ঙাকশেল মন্ত্রী শ্রী রাজনাথ সিংহনা ওগস্ত ১৯, ২০২২দা মনিপুরগী হেদক্বার্তর্স ইন্সপেক্তর জেনেরেল অসাম রাইফল্স (সাউথ)তা চত্তুনা রেদ সীল্দ দিভিজন অমসুং অসাম রাইফল্সকী লান্মীশিংগা ৱারী ৱাতায় শানখ্রে‍। মহাক্কী খোঙচৎ অদুদা চীফ ওফ আর্মী স্তাফ মনোজ পান্দে, জি.ও.সি.-ইন-সি. ইস্তর্ন কম্মান্দ লেফ্তনেন্ত জেনেরেল আর.পি. কলিতা অমসুং জি.ও.সি. স্পিয়র কোর লেফ্তনেন্ত জেনেরেল আর.সি. তিৱারি লোয়ননা আর্মী অমসুং অসাম রাইফল্সকী মকোক থোংবা ওফিসরশিংসু শরুক য়াখি‍। মহাক্কী খোঙচৎ অদুদা, ঙাকশেল মন্ত্রীগী মফমদা লমদমসিদা ইং-চীকপা অমদি তংদু লৈতাবা পুরক্নবগীদমক লাল্হৌবগী ইরাং নমথনবা লোয়ননা ইন্দো-ম্যান্মার ঙমখৈ ঙাক শেনবগী পায়খৎলিবা থবকশিংগী মরমদা পাউদমখি‍।

লান্মীশিংগী মফমদা ৱা ঙাঙলদুনা, শ্রী রাজনাথ সিংহনা চীংগী মফম অমসুং ঈশিং নুংশিৎকী ফীভম কয়া মায়োক্নদুনা মখোয়গী মথৌ থৌনা লৈনা অমদি অচেৎপা ফিরেপকা লোয়ননা পাঙথোকপগীদমক অমসুং মনিপুরগী ঙাকশেলগী ফীভম ফগৎহনবগীদমক লান্মীশিং অমসুং ওফিসরশিংবু থাগৎখি‍। ইন্দিয়ন আর্মী অমসুং অসাম রাইফল্সকী লান্মীশিংগী মরক্তা লেপ্পা ফংবসি তশেংনা চাওথোকচনিংঙাইনি হায়না মহাক্না হায়খি‍।

ঙাকশেল মন্ত্রীনা রেদ সীল্দ দিভিজনবু মখোয় হেক লিংখৎখিবদগী হৌজিক ফাওবদা, ১৯৭১গী লান, স্রি লঙ্কাদা আই.পি.কে.এফ.কী শরুক অমা ওইনা চৎলুবা নৎত্রগা হৌজিক লৌরিবা শক্লোনশিংগীদমক থাগৎখি‍। হৌখিবা চহি ৭০ হেনবসিদা মশক থোকপা থৌদাং য়াখিবা অমদি লৈবাক মনুংগী ঙাকশেল, ইন্দো-ম্যান্মার ঙমখৈ ঙাক শেনবা অমদি অৱাং নোংপোকপু লৈবাক্কী পরিংদা পুশিল্লকপদা লৌরিবা মরুওইবা শক্লোনগীদমক্তসু মহাক্না অসাম রাইফল্সপু থাগৎখি‍। “মসিগীদমক্তা অদোমবু ‘অৱাং নোংপোক মীয়ামগী মরূপ’ অমসুং ‘অৱাং নোংপোকপু ঙাক্লিবা লান্মী’ হায়না খঙনরিবনি,” হায়না মহাক্না ফোঙদোকখি‍।

শ্রী রাজনাথ সিংহনা লান্মী তেঙ্গোলশিংদা লৈবাক্কী ফিরালবু লেঙবা নাইদ্রবা কত্থোকপগা লোয়ননা ৱাংনা পাইহন্নবা ৱাফম থম্লদুনা লৈবাকসিগী ঙমখৈ নীংথিনা ঙাক শেল্লবা মতমদা মপুং ফাবা মতিং ফুদোকপা ঙমগদৌরিবনি হায়না হায়খি‍। রেদ সীল্দ দিভিজন অমসুং অসাম রাইফল্সকী লান্মী ১০০০ হেনবনা ঙাকশেল মন্ত্রীনা ৱারী শাতায় শানবা অদুদা শরুক য়াখি‍।

*****