প্রাইমারী প্রদ্যুসিং সেক্তরশিংগী মরক্তা ফিসরিজ অসি খ্বাইদগী খোঙজেল য়াঙনা চাওখৎলক্লিবা সেক্তরশিংগী মরক্তা অমনি‍। সেক্তর অসিনা লৈবাকসিগী শেন্মিৎলোন অমসুং অপুনবগী ওইবা চাওখৎপদা মরুওইবা শক্লোন অমা লৌরি, অমদি “সনরাইজ সেক্তর” হায়নসু খঙনদুনা, মসিনা থোং মান্নবা অমদি পুম্নমক কোনশিনবা চাওখৎপগী লম্বীগী খুত্থাঙদা য়াম্লবা মতিং পুরক্কনি হায়না পানরি‍। সেক্তর অসিবু লৈবাকসিগী মীওই মিলিয়ন ১৪.৫তা থবক পীদুনা ঙামী কাঙলুপ মিলিয়ন ২৮গী পুন্সি হিংনবগী লম্বী পীননবা অচৌবা ইঞ্জিন অমা ওইনা শকখঙলে‍। অসুম্না সেক্তর অসিনা লৈবাকসিগী নহা ওইরিবা ওন্ত্রপ্রিন্যুরশিংবু থোরক্তুনা পাম্বৈ পুথোক্নবা, তেক্নোলোজী ইন্তরভেন্সন অমসুং ইনোভেতিব ওইবা পাম্বৈগী খুত্থাঙদা থেংনরিবা শিংনবশিংগী ৱাখৈ পুরক্নবা পুক্নিং চিংশিল্লি‍।

মসিবু য়োকখৎনবগীদমক, ইকায়খুম্নরবা প্রধান মন্ত্রীনা লুচিংবা মন্ত্রী মন্দলনা ভারতকী ঙায়োক সেক্তরদা তুং কোইগদবা অমদি দাইত্ব লৈবা চাওখৎ থৌরাংগী খুত্থাঙদা ‘ব্লু রিভোলুসন’ পুরক্নবগীদমক ‘প্রধান মন্ত্রী মতস্য সম্পদ য়োজনা (পি.এম.এম.এস.ৱাই.) হৌদোকখিবনি‍। স্কিম অসিনা চহিদা ৯%গী চাংদা চাউখৎহন্দুনা ২০২৪-২৫ ফাওবদা ঙা পুথোকপগী চাং মেত্রিক তন লাখ ২২০দা হেনগৎহন্নবা পান্দম থম্লি‍। অচৌবা মঙলানগা লোয়ননা হৌদোক্লিবা স্কিম অসিনা মথংগী চহি মঙাসিদা মপান্দা থাদোকপদগী ফংলকপা শেন্ফম লুপা করোর ১,০০,০০০দা হেনগৎহন্নবা অমদি হকথেংননা অমদি নাকোইননা মীওই লাখ ৫৫দা থবক পীননবা পান্দমসু থম্লি‍।

ঙায়োক সেক্তরগী মতং অসিবু খঙদুনা, ভারত লৈঙাক্কী দিপার্তমেন্ত ওফ সাইন্স এন্ত তেক্নোলোজীগী মখাদা লৈবা স্তেতুতরী বোদী অমা ওইরিবা তেক্নোলোজী দেভেলপমেন্ত বোর্দনা ‘এদভান্স, ইন্তেন্সিব, ওল মেল তিলাপিয়া এক্বাকল্চর প্রোজেক্ত ৱিথ ইজ্রাএলি তেক্নোলোজী”গীদমক এম/এস ফাউন্তেনহেদ এগ্রো ফার্ম্স প্রাইভেৎ লিমিতেদ, নাভি মুমবাই, মহারাস্ত্রদা মতেং পীরি‍। কম্পেনী অসিগী অপুনবা প্রোজেক্ত কোস্ত লুপা করোর ২৯.৭৮কী মনুংদা লুপা করোর ৮.৪২গী শেন্থংগী তেংবাং পীননবা বোর্দ অসিনা নাকল অনিগী ওইবা য়ানচে অমা খুৎয়েক পীনখ্রে‍।

‘তিলাপিয়া’ অসি মালেমগী ওইনা খ্বাইদগী পোত্থোক লৈবা অমদি লল্লোন ইতিক তৌনবা ঙা মখল অমা ওইরক্লি‍। তিলাপিয়া য়োকপা অসি মালেমগী মফম কয়াদা শেন্দোং লৈবা থৌওং অমা ওইরক্লি অমদি মসিগী থুনা চাউগনবা অমসুং থোইদোক্না শেন্নদনা য়োকপা য়াবসিগী য়েংলগা ফিসরী এক্সপর্তশিংনা তিলাপিয়াবু “এক্বাতিক চিকন” হায়না কৌনরি‍। ঙসিদি, মালেমগী ওইবা ঙা হায়না ঙা মখল অমদা মমিং পীবা তারবদি তিলাপিয়াদগী হেনবা মমিং অমা লৈত্রে‍।

ভারত্তা দাইত্ব লৈবা মওংদা তিলাপিয়া য়োকপগী থৌওং শৌগৎনবগীদমক, এম/এস ফাউন্তেনহেদ এগ্রা ফার্মস প্রাইভেৎ লিমিতেদনা মপুং ফাবা প্রদক্নসন লাইন অমা (মরুম কোকপদগী হৌরগা মপুং মরৈ ফাবা ফাওবগী) মুধোল (কর্নাতকা)দা লিংখৎনবা মীৎয়েং থম্লি‍। কম্পেনী অসিনা ইজ্রাএলগী নির দেবিদ ফিস ব্রীদিং ফার্মদগী পেরেন্ত ব্রুদস্তোক ‘হরমোন’ পুশিল্লক্তুনা য়োক্লগা তিলাপিয়া তন ৫০০ পুথোক্নবা পান্দম থম্লি‍। হর্মোন অসি ওরিওক্রোমিস নিলোতিকস (লাবা) অমসুং ওরিওক্রোমিস ওরিয়স (অমোম) হায়রিবা খনগৎলবা তিলাপিয়া মখল অনিসি পুল্লগা শেমবা হাইব্রিদ মখল অমনি, অদুগা মসিবু থুনা চাউগনবা; অইংবা মফমদসু লৈবা ঙমবা; মচু পানবা (য়েংবদা পুক্নিং হুবা); হোর্মোন শীজিন্নবগী চৎনরিবা মওং মতৌ য়াওদনা ওল হাইব্রিদ ফ্রাই প্রোজেনী লাবা ঙাক্তা ওইবা হায়রিবা অখন্নবা মওং মতৌশিংগীদমক খঙনৈ‍।

ভারতকী য়াম্লবা লেন্দলোক ওইবা ঈশিংগী সোর্স নীংথিনা ফংবা মফম খুদিংমক্তা চৎনবা য়াগদবা, কংফাল মনুংগী পুখ্রিশিংদা তুরেলদগী কুমগী ঈশিং লৌফম লৈবা ক্লোজ লুপ ফার্মিং ফোর এরিদ জোনগী খুত্থাঙদা ঙা মখল অসি য়োক্নবগীদমক কম্পেনী অসিনা এক্বাকল্চর প্রদক্সন তেক্নোলোজী লিমিতেদ (এ.পি.তি.আই.এল.) ইজ্রাএলদগী খুমাঙ চাওশিল্লবা ইজ্রাএলি তেক্নলোজী (ওক্তোবর ২০২০দা খুৎয়েক পীনখিবা তেক্নোলোজী সর্ভিস এগ্রীমেন্তকী মখাদা) শীজিন্নরি‍। ভারতকী ফীভমদা চুশিন্নহন্নবা ফেসিলিতী অসিগী মপুং ফাবা ইঞ্জিনিয়রিং অসি ফংলিবা লম, ফংলিবা ঈশিং, ঈশিং-নুংশিৎকী ফীভম, অকোয়বদা ফংলিবা মচাকশিং, লৈহাউগী ফীভম, তোপোগ্রাফীনচিংবা মফমদুগী ফীভমগী মতুং ইন্না মথৌ তাবা য়েংলগা শেমবনি‍।

শ্রী রাজেস কুমার পাথক, আই.পি. এন্দ তি.এ.এফ.এস.ও সেক্রেতরী, তি.দি.বি.না হায়খি মদুদি, “ভারতকী ঙামী কাঙলুপশিংবু ‘ব্লু রিভোলুসন’গী খুত্থাংদা শেন্মিৎলোন ফগৎহন্নবা মীৎয়েঙদা ভারত লৈঙাক্না ঙায়োক সেক্তরদা অখন্নবা মীৎয়েঙ থম্লি‍। সেক্তর অসিদা এক্সপোর্তকী, মরুওইনা মালেমগী কৈথেলদা লৈরিবা দিমান্দ য়েংলগা ‘তিলাপিয়া ঙা’ মখল অসিগী ওইনা, চাওরবা মতিং লৈ‍। অদুগা পুশিল্লক্লিবা তেক্নোলোজী অসি ‘মান্নবা অতৈ মখল লৈতবা’ অসিনা মরম ওইরগা, ঙায়োক সেক্তরগী এক্সপোর্ত্তগী তাল্লকপা শেন্ফম লুপা করোর ১,০০,০০০দা শরুক অনি হেনগৎহন্নবা পান্দম থম্লিবা ইকায়খুম্নরবা পি.এম.গী মঙলান চাউনা মঙলিবা স্কিম, প্রধান মন্ত্রী মতস্য সমপদ য়োজনা (পি.এম.এম.এস.ৱাই.)দা চাউনা কান্নগনি‍।”

<><><><><>