“ভারৎ অসি ফত্তবা মিৎয়েং য়েংলকপা খুদিংগী মাইয়োক্তা মতিক চাবা পাউখুম পীবা ঙম্নবা মতিক চানা শেম শাদুনা লৈরবা মপাঙ্গল কনবা অমসুং মশাদা থাজবা লৈবাক অমা ওইরে”, হায়না কেন্দ্রগী ঙাক-শেল মন্ত্রী, শ্রী রাজনাথ সিংহনা ‘কার্গিল বিজয় দিবস’ নীংশিংনবা জুলাই ২৪, ২০২২দা জম্মুদা পাংথোকখিবা থৌরমদা হায়খি। নীংতম্বদগী হৌদুনা লৈবাক্কী সেবাদা থৱাই কত্থোকখ্রবা নীংতম লান্মী অমসুং আর্ম্দ ফোর্সকী মীওইশিংদা ইকায় খুম্নবা উৎলদুনা, শ্রী রাজনাথ সিংহনা ভারতকী অমত্তা ওইবা অমসুং অপুনবগী শক্তম ঙাক-শেল্লিবা অসিদি লৈবাক্কীদমক্তা চাউথোকচবগী ৱাখল্লোন্না মখোয়গী ভেল্যুগী ময়োলদা লৈবননি হায়খ্রে। প্রধান মন্ত্রী, শ্রী নরেন্দ্র মোদীনা লুচিংবা সরকারগী অমত্তা ওইবা পান্দমদি লৈবাক্কী অপাম্বা ঙাক-শেনবনি অমসুং তুংগী মতমগী মখল খুদিংগী লান শোক্নবা ঙম্নবগীদমক্তা আর্ম্স ফোর্সতা মতমগা চুনবা খ্বাইদগী ফবা খুৎশু-খুৎলায় পীনবগীদমক্তা মরোমদোম লেপচবা ঙম্বা দিফেন্স ইকোসীস্তেম অমা শেম্বগী পায়খৎফম থোকপা থবক খুদিংমক পায়খৎলে হায়না ফোংদোকখি।

“ঐখোয়না খ্বাইদগী অহেনবা মিৎয়েং চঙলিবসিদি দিফেন্সতা আত্মানির্ভর ওইবা ঙম্বনি, মসিগী মরমদি, লৈবাক্কী তেক্ত-কায়দনবগীদমক্তা চাউরবা সেক্যুরিতী এপারেতস অমা শেমগৎপদা মসিগী মরু ওইবা য়াম্না লৈবননি। পান্দম অসি ফংবা ঙম্নবগীদমক্তা, দিফেন্স বজেতকী ৬৮%দি লৈবাক্কী সোর্স্তগী দিফেন্স ইক্বিপমেন্ত লৈনবা খাক্তুনা থমখ্রে। ঐখোয়না ইম্পোর্ত্তা মপুং ওইনা মখা পোল্লম্বদগী, হৌজিক্তি ইশাগী তঙাই ফদবসু পীবা ঙম্বগা লোয়ননা নেত এক্সপোর্তর অমা ওইবা ঙম্লে, অমসুং ‘মেক ইন ইন্দিয়া, মেক ফোর দি ৱর্ল্দ’গী পান্দমগী মতুং ইন্না, ঐখোয়গী মরী ফজনা লৈবা য়ুম্লোন্নবা লৈবাক্কী তঙাই ফদবশিংসু পীবা ঙম্লে। সরকারনা ইকুই কুইদনা পায়খৎখিবা খোঙথাং কয়ানা মরম ওইরগা, ভারতনা দিফেন্সকী পোৎলমগী এক্সপোর্ত্তা মালেমগী ওইনা মকোক থোংবা ২৫গী মনুং চল্লে। ঐখোয়গী পান্দমদি ভারতপু মালেমগী শক্তি ওইহনবনি।  মপাঙ্গল কনবা, নুংঙাই য়াইফবা, মরোমদোম লেপচবা ঙম্বা অমসুং মায় পাকপা ভারত অমগীদমক্তা ঐখোয়না মঙলান অমা মঙলিবা অসিগা লোয়ননা মসিনা ঐখোয়গী অথৌবশিংগী মফমদা ইকায় খুম্নবা উৎপগী খ্বাইদগী চুনবা থৌওং ওইগনি”, হায়না ঙাক-শেল মন্ত্রীনা হায়খি।

নীংতম্বা ফংলবা মতুংগী ভারতনা থেংনরিবা শিংনবা কয়াগী মতাংদা মশাগী ৱাফম ফোংদোক্লদুনা, শ্রী রাজনাথ সিংহনা ইং ১৯৪৮, ১৯৬২, ১৯৬৫, ১৯৭১ অমসুং ১৯৯৯দা য়েক্নবনা ফত্তবা মিৎয়েং য়েংনবা হোৎনখিবা অমসুং থৌনা ফরবা ভারত লান্মীশিংনা মখোয়গী অনীংববু অরেম্বা তাহনখিদুনা জম্মু অমসুং কশ্মির (জে. অমসুং কে.) অমসুং লদাখনা ‘লানগী মরু ওইবা থিএতর’ ওইখি হায়না ফোংদোকখি। মহাক্না ব্রিগেদিয়র উসমান অমসুং মেজর সোম্নাথ শর্মনা ইং ১৯৪৮; ইং ১৯৬২গী মেজর শৈতান সিংহগী মথৌনা; ইং ১৯৭১গী লান্দা ভারতকী পুৱারী ওইবা মায় পাকপা অমসুং কার্গিলগী থৌনা ফরবা কেপ্তেন বিক্রম বত্রা অমসুং কেপ্তেন মনোজ পান্দেনা মশাগী থৱাই থাদুনা ভারতকী অপুনবা অমসুং অমত্তা ওইবগী শক্তম ঙাকখিবা অমসুং মীয়াম্বু, মরু ওইনা নহারোলশিংবু, হৌজিক ফাওবদা লেপ্তনা ইথিল পীরিবা থৌনা ফরবা থৌওং কয়াগী মতাংদা পাউদমখি। গলৱান তম্পাক্কী থৌদোক্তা থোইদোক হেন্দোক্না থৌনা ফবগী মতৌ উৎখিবা অমসুং ভারতকী মচু অহুমগী ফিরালবু ৱাংনা অদুমক পাইহন্দুনা থমখিবা ভারত লান্মীশিংগী মফমদসু মহাক্না ইকায় খুম্নবা উৎখি।

 “ইং ১৯৬৫ অমসুং ১৯৭১গী হকথেংননা শোক্নবা লান্দা মায়থীরবা ফাওবদা, পাকিস্তান্না প্রোক্সী ৱারগী পাম্বৈ শিজিন্নখি। মখোয়না ভারতপু ‘লিশিংলক কক্তুনা ঈ থোকহন্নবা’ দিকেদ অনি হেন্না হোৎনদুনা লাকখি। অদুবু, ঐখোয়গী থৌনা ফরবা লান্মীশিংনা ভারতকী অপুনবা, অমত্তা ওইবা অমসুং মনীং তম্বদা কনামত্তনা অয়েৎপা পীবা য়ারোই হায়না হঞ্জিন-হঞ্জিন্না উত্তুনা লাকখি”, হায়না ঙাক-শেল মন্ত্রীনা হায়খি অমসুং ঐখোয়গী আর্ম্দ ফোর্সনা তুংদা থেংনরকপা শিংনবা খুদিংমক মায় পাক্না মাইয়োক্নবা ঙম্নবা শেম-শাদুনা লৈরি হায়না লৈবাক্কী মফমদা থাজবা পীখি।

কার্গিল লান মনুংদা শিংনবা কয়া অমসুং মালেমগী ওইবা প্রেসর মশিং খঙবা ঙমদনা থেংনরবসু, আর্ম্দ ফোর্সকী মীওইশিংদা পুক্নিং থৌগৎখিবা অমসুং মতিক চানা লুচিংখিবা ভারতকী হান্নগী প্রধান মন্ত্রী, শ্রী অতল বিহারী ভাজপায়বু শ্রী রাজনাথ সিংহনা থৌরম অসিদা নীংশিংখি। কার্গিল লান মায় পাকখিবা অসিবু সর্ভিস অহুমগী মরক্তা অমত্তা ওইবগী ৱাখল্লোন চেন্দুনা সরকারগা তেংবাংনদুনা লুরবা মতমদুদা লৈবাক্কী নীংতম্বা অমসুং অমত্তা ওইবগী মতৌবু ঙাক-শেনখিবগী খ্বাইদগী মরু ওইবা খুদম্নি হায়না মহাক্না পাউদমখি। “কার্গিল লান্না দিফেন্স সেক্তরদা অমত্তা ওইবা অমসুং মরোমদোম লেপচবা ঙম্বগী মতৌ লৈবগী য়াম্না লুবা তঙাই ফদববু ঐখোয়গী ইফমদা খঙহনখি। তুংগী শিংনবা কয়াগীদমক্তা শেম-শাদুনা লৈবা ঙম্নবা হায়রিবা গুনশিং ফংবা হায়বসিনা ঐখোয়না মতম চুপ্পদা হোৎনবা থৌওং ওইখি। জোইন্ত থিএতর কম্মান্দ শেমগৎপা অমসুং দিফেন্সতা মরোমদোম লেপচবা ঙম্নবা রিফোর্ম কয়া পাংথোকখিবশিং অসি মাইকৈ অসিদা থাংজিনখিবা খোঙথাংশিংনি”, হায়না মহাক্না মখা তাখি।

অতোপ্পা রাজ্যনা লৈবাক্কী অপাম্বা ঙাক্নবগীদমক্তা খোঙফম চেৎপগুম্না, জম্মু অমসুং কশ্মিরগী মীয়ামসু মান্নবা থৌওং উৎপগীদমক্তা থাগৎলদুনা মখোয়না আর্ম্দ ফোর্সতা তেংবাংখিবশিংবুসু শ্রী রাজনাথ সিংহনা অখন্ননা পনখি। জে. অমসুং কে.না মতম পুম্বদা ভারতকী তৎন-থানবা য়াদ্রবা শরুক অমা ওইদুনা লাক্লি অমসুং সরকারনা য়ুনিয়ন তেরিতোরী অসিবুসু, লৈবাক্কী অতোপ্পা রাজ্যশিংগা মান্ননা, চাউখৎ-থৌরাংগী অনৌবা থাক য়ৌহন্নবা লেপ্তনা হোৎনরি হায়খি। আর্তিকল ৩৭০বু আর্তিফিসিএল লেগেল বেরিয়র অমা হায়না কৌরদুনা, মহাক্না আর্তিকল ৩৭০ লৌথোকখিবনা জম্মু অমসুং কশ্মিরগী মীয়ামদা, মরু ওইনা নহাশিংগী মফমদা, অনৌবা থাজবা পুরক্লে অমসুং অনীংবা অপাম্বা কয়া ফংহল্লে হায়না ফোংদোকখি। ৱারেপ অসিনা মীয়ামগী য়াইফ য়ুম্বালগী অনৌবা থোঙ কয়া হাংলে অমসুং য়ুনিয়ন তেরিতোরী অসিনা খোঙজেল য়াঙনা চাউখৎ-থৌরাংদা শরুক য়ারি হায়না মহাক্না হায়খি।

পি.ও.কে. অমসুং গিলগিত-বালতিস্তানগী মতাংদা লমদমশিং অসি পাকিস্তান্না আইনগী ৱাংমদা লৌশিনখিবনি অমসুং মসিবু নীংতমহনবগী ৱারেপ অসি ভারতকী পার্লিয়ামেন্ততা অয়েৎপা লৈতনা লৌখ্রবনি হায়খি। আর্ম্দ ফোর্স্তা হৌজিক থবক তৌরিবা মীওই কয়া অমসুং পরম ভীর চক্রা ফংখ্রবা কেপ্তেন বানা সিংহ য়াওনা ভেতেরেন কয়াসু ঙসিগী থৌরমদা শরুক য়াখি।

*****