ঐহাক্কী নুংশিরবা ইরৈবাকচাশিং,

খুরুমজরি!

৭৬শুবা নীংতম নুমিৎকী মাংওইননা লৈবাক অসিদা অমদি মীরৈবাক্তা লৈরিবা ভারত মচা পুম্নমক্তা ঐহাক্না মাংজৌননা য়াইফ-পাইজেল পীজরি। মরু ওইবা থৌরম অসিনা লাকপদা মীয়ামদা ঐহাক্না ৱা ঙাংবা ফংজবদা য়াম্না নুংঙাইবা পোকই। ভারতনা মনীংতম্বা লৈবাক অমা ওইনা চহি ৭৫ মপুং ফারগনি। খুন্নাইবু ইং-তপ্পা, অমত্তা ওইবা অমসুং মীয়ামবু শক্তি পীনবা ওগস্ত তরামরি অসি ‘পারতিসন হোরর্স রিমেম্বরেন্স দে’ হায়না পাঙথোক্লি। হয়েং অসি ঐখোয়না লোইলম লৈঙাক্কী মীওৎ-মীনৈদগী ইশাবু নীংতম্বা ফংহনখিবা অমসুং ঐখোয়গী তুংলমচৎ নৌনা শেমগৎখিবা নুমিৎ অদুনি। ঐখোয় পুম্নমক্না নুমিৎ অসিগী চহিগী কুমওন পাঙথোক্লিবা মতম অসিদা, ঐখোয়না নীংতম্বা ভারত্তা হিংবা ঙম্নবা চাউনা কত্থোকখিবা অদুগুম্লবা নুপা অমসুং নুপী পুম্নমকপু ইকাই খুম্নবা উৎচরি।

মসি ঐখোয় পুম্নমক্কী খক্তা নত্তনা মালেম শিনবা থুংনা দেমোক্রেসীগী এদভোকেৎ তৌরিবা খুদিংমক্কীদমক নুংঙাইবা ফোঙদোক্নবগী মরম অমনি। ভারতনা নীংতম্বা ফংলবা মতমদা, ভারত্তা দেমোক্রেসী মওংদা লৈঙাক শেম্বদা মাইপাকপগী মতাংদা চিংনবা পোকখিবা মালেমগী লুচিংবা অমসুং এক্সপর্ত কয়া অমা লৈখি। মখোয়না চিংনবা পোকপগী মরম লৈরমখি। মতম অদুদা দেমোক্রেসী অসি শেল-থুমগী লমদা চাউখত্পা লৈবাকশিং খক্তদা লৈরমখি। লোইলম লৈঙাক্কী মখাদা চহি কয়া লৈরুরবা মতুংদা ভারত অসি লায়রবা অমসুং লাইরিক হৈতবা অসিনা মশক তাকখি। অদুবু ঐখোয় ভারত মচাশিংনা অমসি অরানবনি হায়না উৎখি। দেমোক্রেসী অসি লমদম অসিদা মরা চেৎনা তাখিবা খক্তা নত্তনা মসিবু হেন্না মপাঙ্গল কলহনখি।

অতোপ্পা য়াম্না লিরবা দেমোক্রেসীদা অয়াম্বনা নুপীশিংনা ভোতৎ থাদবগী হক ফংনবা হোৎনবা মতম শাংনা লান্থেংনবা তারমখি। অদুবু ভারতনা রিপব্লিক ওইরকপদগী হৌনা য়ুনিভর্সেল এদল্ত ফ্রানসাইজ রাইৎ এদোপ্ত তৌখি। অসুম্না মোদর্ন ইন্দিয়া শেমখিবশিংনা চহি শুরবা প্রজা খুদিংমক লৈবাক শেমগত্পগী অপুনবা থৌওংদা শরুক য়াবা ঙমহনখি। অসুম্না ভারতনা দেমোক্রেসীগী অশেংবা মতিক-ময়াই অদু মালেমদা খঙহনবদা মতেং পাংখিবগী মনা পীবা য়াই।

মসি চান্নরুবা নত্তে হায়না ঐনা থাজৈ। সভ্যতা হৌরকপদা, লমদম অসিগী মুনি-ঋসিশিংনা মীপুম খুদিংমক মান্নৈ হায়বা ৱাখল্লোন তাক্লিবা মীওইবা জাতিগী বিজন অমা শেম্বীরমখি; তশেংনমক, পুম্নমক্কী অমত্তা ওইবা হায়বনি। অচৌবা নীংতম ইহৌ অমসুং মহাত্মা গান্ধীগুম্বা লুচিংবশিংনা অনৌবা মতমগীদমক ঐখোয়গী অরিবা মতমগী ভেল্যুশিং অদু অমুক হন্না পুথোকখি। ঐখোয়গী দেমোক্রেসীদা ভারতকী মওং-মতৌ চেল্লিবা অসিদা অঙকপা পোক্নীংঙাই ওইদে। গান্ধীজীনা দিসেন্ত্রেলাইজেসন অমসুং মীয়ামদা শক্তি পীনবা ৱাফম থমখি।

হৌজিক চয়োল ৭৫, জাতি অসিনা ঐখোয়দা নীংতম্বা ফংহনখিবা অথোইবা ৱাখল্লোনশিং অসি নীংশিংদুনা লাক্লি। ২০২১গী মার্চতা ঐখোয়না দান্দি মার্চ অমুক হন্না পাঙথোকপগা লোয়ননা “আজাদী কা অমৃত মহোত্সব’ হৌদোকখি। মওং অসুম্না ঐখোয়গী পালন থৌরমশিং অসি ঐখোয়গী ইহৌবু মালেমগী মেপ্তা য়াওহনখিবা অদুগুম্লবা মরু ওইবা থৌদোক অদুবু ইকাই খুম্নবা উৎপগা লোয়ননা  হৌখি। মসিগী কুম্মৈ অসি ভারতকী মীয়ামদা কত্থোকপনি। মীয়াম্না ফংখিবা মাই পাকপা অদুদা য়ুম্ফম ওইরগা ‘আত্মনির্ভর ভারত’ ওইহন্নবা ৱারেপ অসিসু মসিগী মহোত্সব অসিগী শরুক অমনি। চহি কাংলুপ খুদিংমক্কী প্রজাশিংনা লৈবাক শিনবা থুংনা পাঙথোকপা থৌরম কয়াদা থৱায় য়াওনা শরুক য়াখি। মসিগী অচৌবা কুম্মৈ অসি ‘হর ঘর তিরঙ্গা অভিয়ান’গা লোয়ননা মখা চত্থরি। লৈবাক অসিগী কাচিন-কোয়া শিনবা থুংবদা ভারতকী মচু অহুমগী ফিরাল পাইহল্লি। য়াম্না চাউবা মওংদা নীংতম ইহৌগী অসি অমুক হন্না হিংগৎহল্লিবা অসি উবদা অথোইবশিংনা নুংঙাইবা ফাওরমগনি।

ঐখোয়গী লৈবাক্কী চাউরবা লমদম অসিদা ঐখোয়গী মতিক-ময়াই লৈয়া নীংতম ইহৌ অসি থৌনা ফনা শোক্নখি। অথোইবা নীংতম লান্মী কয়ানা মখোয়গী থৌদাং অদু পাঙথোকখি অমসুং মখোয়গী থৌনা ফবা থৌদাংশিং পাঙথোকপগী মমি থমলমদুনা মীৎকপ থোকপগী মৈরা অদু খুৎশিন্নরমখি। মরু ওইনা লৌমী অমসুং ত্রাইবেল মীয়ামগী মরক্তা মতম শাংনা অকাও পরৈ চল্লুরবা অথৌবা অমসুং মখোয়গী ইহৌ কয়া লৈ। সরকারনা মমাং চহিদা নবেম্বর ১৫বু ‘জনজতীয় গৌরব দিবস’ ওইনা পাঙথোক্নবা লৌখিবা ৱারেপ অদু তরাম্না ওকলি মরমদি ঐখোয়গী ত্রাইবেলগী অথৌবশিং অসি শুপ্নগী লোকেল নত্রগা রিজনেল আইকন খক্তা নত্তে মখোয়না জাতি পুম্ববু ইথিল পীরি।

নুংশিরবা প্রজাশিং,

জাতি অমগীদমক, মরুওইনা ভারতগুম্বা অরিবা জাতি অমগীদমক চহি ৭৫ শুরকপা অসি য়াম্না থুনমক হৌখিবগা মান্নৈ। অদুবু ঐখোয়গীদমক্তদি মসি পুন্সি খোঙচৎ অমগা পাঙখক ওইরি। ঐখোয়গী ইরক্তা লৈরিবা সেনিয়র সিতিজেনশিংনা মখোয়গী পুন্সিদা অচৌবা অহোংবা অমা উবা ফংখি। মখোয়না নীংতম্বা ফংলবা মতুংদা মীরোল খুদিংমক্না মতৌ করম্না কন্না হোৎনখিবগে; ঐখোয়না মতৌ করম্না অচৌবা শীংনবা কয়া মায়োক্নখিবগে অমসুং মতৌ করম্না ঐখোয়গী তুংলমচৎকী থৌদাং লৌখিবগে হায়বদু উবা ফংখি। থৌওং অসিদগী তমশিনখিবা পরাশিং অদু ঐখোয়না জাতিগী খোঙচৎতা মথংগী মাইপাকপগী পন্দুপ  - অমৃত কাল, ঐখোয়গী নীংতম্বা ফংবগী চহি চামা শুবগী কুমওন য়ৌগদবা চহি ২৫, তম্না চংশিনবদা য়াম্না কান্নরগনি।

২০৪৭ ফাওবদা ঐখোয়না ঐখোয়গী নীংতম লান্মীশিংগী মংলানশিং অদু মপুং ফানা মঙফাওনহল্লগনি। বাবাসাহেব ভিমরাও অম্বেদকরনা লুচিংদুনা কন্সতিত্যুসন শেম্বিরবা মীওইশিংগী মঙলান্দা ঐখোয়না অচৌবা মতেং অমা পীরগনি। ঐখোয়না হান্নদগী হৌনা আত্মনির্ভর ভারত, মাগী অশেংবা মতিক-ময়াই পুথোকপা ঙম্বা ভারত অমা শেমগৎনবা মাইকৈদা চংশিল্লি।

হৌখিবা চহি খরসিদা মালেমনা অনৌবা ভারত অমা শেমগৎলকপা উবা ফংখি, কোবিদ-১৯ শন্দোক্লবা মতুংদনা হেন্না হেনগৎলকখি। লাইচৎ অসি থেংননবা লৌখৎখিবা ঐখোয়গী রেসপোন্স অসি মফম খুদিংমক্তা থাগৎনরকখি। ঐখোয়না লৈবাক অসিদা শাজবা ভেক্সিনশিংগা লোয়ননা মীওইবগী পুৱারিদা খ্বাইদগী চাউবা ভেক্সিনেসন দ্রাউব চত্থখি। হৌখিবা থাদা ঐখোয়না অপুনবাব ভেক্সিন কভরেজদা করোর ২০০ হেনখি। কোবিদ-১৯ লাকশিনবদা ঐখোয়গী মাইপাকপশিং অসি চাউখৎলবা লৈবাক কয়াদগী হেন্না ফবা ওইখি। মসিগী থৌনা অসিগীদমক ঐখোয়না ঐখোয়গী বিজ্ঞানিকশিং, দোক্তরশিং, নর্সশিং, পেরামেদিকশিং অমসুঙ্ তিকা থাবগা মরি লৈনবা স্তাফশিংবু থাগত্পা ফোঙদোকচরি।

লাইচৎ অসিনা মালেম পুম্বদা পুন্সি কয়া অমা অমসুং শেন্মিৎলোন কয়া অমা মাঙহনখ্রে। মালেম অসিনা অচৌবা লাংফম অসিনা পীরকপা শেন্মিৎলোনগী চৈথেং থেংনরিঙৈদা, ভারতনা মওং চুম্না থেংনহৌদুনা ঙসিদি মাংজিল থানা চঙশিল্লি। মালেমদা ভারতসু খোঙজেল য়াঙনা খুমাং চাউশিল্লিবা শেন্মিৎলোনশিংগী মরক্তা অমা ওইরি। ভারতকী স্তার্ত-অপ ইকোসিস্তেম অসিসু মালেমদা ৱাংলি। ঐখোয়গী লৈবাক অসিগী স্তার্ত-অপশিংনা মায় পাক্লকপা মরুওইনা য়ুনিকোর্ন মশীং থীঙমদনা য়ামখৎলকপা হায়বসি ইন্দস্ত্রিএলগী ওইবা খুমাং চাউশিল্লকপগী খুদম অমনি। লৈঙাক অমসুং পোলিসী মেকরশিংনা মালেমদা চৎলিবা মওং অসিবু থুগাইদুনা শেন্মিৎলোন চাউখৎপগী মনা লৌফম থোকই। হৌখিবা চহি খরা অসিদা, ফিজিকেল অমসুং ইনফ্রাস্ত্রকচরগী ওইবা মমাংদা উখিদ্রিবা খুমাং চাউশিনবা কয়া অমা উবা ফংলে। প্রধান মন্ত্রী গতি-শক্তি য়োজনাগী খুত্থাংদা, ঈশিং, কংফাল, নোংথক অসিনচিংবদা য়ুম্ফম ওইবা চৎথোক চৎশিনগী লম্বী কয়া অমনা লৈবাক শীনবা থুংনা শম্নহন্দুনা লৈবাক অসিগী চত্থোক চৎশিন্দা হেন্না খুদোং চাহল্লে। লৈবাক অসিদা উরিবা চাউখৎপগী শক্তম অসিগীদমকসু, শিন্মীশিং অমসুং লৌমীশিংনা কন্না হোৎনজবনা অমসুং কর্বারৱালাশিংনা লন হেনগৎহনবদগী  ফংলকপনি। থম্মোই হেন্না পেন্নিংঙাই ওইবা অমদি, খুমাং চাউশিনবগী মওং অসি পুম্নমকপু কোনশিল্লি অমসুং খেন্নবা লৈবশিং হন্থরক্লি।

মসিনা অহৌবখক্তমক ওইদ্রি। শেন্মিৎলোনগী রিফোর্ম অমসুং পোলিসীগী খোঙথাং কয়া অমসু মতম কয়াগী মমাংদগী শেমগৎলক্লি। খুদম ওইনা দিজিতেল ইন্দিয়ানসু ৱাখল লৌশিংগী শেন্মিৎলোন শেমদুনা লাক্লি। 'নেসনেল এজুকেসন পোলিসী' অসিনসু তুংগী মীরোলবু ইন্দস্ত্রিএল রিভোলুসনগী মথংগী তাংকক অমদা পুশিনবীদুনা ঐখোয়গী হেরিতেজগা শম্নহন্নবা পান্দম থম্লি।

শেন্মিৎলোন্দা মায় পাকপনা হিংবদা লায়হনবগী চাংসু হেনগৎলক্লি। শেন্মিৎলোনগী রিফোর্মশিংসু অনৌবা য়াইফ-থৌরাংগী খোঙথাংশিংগা শম্ননা চৎমিন্নরি। মশাগী য়ুম অমা লৈজবা হায়বসি লাইরবশিংগী মংলান অমা ওইদ্রে, মসি মীওই কয়া অমগী অশেংবা লন হায়বদু ওইরে, মসিগীদমক 'প্রধান মন্ত্রী অৱাজ য়োজনা'বু থাগৎফম থোকই। মসিগা মান্ননা, 'জল জীবন মিসন'গী মখাদা, তোতী ঈশিংসু 'হর ঘর জল' থৌশিলনহেক  হৌদোক্লকপদগী য়ুমথোং খুদিংদা পীরি। 

ময়াম অসিগী অমসুং মসিগা মান্নবা থৌরাং কয়া অমগী পান্দম অসি মীপুম খুদিংদা মরুওইনা লাইরবশিংদা তঙাইফদবা খুদোংচাবশিং পীবা হায়বসিনি। ঙসিগী ভারতকী মরুওইবা ৱাহৈ অমা হায়রবদি নুংশিবা; কনা লৈজদ্রবশিংগীদমক, লাইরবশিংগীদমক অমসুং শোত্থরবশিংগীদমক হায়বনি। ঐখোয়গী জাতিগী মগুন খরদি ঐখোয়গী সংবিধান্দা প্রজাশিংগী ফন্দামেন্তেল দ্যুতী ওইনা য়াওরি। ঐহাক্না মীয়ামদা মখোয়গী তঙাইফদবা থৌদাংশিং খঙনবা অমসুং লৈবাক অসিনা অনৌবা খুমাং চাউশিনবা অমা ফংনবগীদমক ঙাকনা চৎপীনবগীদমক আপিল তৌজরি।

নুংশিজরবা প্রজাশিং,

শেমদোক শাদোকপা কয়া অসিগী ময়োলদা, ঐখোয়না হকশেল, এজুকেসন, শেন্মিৎলোন অমসুং অতোপ্পা মসিগা মরী লৈনবা হীরম কয়া অমগা লোইননা অফবা লৈঙাক্তা মীৎয়েং থমলিবা অসি উরে।  'লৈবাক্না হান্না' হায়বা ৱাখল্লোন অসিগা লোইননা থবক অমা পায়খৎপা মতমদা, হায়রিবসিমক ৱারেপ খুদিংদা অমসুং সেক্তর খুদিংদা মমি তাবা উই। মসি মালেমদা লৈরিবা ভারতকী ফিরেপতসু মমি তারি।

ভারতকী অনৌবা থাজবসি মসিগী নহাশিং, লৌমীশিং, অমসুং নুপীশিংদগী হৌরকপনি। জেন্দর ইনইক্বেলিতী হায়বসি হন্থরক্লি অমসুং নুপী ওইবীশিংনা লিক্লিগী পল কয়া থুগাইদুনা মাংজিল থানসু চঙশিল্লক্লি। মখোয়না খুন্নাইগী অমসুং রাজনিতীগী থৌওংশিংদা য়াওশিল্লকপনা মসিবু হেন্না মায় পাকহনগনি। খ্বাইদগী মখোঙদগী য়েংবদা, পঞ্চায়তি রাজ ইন্সতিত্যুসন্দা ঐখোয়গী মীখল মায় পাক্লবী নুপী মীহুৎ লাখ ১৪ হেন্না লৈরি।

ঐখোয়গী ইচানুপীশিং অসি লৈবাক অসিগীদমক্তা খ্বাইদগী চাউবা আশানি।  খরা অমনা হন্দক্তা পাংথোককিবা কমনৱেল্থ গেম্সতা লৈবাক অসিগীদমক্তা মিংচৎ পুরকখি। তশেংনা হায়রবদদা ভারতকী শান্নরোইশিংনা ইন্তর্নেস্নেল কমপিতিশনশিংদা মখোয়গী পার্ফোর্মেন্স অদুনা লৈবাক অসিবু চাউথোকহল্লকখি। ঐখোয়গী মাইপাক্লবশিং কয়া অমদি খুনাই অসিগী খ্বাইদগী হেন্না শোত্থরবা কাংলুপশিংদগীনি। ফাইতর পাইলতশিং ওইবদগীনা স্পেস সাইন্তিস্ত ফাওবা ওইদুনা ঐখোয়গী ইচানুপীশিংনা অৱাংবা থাক কয়া অমা কাখৎলি।

নুংশিজরবা প্রজাশিং,

ইন্দিপেন্দেন্স দেগী থৌরম পাংথোকপদা, ঐখোয়না ঐখোয়গী ‘ভারতিয়তা’ অসিবু নুংঙাইবা ফোংদোক্লিবনি। ঐখোয়গী লৈবাক অসি দাইভর্সিতীনা পিক থল্লে। অদুবু মতম অসিমক্তদা, ঐখোয় পুম্নক্তা চপ মান্নবা অমদি লৈ। মসিগী চপ মান্নবা লংলা অসিনা ঐকোব পুম্নমক অসিবু পুনশিল্লি অমসুং এক ভারত শ্রেস্থ ভারতকী ৱাখল্লোন অসিগা লোইননা পুন্না চৎমিন্ননবা ঐখোয়বু থৌগৎলি।

ভারত অসি য়াম্না ফজবা লৈবাক অমনি, লোইননা মফম অসিগী চিং, তুরেল, পাত অমসুং উমং-ৱামং অমসুং অসিগুম্বা মহৌশাগী ওইবা ফজরবা মফম অসিদা লৈরিবা শা-শনশিং অমসুং উচেক-ৱায়াশিং  অসিনসু মরম ওইরিবনি। মহৌশাগী অকোইবদা লৈরিবা ফিভম  অসিনা অনৌবা শিংনবা কয়া ময়োক্নবা মতমদা ঐখোয়না ভারত অসিবু ফজহল্লিবা খুদিমকপু ঙাক-শেন্দুনা থম্নবগীদমক্তা অচেৎপা ফিরেপ লৌগদবনি। ঈশিং, লৈবাক লৈহাও অমসুং বায়ো-দাইভর্সিতী নিংথিনা শিজিন্নদুনা থম্বা হায়বসি ঐখোয়গী হৌগৎলক্লিবা অঙাংশিংগী মাইকৈদা তৌফম থোকপা ইথৌনি। মহৌশা লাইরেম্বিগীদমক্তা ঙাক-শেনবীবা হায়বসি ভারতকী চৎনবীগি শরুক অমনি। ঐখোয়গী লমদম অসিগী ওইবা হিংবগী মওং-মতৌ অসিগা লোইননা, ঐখোয় ভারতমচাশিংনা মালেম অসিগী অতোপ্পা কয়া অমদা উৎপা ঙমগনি। বোগ অমসুং আয়ুর্বেদ অসি মালেম অসিদা ভারতকী মপাল নাইদ্রবা খুদোলনি।  মালেম শিনবা থুংনা মখোয়শিং অসিবু পাম্নবা হেনগৎলক্লি।

নুংশিজরবা ইরৈবাকচাশিং,

ঐখোয়গী লৈবাক অসিনা ঐখোয়গী পুনশিদা লৈরিবা পুম্নমক ঐখোয়দা পিরিবনি। ঐখোয়না ঐখোয়গী লৈবাক অসিগী সেফ্তী, সেক্যুরিতী, প্রোগ্রেস অমসুং প্রোসপরিতীগীদমক্তা ঐখোবনা তৌবা ঙম্বা খুদিংমক তৌনবগীদমক্তা ৱাশক্কদবনি। ভারত অসিবু মিংচৎ লৈবা অমা ওইনা শেমগৎপা মতমদতা ঐখোয়না হিংলিবা অসিগী ৱাহন্থোক লৈগদৌরিবনি। ইন্দিয়ন লিতরেচরবু কন্নদা লোলগী খুত্থাংদা চাউখৎহল্লম্বা, য়াম্না মমিং লৈরবা নেস্নেলিস্ত পোইত কুভেমপুনা ইরম্মি:

নানু আলিৱে, নীনু আলিৱে

নম্মা এলুবুগল মেলে

মুদুৱুদু মুদুৱুদু

নৱভারতদা লীলে

মসিগী ৱাহন্থোক্তি

‘ঐহাক চৎখিগনি

অসুম্না অদোমসু চৎখিগনি

অদুবু ঐখোবগী শরুদা হোগৎলকখিগনি

অনৌবা ভারতকী ফজরবা ৱারী’

মসি ইমা লৈবাক্কীদমক্তা অমসুং ইরৈবাকচাশিংগী চাউখৎ-থৌরাংগীদমক্তা মপুং ফানা কত্থোক্নবগীদমক্তা নেস্নেলিস্ত পোইত অমগী য়াহৌ খোল্লাওনি। মসিগী ৱাকল্লোনশিং অসিগী মতুং ইন্নবা ২০৪৭গী ভারত শেমগৎকদোরিবা লৈবাক অসিগী নআরোলশিংদা ঐহাক্না অখন্ননা আপীল তৌরি। 

ঐহাক্না লোইশিন্দ্রঙৈগী মমাংদা, ঐহাক্না আর্মদ ফোর্সশিংদা, মপান লমদা ভারতকী মিসনশিংগী মেম্বরশিং, অমসুং মশাগী মমালৈবাকপু লেপ্তনা চাউথোহল্লিবা ইন্দিয়ন দাইপোরাদা ইন্দিপেন্দেন্স দেগী য়াইফ-পাউজেল পীরি। নখোয় পুম্নমক্তা ঐহাক্কী য়াইফ-পাউজেল পীরি।

থাগৎচরি,

জয় হিন্দ!

****