কর্নাতকাগী রাজ্যপাল, শ্রীমান থাৱর চান্দজী গেহলোত, মুখ্যমন্ত্রী শ্রী বাসবরাজ বোমাইজী, কেন্দ্র মন্ত্রী মন্দলগী ঐহাক্কী মরুপ, কর্নাতকা সরকারগী মন্ত্রী, এম.পি. অমসুং এম.এল.এ.শিং অমসুং মশিং য়াম্না লেংবীরক্লিবা ঐহাক্কী ইচিল ইনাওশিং!

ঙসি অসি ভারতকী সমুদ্রগী পাঙ্গলগী ওইবা য়াম্না য়াইফরবা নুমিৎনি। লৈবাক ঙাক-শেনবা ওইরো নত্ত্রগা লৈবাক্কী শেন্মিৎলোন ঙাক-শেনবা ওইরো, ভারতনা ঙসিদি চাউর-চাউরবা খুদোংচাবশিংগী খুদম ওইরি। ঙসিগী নুমিৎকী মতম খরগী মমাঙদা কোচীদা ভারতকী লমদমসিদা শাজবা অহানবা এয়রক্রাফ কেরিয়রবু লৈবাক মীয়ামদা খুৎশিন্নখিবনা পুম্নমকপু চাউথোকচহল্লে।

অদুগা, হৌজিক্সু মেঙ্গালোরদা লুপা করোর ৩৭০০ হেনবা প্রোজেক্তশিং মীয়ামদা খুৎশিন্নরি, উরেপ উয়ুং তম্লি অমসুং ভুমিপুজাসু পাংথোক্লি। পুৱারী ওইরবা মেঙ্গালোর হিথাংফমগী কেপাসিতী  হেনগৎপগা লোয়ননা মফমসিগী রিফাইনরী অমসুং ঙামীশিংগী শেন্থোক হেনগৎহন্নবা প্রোজেক্ত কয়া অমা শঙ্গাবগা লোয়ননা উরেপ উয়ুং তম্লে। অসিগুম্বা প্রোজেক্তশিং অসিগীদমক্তা ঐহাক্না কর্নাতকাগী মীয়াম্বু থাগৎপগা লোয়ননা য়াইফ পাউজেল পীজরি।

প্রোজেক্তশিং অসিনা মরম ওইরগা, কর্নাতকাগী লল্লোন-ইতিক, ইন্দস্ত্রীশিংদা অহেনবা পাঙ্গল ফংলগনি, পুন্সি মহিং লাইথোকহনবদা অহেনবা মিৎয়েং চঙলগনি। ৱান দিস্ত্রিক্ত, ৱান প্রদক্ত স্কিমগী মখাদা পুথোক্লিবা কর্নাতকাগী ঙামী অমসুং ইন্দস্ত্রীশিংগী পোত্থোকশিংনা হৌজিক মালেমগী কৈথেল য়ৌবদা হান্নদগী হেন্না লায়থোক্লগনি।

মরূপশিং,

ঐহাক্না হন্দক্কী নীংতম্বা নুমিত্তা লাল কিলাগী ফম্বাক্তগী ৱাশক মঙাগী মতাংদা হায়খিবশিংগী মরক্তগী খ্বাইদগী অহানবদুদি চাউখৎপা ভারত অমা ওইহনবা অসিনি। চাউখৎপা ভারত অমা ওইহন্নবগীদমক্তা লৈবাক্কী মেন্যুফেকচরিং সেক্তরদা মেক ইন ইন্দিয়াবু হেন্না চাউখৎহনবগী য়াম্না তঙাই ফদবা লৈ। ঐখোয়গী এক্সপোর্ত হেনগৎহনবা, মালেমদা ঐখোয়গী পোত্থোকশিং য়ৌহনবা, মমলগী মতাংদা চাংয়েংনবা ঙমহনবা হায়বসি চাউখৎপা ভারত অমা ওইহনবদা য়াম্না তঙাই ফদে। অহোঙবা অমসুং অরায়বা লোজিস্তিক্স য়াওদনা মসি ওইথোকপা ঙম্লোই।

ৱাখল্লোন অসিগা লোয়ননা, লৈবাক অসিদা চহি ৮দগী ইনফ্রাস্ত্রকচরগী মতাংদা হান্না পাংথোক্লমদবা মওংদা থবক কয়া পায়খৎলি। ইনফ্রাস্ত্রকচর অচৌবা প্রোজেক্ত পায়খত্তবা লৈবাক্কী মফম অমত্তা লৈরম্লোই। ভারতমালাগা লোয়ননা ঙমখৈ রাজ্যশিংগী লম্বী-শোরোক্কী ইনফ্রাস্ত্রকচরশিং ফগৎহল্লি। সাগরমালানা সমুদ্র তোর্বানগী ইনফ্রাস্ত্রকচরশিংবু মপাঙ্গল হাপ্লি।

ইচিল ইনাওশিং,

হৌখিবা চহিশিংদা লৈবাক অসিনা হিথাংফম্না চাউখৎপা পুরকপদা তেংবাংবা হায়বা হীরম অসিবু মরু ওইবা মন্ত্রা ওইহল্লি। মসিগুম্বা হোৎনজমন কয়াগী মতেংনা শুপ্নগী চহি ৮গী মনুংদা ভারতকী হিথাংফমশিংগী কেপাসিতীনা শরুক অনি হেন্না হেনগৎলিবনি। মসিনা হায়বদি, ইং ২০১৪ ফাওবদা লৈবাক অসিদা শেম-শাখিবা হিথাংফম মশিংদা চহি ৮গী মনুংদা মসিগী শরুক অনি হাপচিনখ্রে হায়বনি।

মেঙ্গালোর হিথাংফমদা তেক্নোলোজীগী খুদোংচাবশিং হাপচিল্লিবা অসিনা মসিগী কেপাসিতী অমসুং ইফিসিএন্সী অনিমক হেনগৎলগনি। গ্যাস অমসুং লিক্বিদ কার্গোগা মরী লৈনবা প্রোজেক্ত মরিগী ঙসি উরেপ উয়ুং তমখ্রিবা অসিনা কর্নাতকা অমসুং লৈবাক্তা কান্নবা য়াম্না পীরগনি। মসিদগী ক্রুদ ওইল, এল.পি.জি. গ্যাস অমসুং বিতুমিন ইম্পোর্ত তৌবগী মমল য়াম্না হন্থরগনি।

মরূপশিং,

অমৃতকাল অসিদা ভারতনা গ্রীন গ্রোথকী পান্দমগা লোয়ননা খোঙদারি। গ্রীন গ্রোথ অমসুং গ্রীন জোব হায়বসি অনৌবা খুদোংচাবনি। মফমসিগী রিফাইনরীশিংদা ঙসি অনৌবা খুদোংচাবা কয়া হাপচিল্লিবা অসিনা ঐখোয়গী প্রাইওরিতীশিংবু ময়েক শেংনা তাক্লি। ঐখোয়গী রিফাইনরীনা ঙসি তুরেলগী ঈশিংগী মখা পোল্লি। দিসেলিনেসন প্লান্তনা মরম ওইরগা রিফাইনরীশিংনা তুরেলগী ঈশিংগী মখা পোনবগী চাং হন্থহল্লগনি।

ইচিল ইনাওশিং,

মমাংগী চহি ৮ অসিদা লৈবাক পুম্বদা ইনফ্রাস্ত্রকচর চাউখৎহনবদা ঐখোয়না অহেনবা মিৎয়েং চঙলিবা, মসিদগী কর্নাতকানা কান্নবা য়াম্না ফংলি। কর্নাতকানা সাগরমালা প্রোজেক্তকী খ্বাইদগী চাউবা বেনিফিশরীশিংগী মরক্তা অমনি। কর্নাতকাদা নেস্নেল হাইৱেগী সেক্তরদা মমাংগী চহি ৮দা চাউরাকপা লুপা করোর লিশিং ৭০গী প্রোজেক্তকী থবক পাংথোকখ্রে। মসিদা নত্তনা, লুপা করোর লাখ ১গী পাইপলাইন প্রোজেক্তকী থবকসু পায়খৎলি। বেঙ্গালুরু-চেন্নৈ এক্সপ্রেসৱে, বেঙ্গালুরু-মৈসুরু রোদ হাইৱেবু লেন তরুক্তা ওন্থোকপা, বেঙ্গালুরুগা পুনেগা শম্নহনগদবা গ্রীনফিল্দঃ কোরিদোর, বেঙ্গালুরু সেতিলাইত রিং রোদ, অসিগুম্বা তোঙানবা প্রোজেক্ত কয়াদসু থবক চত্থরি।

রেলৱেগী ওইনদি ২০১৪গী মমাংগা চাংদম্ববদা কর্নাতকাগী বজেত্তা শরুক ৪ হেন্না হেনগৎলে। রেল লাইন পাকথোক চাউথোকহনবগী হীরমদসু, মমাংগী চহি ৮দা শরুক মরিদগী হেনবা খোঙজেলদা থবক পায়খৎলি। কর্নাতকাগী রেল লাইশিংবু ইলেক্ত্রিক ওন্থোকপগী থবক্কী চাউরবা শরুকশিংদি মমাংগী চহিদা ৮দা লোইশিনখ্রে।

মরূপশিং,

ঙসিগী ভারতনা মতমগা চুনবা ইনফ্রাস্ত্রকচর চাউখৎহনবদা অসুক য়াম্বা মিৎয়েং চঙলিবসি চাউখৎপা ভারত অমা পুরক্নবগীনি। মতমগা চুনবা ইনফ্রাস্ত্রকচরনা খুদোংচাবা কয়া পুরকপগা লোয়ননা থবক মশিং য়াম্না পীবসু ঙমগনি। মসিনা অমৃতকাল অসিদা ঐখোয়গী ৱারেপশিংবু ফংহনবগী পাম্বৈ অমসু ওইরিবনি।

ইচিল ইনাওশিং,

লৈবাক মীয়াম্না মখোয়গী থৱাই য়াওবগী মতৌ অমসুং মতিকপু অচুম্বা মাইকৈদা শিজিন্নবা হায়বসি লৈবাক্না থুনা চাউখৎপগীদমক্তা য়াম্না মরু ওই। লৈবাক্কী মপাঙ্গলনা তঙাই ফদবা হীরমশিং ফংহন্নবা অমত্তা ওইনা হোৎনমির্কপা মতমদা লৈবাক্কী চাউখৎপগী খোঙজেলসু হেনগৎলক্কনি। ইকায় খুম্ননা হিংনবগীদমক্তা তঙাই ফদবা পক্কা ইয়ুম, অমাংশঙ, অশেংবা ঈশিং অমসুং মৈখুদগী নীংতম্বা চাকখুম, হায়রিবশিং অসি হৌজিক্কী মতমগী তঙাই ফদবা পোৎলম ঙাক্তনি।

মসিগুম্বা খুদোংচাবশিং অসিদা ঐখোয়গী দবল ইঞ্জিন সরকারনা খ্বাইদগী অহেনবা মিৎয়েং চঙলি। হৌখিবা চহি ৮দা লৈবাক্কী লাইরবশিংগীদমক্তা করোর অহুমদগী হেনবা য়ুম শাবীখ্রে। কর্নাতকাগী ওইনসু, লাইরবশিংগী য়ুম লাখ ৮ হেনবগী অয়াবা পীখ্রে। মিদ্দল ক্লাসকী ইমুং লিশিং কয়াদা মশাগী ময়ুম শানবগীদমক্তা লুপা করোর কয়াগী তেংবাং পীখ্রে।

জল জীবন মিসনগী মখাদা ঐখোয়না শুপ্নগী চহি অহুমগী মনুংদা লৈবাক পুম্বগী য়ুম করোর ৬ হেনবগী মফমদা তোতি ঈশিং ফংহনখ্রে। কর্নাতকাদসু খুঙ্গংগী ইমুং লাখ ৩০ হেনবগী মফমদা অহানবা ওইনা তোতি ঈশিং ফংহনখ্রে। মসিগুম্বা খুদোংচাবা অসিদগী ঐখোয়গী ইচে-ইচল অমসুং ইচানুপীশিংনা খ্বাইদগী হেন্না কান্নবা ফংবসিদা ঐহাক্না য়াম্না নুংঙাইবা ফাওই।

মরূপশিং,

লাইরবশিংনা খ্বাইদগী চাউবা তঙাই ফদবদি শেল চঙদবা লাইয়েংবা অমসুং সোসিএল সেক্যুরিতীনি। লাইরবা অমদা খুদোংচাদবা লাকপা মতমদা, মখোয়গী অপুনবা ইমুংদা নত্তনা চারোন শুরোনশিংনা অৱাবা মাইয়োক্নৈ। আয়ুশমান ভারতনা লাইরবশিংবু মসিগুম্বা অৱাবদগী কনবীরে। আয়ুশমান ভারত য়োজনাগী মখাদা লৈবাক্কী চাউরাকপা লাইরবা করোর ৮না হোস্পিতালদা লৈদুনা লেম্না লাইয়েংখ্রে। মসিদগী লাইরবশিংগী চাউরাকপা লুপা লিশিং ৫০ তিংবদগী কনখ্রে। কর্নাতকাদসু আয়ুশমান ভারতকী কান্নবশিং লাইরবা অনাবা লাখ ৩০ হেনবনা ফংখ্রে অমসুং মখোয়নসু লুপা করোর লিশিং ৪ হেন্না তুংশিনবা ঙমখ্রে।

ইচিল ইনাওশিং,

নীংতম্বা ফংলবা মতুংদা ফাওবা শুপ্নগী রিসোর্স লৈবা মীওই খক্তনা কান্নবা ফংবগী ফিভম অমা লৈরম্মি। শেন্মিৎলোনগী হীরমদা মপাঙ্গল শোনবশিংবু অহানবা ওইনা চাউখৎপগী কান্নবা ফংহল্লে। শেন্মিৎলোনগী মিৎয়েংদগী অতৈদগী তাথবনি হায়দুনা কাওথোকপীরম্বশিংগীদমক্তা ঐখোয়না সরকারনা মখোয়গীদমক্তা লেপ্লি। অপীকপা লৌমী, অপীকপা লল্লোনবা মী, ঙামী, স্ত্রীত ভেন্দর, মখোয়গুম্বা মীওই করোর কয়ানা লৈবাক অসিনা চাউখৎলকপগী কান্নবা ফংবা হৌখ্রে, মখোয়না চাউখৎপগী খোঙজেলগী শরুক ওইরে।

পি.এম. কিসান সম্মান নিধীগী মখাদা লৈবাক্কী মীওই করোর ১১ হেনবা লৌমীশিংগী বেঙ্ক একাউন্ত চাউরাকপা করোর লাখ ২ ত্রান্সফর তৌবীখ্রে। কর্নাতকাদসু চাউরাকপা লৌমী লাখ ৫৫ হেনবনা চাউরাক্না লুপা করোর লিশিং ১০ ফংনখ্রে। পি.এম. স্বনিধীগী মখাদা লৈবাক্কী ইচিল ইনাও স্ত্রীত ভেন্দর লাখ ৩৫দা শেন্মিৎলোনগী তেংবাং পীখ্রে। মসিদসু, কর্নাতকাগী চাউরাকপা স্ত্রীত ভেন্দর লাখ ২না কান্নবা ফংখ্রে।

মুদ্র য়োজনাগী মখাদা লৈবাক শিনবা থুংবগী পীক্না কারবার তৌজবা চাউরাকপা মীওই করোর লাখ ২০ হেনবগী মফমদা লোন পীথখি। মসিদসু, কর্নাতকাগী পীক্না কারবার অমসুং ইন্দস্ত্রী তৌজবশিংদা চাউরাকপা লুপা করোর লাখ ২গী বেঙ্ক লোন পীথখ্রে।

মরূপশিং,

সমুদ্র তোর্বানগী মফমশিংদা তাবা খুঙ্গং, হিথাংফমগী অনকপদা লৈবা মরূপশিং, ঙা ফাবগী শিনফমগা মরী লৈনবা ঐখোয়গী ইচিল ইনাওশিংগী পুন্সি মহিং ফগৎহন্নবগীদমক্তা ঐখোয়গী দবল ইঞ্জিন সরকারনা অখন্নবা মওংদা হোৎনরি। ঙৈহাক্কী মমাংদসু, ফিশরীগা মরী লৈনবা মরুপশিংদা কিসান ক্রেদিত কার্দ য়েন্থোকখ্রে। অরুবা সমুদ্রদা চত্তুনা ঙা ফাবদা তঙাই ফদবা হি, মতমগা চুনবা ভেসেল কয়া পীখ্রে।

পি.এম. মতস্য সম্পদা য়োজনাগী মখাদা পীরিবা সবসিদী ওইরো, নত্ত্রগা ঙামীশিংদা কিসান ক্রেদিত কার্দকী খুদোংচাবা পীবা ওইরো, মসিনা ঙামীশিংগী য়াইফ য়ুম্বালগীদমক্তা অমসুং মখোয়গী শেন্থোক হেনগৎহন্নবগীদমক্তা পাংথোকপা অহানবা খোঙথাংনি।

ঙসি, কুলাইদা ঙা ফাবগী হিথাংফমগী ভুমি পুজন পাংথোকখি। মতম কয়াদগী ফিশরী সেক্তরগা মরী লৈনদুনা লাক্লবা ইচিল ইনাওশিংনা মসিগীদমক্তা ঙাইজদুনা লাকখিবনি। মসি শেম-শাবা লোইদুনা শিজিন্নবা য়ারক্লবা মতমদা ঙামীশিংগী শিংনবা কয়াগী ৱারোইশিন ফংলগনি। প্রোজেক্ত অসিনা ঙামী মশিং কয়াগী ইমুং-মনুংদা তেংবাংগনি, অদুগা মীওই কয়া অমসু থবক ফংগনি।

মরূপশিং,

দবল ইঞ্জিনগী সরকার, লৈবাক্কী মীয়ামগী তঙাই ফদবশিং ফংহন্নবা অহিং-নুংথিল খঙদনা হোৎনরি। লৈবাক মীয়ামগী অপাম্বসি ঐখোয়গী সরকারদা লৈবাক মীয়াম্না পীবা য়াথংগা মান্নৈ। লৈবাক মীয়াম্না ভারত্তা মালেমগী থাক্কী ইনফ্রাস্ত্রকচর লৈহনবা পাম্মি। ঙসিদি, লৈবাক্কী কাচিন কোয়া খুদিংদা মতমগা চুনবা ইনফ্রাস্ত্রকচর শেমগৎ-শাগৎলি।

ঐখোয়গী শহর খুদিংবু য়ারিবমখৈ মেত্রো কন্নেক্তিবিতী লৈহনবা হায়বসি লৈবাক মীয়ামগী অপাম্বনি। ঐখোয়গী সরকারগী হোৎনজমন্না মরম ওইরগা, হৌখিবা চহ ৮দা মেত্রো লৈবা শহর মশিংনা শরুক মরি হেনগৎখ্রিবনি।

শেল চঙদনা অমসুং লায়না প্লেন তোংদুনা চৎপা হায়বসি লৈবাক মীয়ামগী অপাম্বনি। উরান য়োজনাগী মখাদা হৌজিক ফাওবদা পেসেঞ্জর করোর অমা হেনবনা প্লেন তোনখ্রে।

ভারত্তা ক্লীন ইকোনোমী লৈবা হায়বসি লৈবাক মীয়ামগী অপাম্বনি। ঙসিদি ভারতকী দিজিতেল পেমেন্তনা পুৱারী ওইবা থাক্তা লৈরে, অমসুং ভিম-য়ু.পি.আই.গুম্বা ঐখোয়গী ইনোওভেসন্না মালেমগী পুক্নিং চিংশিল্লি।

লৈবাক্কী মীয়াম্না অয়াঙবা ইন্তর্নেত পাম্মি, অহোঙবা ইন্তর্নেত পাম্মি, লৈবাক্কী কাচিন কোয়া খুদিংদা ইন্তর্নেত পাম্মি। ঙসিদি, কিলোমীতর লাখ ৬মুক্কী ওপ্তিকেল ফাইবর কেবল তিংদুনা গ্রাম পঞ্চায়তশিংবু শম্নহল্লি।

৫জি.গী কান্নবগী সেক্তরদসু অনৌবা অহোংবা অমা লাক্কদৌরবনি। কর্নাতকাগী দবল ইঞ্জিন সরকারসু মীয়ামগী অনীংবা অপাম্বা থুংহন্নবগীদমক্তা কন্না হোৎনরিবা অসিদা ঐহাক্না নুংঙাইবা ফাওই।

মরূপশিং,

ভারতকী ওইনা কিলোমীতর লিশিং তরেত মখাই শাংবা সমুদ্র তোর্বান লৈ। ঐখোয়না লৈবাক্কী অসিগুম্বা রিসোর্সকী মপুং ফাবা কান্নবা লৌগদবনি। মফমসিগী কারাবালী সমুদ্র তোর্বান অমসুং ৱেস্তর্ন ঘাতসু তুরিজমগীদমক্তা মমিং চৎলি। ক্রুজ সিজন খুদিংদা ন্যু মেঙ্গালোর হিথাংফম্না চাংচৎ ওইনা তুরিস্ত লিশিং ২৫ হেন্দল তৌই হায়না ঐহাক্কী ইফমদা পাউদম্লক্লি। মসিদা মীরম লৈবাক্কী মীওই মশিং য়াম্মি হায়বসু খঙলে। মসিনা হায়বদি, চাউখৎপা য়াবা ওইথোকপা য়াম্না লৈ হায়বনি অমসুং ভারত্তা মিদ্দল ক্লাসশিংগী মপাঙ্গল হেনগৎলক্লিবা মওং অসিদা ভারত্তা ক্রুজ তুরিজমগী মতিক হেন্না হেন্না হেনগৎপা য়াই অমসুং হেনগৎলক্লি হায়বসি মসিনা তাক্লি।

তুরিজম হেনগৎলকপা মতমদা, মসিনা ঐখোয়গী কোত্তেজ ইন্দস্ত্রী, ঐখোয়গী আর্তিসান, গ্রাম উদ্যোগ, স্ত্রীত ভেন্দর, ওতো রিক্সো থৌবা, তেক্সী থৌবা, মখোয়গুম্বা খুন্নাইগী কাঙলুপ য়ামদবা মীওইশিংনা কান্নবা য়াম্না ফংই। ন্যু মেঙ্গালোর হিথাংফম্না তুরিজম হেনগৎহন্নবগীদমক্তা অনৌবা খুদোংচাবা কয়া লেপ্তনা হাপচিনবা অসিদা ঐহাক্না য়াম্না নুংঙাইবা ফাওই।

মরূপশিং,

কোরোনাগী অৱাবা মতম হৌরকখিবা মতমদা, ঐহাক্না শিংনববু খুদোংচাবদা ওন্থোকসি হায়খিবনি। ঙসিদি লৈবাক অসিনা শিংনববু খুদোংচাবদা ওন্থোক্তুনা উৎলে। নুমিৎ খরনিগী মমাংদা জি.দি.পি.গী মশিং লাকখ্রে, ভারতনা কোরোনা মতমগী মনুংদা শেমখিবা থৌশিল-থৌরাং, লৌখিবা ৱারেপশিং কয়া য়াম্না মরু ওই হায়বা মসিনা তাক্লে। মমাংগী চহিদা মালেম্না শিংনবা কয়া থেংনখ্রবসু,  ভারতনা বিলিয়ন দোল্লর ৬৭০, হায়বদি, লুপা করোর লাখ ৫০গী অপুনবা এক্সপোর্ত তৌখি। শিংনবা কয়াগা মায় পাক্না মাইয়োক্নদুনা, ভারতনা বিলিয়ন দোল্লর ৪১৮, হায়বদি লুপা করোর লাখ ৩১গী পোত্থোক এক্সপোর্ত তৌবা ঙম্বগী অনৌবা রেকোর্দ থমখ্রে।

ঙসিদি, লৈবাক অসিগী গ্রোথ ইঞ্জিনগা মরী লৈনবা সেক্তর খুদিংনা মশাগী খ্বাইদগী ঙমজবা চাংদা মথৌ পাংথোক্লি। সর্ভিস সেক্তরসু শাহৌ লৌবগী মাইকৈদা খোঙজেল য়াঙনা চঙশিল্লি। পি.এল.আই. স্কিমগী কান্নবশিংগী মমি মেন্যুফেকচরিং সেক্তরদা তাবা উরি। মোবাইল ফোনগা লোয়ননা ইলেক্ত্রোনিক মেন্যুফেকচরিং সেক্তরনা শরুক য়াম্না শাহৌ লৌরে।

ঙসিগী ইম্পোর্তনা চহি ৩গী মনুংদা তারক্লিবা চাংগা মান্ননা ঐখোয়গী এক্সপোর্তকী চাং হেনগৎলক্লি। মেঙ্গালুরুগুম্বা মরু ওইবা হিথাংফম লৈবা, লৈবাক্কী সমুদ্র তোর্বানগী মফমশিংনা ভারতকী পোত্থোক এক্সপোরত তৌবদা মখোয়গী রিসোর্সশিং শিজিন্নদুনা ময়াম অসিগী কান্নবশিং হকথেংননা ফংনরি।

মরূপশিং,

সরকারগী হোৎনজমন্দগী লৈবাক অসিদা হৌখিবা চহিশিংদা কোস্তেল ত্রাফিক্তা শরুক য়াম্না হেনগৎপগী ফিভমসু ঐখোয়না উরে। লৈবাক্কী তোঙান-তোঙানবা হিথাংফমশিংদা খুদোংচাবা অমসুং পথাপ হেন্না ফগৎলকপনা মরম ওইরগা, কোস্তেল মুবমেন্ত হৌজিক য়াম্না হেন্না লায়থোক্লে। পোর্ত কন্নেক্তিবিতী হেন্না ফগৎহনবা, মসিদা হেন্না খোঙজেল লৈরকপা হায়বসিদা সরকারনা হোৎনরি। মরম অদুনা, পি.এম. গতিশক্তি নেস্নেল মাস্তর প্লানগী মখাদা সীম্লেস পোর্ত কনেক্তিবিতীদা তেংবাংগদবা রেলৱে অমসুং রোদকী প্রোজেক্ত ২৫০ হেন্না মশক খঙদোকখ্রে।

ইচিল ইনাওশিং,

মথৌনা অমসুং লল্লোন ইতিক্কীদমক্তা মমিং লৈবা মসিগী সমুদ্র তোর্বানগী মফম অসি পোক্লপদগী লোইনরক্লবা তেলেন্তনা থল্লিবনি। ভারতকী ইন্তর্প্রাইজিং ওইবা মীওই কয়া মফমসিদগী লৈবনি। ভারতকী নীংথিরবা ইথৎ অমসুং চিং কয়া কর্নাতকাদা লোইরিবনি। ভারতকী মমিং লৈরবা লাইনীংফম অমসুং লাইশঙ কয়াসু মফমসিদা লৈরিবনি। লৈবাক অসিনা হৌজিক নীংতম্বগী অমৃত মহোৎসব পাংথোক্লিবা অসিদা, ঐহাক্তি রানি অবক্কা অমসুং রানি চান্নভাইরাবুসু নীংশিংবা পাম্মি। ভারতকী লমদম, ভারতকী কারবারবু লোইলম লৈঙাক্তগী কন্নবগীদমক্তা মখোয়না হোৎনখিবা অসি মশক থোকপনি। এক্সপোর্ত সেক্তরদা ঙসি মাংজিল থানা চৎলিবা ভারতকীদমক্তা মখোয়গুম্বী থৌনা লৈবী নুপীশিং অসি অচৌবা ইথিল অমনি।

হর ঘর তিরঙ্গা খোঙজংবু কর্নাতকাগী মীয়াম খুদিংনা, ঐখোয়গী নহারোল মরূপশিংনা মায় পাকহনখিবা, মদুমকসু মসিগুম্লবা নীংথিরবা চৎনবীগী মখা চত্থরকপা থৌওং অমনি। কর্নাতকাগী কারাবলী মফমদা লাকপা মতমদা লৈবাক নীংবগী মসিগুম্বা ৱাখল্লোন, লৈবাক্কীদমক্তা ৱারেপ লৌবগী মতৌনা ঐহাকপু মতম পুম্বদা ইথিল পী। মেঙ্গালুরুদা উবা ফংলিবা মসিগুম্বা থৱাই য়াওবগী মতৌনা চাউখৎপগী লম্বীবু হেন্না ময়েক শেংহল্লে, অসিগুম্বা থাজবা অসিগা লোয়ননা ঐহাক্না মীয়াম খুদিংবু চাউখৎ-থৌরাংগী প্রোজেক্তশিং অসিগীদমক্তা থাগৎচরি অমসুং য়াইফ পাউজেলসু পীজরি।

ঐহাক্কী লোয়ননা অমুক্তা হৌনা লাওমিন্নসি –

ভারত ইমানা য়াইফরে

ভারত ইমানা য়াইফরে

ভারত ইমানা য়াইফরে

মীয়াম্বু থাগৎচরি!

***