নহারোল অমসুং শান্ন-খোৎনবগী মন্ত্রালয়
ভারতনা সি.দবল্যু.জি. ২০২২গী ৫নি চনবা নুমিৎতা গোল্দ ২ অমসুং সিলভর মেদল ২ লৌবা ঙমখ্রে
লোন বোল্সকী পুৱারী ওইরবা গোল্দগী মতুংদা ভারতনা নুপাগী তেবল তেনিসতা গোল্দ অমা, বেদমিন্তন মিক্সতা সিলভর অমা অমসুং নুপাগী কেজি ৯৬কী ৱেতলিফতিংদা সিলভর অমা লৌবা ঙমখি
Posted On:
03 AUG 2022 11:20AM by PIB Imphal
মরু ওইবা হাইলাইৎশিং:
- রাস্ত্রপতি, শ্রীমতি দ্রৌপদী মুর্মু অমসুং প্রধান মন্ত্রী শ্রী নরেন্দ্র মোদীনা শান্নরোয়শিংদা মখোয়গী শীংথানীংঙাই ওইরবা পর্ফোরমেন্সকীদমক থাগৎপা ফোঙদোকখ্রে
- শান্নরোয়শিংবু থাগৎপা ফোঙদোক্লদুনা স্পোর্তস মন্ত্রী অনুরাগ সিংহ থাকুরনা হায়খি কম্মনৱেল্থ গেমসতা শান্নরোয়শিংনা ফজরবা পর্ফোরমেন্স উৎখি
ভারতনা বর্মিংহমদা পাঙথোক্লিবা কম্মনৱেল্থ গেমস ২০২২গী ৫নি চনবা নুমিৎতা মেদল ৪ লৌবা ঙমখি। নুপী মরিগী লোন বোল্স তৌমনা পুৱারী ওইরবা গোল্দ অমা লৌরবা মতুংদা নুপাগী তেবল তেনিস তীমনা ফাইনেলদা সিঙ্গাপুরবু ৩-১দা মাইথিবা পীরম্লগা নুমিৎ অসিদা অনিশুবা গোল্দ মেদল লৌবা ঙমখি। ৱেতলিফতর বিকাস থাকুরনা নুপাগী কেজি ৯৬কী ফাইনেলদা সিলভর মেদল অমা লৌরবা মতুংদা বেদমিন্তন মিক্স তীমনা ফাইনেলদা মলেসিয়াগী মখুৎতা মাইথিহৌদুনা সিলভর মেদল লৌখি। ভারতকী মেদল তেল্লী অসি গোল্দ ৫, সিলভর ৫ অমসুং ব্রোঞ্জ মেদল ৩ লৌবা ঙমখিবগা লোয়ননা ১৪ শুখ্রে। রাস্ত্রপতি শ্রীমতি দ্রৌপদী মুর্মু, প্রধান মন্ত্রী শ্রী নরেন্দ্র মোদী, কেন্দ্রগী স্পোর্তস মন্ত্রী শ্রী অনুরাগ থাকুর অমসুং লৈবাক অসিগী কাচিন কোয়াদা লৈরিবা ভারত মচাশিংনা তীম অসিবু মখোয়গী মাইপাকপা অসিগীদমক থাগৎপা ফোঙদোক্নরক্লি।
রাস্ত্রপতি শ্রীমতি দ্রৌপদী মুর্মুনা সি.দবল্যু.জি. ২০২২দা গোল্দ মেদল লৌরকপগীদমক তেবল তেনিস তীমবু থাগৎপা ফোঙদোকখি। রাস্ত্রপতিনা ত্বিত তৌখি, “সাথিয়ান জ্ঞানসেকরন, হরমীত দেসাই, শরত কমল অমসুং সনীল শেত্তীনা সি.দবল্যু.জি. ২০২২দা তেবল তেনিসতা পুৱারী ওইরবা গোল্দ মেদল লৌরকপগীদমক থাগৎপা ফোঙদোকচরি। মখোয়না থোইদোক হেন্দোকপা স্কিল অমসুং অখাং কনবা উৎখি। মখোয়না লৈবাক্কী থমোয় জয় তৌবা ঙমখি। মখোয়গী মাইপাক অসিনা ঐখোয়গী নহারোলশিংদা ইথিল পীগনি হায়না ঐহাক্না থাজৈ।”
বেদমিন্তন তীমবু থাগৎপা ফোঙদোক্লদুনা প্রধান মন্ত্রীনা ত্বিত তৌখি, “মিক্স তীম ইভেন্ত কম্মনৱেল্থ গেমসতা সিলভর মেদল লৌরকপগীদমক ভারতকী বেদমিন্তন তীমগী মেম্বরশিংবু থাগৎপা ফোঙদোকচরি। মখোয়না উৎখিবা স্কিল, তীম ৱার্ক অমসুং থৌনা অদু শীংথানীংঙাই ওই। ঐহাক্না শান্নরোয় পুম্নমকপু থাগৎলি।”
প্রধান মন্ত্রী শ্রী নরেন্দ্র মোদীনা সি.দবল্যু.জি. ২০২২দা তেবল তেনিস তীমনা গোল্দ মেদল লৌরকপা, বেদমিন্তন তীমনা সিলভর মেদল লৌরকপা অমসুং বিকাস থাকুরনা সিলভর মেদল লৌরকপদা থাগৎপা ফোঙদোকখ্রে।
প্রধান মন্ত্রী, শ্রী নরেন্দ্র মোদীনা তেবল তেনিসকী ওইনা জি. সাথিয়ান, হরমীত দেসাই, শরত কমল অমসুং সনীল শেত্তীনা গোল্দ মেদল লৌরকপদা থাগৎপা ফোঙদোকখ্রে। প্রধান মন্ত্রীনা ত্বিত তৌখি, “তেবল তেনিসকী ওইনা নুংঙাইরবা পাউ! জি. সাথিয়ান, হরমীত দেসাই, শরত কমল অমসুং সনীল শেত্তীগী দাইনামিক ওইবা তীমবু সি.দবল্যু.জি.দা গোল্দ মেদল লৌরকপা ঙমখিবগীদমক থাগৎপা ফোঙদোকচরি। তীম অসিনা স্কিল নত্ত্রগা অখাং কনবদা ওইরবসু হেন্না ৱাংবা বেঞ্চমার্কশিং থমখি। মখোয়গী তুংগী পুন্সিদা মাইপাক্নবগীদমক ঐহাক্না য়াইফ-মঙ্গোল পীজরি।”
ত্বিত অমদা প্রধান মন্ত্রীনা হায়খি, “ভারতকী বেদমিন্তন তীম @srikidambi, @satwiksairaj, @buss_reddy, @lakshya_sen, @Shettychirag04, তৃসা জোল্লী, আকার্সী কশ্যপ, @P9Ashwini, গায়ত্রি গোপিচান্দ অমসুং @Pvsindhu1না বর্মিংহম সি.দবল্যু.জি.দা সিলভর মেদল লৌরকপগীদমক থাগৎপা ফোঙদোকচরি। নখোয়গী মাইপাকপা অসিগীদমক চাউথোকচবা পোকই।”
অতোপ্পা ত্বিত অমদা পি.এম.না হায়খি, “বেদমিন্তন অসি ভারত্তা খ্বাইদগী পাম্নবা মশান্নশিংগী মরক্তা অমনি। সি.দবল্যু.জি.দা সিলভর মেদল লৌরকপা ঙম্বা অসিনা মশান্না অসিবু হেন্না পাম্নবা হেনগৎহনবদা অমসুং তুংলমচৎতা মীয়াম্না মসিবু হেন্না শান্ননীংনবগী ইথিল পীবদা চাউনা মতেং ওইরগনি।”
ৱেতলিফতর, বিকাস থাকুরনা সিলভর মেদল লৌরকপপু থাগৎলদুনা পি.এম.না ত্বিত তৌখি, “সি.দবল্যু.জি.দা হেন্না মাইপাকপা ঙম্লে, হন্দক্তি বিকাস থাকুরনা মরম ওইদুনা ৱেতলিফতিংদা সিলভর অমা ফংবা ঙমখি। মহাক্না স্পোর্তসতা কত্থোকপা অসি শীংথানীংঙাই ওই। মহাক্কী তুংগী পুন্সিদা মাইপাক্নবগীদমক য়াইফ-মঙ্গোল পীজরি।”
স্পোর্তস মন্ত্রী শ্রী অনুরাগ সিংহ থাকুরনা মেদল লৌরকখ্রবশিংবু থাগৎখি। শ্রী থাকুরনা ত্বিত তৌখি, “অতোপ্পা ফজরবা ফোল্দ মেদল অমগা ফংবা ঙম্লে। ভারতকী নুপাগী তেবল তেনিস তীমনা ফজরবা শো অমা উৎখ্রে। শরত কমল, জি সাথিয়ান অমসুং হরমীত দেসাইনা লুচিংবা ঐখোয়গী পেদ্দলরশিংনা থাশিরবা সিঙ্গাপুরবু ৩-১দা মাইথিবা পীখিবগী মওং অদুদা অপেনবা পোকই। ঐখোয়না মাইপাক্না ঙম্লে!”
অতোপ্পা ত্বিত অমদা শ্রী থাকুরনা হায়খি, “ভারতকী বেদমিন্তন মিক্স তীমনা #CWG2022দা সিলভর ফংনবা হোৎনবদা অখাং কনবা মতৌ উৎখি!! চিরাগ অমসুং সতৱিক অমদি সিন্ধুগী হনবা লৈত্রবা থৌনা অদু অমুক হল্লকপা অদু থাগৎলি! কিদমবীগী ইনর্জেতিক গেম অদু স্পোর্তস পামজবা মীওইশিংনা অপেনবা পোকখি। তৃসা জোল্লী অমসুং গায়ত্রি পুল্লেলানা মখোয়গী থৌনা উৎখি!”
বিকাসপু থাগৎপা ফোঙদোক্লদুনা শ্রী থাকুরনা ত্বিত তৌখি, “পুন্না কিজি ৩৪৬, স্নেৎচ – কেজি ১৫৫, ক্লীন এন্দ জর্ক – কেজি ১৯১ থাংগৎতুনা নুপাগী কেজি ৯৬কী ফাইনেলদা সিলভর মেদল অমা লৌদুনা কম্মনৱেল্থ গেমসতা থংন-থংননা মেদল ৩ লৌখিবা, বিকাস থাকুরনা ফজরবা পর্ফোরমেন্স উৎখি!!”
জি. সাথিয়ানগী মাইপাকপশিংগীদমক মসিদা নম্বীয়ু
হরমীত দেসাইগী মাইপাকখিবশিংগীদমক মসিদা নম্বীয়ু
শরত কমলগী মাইপাকখিবশিংগীদমক মসিদা নম্বীয়ু
সনীল শেত্তীগী মাইপাকখিবশিংগীদমক মসিদা নম্বীয়ু
বিকাস থাকুরগী মাইপাকখিবশিংগীদমক মসিদা নম্বীয়ু
*******
(Release ID: 1847809)
Visitor Counter : 175