প্রধানমন্ত্রীগী লোইশঙ
প্রধান মন্ত্রীনা কম্মনৱেল্থ গেম্স ২০২২গী ভারতকী কন্তিঞ্জেন্তপু ওক্তুনা ইকায় খুম্নখ্রে
“শান্নরোইশিংগী মশক থোকপা হোৎনজমন্দগী, লৈবাক অসিনা ইথিল পীনিংঙাই ওইরবা মায় পাকপা কয়াগা লোয়ননা নীংতম্বগী অমৃত কালদা খোঙদারি”
“শান্নরোইশিংনা লৈবাক্কী নহারোলশিংদা শান্ন-খোৎনবখক্তা নত্তনা অতোপ্পা সেক্তরশিংদসু মীথোই মীহেন্নবা ইথিল পীরি”
“ঐখোয়গী নীংতম ইহৌগী খ্বাইদগী অথোইবা পাঙ্গল অমসু ওইখিবগুম্না অদোম্না লৈবাকপু ৱাখল্লোন অমসুং পান্দমগী হীরমদা লৈবাকপু অমত্তা ওইহল্লি”
“মচু অহুমগী ফিরালগী মপাঙ্গল অসিদি ঐখোয়না য়ুক্রেন্দা উখ্রে, মসিনা ভারত মচা খক্তগী নত্তনা অতোপ্পা লৈবাক্কী মীয়ামশিংনা লানফম অসিদগী থোক্লকপদা ঙাক্লৌ চুংগোই ওইখিবনি”
“ঐখোয়দা মালেমগী ওইনা অফবা, ইনক্লুসিব, তোঙানবা মতৌ চেনবা অমসুং মতিক লৈবা স্পোর্ত ইকোসীস্তেম অমা শেম্বগী থৌদাং লৈ। তেলেন্ত অমত্তা চিত্থহনবা য়াদে”
Posted On:
13 AUG 2022 1:13PM by PIB Imphal
প্রধান মন্ত্রী, শ্রী নরেন্দ্র মোদীনা নই দিল্লীদা কম্মনৱেল্থ গেম্স (সি.দবল্যু.জি.) ২০২২গী ভারতকী কন্তিঞ্জেন্তপু ওক্তুনা ইকায় খুম্নখ্রে। ওকপগী থৌরমদা শান্নরোই অমসুং মখোয়গী কোচশিংনা শরুক য়াখি। থৌরম অসিদা শরুক য়াখিবশিংগী মরক্তা য়ুথ এফিয়র্স অমসুং স্পোর্ত, অমদি ইনফোর্মেসন অমসুং ব্রোদকাস্তিংগী কেন্দ্র মন্ত্রী, শ্রী অনুরাগ সিংহ থাকুর অমসুং য়ুথ এফিয়র্স অমসুং স্পোর্তকী রাজ্য মন্ত্রী, শ্রী নিতিশ প্রমানিকসু য়াওখি।
বর্মিংঘামদা পাংথোকখিবা কম্মনৱেল্থ গেম্স ২০২২দা ভারতনা তোঙানবা মশান্নশিংদা মশক থোকপা পরফোর্মেন্স উত্তুনা গোল্দ ২২, সিলভর ১৬ অমসুং ব্রোঞ্জ ২৩ লৌখিবগীদমক্তা প্রধান মন্ত্রীনা শান্নরোই অমসুং মখোয়গী কোচশিংবু থাগৎখি। প্রধান মন্ত্রীনা শান্নরোই অমসুং কোচশিংবু তরাম্না ওকপগা লোয়ননা সি.দবল্যু.জি. ২০২২দা ভারতকী শান্নরোইশিংনা ফংখিবা মায় পাকপশিংদা মহাক্না চাউথোকচবা ফাওই হায়নসু ফোংদোকখি। শান্নরোইশিংগী মশক থোকপা হোৎনজমন্দগী লৈবাক অসিনা ইথিল পীনিংঙাই ওইরবা মায় পাকপা কয়াগা লোয়ননা নীংতম্বগী অমৃত কালদা খোঙদারিবা অসি তসেংনা চাউথোকচনীংঙাইনি হায়না প্রধান মন্ত্রীনা ফোংদোকখি।
হৌখিবা চয়োল খরসিদা লৈবাক্না শান্ন-খোৎনবগী লমদা অচৌবা মায় পাকপা অনি ফংখ্রে হায়না প্রধান মন্ত্রীনা মীয়ামগী পুক্নিং চিংশিনখি। কম্মনৱেল্থ গেম্সতা পুৱারী ওইরবা থৌওং পাংথোকখিবগা লোয়ননা, লৈবাক অসিনা চেস ওলিম্পিয়াদসু অহানবা ওইনা য়ুম্বু ওইদুনা পাংথোকখি। প্রধান মন্ত্রীনা শান্নরোইশিংগী মফমদা অসুম্না ফোংদোকখি, “অদোম্না বর্মিংঘামদা শান্নরিঙৈ মরক্তা, ভারত লৈবাক অসিগী লৈবাক মচা করোর কয়ানা অদোমগী থৌওং খুদিং য়েংনবা থেংলবা অহিং ফাওবা তুমদনা লৈনখি। অদোমগী পরফোর্মেন্সশিং পুম্নমক মতম চানা খঙনবগীদমক্তা মীওই কয়ানা এলার্ম থমদুনা তুম্নখিবনি”। মহাক্না কন্তিঞ্জেন্তশিংবু লমথাখিবা মতমদা ৱাশকখিবগী মতুং ইন্না ঐখোয়না ঙসিদি মায় পাকপগী নুংঙাইবা ফোংদোক্লি হায়না প্রধান মন্ত্রীনা হায়খি।
প্রধান মন্ত্রীনা মশক থোকপা পরফোর্মেন্সশিংদা মিৎয়েং চঙলদুনা মেদল কয়া অমসু শম্নাদা লিত্থোকখিবা কয়া য়াওবনা অপুনবা মশিংনা মপুং ওইবা ৱারী তাকপা নত্তে, ৱাখল চেৎপা শান্নরোই কয়ানা মসিবু অথুবা মতমদা শেমদোক্লগনি হায়না ফোংদোকখি। মমাংগী মতমগা চাংদম্নবদা, ভারতনা অনৌবা মশান্না মরিদা মায় পাকপা ঙম্বগী অনৌবা পাম্বৈ কয়া খঙখি হায়না মহাক্না হায়খি। শান্নরোইশিংনা লোন বোলদগী এথলেতিক্স ফাওবদা নীংথিনা শান্নখি। মসিগুম্বা পরফোর্মেন্স অসিদগী ভারতকী নহারোলশিংনা অনৌবা মশান্নদা মায় ওনশিনবগী থৌওং কয়া লৈবাক অসিদা য়াম্না হেনগৎলগনি হায়না প্রধান মন্ত্রীনা থমখি। ভারতকী মচানুপীশিংনা বোক্সিং, জুদো, রেস্তলিং মশান্নদা মায় পাকখিবা অমসুং মখোয়না সি.দবল্যু.জি. ২০২২দা মীথোই মীহেনখিবদা প্রধান মন্ত্রীনা অহেনবা মিৎয়েং চঙখি। খ্বাইদগী অহানবা ওইনা শরুক য়াখিবা শান্নরোইশিংদগী মেদল ৩১ লাকখিবা অসিনা নহারোলশিংনা মশাদা থাজবা হেনবগী মতৌ তাক্লি হায়না মহাক্না ফোংদোকখি।
শান্নরোইশিংনা লৈবাক্কী মফমদা মেদল পীবা খক্তা নত্তনা নুংঙাইবা ফোংদোকপা অমসুং চাউথোকচবগী খুদোংচাবসু পীদুনা ‘এক ভারত, শ্রেস্থ ভারত’কী ৱাশকপু হেন্না চেৎশিনহল্লে হায়না প্রধান মন্ত্রীনা ফোংদোকখি। শান্নরোইশিংনা লৈবাক্কী নহারোলশিংদা শান্ন-খোৎনবখক্তা নত্তনা অতোপ্পা সেক্তরশিংদসু মীথোই মীহেন্নবা ইথিল পীরি হায়না প্রধান মন্ত্রীনা হায়খি। “ঐখোয়গী নীংতম ইহৌগী খ্বাইদগী অথোইবা পাঙ্গল অমসু ওইখিবগুম্না অদোম্না লৈবাকপু ৱাখল্লোন অমসুং পান্দমগী হীরমদা লৈবাকপু অমত্তা ওইহল্লি”, হায়না প্রধান মন্ত্রীনা ফোংদোকখি। নীংতম লান্মী কয়াবু পল্লদুনা, মখোয়গী থৌওং তোঙাল্লবসু, মখোয় পুম্নমক্তা নীংতম্বগী মান্নবা পান্দম লৈখি হায়না প্রধান মন্ত্রীনা হায়খি। মান্নবা থৌওং ওইনা, ঐখোয়গী শান্নরোইশিংনা লৈবাক্কী মিংচৎ পুরকপগী ফম্বাক্তা খোঙদারে। মচু অহুমগী ফিরালগী মপাঙ্গল অসিদি ঐখোয়না য়ুক্রেন্দা উখ্রে, মসিনা ভারত মচা খক্তগী নত্তনা অতোপ্পা লৈবাক্কী মীয়ামশিংনা লানফম অসিদগী থোক্লকপদা ঙাক্লৌ চুংগোই ওইখিবনি হায়না প্রধান মন্ত্রীনা পাউদমখি।
খেলো ইন্দিয়াগী থাক্তগী থোক্লক্তুনা মালেমগী থাক্তা মশক থোকপা থৌওং পাংথোকখিবা শান্নরোইশিংগীদমক্তা প্রধান মন্ত্রীনা নুংঙাইবা ফোংদোকখি। ঐখোয়না হৌজিক উবা ফংলিবা তি.ও.পি.এস. (তার্গেত ওলিম্পিক পোদিয়ম স্কিম)গী কান্নবা মহৈসু মহাক্না পনখি। অনৌবা তেলেন্ত খঙদোক্তুনা মখোয়বু মীয়ামগী ফম্বাক্তা পুথোক্নবা ঐখোয়না হেন্না হোৎনফম থোকপগী তঙাই ফদবা লৈরক্লিবা অসিদসু প্রধান মন্ত্রীনা মিৎয়েং চঙখি। “ঐখোয়দা মালেমগী ওইনা অফবা, ইনক্লুসিব, তোঙানবা মতৌ চেনবা অমসুং মতিক লৈবা স্পোর্ত ইকোসীস্তেম অমা শেম্বগী থৌদাং লৈ। তেলেন্ত অমত্তা চিত্থহনবা য়াদে”, হায়না মহাক্না মীয়ামগী পুক্নিং চিংশিনখি। শান্নরোইশিংগী মায় পাকপশিং অসিদা কোচ, স্পোর্ত এদমিনিস্ত্রেতর অমসুং সপ্পোর্ত স্তাফশিংগী থৌদাংশিংবুসু প্রধান মন্ত্রীনা শকখঙখি।
প্রধান মন্ত্রীনা শান্নরোইশিংগী মফমদা লাক্কদৌরিবা এসিয়ন গেম্স অমসুং ওলিম্পিক্সকীদমক্তা নীংথিনা শেম-শানবা ৱাফম থমখি। নীংতম্বগী অমৃত মহোৎসবকী পুংফম অসিদা লৈবাক্কী স্কুল, অমসুং এজুকেসনগী ইন্সতিত্যুসন ৭৫দা চত্তুনা অঙাংশিংদা ইথিল পীনবা প্রধান মন্ত্রীনা শান্নরোই অমসুং মখোয়গী কোচশিংগী মফমদা মমাং চহিদা হায়খিবসু লৈখ্রবনি। শান্নরোই কয়ানা ‘মীৎ দি চেম্পিয়ন’ কেম্পেনগী মখাদা থবক অসি পাংথোক্তুনা মায় পাকহনখি হায়না প্রধান মন্ত্রীনা পাউদমখি। লৈবাক্কী নহারোলশিংনা শান্নরোইশিংবু মখোয়গী রোল মোদেল ওইনা উবনা মরম ওইরগা থৌওং অসি মখা তানা চত্থনবা মহাক্না শন্নরোইশিংগী মফমদা অমুক্কা হন্না থমখি। “লৈবাক্কী হৌরক্লিবা চারোন-শুরোন্দা কান্নবা পীনবগীদমক্তা মীয়াম্না অদোম অমদি অদোমগী মতিকপু শকখঙবা, অমসুং পাম্নবা হেনগৎলক্লিবা অসিগী কান্নবা লৌসি”, হায়না প্রধান মন্ত্রীনা হায়খি। প্রধান মন্ত্রীনা শান্নরোইশিংবু মখোয়গী ‘বিজয় য়াত্রা’গীদমক্তা থাগৎপা ফোংদোকপগা লোয়ননা মখোয়গী তুংগী থবক-থৌরম খুদিংদা মায় পাকপা ওইয়ু হায়বা য়াইফ পাউজেল পীবগা লোয়ননা প্রধান মন্ত্রীনা মহাক্কী ৱাফম লোইশিনখি।
প্রধান মন্ত্রীগী ঙসিগী ওকপগী থৌরম অসিদি শান্ন-খোৎনবগী মরু ওইবা থৌরম কয়াদা ভারতকী মীহুৎ ওইরিবা শান্নরোইশিংবু পুক্নিং থৌগৎনবা লেপ্তনা পায়খৎলিবা থৌওংশিংগী শরুক অমনি। প্রধান মন্ত্রীনা মমাংগী চহিদা তোকিয়ো ২০২০ ওলিম্পিক্সকীদমক্তা খোঙশানগদৌরিবা ভারতকী শান্নরোইশিংগী কন্তিঞ্জেন্ত অমসুং তোকিয়ো ২০২০ পেরালিম্পিক্স গেম্সকীদমক্তা খোঙশানগদৌরিবা ভারতকী পেরা-এথলীত কন্তিঞ্জেন্তকা উন্নদুনা ৱারী শাখি। প্রধান মন্ত্রীনা কম্মনৱেল্থ গেম্স ২০২২গী মনুংদসু শান্নরোইশিংগী প্রোগ্রেসশিংবু থৱাই য়াওনা ইন্নখি অসুং মখোয়গী মায় পাকপা অমসুং থৱাই য়াওবা হোৎনজমন্দা থাগৎপা ফোংদোকপগা লোয়ননা হেন্না নীংথিনা শান্ননবা পুক্নিংসু থৌগৎখি।
সি.দবল্যু.জি. ২০২২ অসি ইং ২০২২গী জুলাই ২৮দগী ওগস্ত ৮ ফাওবা বর্মিংঘামদা পাংথোকখিবনি। স্পোর্তিং দিসিপ্লিন ১৯ শিনবা থুংবগী ইভেন্ত ১৪১দা অপুনবা শান্নরোই ২১৫না মসিদা শরুক য়াখিবনি, অমসুং ভারতনা তোঙানবা মশান্নশিংদা গোল্দ ২২, সিলভর ১৬ অমসুং ব্রোঞ্জ ২৩ লৌবা ঙমখিবনি।
*****
(Release ID: 1851536)
Visitor Counter : 139
Read this release in:
Bengali
,
Assamese
,
Malayalam
,
Kannada
,
English
,
Urdu
,
Hindi
,
Marathi
,
Punjabi
,
Gujarati
,
Odia
,
Tamil
,
Telugu