুপ অদুদগী খ্বাইদগী ফবা হিদাক লৌখৎকনি।

৮. লাইয়েংবদা লোইবা ফাওবদা চঙবা শেনফম খন্নগনি অমসুং হিদাক অমগী য়ুনিত অমগী মমল খন্নরোই।

৯. ফিক্স দোজ কম্বাইন্নেসন খন্নরোই।

১০. য়ুনিভর্সেল ইম্মুনাইজেসন প্রোগ্রামদা য়াওরবা তিকাশিং

এন.এল,ই.এম ২০২২ মসিদা য়েংবা য়াগনি:

https://cdsco.gov.in/opencms/opencms/system/modules/CDSCO.WEB/elements/download_file_division.jsp?num_id=OTAxMQ==

হৌদোকপা থৌরম অদুদা য়ুনিয়ন হেল্থ সেক্রেতরি শ্রী রাজেস ভুসন, দি.সি.জি.আইগী দোক্তর ভি.জি সোমানি, জোইন্ত সেক্রেতরি দোক্তর মান্দিপ কুমার ভান্দারি, এস.এন.সি.এমগী ভাইস চিয়রমেন দোক্তর ৱাই.কে গুপ্তা অমসুং মিনিস্ত্রিগী অতোপ্পা সেনিয়র ওফিসিএলশিং শরুক য়াখি।

*****