চৎলিবা শেনবা চহি অসিগী অহানবা থা মরি (এপ্রিল – জুলাই) অসিগী মনুংদা চহি কাংলুপ ০-৫গী অঙাং লাখ ৭৯ হেন্না য়ুনিক আইদেন্তিফিকেসন ওথোরিতীনা এনরোল তৌখি।

মসি বাল আধার থৌশিলগী মখাদা চহি কাংলুপ ০-৫গী মনুংদা লৈরিবা অঙাংশিং হেন্না য়ৌশিনবা ঙম্নবা অমসুং মমা-মপা অমদি অঙাংশিংনা কান্নবা কয়ামরুম ফংনবা হোৎনবদা মতেং পাংনবগী নৌহৌনা পাইখৎপা খোঙথাং অমগী শরুক্নি। মার্চ ৩১, ২০২২ লোইরকপা ফাওবদা চহি কাংলুপ ০-৫গী অঙাং করোর ২.৬৪না বাল আধার পাইখি, মশিং অসি জুলাই ২০২২ লোইরকপা ফাওবদা করোর ৩.৩৪দা হেনগৎলকখি।

বাল আধার রেজিস্ত্রেসন অসি লৈবাক শিনবা থুংবদা খোঙজেল য়াংবা হেনগৎলকপগা লোয়ননা য়াম্না নীংথিনা খুমাং চাউশিল্লি। হিমাচল প্রদেশ অমসুং হরিয়ানাগুম্বা রাজ্যশিংদা লৈরিবা চহি কাংলুপ ০-৫গী অঙাংশিং এনরোলমেন্তশিং তৌবা অসি তার্গেতেদ এজ গ্রুপকী ৭৯% হেন্না কবর তৌবা ঙমখ্রে। জম্মু অমসুং কাশ্মির, মিজোরাম, দিল্লী, আন্ধ্র প্রদেশ অমসুং লক্ষদীপ য়াওনা অতোপ্পা রাজ্য অমসুং য়ু.তি. কয়ামরুমদা অঙাংশিং (চহি কাংলুপ ০-৫) শীংথানীংঙাই ওইবা মওংদা রেজিস্ত্রেসন তৌরি।

অপুনবগী ওইনা হৌজিক ফাওবগী আধার সেচুরেসন অসি ৯৪%রোম ওইরি। অহলশিংগী ওইনা আধার সেচুরেসন অসি ১০০% ওইরি। আধার অসি হৌজিক হিংবদা লাইহনবা অমসুং ললোন-ইতিক তৌবদা লাইহনবা, অনিমক্কী ওইনা কেতলিস্ত ওইরি।

য়ু.আই.দি.এ.আই. অমসুং মাগী রিজনেল ওফিসশিংনা বাল আধার থৌশিলগী মখাদা রেসিদেন্তশিংদা মাংদা থোরক্তুনা মখোয়গী অঙাংশিং রেজিস্তর তৌনবা লেপ্পা লৈতনা পুক্নিং থৌগৎতুনা লাকখি। বাল আধারনা য়াইফ-থৌরাংগী কান্নবা কয়ামরুম ফংহনবা ফেসিলিতেতর ওইনা মথৌ তৌরি অমসুং মসিনা পোকপদগী হৌনা অঙাংশিংগী হক ফংনবগী দিজিতেল ফোতো আইদেন্তিতী অমা ওইনা মথৌ তৌরি।

চহি কাংলুপ ০-৫গী অঙাংশিংদা বাল আধার পীরি। আধার পীবদা বাইওমেত্রিক (ফিঙ্গর প্রিন্ত অমসুং আইরিস) কল্লেক্সন অসি মরু ওইবা ফীচর অমা ওইরি মরমদি মসি বাইওমেত্রিক অদুগী দি-দুপ্লিকেসন্দা য়ুম্ফম ওইবা য়ুনিকনেসন অমা শেম্বদা মথৌ তাই। অদুম ওইনমক চহি কাংলুপ ০-৫গী অঙাংশিংগী আধার এনরোলমেন্তদা বাইওমেত্রিক্স অসি লৌদে।

চহি কাংলুপ ০-৫গী অঙাংশিংগী আধার এনরোলমেন্ত অসি অঙাং অদুগী ফেসিএল ইমেজতা অমসুং মমা-মপা/অহল লমনগী বাইওমেত্রিক ওথেন্তিকেসন্দা (চৎনবা আধার অমা য়াওরগা) য়ুম্ফম ওইরগা পীরি। বাল আধারগী এনরোলমেন্ত তৌবা মতমদা প্রুফ ওফ রিলেসনশিপ দোক্যুমেন্ত অমা (বর্থ সর্তিফিকেৎ ওইগদবা) চংই।

বাল আধার অমসুং মহৌশাগী ওইবা আধারগী মরক্তা খেন্নবা খঙনবগীদমক মসি হিগোক মচুদা পীরি লোয়ননা মসি অঙাং অদুনা চহি ৫ শুবা ফাওবা চৎনগনি হায়বা ৱাফম য়াওরি। চহি ৫ শুরকপদা অঙাং অদুনা মেন্দেতরী বাইওমেত্রিক অপদেৎ (এম.বি.য়ু.) কৌবা প্রোসেস অমা মপুং ফানা লোইশিন্নবা আধার সেবা কেন্দ্র অমদা মহাক্কী বাইওমেত্রিক পীবা মথৌ তাই।

এম.বি.য়ু.গী থৌওং অসি দি-দুপ্লিকেসন প্রোসেস অমগী খুত্থাংদা চৎথৈ। থৌওং অসি মপুং ফানা লোইরবা মতুংদা অঙাং অদুদা আধার নম্বরদা অহোংবা অমত্তা লৈতনা মহৌশাগী ওইবা আধার অদু পীরি।

****