প্রধান মন্ত্রী শ্রী নরেন্দ্র মোদীনা সেপ্তেম্বর ৮, ২০২২গী য়াচঙবা পুং ৭ তাবা মতমদা ‘কর্তব্য পথ’ শঙ্গাগদৌরি‍। মসিনা হান্নগী রাজপথনা পাঙ্গলগী খুদম ওইরম্বদগী কর্তব্য পথনা মীয়াম্না মপু ওইবগী, মপাঙ্গল কলহনবগী খুদম ওইবা মায়কৈদা হোংলকপগী খুদম চাংদম ওইরি‍। থৌরম অদুদা প্রধান মন্ত্রীনা ইন্দিয়া গেত্তা নেতাজী সুভাস চন্দ্র বোসকী মীতমসু মায়খুম হাংদোক্কদৌরি‍। লৌখৎলিবা খোঙথাংশিং অসি ‘লোইলমগী ৱাখল্লোনগী মমি পুম্নমক মাংহনখিবা’ হায়বা পি.এম.গী ‘পঞ্চ প্রান’ শিংগী মরক্তগী অমগগী পরিংদনি‍।

হৌখিবা চহিশিংদা, রাজপথ অমসুং থংনবা সেন্ত্রেল ভিস্তা এভেন্যুগী মফমশিংদা মফমসিদা লাকপা মীওইশিং চিনবা হেনগৎলকপা অমদি মফমসিগী ইনফ্রাস্ত্রকচরদা শাফু পীবগী ফীভম থেংদুনা লাক্লি‍। মফমসিদা পব্লিক তোইলেৎ, স্ত্রীত ফর্নিচর অমসুং মরাং কায়বা পার্কিং মফম্নচিংবা তঙাই ফদনা চঙদ্রবা য়াদ্রবা ফীভমশিং লৈতে‍। মখা তানা মফমসিদা সাইনেজ মতিক চাদবা, ঈশিংগী ফীচরশিং নীংথিনা য়েংশিনবিদবা অমদি মওং মরিল নাইদনা পার্কিং তৌবগী ফীভম লৈরম্মি‍। অদুগা গনতন্ত্র নুমিৎ অমসুং লৈবাক্কী ওইবা থৌরমশিং অয়েৎ অপন য়াম্না লৈহন্দনা অমদি মীয়াম চত্থোক চৎশিন্দা অপনবা কা হেন্না থোকহন্দনা শিনবগী মথৌ তাবসু লৈরি‍। নৌনা শেমগৎ শাগৎলিবা অসি অসিগুম্বা ৱাফমশিং অসি মাঙদা থম্লগা অর্কিতেকচরেল করেক্তরশিংগী মশক মওং থোইদোক্না কায়হন্দনা পায়খৎপনি‍।

কর্তব্য পথতা মশক ফজথোকহল্লবা লেন্দস্কেপ, খোঙ লম্বী য়াওবা লোন, অহেনবা অশং অমানগী মফমশিং, নৌনা শেমদোক্লবা কেনেলশিং, অনৌবা এমেনিতী ব্লোকশিং, ফীভম ফগৎহল্লবা সাইনেজ অমসুং ভেন্দিং কিওস্কশিং য়াওগনি‍। মসিগী মথক্তা খোঙনা চৎপা মীওইশিংগী অনৌবা অন্দরপাসশিং, ফীভম ফগৎহল্লবা পার্কিং মফমশিং, অনৌবা একজিবিসন পেনেলশিং অমসুং ফীভম ফগৎহল্লবা নুমিদাংগী মৈঙালগী ফীভম্নচিংবা ফীচরশিংনা মফমসিদা লাকপা মীওইশিংগী এস্কপিরিএন্স হেনগৎহল্লগনি‍। মফমসিদা সোলিদ ৱেস্ত মেনেজমেন্ত, শীজিন্নবা লোইরবা ঈশিং রিসাইকল তৌবা, নোংগী ঈশিং য়োকশিনবা অমসুং ইনর্জী য়াম্না চঙদবা লাইতিং সিস্তেম অমদি অতৈ অতৈনচিংবা য়াম্লবা তুং কোইনা চৎকদবা ফীচরশিং য়াওরি‍।

প্রধান মন্ত্রীনা মায়খুম হাংদোক্কদৌরিবা নেতাজী সুভাস চন্দ্র বোসকী মীতম অসি চহিসিগী অঙনবা শরুক্তা প্রধান মন্ত্রীনা পরাক্রম দিবস (জনুৱারী ২৩)দা মায়খুম হাংদোকখিবা নেতাজীগী হোলোগ্রাম মীদম থম্লিবা মফমদুমক্তদা খিনবনি‍। গ্রেনাইতনা শাবা মীতম অসি ঐখোয়গী নীংতম ইহৌদা নেতাজীনা লৌরম্বা মমল নাইদ্রবা থৌদাংশিংগী চপ চারবা শ্রদ্ধাঞ্জলি অমনি, অমদি লৈবাকসিনা মহাক্কী লমন তোনশিন্দুনা লৈহৌবগী খুদম ওইরগনি‍। শ্রী অরুন য়োগিরাজনা মকোক চিংদুনা শাবা ফীত ২৮ ৱাংবা মীতম অসি মোনোলিথিক গ্রেনাইত নুঙ অমদগী শাবনি অমদি এম.তি. ৬৫ লুম্মী‍।

****