বার্মিংহাম কম্মনৱেল্থ গেমস(সি দব্লিউ জি)২০২২দা শরুক য়াগদবা ভারতকী শানরোয়শিং লমথাবগী ঙসি নিউ দিল্লিদা পাংথোকপা থৌরম অমদা য়ুথ এফেয়ার্স অমসুং স্পোর্তসকী য়ুনিয়ন মিনিস্তর শ্রী অনুরাগ থাকুর শরুক য়াখ্রে। থৌরম অদু ইন্দিয়ান ওলেম্পিক এসোসিএসন(আই ও এ)না শীনবনি।

থৌরম অদুদা শরুক য়াখিবা অতোপ্পা শক্নাইরবা মীওইশিংগী মরক্তা ভারত সরকারগী হোম এফেয়ার্স অমসুং য়াসকী রাজ্য মন্ত্রী শ্রী নিতিস প্রামানিক, স্পোর্তস ওথোরিতি ওফ ইন্দিয়াগী দিরেক্তর জেনরেল শ্রী সন্দিপ প্রধান অমসুং আই.ও.এগী এক্তিং প্রসিদেন্ত অনিল খান্না য়াওখি।

থৌরম অদুদা শরুক য়াখিবা শানরোয় ২১৫গী কাংবু অদুদা তোকিও ওলেম্পিক ২০২০দা মেদল ফংখ্রবা বাজরাং পুনিয়া, পি.আর শ্রীজেস, মানপ্রিদ সিংহ, হারমানপ্রিদ সিংহ অমসুং লবলিনা বোরগোহাইন য়াওখি। অতোপ্পা শক্নাইরবা শানরোয়শিংগী মনুংদা ওলেম্পিক্তা মেদল ফংখ্রবা সকশি মালিক, লমজেল্লোয় দুদি চান্দ অমসুং হিমা দাস, এসিয়ান বোক্সিং চেম্পিয়নসিপ গোল্দ মেদালিস্ত সিব থাবা অমসুং বোক্সর অমিত পাঙ্গাল য়াওখি।

থৌরম অদুদা শানরোয়শিংগী কিতশিংশু হাংদোকখি। আই.ও.এনা তিমগী প্রিন্সিপাল স্পোন্সর ওইনা জে.এস.দব্লিউগা পুন্না চৎমিন্নদুনা চৎথোক-চৎশিন অমসুং শানবগী মচাকশিং পুথোকখি। শানরোয়শিংগীদমক এদিদাসনা ওফিসিএল ওইনা খোঙউপ পুথোকখি অমসুং মনয়াভরনা সেরিমোনিএল কিত্তিং পার্তনর ওইখি। 

থৌরম অদুদা মিনিস্তর অনুরাগ থাকুরনা হায়খি ঐখোয়গী প্রধান মন্ত্রী শ্রী নরেন্দ্র মোদীগী পান্দম অমসুং চোকথবা নাইদনা হোৎনবদগী ঙসিদি ভারতকী শান্ন-খোৎনবা মালেমগী অৱাংবা থাক অমদা য়ৌবা ঙম্লে। হৌখিবা চহিগী ওলেম্পিক অদু ঐখোয়গী খ্বাইদগী ফজবা ওইখি অমসুং চহি খর অসিদা ঐখোয়গী মিৎমাংদা মশান্না খুদিংমক্তা ঐখোয়গী শানরোয়শিংনা ফগৎলকপা ঐখোয়না উবা ফংলে। পুৱারি ওইনা থোমাস কপ মাইপাকখিবা অসি শানরোয়শিং ফগৎলকপগী খুদম্নি।

মহাক্না মখা তানা হায়খি, গেমস অসিগী হন্দক্কী ভারতকী তিম অসি ঐখোয়গী খ্বাইফগী ফবা অমসুং মশিং য়াম্বনি অমসুং মখোয়না মেদল কয়া ফংদুনা অমুক হন্না মালেমগী থাক্তা ঐখোয়গী শানরোয়শিংনা ভারতকী মিংচৎ পুরকপা ঙমগনি হায়না ঐনা থাজবা থম্লি। ঐখোয়না মখোয়গীদমক চাউথোকচবা পোকই অমসুং মাইপাক্লবসু নত্ত্রগা মাইথিরবশু লৈবাক অসিনা মখোয়গীদমক লেপ্লি। নখোয় খুদিংমক মাইপাকপা ঙম্নবা ঐখোয়না য়াইফ-পাউজেল পীজরি।

য়ুনিয়ন মিনিস্তরনা হায়খি গেমস অসিগী স্কাদতা নুপা ১০৮ অমসুং নুপী ১০৭ য়াওদুনা নুপা-নুপী থোংমান্নবা অসিদা য়াম্না হরাওই।

আই.ও.এগী সেক্রেতরি জেনেরেল শ্রী রজিব মেহতানা হায়খি, স্কাদ অসিনা ফজনা শানগনি হায়না ঐখোয়না থাজবা থম্লি। মখোয়গী ত্রেনিং অমসুং শেম-শাবা অসি অৱাংবা থাক অমনি অমসুং বার্মিংহাম কম্মনৱেল্থ গেমস অসিদা ঐখোয়না খ্বাইদগী ফজনা শানবা ঙম্নবা স্পোর্তস মিনিস্ত্রিনা পাংথোকফম থোকপা থবক অমতা পাংথোক্তনা তোকখিদে। গেমস অসিদা য়াম্না চাউনা মাইপাকপা ঙম্নবা ঐখোয়গী শানরোয়শিং, কোচশিং অমসুং সপোর্ত স্তাফশিংদা ঐনা ঐগী য়াইফ-পাউজেল পীজরি অমসুং তৌবীমল খঙবা উৎচরি।

বার্মিংহাম গেমস অসিদা মেদল ফংলকপা শানরোয়শিংদা আই.ও.এনা পীগদবা শেনগী মনা শ্রী মেহতানা লাউথোকখি। সনাগী মেদল ফংলকপশিংদা শেন ওইনা লুপা ২০,০০,০০০ অমসুং সিলভর মেদল ফংলকপশিংদা লুপা ১০,০০,০০০ পীগনি অমসুং ব্রোঞ্জ মেদল ফংলকপশিংদা লুপা ৭,৫০,০০০ পীগনি।

মফম অদুগী ঈশিং-নুংশিৎকী ফিবমগা চুশিন্নবা ঙম্নবা ভারতকী শানরোয় খর মাংজৌন্না য়ু.কেদা লৈখ্রে। মালেমগী তোঙান-তোঙানবা মফমশিংদা ত্রেনিং নত্ত্রগা কম্পিতিসনগীদমক লৈরিবা শানরোয়শিং বার্মিংহামদা লাক্লগনি। 

চহি মরিগী মমাঙদা অস্ত্রেলিয়াগী গোল্দ কোস্তদা পাংথোকখিবা গেমস অসিদা ভারত সনাগী মেদল ২৬ য়াওনা পুন্না মেদল ৬৬ ফংদুনা অস্ত্রেলিয়া অমসুং ইংলেন্দগী মথংদা অহুমশুবদা লৈখি। অপুনবা সনাগী মেদল ২৬গী মনুংদা মেদল ২৫(চাদা ৯০)অদু বেতমিন্তন, বোক্সিং, সুতিং, তেবল তেনিস, ৱেথলিফতিং অমসুং রেস্তলিংদগী ফংখি। এথলেতিক, পেরাস্পোর্তস অমসুং ইসক্বাস অসি ভারতকী অতোপ্পা মেদল ফংবা মশান্নশিংনি।

হন্দক্কী গেমস অসিদা য়াওদ্রবা, অদুগা গোল্দ কোস্তদা পাংথোকখিবা গেমস অদুদা সনাগী মেদল ৭ য়াওনা ভারতনা সুতিংদা মেদল ১৬ ফংখি। হন্দক্কী গেমস অসিদা অহানবা ওইনা নুপীগী ক্রিকেদ য়াওরে অমসুং ভারতনা মেদল ফংবা য়াবগী খুদোংচাবা অদু উবা ফংলগনি।

বেতমিন্তন, বোক্সিং, হোক্কি, ৱেথলিফতিং অমসুং রেস্তলিংদা ভারতকী শানরোয়শিংনা হৌখিবা গেমসতগী হেন্না ফজনা শানদুনা সুতিং য়াওদবগী মাঙজবা অদু মেনখৎপা ঙমগনি।

ভারতকী সি.দব্লিউ.জি স্কাদ অসি  অদানি স্পোর্তলাইন্না প্রিন্সিপাল স্পোন্সর অমসুং জে.এস.দব্লিউ ইন্সপাইয়রনা প্রিন্সিপাল অমসুং কিত্তিং স্পোন্সর ওইরি। হরবেল লাইফনা নিউত্রিসন পার্তনর, মনয়াৱারনা সেরিমোনিএল কিত্তিং পার্তনর অমসুং এদিদাসনা ফুদৱেয়ার পার্তনর ওইরি। আইনোক্স অমসুং অমুলনা এসোসিএদ স্পোন্সরশিং, বোরোসিলনা হায়দ্রেসন পার্তনর অমসুং এস.এফ.এনা স্পোর্তস ইদ-তেক পার্তনর ওইরি।

*****