নহারোল অমসুং শান্ন-খোৎনবগী মন্ত্রালয়
ভারতনা সি.দবল্যু.জি. ২০২২গী ৬নি চনবা নুমিৎতা সিলভর অমা অমসুং ব্রোঞ্জ মেদল মরি লৌবা ঙমখ্রে
Posted On:
04 AUG 2022 11:53AM by PIB Imphal
মরু ওইবা হাইলাইৎশিং:
- রাস্ত্রপতি, শ্রীমতি দ্রৌপদী মুর্মু অমসুং প্রধান মন্ত্রী শ্রী নরেন্দ্র মোদীনা লবপ্রীতকী শীংথানীংঙাই ওইরবা পর্ফোরমেন্সকীদমক থাগৎপা ফোঙদোকখ্রে
- পুৱারী শেমখিবগীদমক অমসুং সি.দবল্যু.জি.দা মহাক্কী অহানবা মেদল লৌবা ঙমলকপগীদমক তেকস্বিন শঙ্করবু থাগৎপা ফোঙদোকচরি, ব্রোঞ্জ অসো গোল্দদগী হেন্না মরু ওই: শ্রী অনুরাগ সিংহ থাকুর
ভারতনা বর্মিংহমদা পাঙথোক্লিবা কম্মনৱেল্থ গেমস ২০২২গী ৬নি চনবা নুমিৎতা সিলভর অমা অমসুং ব্রোঞ মেদল ৪ লৌবা ঙমখি। লবপ্রীত সিংহগী ব্রোঞ্জ মেদলগী মতুংদা জুদোকা তুলিকা মান্না কেজি ৭৮+দা সিলভর লৌখি, ৱেতলিফতর গুরদীপ সিংহনা নুপাগী কেজি +১০৯দা ব্রোঞ্জ মেদল লৌখি, সৌরব ঘোসালনা ব্রোঞ্জ লৌবা ঙমখি অমসুং তেজস্বিন শঙ্করনা হাই জম্পতা ভারতকী খ্বাইদগী অহানবা মেদল লৌদুনা এথলেতিক্সকী পুৱারী শেম্বা ঙমখি। ভারতকী মেদল তেল্লী অসি গোল্দ ৫, সিলভর ৬ অমসুং ব্রোঞ্জ মেদল ৭ লৌবা ঙমখিবগা লোয়ননা ১৮ শুখ্রে। রাস্ত্রপতি শ্রীমতি দ্রৌপদী মুর্মু, প্রধান মন্ত্রী শ্রী নরেন্দ্র মোদী, কেন্দ্রগী স্পোর্তস মন্ত্রী শ্রী অনুরাগ থাকুর অমসুং লৈবাক অসিগী কাচিন কোয়াদা লৈরিবা ভারত মচাশিংনা মেদল লৌরকখ্রবশিংবু মখোয়গী মাইপাকপা অসিগীদমক থাগৎপা ফোঙদোক্নরক্লি।
রাস্ত্রপতি শ্রীমতি দ্রৌপদী মুর্মুনা তেজস্বিন শঙ্করবু থাগৎপা ফোঙদোকখি। রাস্ত্রপতিনা ত্বিত তৌখি, “ব্রোঞ্জ মেদল লৌনবা হোৎনবদা তেজস্বিন সঙ্করনা ফজবা পর্ফোরমেন্স অমা উৎখি। #CommonwealthGames তা হাই জম্পতা মেদল ফংলবা অহানবা ভারত মচা ওইবগীদমক নুংঙাইবা ফোঙদোকচরি। জাতিগী মশক তাক্নবা অদোম্না শীংথানীংঙাই ওইরবা ফিরেপ উৎখি। অহেনবা পুক্নিং থৌগৎনীংঙাই ওইবা থৌনা কয়াগীদমক ঐহাক্না য়াইফ-মঙ্গোল পীজরি।
তুলিকাগী পর্ফোরমেন্স অদু থাগৎলদুনা রাস্ত্রপতিনা ত্বিত তৌরকখি, “তুলিকা মানবু #CommonwealthGamesতা থৌনা ফনা শান্নখিবগীদমক অমসুং জুদোদা সিলভর মেদল লৌরকপগীদমক নুংঙাইবা ফোঙদোকচরি। অদোম্না অঙাং ওইনা মায় পাক্নবগী শীংথানীংঙাই ওইবা থৌনা অমসুং মপাঙ্গল অদু উৎখি। অদোম্না হেন্না থৌনা লৈবা অমসুং তুংগী ইভেন্তশিংদা হেন্না মাইপাকপা ঙম্বা ওইরসনু।”
ত্বিত অমদা রাস্ত্রপতিনা হায়খি, “কন্না হোৎন্দুনা #CommonwealthGamesতা ৱেতলিফতিংদা ব্রোঞ্জ মেদল লৌরকপগীদমক গুরদীপ সিংহবু থাগৎপা ফোঙদোকচরি। অদোম্না অদোমগী পোদিয়ম ফিনিস অমসুং থৌনা লৈনা লিফ তৌবগা লোয়ননা ভারতপু চাউথোকচবা পোকহল্লে। লাক্কদৌরিবা ইভেন্তশিংদা অদোম্না মায় পাকপগী অনৌবা পনখৈশিং মখা তানা য়ৌবা ঙম্বা ওইরসনু।”
রাস্ত্রপতিনা সৌরববু ব্রোঞ্জ লৌরকপগীদমক থাগৎপা ফোঙদোকখি। রাস্ত্রপতিনা ত্বিত তৌরকখি, “#CommonwealthGamesতা স্কৱাশ মেনস সিঙ্গলসতা ব্রোঞ্জ মেদল লৌরকপা ঙমখিবগীদমক সৌরব ঘোসালবু থাগৎপা ফোঙদোকচরি। ভারতনা অদোমগীদমক চাউথোকচৈ মরমদি অদোম্না নুপাগী সিঙগ্লস স্কৱাশতা ভারতকীদমক অহানবা মেদল ফংদুনা অনৌবা মফম অমা কনবা ঙমখি।”
প্রধান মন্ত্রী, শ্রী নরেন্দ্র মোদীনা স্কৱাশ শান্নরোয় সৌরব ঘোসাল, জুদো শান্নরোয় তুলিকা মান, ৱেতলিফতর গুরদীপ সিংহ অমসুং তেজস্বিন শঙ্করনা সি.দবল্যু.জি ২০২২দা মেদলশিং লৌরকপগীদমক থাগৎপা ফোঙদোকখি।
প্রধান মন্ত্রীনা তেজস্বিন শঙ্করবু হাই জম্পতা ভারতকী অহানবা মেদল লৌরকপগীদমক থাগৎপা ফোঙদোকখি। তেজস্বিন শঙ্করনা হাই জম্পতা ফংখিবা ব্রোঞ্জ অসি ভারতকী ওইনা কম্মনৱেল্থ গেমস ২০২২গী ত্রেক এন্দ ফিল্দগী অহানবা মেদলসু ওইরি। প্রধান মন্ত্রীনা ত্বিত তৌখি, “তেজস্বিন শঙ্করনা পুৱারী শেম্বা ঙমখ্রে। মহাক্না সি.দবল্যু.জি.দা হাই জম্পতা ঐখোয়গী অহানবা মেদল লৌবা ঙমখি। ব্রোঞ্জ মেদল লৌরকপগীদমক মহাকপু থাগৎচরি। মহাক্না হোৎনখিবশিং অদুগীদমক চাউথোকচবা পোকই। মহাক্কী তুংগী পুন্সিগীদমক য়াইফ-মঙ্গোল পীজরি। মহাক্না তুংদা মাইপাকপা ঙম্বা ওইরসনু।”
গুরদীপ সিংহবু থাগৎলদুনা প্রধান মন্ত্রীনা ত্বিত তৌখি, “হোৎনবা কনবা অমসুং কত্থোকপনা চাউনা মাইপাকপা ঙমহল্লি… ৱাফম অসি গুরদীপ সিংহনা সি.দবল্যু.জি.দা ৱেতলিফতিংদা ব্রোঞ্জ মেদল লৌদুনা উৎখি। মহাক্না ঐখোয়গী প্রজাশিংগী মরক্তা হরাও নুংঙাইবা ফাওরিবা অসি হেন্না হেনগৎহনখি। মহাকপু থাগৎচরি অমসুং তুংগী পুন্সিগীদমক য়াইফ-মঙ্গোল পীজরি।”
অতোপ্পা ত্বিত অমদা পি.এম.না জুদো শান্নরোয় তুলিকা মানবু থাগৎখি অমসুং হায়খি, “তুলিকা মান্না বর্মিংহম গেমসতা ঙান্থোইখ্রে! জুদোদা মহাক্না সিলভর মেদল লৌরকপা ঙমখিবগীদমক থাগৎপা ফোঙদোকচরি। মহাক্কী অখন্নরবা স্পোর্তিং কেরিয়রদা মেদল অসিনা অতোপ্পা মাইপাকপা অমগা হাপলরে। মহাক্কী তুংগী পুন্সিগীদমক য়াইফ-মঙ্গোল পীজরি।”
সৌরব ঘোসালবু পি.এম.না থাগৎলদুনা ত্বিত তৌখি, “@SauravGhosal না মাইপাকপগী অনৌবা পনখৈশিং য়ৌবা ঙম্বা অসিদা নুংঙাইবা পোকই। মহাক্না বর্মিংহমদা লৌরকখিবা ব্রোঞ্জ মেদল অসি য়াম্না মরু ওইবা অমনি। মহাকপু থাগৎপা ফোঙদোকচরি। মহাক্কী মাইপাকপা অসিনা ভারতকী নহারোলশিংগী মরক্তা স্কৱাশ হেন্না পাম্নবা হেনগৎহনবদা মতেং পাংবা ওইরসনু।”
শ্রী অনুরাগ থাকুরনসু তেজস্বিনবু থাগৎখি অমসুং ত্বিত তৌখি, “ভারতকীদমক সি.দবল্যু.জি.দা হাই জম্পতা মেদল লৌবা ঙমখিবা খ্বাইদগী অহানবা এথলেত। পুৱারী অমা শেমখিবগীদমক অমসুং সি.দবল্যু.জি.দা অদোমগী অহানবা মেদল লৌরকপগীদমক তেজস্বিন শঙ্করবু থাগৎপা ফোঙদোকচরি। ব্রোঞ্জ অসি গোল্দদগী হেন্না মগুন লৈ!!!”
গুরদীপ সিংহবু থাগৎলদুনা স্পোর্তস মন্ত্রীনা ত্বিত তৌখি, “#CWG2022দা ৱেতলিফতিংদা ১০শুবা মেদল ময়ুমদা পুরকপগীদমক গুরদীপপু থাগৎপা ফোঙদোকচরি। কন্তিঞ্জেন্ত পুম্নমক অসি য়াম্না শীংথানীংঙাই ওই। হৌজিক চহি তরাগী খুজিং কয়াদগী চেম্পিয়নশিং পুথোক্তুনা লাকখিবা এন.এস.এন.আই.এস. পতিয়ালানা অতোপ্পা মেদল ৱিনর অমগা পুথোকপা ঙমলে অমসুং সি.দবল্যু.জি.গী হন্দক্কী ইদিসন অসিদা ভারত্তা মেদল ১০ খুদোল তম্বা ঙমখি।”
অতোপ্পা ত্বিত অমদা শ্রী থাকুরনা হায়খি, “#CWG2022দা ব্রোঞ্জ অমা লৌরকপগীদমক সৌরব ঘোসালবু থাগৎপা ফোঙদোকচরি। অদোমগী মেদল অসিনা নহা কয়াবু স্কৱাশ শান্ননীংনবা ইথিল পীরগনি। মসি ঐখোয়না চেম্পিয়ন কয়া পুথোকপা ঙমগদবা দিসিপ্লিন অমনি অমসুং গেম অসিগী চাউখৎহন্নবগীদমক মতিক চাবা ইনফ্রাস্ত্রকচর স্পোর্তস বিভাগনা পীগনি।”
গুরদীপ সিংহগী মাইপাকখিবশিংগীদমক মসিদা নম্বীয়ু
তুলিকা মানগী মাইপাকখিবশিংগীদমক মসিদা নম্বীয়ু
সৌরব ঘোসালগী মাইপাকখিবশিংগীদমক মসিদা নম্বীয়ু
*******
(Release ID: 1848290)
Visitor Counter : 117